close

తాజా స‌మాచారం

ఏపీలో 1051 కొలువుల కబురు

* గ్రూప్‌-3 ఉద్యోగాలకు ప్రకటన జారీ
* వచ్చే వారం మరిన్ని నోటిఫికేషన్లు

ఈనాడు, అమరావతి: నిరుద్యోగులకు తీపి కబురు అందిస్తూ గ్రూప్‌-3 (పంచాయతీ కార్యదర్శి- గ్రేడ్‌-4) ఉద్యోగాల ప్రకటన వెలువడింది. ఆర్థికశాఖ అనుమతించిన 1000 పంచాయతీ కార్యదర్శుల పోస్టులతోపాటు అదనంగా 51 (గతంలో భర్తీకాకుండా ఉన్న పోస్టులు) భర్తీ చేసేందుకు డిసెంబ‌రు 21న‌ ఏపీపీఎస్సీ నోటిఫికేషన్‌ జారీ చేసింది. దీంతోపాటు మహిళా శిశు సంక్షేమశాఖకు చెందిన ఎక్స్‌టెన్షన్‌ ఆఫీసర్‌ గ్రేడ్‌-1 ఉద్యోగ నియామకాల ప్రకటనా విడుదలైంది. కమిషన్‌ ఛైర్మన్‌ ఉదయ భాస్కర్‌ వివరాలను వెల్లడించారు
* గ్రూప్‌-3 మొత్తం పోస్టులు: 1051
* దరఖాస్తుల స్వీకరణ ప్రారంభం: డిసెంబ‌రు 27
* దరఖాస్తుకు తుది గడువు: జనవరి 19
* ప్రాథమిక పరీక్ష జరిగే తేదీ: ఏప్రిల్‌ 21
* ఆన్‌లైన్‌లో ప్రధాన పరీక్ష తేదీ: ఆగస్టు 2
మహిళా శిశు సంక్షేమశాఖలో ఎక్స్‌టెన్షన్‌
ఆఫీసర్‌-గ్రేడ్‌-1 పోస్టులు: 109
దరఖాస్తుల స్వీకరణ: డిసెంబ‌రు 28 నుంచి
దరఖాస్తుకు తుది గడువు: జనవరి 18
ప్రాథమిక పరీక్ష తేదీ: తరువాత ప్రకటిస్తారు
ప్రధాన పరీక్ష తేదీ: ఏప్రిల్‌ 25
ఈ నోటిఫికేషన్లు సిద్ధం
అసిస్టెంట్‌ ఎలక్ట్రికల్‌ ఇన్‌స్పెక్టర్‌, అసిస్టెంట్‌ కమిషనరు (దేవాదాయ), ఇన్‌స్పెక్టర్‌ ఆఫ్‌ బాయిలర్స్‌ పోస్టుల భర్తీ ప్రకటనలూ సిద్ధంగా ఉన్నాయి.
పూర్వ పద్ధతిలోనే గ్రూప్‌-1, గ్రూప్‌-2 భర్తీ
గ్రూప్‌-1, గ్రూప్‌-2 ఉద్యోగాల భర్తీ ప్రక్రియపై ఉత్కంఠ వీడింది. 2012లో నిర్ణయించిన ప్రకారం గ్రూప్‌-2 కింద గుర్తించిన ఎగ్జిక్యూటివ్‌ పోస్టులను గ్రూప్‌-1 పోస్టుల్లో 1బి కింద భర్తీ చేయాల్సి ఉంది. దీనిని అభ్యర్థులు వ్యతిరేకించడంతో ప్రభుత్వ నిర్ణయాన్ని అనుసరించి పూర్వ పద్ధతిలోనే గ్రూప్‌-1, గ్రూప్‌-2 ఉద్యోగాలను (2016) విడివిడిగా భర్తీ చేశారు. ఈ నిర్ణయాన్ని 2016 నోటిఫికేషన్లకే వర్తించేలా అప్పట్లో నిర్ణయం తీసుకున్నారు. ఈ క్రమంలో కొత్తగా భర్తీ చేయనున్న గ్రూప్‌-1, గ్రూప్‌-2 ఉద్యోగాల భర్తీపై ప్రభుత్వ నిర్ణయాన్ని కమిషన్‌ కోరింది. పరిశీలన జరిపిన ప్రభుత్వం పూర్వ పద్ధతిలోనే విడివిడిగా భర్తీ చేయాలని శుక్రవారం రాత్రి ఉత్తర్వులు జారీ చేసిందని కమిషన్‌ సభ్యుడు రంగ జనార్దన వెల్లడించారు. వచ్చేవారం గ్రూప్‌-1, 2, ఇతర ఉద్యోగ నియామకాల ప్రకటనలు జారీ చేస్తామని పేర్కొన్నారు.
జిల్లాల వారీగా గ్రూప్‌-3 పోస్టులు
* శ్రీకాకుళం: 114
* విజయనగరం: 120
* విశాఖపట్నం: 107
* తూర్పుగోదావరి: 104
* పశ్చిమగోదావరి: 25
* కృష్ణా: 22
* గుంటూరు: 50
* ప్రకాశం: 172
* నెల్లూరు: 63
* చిత్తూరు: 141
* అనంతపురం: 41
* కర్నూలు: 90
* కడప: 2 (క్యారీ ఫార్వర్డ్‌)

Posted on 22.12.2018