close

తాజా స‌మాచారం

ఏపీ గ్రూప్‌-1 ప్రిలిమ్స్‌ ఫలితాల విడుదల

* ప్రధాన పరీక్షకు 1 : 50 నిష్పత్తిలో అభ్యర్థుల ఎంపిక
ఈనాడు డిజిటల్‌, అమరావతి: గ్రూప్‌-1 ప్రిలిమ్స్‌ ఫలితాలను ఏపీపీఎస్సీ న‌వంబ‌రు 1న‌ రాత్రి పొద్దుపోయిన తర్వాత ప్రకటించింది. ఏపీ హైకోర్టు ఇచ్చే తుది తీర్పునకు లోబడి ఫలితాలుంటాయని తెలిపింది. ప్రిలిమ్స్‌ పరీక్షను 240 మార్కులకు నిర్వహించగా 90.42 కటాఫ్‌గా నిర్ణయించింది. ప్రధాన పరీక్షలను ఈ ఏడాది డిసెంబర్‌ 12 నుంచి 23 వరకు నిర్వహించనున్నారు. ప్రిలిమ్స్‌ నుంచి ప్రధాన పరీక్షకు 8,351 మంది అర్హత సాధించారు. మొదటిపేపర్‌లో బుక్‌లెట్‌ సిరీస్‌ నంబర్‌ వేయనందున, టాంపరింగ్‌, ఇతర తప్పిదాలు చేసినందుకు 237 పేపర్లను మూల్యాంకనం చేయలేదు. పేపర్‌-2లో 300 పేపర్లనూ మూల్యాంకనం చేయలేదు. ప్రధాన పరీక్షకు 1 : 50 నిష్పత్తిలో అభ్యర్థులను ఎంపికచేశారు. కేటగిరీల వారీగా 1 : 12 లేదా 1 : 15 నిష్పత్తిలో అభ్యర్థులను ఎంపిక చేయాలని కమిషన్‌ భావించినా, అభ్యర్థుల విజ్ఞప్తితో 1 : 50 నిష్పత్తి తీసుకుంది.

Posted on 02.11.2019