'ఐటీ'లో అగ్రగామిగా హైదరాబాద్

* నూతన ఆవిష్కరణల వేదిక 'టి' హబ్
* నగరంలో దేశంలోనే అతిపెద్ద ఇంక్యుబేటర్
* తెలంగాణ ఐటీ మంత్రి కేటీఆర్ వెల్లడి
* ఐఐఐటీ ఆవరణలో టి-హబ్‌కు శంకుస్థాపన

ఈనాడు, హైదరాబాద్: సమాచార సాంకేతిక (ఇన్ఫర్మేషన్ టెక్నాలజీ-ఐటి) రంగంలో పెట్టుబడులకు హైదరాబాద్‌ను దేశంలోనే అత్యంత అనువైన నగరంగా తీర్చిదిద్దుతామని తెలంగాణ రాష్ట్ర పంచాయతీరాజ్, ఐటీ శాఖ మంత్రి కె.తారకరామారావు తెలిపారు. ఐఐఐటీ ఆవరణలో టి-హబ్‌కు జనవరి 23న ఆయన శంకుస్థాపన చేశారు. ఈ సందర్భంగా మంత్రి మాట్లాడుతూ టి-హబ్ దేశంలోనే అతిపెద్ద ఇంక్యుబేటర్ అవుతుందన్నారు. కొత్త ఆలోచనలతో ముందుకు వచ్చే ఔత్సాహికులకు టి-హబ్ ఉపయోగపడుతుందని చెప్పారు. ఐటీ రంగంలో ఆలోచనల దశలోని వారికి, ఆలోచనలను కార్యరూపంలోకి తీసుకొనిరావాలనుకొనే వారికి, ఉత్పాదనలను మార్కెట్‌లోకి తీసుకెళ్లడానికి సిద్ధంగా ఉన్న కంపెనీలకు టి-హబ్ చక్కటి వేదిక అవుతుందన్నారు. నిర్వచించు (డిఫైన్), రూపరచన చేయు (డిజైన్), అందజేయు (డెలివరీ) అనే వాటికి కార్యరూపం ఇవ్వడానికే టి-హబ్ అని వివరించారు. అత్యధికంగా దాదాపు 60 శాతం ఉద్యోగాలు కల్పించినవి చిన్న కంపెనీలే అని పేర్కొంటూ వీటి వైపే ప్రపంచం చూస్తోందన్నారు. చిన్న కంపెనీల ఏర్పాటుకు సహకరిస్తామన్నారు. ఇప్పటికే ఐఐఐటీ, ఐఎస్‌బీ, నల్సార్‌లలో ఉన్న ఆలోచన జనని కేంద్రాలు (ఇంక్యుబేటర్లు) టి-హబ్‌లో భాగమవుతాయని, దీంతో ఇది ఇంక్యుబేటర్లకే ఇంక్యుబేటర్‌గా నిలుస్తుందన్నారు. ఇప్పటికే ఐఐఐటీలో అయిదు స్టార్టప్‌లు ఏర్పాటయ్యాయని వెల్లడించారు. ఆలోచనలను ఉత్పాదన వరకూ తీసుకురావడమే టి-హబ్ లక్ష్యమన్నారు. టి-హబ్‌కు అనుబంధంగా ప్రభుత్వం, వివిధ సంస్థలు కలసి సుమారు రూ.300 కోట్లతో నూతన కార్యక్రమాలలో పెట్టే పెట్టుబడి నిధి(వెంచర్ క్యాపిటల్ ఫండ్)ని ఏర్పాటు చేస్తుందన్నారు. దీని ద్వారా ఔత్సాహికులకు అవసరమైన ఆర్థిక తోడ్పాటు అందించడం సాధ్యమవుతుందని తెలిపారు. గూగుల్, ఫేస్‌బుక్, వాట్సప్‌లాంటి సరికొత్త ఆలోచనల ఆవిష్కరణలు టి-హబ్ నుంచి రావాలని ఆకాంక్షించారు.
మూడు సంస్థల భాగస్వామ్యంతో టి-హబ్
టి-హబ్ మొదటి దశకు రూ.35 కోట్లను తెలంగాణ ప్రభుత్వం వ్యయం చేస్తోందని, దీంతో ఐఐఐటీ ఆవరణలో 60వేల చదరపు అడుగుల భవనం అందుబాటులోకి వస్తుందని మంత్రి కేటీఆర్ తెలిపారు. జూన్ రెండో కంటే ముందే టి-హబ్ మొదటి దశను పూర్తి చేసి అందుబాటులోకి తెస్తామన్నారు. టి-హబ్‌ను తెలంగాణ ప్రభుత్వం, ఐఎస్‌బీ, ఐఐఐటీ, నల్సార్‌లు భాగస్వామ్యంతో ఏర్పాటు చేస్తోందన్నారు. ఈ మూడు సంస్థలు పూర్తి స్థాయిలో క్రియాశీలక పాత్ర పోషిస్తున్నాయన్నారు. 2018 ఫిబ్రవరిలో జరిగే ప్రపంచ ఐటీ కాంగ్రెస్ నాటికి మూడు లక్షల చదరపు అడుగుల విస్తీర్ణంలో టి-హబ్ రెండో దశను అందుబాటులో తీసుకొస్తామన్నారు. రాయదుర్గంలో నిర్మించే ఈ భవనానికి రూ.200 కోట్లు వ్యయమవుతుందని వివరించారు. దీనికి కేంద్రం సాయాన్నీ కోరామని, కేంద్ర మంత్రి సుజనాచౌదరితో మాట్లాడామని తెలిపారు.

Posted on 24-1-2015

Industry      Interaction

Higher Education

Job Skills

Soft Skills

Comm. English

Mock Test

E-learning