close

తాజా స‌మాచారం

20న‌ ఏపీపీఎస్సీ కీలక భేటీ

* కొన్ని ఉద్యోగ ప్రకటనల జారీపై స్పష్టత
ఈనాడు, అమరావతి: ఆంధ్రప్రదేశ్‌ పబ్లిక్‌ సర్వీస్‌ కమిషన్‌ (ఏపీపీఎస్సీ) కీలక సమావేశం డిసెంబ‌రు 20న‌ విజయవాడలో జరుగనుంది. ముఖ్యంగా గ్రూపు-1, గ్రూపు-2, గ్రూపు-3, ఇతర ఉద్యోగ ప్రకటనల జారీ, ప్రభుత్వ శాఖల నుంచి రావాల్సిన అదనపు సమాచారంలో పురోగతి గురించి ఈ సమావేశంలో సభ్యులు చర్చించనున్నారు. గ్రూపు-2 ఎగ్జిక్యూటివ్‌ పోస్టులను గ్రూపు-1లో ‘1బి’ కింద గుర్తించాలని ఉమ్మడి ఆంధ్రప్రదేశ్‌లో నిర్ణయించారు. దీనిపై అభ్యర్థుల నుంచి వ్యతిరేకత వ్యక్తం కావడంతో పాత పద్ధతిలోనే నియామకాలు జరిపారు. ఇదే విధానాన్ని త్వరలో జారీ చేయనున్న ఉద్యోగ ప్రకటనల జారీకి వర్తింప చేయాలా? వద్దా? అన్న దానిపై రాష్ట్ర ప్రభుత్వ అభిప్రాయాన్ని కమిషన్‌ కోరగా లిఖిత పూర్వకంగా సమాధానం రాలేదు. పాత పద్ధతిలోనే జరపాలని సచివాలయం నుంచి సంకేతాలు అందినా అధికారిక సమాచారం లేకుండా ఉద్యోగ ప్రకటనల జారీపై నిర్ణయాన్ని తీసుకోలేమని సంబంధిత వర్గాలు తెలిపాయి. గతంలో భర్తీ కాకుండా మిగిలిన ఉద్యోగ ఖాళీలు (క్యారీ ఫార్వర్డ్‌) రానున్న ఉద్యోగ ప్రకటనల్లో కలిపే విషయంపైనా ఈ సమావేశంలో చర్చించనున్నారు. ప్రభుత్వం ఆమోదం తెలిపిన మేరకు ఈ నెలాఖరు నాటికి ఉద్యోగ ప్రకటనల జారీ ప్రక్రియ పూర్తి చేస్తామని కమిషన్‌ వర్గాలు వెల్లడించాయి.
వయో పరిమితిని 44 ఏళ్లకు పెంచరూ..
వయో పరిమితి పెంపు 42 నుంచి 44 ఏళ్లకు పెంచాలని కొందరు అభ్యర్థులు ప్రభుత్వాన్ని అర్థిస్తున్నారు. తెలంగాణలో వయో పరిమితిని 44 ఏళ్లకు పెంచడాన్ని వీరు గుర్తు చేస్తున్నారు. 2011 గ్రూపు-1 ఉద్యోగ నియామకాల్లో నెలకొన్న గందరగోళంతో వెనుకబడిన అభ్యర్థులు వయోపరిమితి పెంచకపోతే నష్టపోతామని ఆవేదన వ్యక్తం చేస్తున్నారు.

Posted on 20.12.2018