తాజా స‌మాచారం

ఎవరికి వారే నిర్వహించుకోండి

* 2011 పాఠ్యప్రణాళిక ప్రకారమే గ్రూప్-1 మెయిన్స్
* తెలుగు రాష్ట్రాలకు సుప్రీంకోర్టు ఆదేశాలు

ఈనాడు, దిల్లీ: ఉమ్మడి ఆంధ్రప్రదేశ్ రాష్ట్రంలో 2011లో నిర్వహించిన గ్రూప్-1 పరీక్షకు సంబంధించిన కేసులో సుప్రీంకోర్టు సంచలన తీర్పు వెలువరించింది. గ్రూప్-1 మెయిన్స్ పరీక్షను 2011 నోటిఫికేషన్‌లో పేర్కొన్న పాఠ్యప్రణాళిక ప్రకారం తెలంగాణ, ఆంధ్రప్రదేశ్‌లు విడివిడిగా నిర్వహించాలని ఆదేశాలిచ్చింది. ప్రక్రియ మూడు నెలల్లో పూర్తిచేయాలని స్పష్టంచేసింది. రాష్ట్ర విభజన నేపథ్యంలో కొత్త సిలబస్‌తో తామే పరీక్షలు నిర్వహించుకుంటామని ఏపీపీఎస్సీ, టీఎస్‌పీఎస్సీల తరఫున దుష్యంత్ దవే, గిరి, వీవీఎస్ రావు వాదనలు వినిపించారు. వాటితో విభేదించిన జస్టిస్ జాస్తి చలమేశ్వర్, జస్టిస్ అభయ్ మనోహర్ సప్రేలతో కూడిన ధర్మాసనం పాత సిలబస్ ప్రకారమే గ్రూప్-1 మెయిన్స్ నిర్వహించాలని స్పష్టంచేసింది. 2011లో మౌఖిక పరీక్షకు హాజరైన తమకు మినహాయింపునిస్తూ ఫలితాలు ప్రకటించాలన్న అభ్యర్థుల వినతిని తోసిపుచ్చింది.
2011లో ఏపీపీఎస్సీ 312 ఖాళీల భర్తీకి గ్రూప్-1 పరీక్ష నిర్వహించింది. 16,782 మంది అభ్యర్థులు మెయిన్స్‌కు అర్హత సాధించారు. 606 మంది మౌఖికపరీక్ష పూర్తిచేశారు. ఈ సమయంలో ప్రిలిమ్స్ ప్రశ్నపత్రంలో ఆరు ప్రశ్నల్లో తప్పులు దొర్లాయంటూ కొందరు అభ్యర్థులు సుప్రీంకోర్టుని ఆశ్రయించారు. వాదనలు విన్న ధర్మాసనం.. మెయిన్స్‌కు అర్హత సాధించిన అభ్యర్థులకు మళ్లీ పరీక్ష నిర్వహించాలని 2013లో ఆదేశాలిచ్చింది. కోర్టు ఆదేశాలు పాటించలేదంటూ చిమట శ్రీనివాస్ అనే అభ్యర్థి కోర్టు ధిక్కరణ పిటిషన్ దాఖలుచేశారు. ఇంటర్వ్యూలకు హాజరైన కోటేశ్వర్‌రావు, శైలజలు తమను మినహాయించాలంటూ ఇంటెరిమ్ పిటిషన్ వేశారు. బుధవారం సుదీర్ఘ వాదనల అనంతరం ధర్మాసనం పైవిధంగా తీర్పు చెప్పింది.

Posted on 30-06-2016