Ask the Expert
|
Feedback
|
About us
|
Contact us
|
Pratibha Home

Eamcet - News

ఏప్రిల్‌ 3 నుంచి ఆన్‌లైన్‌ పరీక్షకు మారే వీలు

* ఏపీ విద్యార్థులు పరీక్షా కేంద్రాలు మార్చుకోవచ్చు
ఈనాడు, హైదరాబాద్‌: తెలంగాణ ఎంసెట్‌ మెడికల్‌ విభాగం పరీక్షను రాత పరీక్షతోపాటు ఆన్‌లైన్‌లోనూ నిర్వహించనున్న నేపథ్యంలో ఏప్రిల్‌ 3 నుంచి 13 వరకు ఆప్షన్లు ఇచ్చుకోవాల్సి ఉంటుంది. కేవలం ఆన్‌లైన్‌ పరీక్షకు వెళ్లాలన్న వాళ్లే ఆప్షన్లు ఎంచుకోవాలని ఎంసెట్‌ కన్వీనర్‌ ఆచార్య ఎన్‌వీ రమణారావు తెలిపారు. ఆన్‌లైన్‌ పరీక్షను కేవలం హైదరాబాద్‌, వరంగల్‌ల్లో మాత్రమే నిర్వహిస్తారు. 25వేల మందికి మాత్రం అవకాశం ఉంటుంది. అంటే మొదటి 25వేల మందికే ఆన్‌లైన్‌లో పరీక్ష రాయడానికి వీలవుతుంది. అయితే ఆప్షన్‌ ఇస్తే ఆన్‌లైన్‌కు ఎంతమంది ఆసక్తి చూపుతారన్న దానిపై అధికారుల్లోనూ చర్చ సాగుతోంది. ఏప్రిల్‌ 3-13 వరకు ఏపీ విద్యార్థులు పరీక్షా కేంద్రాలను మార్చుకోవచ్చు. మొదట్లో ఏపీలో కేంద్రాలు ప్రకటించనందున పలువురు ఏపీ విద్యార్థులు తెలంగాణలోని కేంద్రాలను ఎంచుకున్నారు. ప్రస్తుతం విశాఖపట్నం, విజయవాడ, తిరుపతి, కర్నూలుల్లో పరీక్షాకేంద్రాలు ఏర్పాటు చేసిన విషయం తెలిసిందే.
వెబ్‌సైట్లో పాత ప్రశ్నాపత్రాలు: జేఈఈ మెయిన్‌, అడ్వాన్సుడ్‌ పరీక్షలకు సంబంధించి పాత ప్రశ్నాపత్రాలను ఆయా నిర్వాహక సంస్థలు వెబ్‌సైట్లో ఉంచుతున్నాయి. ఎంసెట్‌లో మాత్రం అది పాటించట్లేదు. మార్కెట్లో పుస్తకాలు కొనుగోలు చేయాల్సిందే. ఇలాంటి పరిస్థితిలో పాత ప్రశ్నాపత్రాలను త్వరలో వెబ్‌సైట్లో ఉంచనున్నారు. వాటిని అభ్యర్థులు డౌన్‌లోడ్‌ చేసుకొని సాధన చేసుకోవచ్చని కన్వీనర్‌ రమణారావు చెప్పారు.

published on 25.03.2016