ఆలోచనలే పెట్టుబడులు!

* విద్యార్థులే సీఈవోలు
* ఇంజినీరింగ్ కళాశాలల్లో కొత్త ఆలోచనలకు పునాదులు
* ఔత్సాహిక వ్యాపారవేత్తల క్లబ్‌ల ఏర్పాటు
* 29న ప్రారంభించనున్న ఏపీ ముఖ్యమంత్రి

ఈనాడు, హైదరాబాద్: ఆంధ్రప్రదేశ్‌లో ఇంజినీరింగ్ కళాశాలలు కొత్త ఆలోచన కేంద్రాలుగా మారనున్నాయి. విద్యార్థుల ఆలోచనలే పెట్టుబడులుగా, సమూహాలే కంపెనీలుగా.. గ్రూపులోని సభ్యులే ముఖ్యకార్యనిర్వాహక అధికారి(సీఈవోలు)గా విభిన్న హోదాల్లో కనిపించనున్నారు. 'ఏపీ కొత్త ఆలోచనల విధానంలో భాగంగా ప్రభుత్వం ప్రవేశపెట్టిన స్టార్ట్అప్ విలేజి పథకంలో భాగంగా కళాశాల్లో ఔత్సాహిక పారిశ్రామికవేత్తల అభివృద్ధి క్లబ్‌లు ఏర్పాటు చేయనున్నారు. ఇంజినీరింగ్ విద్యార్థుల్ని భవిష్యత్తు పారిశ్రామికవేత్తలుగా తీర్చిదిద్దేందుకు 'స్టార్ట్అప్ బూట్‌క్యాంప్ కార్యక్రమాన్ని జనవరి 29న ముఖ్యమంత్రి నారా చంద్రబాబు నాయుడు విశాఖపట్నంలో ప్రారంభించనున్నారు.
103 కళాశాలల భాగస్వామ్యం
రాష్ట్ర ప్రభుత్వం ఇప్పటికే విశాఖపట్నంలో పైలెట్ ప్రాజెక్టు కింద స్టార్ట్అప్ విలేజీని ప్రారంభించింది. రానున్న పదేళ్లలో రాష్ట్రవ్యాప్తంగా వెయ్యి కేంద్రాలను ఏర్పాటు చేయాలని లక్ష్యంగా పెట్టుకుంది. వీటికి రూ.1000కోట్ల మూలధనాన్ని సమకూర్చడంతో పాటు ప్రైవేటు వెంచర్ కేపిటల్ సంస్థల ద్వారా పెట్టుబడులు తీసుకువచ్చేందుకు ప్రయత్నాలు ముమ్మరం చేసింది. విశాఖపట్నంలో పైలెట్ ప్రాజెక్టు కింద ఏర్పాటు చేసిన కొత్త ఆలోచనల కేంద్రంపై విద్యార్థుల్లో అవగాహన కల్పించాలని ప్రభుత్వం యూనివర్సిటీలను ఆదేశించింది. ఈ మేరకు బూట్‌క్యాంప్‌లో భాగంగా కొత్త ఆలోచనలను ప్రోత్సహించడం, విద్యార్థుల నైపుణ్యాల్లో శిక్షణ పొందడం, నూతన సాంకేతిక అంశాలపై సదస్సులు, మేధోమధన కార్యక్రమాలు, కళాశాల స్థాయిలోనే పరిశోధనల్ని ప్రోత్సహించడం, ఆ మేరకు మౌలిక సదుపాయాలు కల్పించనుంది. విద్యార్థులు, అధ్యాపకులు, స్థానిక పారిశ్రామికవేత్తగా సంయుక్తంగా కొత్త ఆలోచనలు అమలు చేస్తూ.. విద్యార్థులను పారిశ్రామిక వేత్తలుగా తీర్చిదిద్దాలని నిర్ణయించింది. ఏపీలో 103 కళాశాలల్ని ఇందులో భాగస్వామ్యం చేయనుంది. 621 మంది విద్యార్థులు, 103 మంది పర్యవేక్షకులతో సహా 721 మంది ఈ కార్యక్రమంలో పాల్గొంటారు. జేఎన్‌టీయూ అనంతపురం ప్రాంతీయ పరిధిలోని 33 కళాశాలల విద్యార్థులతో ఈనెల 23, కాకినాడ పరిధిలోని 70 కళాశాలల విద్యార్థులతో ఈనెల 25న ముందస్తు సమావేశాన్ని ఏర్పాటుచేయనున్నారు.
కళాశాలల్లో కల్పించాల్సిన సౌకర్యాలు
* పరిశోధన, శిక్షణ, కొత్త ఆలోచనల ప్రయోగశాలలు ఏర్పాటు చేయాలి. కళాశాలల్లో పుట్టిన ఆలోచనలు, ఉత్పత్తులను వాణిజ్య పరంగా తీర్చిదిద్దేందుకు వీలుగా ఏర్పాట్లు ఉండాలి.
* అధిక సామర్థ్యం కలిగిన కంప్యూటర్లు, సర్వర్లు, టెలికం, డేటా కమ్యూనికేషన్ పరికరాలు అందుబాటులో పెట్టాలి. కంప్యూటర్లు, ఇంటర్నెట్ 24 గంటలూ వినియోగించుకునే వీలు కల్పించాలి.
* సెమినార్లు, సదస్సులు, వినోదం కోసం ఏర్పాట్లు ఉండాలి. విద్యార్థుల ఆలోచనలకు, వారి ఇష్టమైన రంగాల్లో రాణించేందుకు ప్రోత్సాహం కల్పించాలి.
* విద్యార్థుల ఆలోచనలతో కూడిన ప్రచురణలు, పుస్తకాలు, ఆడియో, వీడియోలు, న్యూస్‌లెటర్లు తీసుకువచ్చేందుకు అనుమతులివ్వాలి.
* వ్యాపార, ఆర్థిక, మార్కెటింగ్, న్యాయ తదితర నిపుణులతో కూడిన పర్యవేక్షణ బృందాన్ని ఏర్పాటు చేసి, వారి సలహాలు విద్యార్థులు తీసుకునేలా ప్రోత్సహించాలి.
* బూట్‌క్యాంప్ కార్యనిర్వాహక కమిటీలో సీఈవో, సీవోవో, సీఎంవో, సీఎఫ్‌వో, సీటీవో, సీసీవో, సీఎస్‌వోలు ఉంటారు. వీరితో పాటు ఒక ఉపాధ్యక్షుడ్ని తరగతి గది నుంచి విద్యార్థులు ఎన్నుకుంటారు.

Posted on 16-1-2015

Industry      Interaction

Higher Education

Job Skills

Soft Skills

Comm. English

Mock Test

E-learning