తాజా స‌మాచారం

ఉద్యోగాల భర్తీపై ఉత్కంఠ!

* ఏపీపీఎస్సీకి కంటకంగా రూల్-7
* 2003 ప్రకటన పోస్టుల భర్తీ బాధ్యత
* 2011 గ్రూపు-1పై ప్రభావం

ఈనాడు, హైదరాబాద్: ఆంధ్రప్రదేశ్ పబ్లిక్ సర్వీస్ కమిషన్ అధికారులకు నియమావళిలోని రూల్-7 కంటకంగా మారింది. ఉద్యోగాలకు ఎంపికైన వారు విధుల్లో చేరకుండా ఉంటే అనుసరించే విధానంలో రూల్-6, రూల్-7 కింద పేర్కొన్న నిబంధనలు పరస్పర విరుద్ధంగా ఉన్నాయి.
* ఉద్యోగాలకు ఎంపికైన వారు విధుల్లో చేరకుండా ఉంటే ఆ పోస్టులను తర్వాత నోటిఫికేషన్‌లో ప్రకటించాలని రూల్-6 కింద పేర్కొన్నారు.
* ఉద్యోగాలకు ఎంపికైన వారు విధుల్లో చేరనట్లు నిర్థారణ అయితే ప్రాధాన్య క్రమంలో ఉన్న అభ్యర్థులను ఎంపిక చేయాలని రూల్-7 కింద నిర్దేశించారు.
రూల్-6ను అనుసరించే ఏపీపీఎస్సీ కార్యకలాపాలు నిర్వహిస్తోంది. 2003 గ్రూపు-1 నోటిఫికేషన్ ద్వారా అభ్యర్థులు చేరకుండా ఖాళీగా ఉన్న పోస్టుల్ని రూల్-7ను అనుసరించి ప్రాధాన్య క్రమంలో భర్తీ చేయాలని అభ్యర్థులు సుప్రీంకోర్టును ఆశ్రయించారు. తీర్పు వారికి అనుకూలంగా వచ్చింది. అభ్యర్థులు చేరక ఖాళీగా ఉన్న 2003నాటి పోస్టులను రూల్-7ను అనుసరించి ప్రస్తుతం భర్తీ చేయాల్సి వస్తోంది. ఉమ్మడి ఆంధ్రప్రదేశ్‌లో ఇది జరిగినందున ఇందుకు సంబంధించిన చర్యలు ఏపీతోపాటు తెలంగాణ పబ్లిక్ సర్వీస్ కమిషన్ చేపట్టాల్సి ఉంది.
* 2003 తర్వాత 2009లో గ్రూపు-1 నోటిఫికేషన్ వెలువడింది. ఈ ప్రకటనలో రూల్-6ను కానీ, రూల్-7ను కానీ అమలు చేయలేదు. ప్రభుత్వం అందజేసిన ఖాళీల భర్తీ కోసమే ఏపీపీఎస్సీ 2009 నాటి ప్రకటన జారీచేసింది.
2011 గ్రూపు-1 నోటిఫికేషన్‌పై ప్రభావం
మరోవైపు 2003లో అభ్యర్థులు చేరక మిగిలిన సుమారు 30 పోస్టుల్ని 2011 గ్రూపు-1 నోటిఫికేషన్‌లో కలిపారు. వీటిల్లో అధిక శాతం ఎంపీడీఓ ఉద్యోగాలు. ఈ పోస్టులకు ఎంపికైన వారి తర్వాత ప్రాధాన్యక్రమంలో ఉన్న వారితో ప్రస్తుతం భర్తీ చేయాలని సుప్రీంకోర్టు ఏపీపీఎస్సీని ఆదేశించింది. దీనికి సంబంధించి చర్యలను తీసుకోవాలంటే 2011 గ్రూపు-1 నోటిఫికేషన్‌లో కలిపేసిన పోస్టులను తగ్గించాల్సి రావడం గమనార్హం. రాష్ట్ర విభజన జరిగినందున ఆంధ్రప్రదేశ్ వరకు వీటి సంఖ్య 30 వరకు ఉంటుందని అంచనా.
దీనివల్ల 2011 గ్రూపు-1 నోటిఫికేషన్‌లో పేర్కొన్న పోస్టులు రెండు రాష్ట్రాల్లోనూ తగ్గుతాయి. ఈ నోటిఫికేషన్ అనుసరించి సుప్రీంకోర్టు ఆదేశాలతో తిరిగి మెయిన్స్‌ను రెండు కమిషన్లు నిర్వహించనున్నాయి. పోస్టులు తగ్గిపోతున్నందున ప్రతి ఒక్క పోస్టుకు 50 మందికి బదులు 70కి పైనే మెయిన్స్ రాసే అవకాశాన్ని కల్పించాల్సిన అవసరం ఉందని భావిస్తున్నామని ఏపీపీఎస్సీ అధ్యక్షుడు ప్రొఫెసర్ ఉదయ్‌భాస్కర్ తెలిపారు.
రూల్-6 అనుసరణీయం
ఎంపికైనప్పటికీ ఉద్యోగాల్లో చేరకుండా ఉంటే ఆ పోస్టుల్ని రూల్-6 అనుసరించి తదుపరి నోటిఫికేషన్‌లో కలిపితే బాగుంటుందని భావిస్తున్నామని ఏపీపీఎస్సీ అధ్యక్షుడు ఉదయ్‌భాస్కర్ చెప్పారు. కొత్త నోటిఫికేషన్లకు ఇబ్బందులు తలెత్తకుండా ఉండేలా రూల్-7ను రద్దు చేయాలని ప్రభుత్వాన్ని కోరామన్నారు. సుప్రీంకోర్టు నోటిఫికేషన్ ప్రకారం 2003 గ్రూపు-1 నోటిఫికేషన్‌కు మాత్రం రూల్-7ను వర్తింపజేస్తామన్నారు.
ఆ అభ్యర్థులకు నష్టం!
రూల్-7ను రద్దు చేస్తే ప్రతిభపరంగా ముందు వరుసలో ఉన్న అభ్యర్థులు నష్టపోతారు. ఉద్యోగాల్లో చేరని వారు లేనప్పుడు ప్రాధాన్య క్రమంలో కింది వరుసలో ఉన్న వారికి అవకాశాన్నిస్తే ప్రయోజనం పొందుతారు. ఈ విధానం అమలుచేయాలంటే ప్రతి పోస్టు భర్తీ వరకు తదనుగుణంగా చర్యలు తీసుకోవాల్సి వస్తుందని ఏపీపీఎస్సీ వర్గాలు పేర్కొన్నాయి. ఇదో ప్రహసనమవుతుందని వ్యాఖ్యానించాయి. పలు సందర్భాల్లో ఈ పోస్టులు భర్తీ కాకుండా ఉండే అవకాశాలూ ఉన్నాయని తెలిపాయి. ఈ నేపథ్యంలో ప్రతి ఏడాది క్యాలెండర్ విధానం ద్వారా పోస్టులను భర్తీ చేసేందుకు చర్యలు తీసుకుంటున్నందున రూల్-6ను అనుసరిస్తే సరిపోతుందని వెల్లడించాయి.

Posted on 09-07-2016