గేట్‌కు తుది మెరుగులు

ఇంజినీరింగ్‌లో పీజీ, పీహెచ్‌డీ ప్రవేశాలకు జాతీయస్థాయిలో నిర్వహించే 'గేట్‌' (గ్రాడ్యుయేట్‌ ఆప్టిట్యూడ్‌ టెస్ట్‌ ఇన్‌ ఇంజినీరింగ్‌) వ్యవధి ఇంకా 2 వారాలు కూడా లేదు. ఈ పరీక్షలో మంచి స్కోరు తెచ్చుకోవాలంటే ఇప్పటివరకూ సాగించిన సన్నద్ధతకు వ్యూహాత్మకంగా మెరుగులు దిద్దుకోవాలి. అందుకు ఉపకరించే సూచనలు...
'గేట్‌' స్కోరును బట్టే వివిధ ఐఐటీలు, ఐఐఎస్‌సీ, ఎన్‌ఐటీలు, ఇతర విశ్వవిద్యాలయాల్లో పీహెచ్‌డీ/ ఎంఈ/ ఎంటెక్‌/ ఎంఎస్‌ కోర్సుల్లో ప్రవేశం లభిస్తుంది. అంతే కాదు- బీహెచ్‌ఈఎల్‌, ఎన్‌టీపీసీ వంటి వివిధ ప్రభుత్వరంగ సంస్థల్లో ఉద్యోగావకాశాలకూ ఈ స్కోరే ఆధారం.
ఐఐటీల్లో ఎంఈ/ ఎంటెక్‌ సీటు అంటే నాణ్యమైన సాంకేతిక విద్య మాత్రమే కాకుండా అంతర్జాతీయంగా అత్యుత్తమమైన సంస్థల్లో ఆకర్షణీయమైన వేతనాలతో ఉద్యోగాలు పొందగల సదవకాశం. ఈ బంగారు భవితను మనసులో పెట్టుకుని ప్రవేశపరీక్షకు పూర్తిస్థాయిలో సిద్ధం కావాలి.
సబ్జెక్టుల వెయిటేజీ
గేట్‌ను ఆన్‌లైన్‌లోనే నిర్వహించడం వల్ల ప్రశ్నపత్రాలను వివిధ సెట్లుగా రూపకల్పన చేస్తున్నారు. కాబట్టి అన్ని సబ్జెక్టులకూ ప్రాధాన్యం ఇస్తున్నారు. అభ్యర్థులు ఏ సబ్జెక్టునూ నిర్లక్ష్యం చేయకుండా అన్నిటిలో ప్రతి అధ్యాయాన్నీ చదవాలి.
కొన్ని అధ్యాయాలు కఠినంగా ఉంటాయి. వీటిని అర్థం చేసుకోవడానికి చాలా సమయం పడుతుంది. ఇందులో ప్రశ్నలు కూడా నాలుగైదు సంవత్సరాలకు ఒకసారి వస్తాయి. సబ్జెక్టు మీద పూర్తిగా పట్టులేనివారు వీటి కోసం ఎక్కువ సమయం కేటాయించడం ఆచరణీయం కాదు. గత ప్రశ్నపత్రాలను బట్టి దాదాపు 25% ప్రశ్నలు పునరావృతమవుతాయి. వీటి కోసం సుమారు 25 సంవత్సరాల ప్రశ్నపత్రాలను సాధన చేయడం మంచిది. 75% ప్రశ్నలు సృజనాత్మకంగా, పరిశోధనాత్మకంగా ఉంటాయి. వీటి కోసం మౌలికాంశాలు జాగ్రత్తగా అర్థం చేసుకోవాలి. గతంలో ఎన్నడూ అడగని అంశాలపై (అన్‌టాప్‌డ్‌ ఏరియాస్‌) తగిన దృష్టి సారించాలి. యూపీఎస్‌సీ నిర్వహించే ఇంజినీరింగ్‌ సర్వీసెస్‌, సివిల్‌ సర్వీసెస్‌ ప్రశ్నలు చాలావరకు గేట్‌లో అడుగుతుంటారు. కాబట్టి వీటిని గేట్‌ సిలబస్‌కు అనుగుణంగా సాధన చేయాలి.
కొన్ని ప్రశ్నలకు పూర్తి సమాచారం ఇవ్వరు. తార్కికంగా ఆలోచించి వీటికి సమాధానం రాబట్టాల్సి ఉంటుంది. ఇటువంటి ప్రశ్నలు ప్రామాణిక గ్రంథాల్లోని అభ్యాస ప్రశ్నల్లో ఉంటాయి. న్యూమరికల్‌ ప్రశ్నల సమాధానాలు సమయపాలనను దృష్టిలో పెట్టుకుని సాధన చేయాలి.
కంప్యూటర్‌ పరిజ్ఞానం
గేట్‌ను ఆన్‌లైన్‌లో నిర్వహిస్తారు. కాబట్టి తగిన రీతిలో కంప్యూటర్‌ పరిజ్ఞానం అవసరం. దీని కోసం ఆన్‌లైన్‌లో నిర్వహించే వివిధ నమూనా పరీక్షలు రాయడం మంచిది. రోజుకు కనీసం 6- 8 గంటల సంసిద్ధత అవసరం. ఇప్పటి వరకూ ఎన్నడూ చదవని కొత్త విషయాల జోలికి పోవద్దు. ఇప్పటికే తగినంత సమయం కేటాయించిన విషయాలను పునశ్చరణ చేయడం చాలా మంచిది. ప్రతిరోజూ రెండు/ మూడు సబ్జెక్టుల నుంచి ముఖ్యమైన ఫార్ములాలను, ఒక్కో ఫార్ములాకు సంబంధించి ఒక న్యూమరికల్‌ ప్రాబ్లమ్‌ను అభ్యాసం చేయాలి. క్లిష్టమైన కీలకాంశాలను మరోసారి మననం చేసుకోవాలి.
పునశ్చరణతోపాటు ఆన్‌లైన్‌లో నిర్వహించే నమూనా పరీక్షలు రాయడం చాలా ముఖ్యం. దీని వల్ల సమగ్ర అవగాహన లేని విషయాలను పునశ్చరణ చేసుకోవచ్చు. ఉత్సాహంగా చదివే- ఎనర్జీ లెవల్స్‌కు అనుగుణంగా కఠినమైన సబ్జెక్టులు, సంబంధిత సబ్జెక్టులనూ సాధన చేయాలి. క్రమం తప్పకుండా రోజూ కనీసం అరగంట యోగా/ ధ్యానం/ చిన్నపాటి వ్యాయామం చేస్తే ఒత్తిడికి దూరం కావచ్చు.
న్యూమరికల్‌ ప్రాధాన్యం:గేట్‌- 2014 ప్రశ్నపత్రాల ప్రకారం వివిధ బ్రాంచీల్లో న్యూమరికల్‌ సమాధాన ప్రశ్నలకు వెయిటేజీ: ఎలక్ట్రానిక్స్‌ &కమ్యూనికేషన్‌: 46/100, కంప్యూటర్‌ సైన్స్‌: 43/100, మెకానికల్‌ ఇంజినీరింగ్‌: 45/100, ఎలక్ట్రికల్‌ ఇంజినీరింగ్‌: 37/100, సివిల్‌ ఇంజినీరింగ్‌: 37/100, ఇన్‌స్ట్రుమెంటేషన్‌ ఇంజినీరింగ్‌: 49/100, ప్రొడక్షన్‌ ఇంజినీరింగ్‌: 40/100
కాబట్టి న్యూమరికల్‌ ప్రశ్నలను అశ్రద్ధ చేయడకూడదు. Consistency of units చాలా ముఖ్యం. చిత్తు కాగితంపై తగిన రీతిలో స్టెప్స్‌ రాసుకోవడం మంచిది. సమాధానం రాని పక్షాన వీటిని పరిశీలించుకునే అవకాశం దొరుకుతుంది.
బహుళైచ్ఛిక ప్రశ్నల విషయంలో ఒక ఫార్ములానీ, మౌలికాంశాన్నీ విద్యార్థి ఎన్ని విధాల తప్పు చేయవచ్చో, ఎన్ని రకాల సమాధానాలు వస్తాయో ముందుగానే పేపర్‌ తయారు చేసేవారు వూహించి తదనుగుణంగా ఆప్షన్లు ఇస్తారు. వచ్చిన సమాధానం కనపడగానే వెంటనే గుర్తించవద్దు. ఒక్క క్షణం మిగతా ఆప్షన్లు కూడా పరిశీలించి చూడాలి.
సమగ్రమైన అభ్యాసం
నమూనా పరీక్షలు రాస్తున్నపుడే తగిన మెలకువలు అలవాటు చేసుకోవాలి. పరీక్షలో సాధారణంగా మొదటి ప్రశ్నలు కొంత కఠినంగా ఉంటాయి. కాబట్టి ఆందోళనకు గురి కాకూడదు. మొత్తం పేపర్‌ కఠినంగా అనిపించినప్పటికీ కంగారు అనవసరం. గేట్‌ స్కోర్‌ కేవలం సహ అభ్యర్థుల సాపేక్ష ప్రతిభపై ఆధారపడి ఉంటుంది.
గేట్‌ 2014లో ఎలక్ట్రానిక్స్‌, ఎలక్ట్రికల్‌, ఇన్‌స్ట్రుమెంటేషన్‌ విభాగాల్లో మొత్తం 100 మార్కులకు 50- 60 మార్కులు సాధించినవారు కూడా ఉత్తమ ర్యాంకులను సాధించారు. మంచి సంస్థల్లో ప్రవేశం పొందారు. గ్రూప్‌-1లోని ఒక మార్కు ప్రశ్నలను త్వరగా చేయాలి. చాలావరకు ఈ విభాగంలో థియరీకి సంబంధించిన మౌలికాంశాలపై ప్రశ్నలు వస్తాయి.
రుణాత్మక మార్కులతో జాగ్రత్త: తప్పు సమాధానాలు రాస్తే, ఒక మార్కు ప్రశ్నలకు 1/3 మార్కులు, రెండు మార్కుల ప్రశ్నలకు 2/3 మార్కులు తగ్గిస్తారు. కాబట్టి ప్రశ్నలకు సమాధానాలు గుర్తించేటపడు అంచనా (గెస్‌) చేసి గుర్తించడం వల్ల ఒక్కోసారి నష్టం జరుగుతుంది. అలాగే న్యూమరికల్‌ ప్రశ్నల విషయానికొస్తే వీటికి ఆప్షన్లుండవు. సరైన సమాధానాన్ని మౌస్‌, వర్చువల్‌ కీ ప్యాడ్‌ ఉపయోగించి సమాధానం మార్క్‌ చేయాలి. వీటికి రుణాత్మక మార్కులు ఉండవు. ఇప్పటివరకూ ఎన్నడూ చదవని కొత్త విషయాల జోలికి పోవద్దు. క్లిష్టమైన కీలకాంశాలను మరోసారి మననం చేసుకోవాలి.


Posted on 19-1-2015

Industry      Interaction

Higher Education

Job Skills

Soft Skills

Comm. English

Mock Test

E-learning