Ask the Expert
|
Feedback
|
About us
|
Contact us
|
Pratibha Home


ఆర్థిక రంగం

‘కేటు’ బ్యాంకులకు ప్రై‘వేటు’ మందు!

* బ్యాంకులకు ఎన్నో ఏళ్లుగా నిధులు సమకూర్చుతున్న కేంద్రం

ఇష్టానుసారం ఎడాపెడా అప్పులిచ్చి.. అవి తిరిగిరాక నష్టాల పాలవుతున్న ప్రభుత్వ రంగ బ్యాంకులు ప్రతిసారీ సహాయం కోసం కేంద్ర ప్రభుత్వం వైపు చూస్తున్నాయి. వేరే దారి లేక, అలా చూస్తూ ఊరుకోలేక.. ప్రజల నుంచి పన్నుల రూపంలో వసూలు చేసిన సొమ్ము నుంచి ప్రభుత్వం బ్యాంకులకు మళ్లీ మూలధనాన్ని సమకూర్చుతోంది. ఎన్నో ఏళ్లుగా ఇదే కొనసాగుతూ వస్తోంది. రెండు, మూడేళ్లకోసారి ఎంతో కొంత సొమ్ము ఇవ్వక తప్పనిసరి పరిస్థితి. పంజాబ్‌ నేషనల్‌ బ్యాంకు (పీఎన్‌బీ)ను వజ్రాల వ్యాపారి నీరవ్‌ మోదీ నిలువునా ముంచిన ఉదంతం వెలుగు చూడటంతో ప్రభుత్వ రంగ బ్యాంకులు అనుసరిస్తున్న విధానాలు మరోసారి చర్చనీయాంశమయ్యాయి. రాజకీయ ఒత్తిళ్లే ఈ పరిస్థితికి కారణమని బ్యాంకింగ్‌వర్గాలు వాపోతున్నాయి. బ్యాంకుల సంఖ్య ఎక్కువైనందున వాటి మధ్య పోటీ పెరిగి చూసీచూడకుండా వ్యాపార రుణాలు ఇస్తున్నాయి.

లక్షల కోట్లలో బకాయిలు
* ఎస్‌బీఐకి అధికంగా రూ. 1.86 లక్షల కోట్ల బాకీలు ఉన్నాయి. ఆ తర్వాత స్థానాల్లో పంజాబ్‌ నేషనల్‌ బ్యాంకు (రూ. 57,630 కోట్లు), బ్యాంక్‌ ఆఫ్‌ ఇండియా (రూ. 49,307 కోట్లు), బ్యాంక్‌ ఆఫ్‌ బరోడా (రూ. 46,307 కోట్లు), కెనరా బ్యాంకు (రూ. 39,164 కోట్లు), యూనియన్‌ బ్యాంక్‌ ఆఫ్‌ ఇండియా (రూ. 38,286 కోట్లు) ఉన్నాయి.
* అదే సమయంలో ప్రైవేటు రంగ బ్యాంకులకు గత ఏడాది సెప్టెంబరు నాటికి రూ.1.03 లక్షల కోట్ల బకాయిల భారం ఉంది.
* ప్రైవేటు రంగ బ్యాంకుల్లో ఐసీఐసీఐ బ్యాంకుకు అధికంగా రూ. 44,237 కోట్ల రాని బాకీల భారం ఉంది.
* తర్వాత స్ధానాల్లో యాక్సిస్‌ బ్యాంకు (రూ. 22,136 కోట్లు), హెచ్‌డీఎఫ్‌సీ బ్యాంకు (రూ. 7,644 కోట్లు), జమ్మూకశ్మీర్‌ బ్యాంకు (రూ. 5,983 కోట్లు) ఉన్నాయి.

సాయం కోసం కేంద్రం వైపు చూపులు
* ఇష్టారాజ్యంగా అప్పులు ఇచ్చి నష్టపోవటం, ఆ తర్వాత సాయం కోసం కేంద్ర ప్రభుత్వం వైపు చూడటం మనదేశంలోని ప్రభుత్వ రంగ బ్యాంకులకు మామూలే. 1985 నుంచి 1992 మధ్యకాలంలో ప్రభుత్వ బ్యాంకులకు కేంద్ర ప్రభుత్వం రూ.4,000 కోట్లను మూలధనంగా సమకూర్చింది. తర్వాత కూడా క్రమంగా తప్పకుండా ఎంతో కొంత సొమ్ము తీసుకుంటూనే ఉన్నాయి.
* 2015లో కేంద్ర ప్రభుత్వం బ్యాంకులకు రూ. 70,000 కోట్లు సమకూర్చే ‘ఇంధ్రధనస్సు’ కార్యక్రమాన్ని ప్రకటించింది. దీని ప్రకారం 2015- 19 మధ్యకాలంలో ప్రభుత్వరంగ బ్యాంకులకు ఈ సొమ్మును మూలధనంగా అందించాలనేది ప్రణాళిక. దీని ప్రకారం ఏటా కొంత సొమ్ము విడుదల చేస్తోంది.
* ఇదే కాకుండా గత ఏడాది అక్టోబరులో రూ. 2.11 లక్షల కోట్ల ‘బ్యాంకుల మూలధనీకరణ’ కార్యక్రమాన్ని కేంద్ర ప్రభుత్వం రూపొందించింది. బ్యాంకులకు రెండేళ్ల కాలంలో ఈ మొత్తం లభించేలా చర్యలు తీసుకుంటారు. కేంద్ర ప్రభుత్వం బడ్జెట్‌ కేటాయింపుల ద్వారా రూ.18,139 కోట్లు ఇస్తుంది. రూ. 1.35 లక్షల కోట్లను రీ-కేపిటలైజేషన్‌ బాండ్లను జారీ చేయటం ద్వారా సమీకరిస్తారు. మిగిలిన సొమ్మును బ్యాంకులు సొంతంగా ఈక్విటీ షేర్ల జారీ ద్వారా సమీకరించుకోవాలి. ఇలా మొత్తం రూ. 2.11 లక్షల కోట్లు బ్యాంకులకు లభించే ప్రణాళికను కేంద్ర ప్రభుత్వం తయారు చేసింది. ఇందులో అత్యధికంగా ఐడీబీఐ బ్యాంకుకు రూ.10,610 కోట్లు లభిస్తాయి.

స్థిరీకరణ వేగవంతం?
బ్యాంకుల సంఖ్య ఎక్కువ కావడంతో వాటిమధ్య విపరీతమైన పోటీ నెలకొంది. ఏటా వ్యాపార ఆదాయాన్ని, లాభాన్ని పెంచుకోవలసి వస్తోంది. దీంతో కంపెనీలకు పెద్దపెద్ద వ్యాపార రుణాలు ఇచ్చే విషయంలో పోటీ పడే పరిస్థితి ఏర్పడుతోంది. ఏదైనా ఒక కంపెనీకి ప్రభుత్వం నుంచి ఒక పెద్ద ప్రాజెక్టు వచ్చిందని తెలియగానే ఆ కంపెనీ వద్ద బ్యాంకర్లు వాలిపోతున్నారు. మేమిస్తాం, అంటే కాదు మేమే ఇస్తాం.. మీకు ఎంత రుణం కావాలి- అని పోటీపడుతున్నాయి. నాలుగైదేళ్ల క్రితం వరకూ ఈ పరిస్థితి ఉంది. అధిక వ్యాపారాన్ని నమోదు చేయాలనే ఆత్రుతే దీనికి కారణం. ఈ క్రమంలో కొన్ని పొరపాట్లు జరిగి బ్యాంకులు నష్టపోయే పరిస్థితి ఏర్పడుతోంది. స్థిరీకరణ (కన్సాలిడేషన్‌) చేపట్టి ప్రభుత్వ రంగ బ్యాంకుల సంఖ్యను తగ్గించటమే దీనికి పరిష్కారమని నిపుణులు సూచిస్తున్నారు. తద్వారా బ్యాంకులు కచ్చితమైన నిబంధలు పాటించే వ్యాపార సంస్థలకే అప్పులు ఇచ్చే పరిస్థితి వస్తుందని పేర్కొంటున్నారు. ఈ దిశగా కేంద్ర ప్రభుత్వం ఏడాది క్రితం ఎస్‌బీఐ అనుబంధ బ్యాంకులను ఎస్‌బీఐలో విలీనం చేసింది. తద్వారా ప్రపంచవ్యాప్తంగా వంద అతిపెద్ద బ్యాంకుల్లో ఒకటిగా ఎస్‌బీఐ అవతరించింది. అలాగే ఇతర ప్రభుత్వ రంగ బ్యాంకులను కూడా విలీనం చేసి అయిదారు పెద్ద బ్యాంకులను ఏర్పాటు చేయాలనే ఆలోచన కేంద్ర ప్రభుత్వానికి ఉంది. ఇప్పుడు దాన్ని వేగవంతం చేసే అవకాశం కనిపిస్తోంది.

ప్రైవేటీకరణ తప్పదా...
పంజాబ్‌ నేషనల్‌ బ్యాంకు (పీఎన్‌బీ) ఉదంతంతో ప్రభుత్వ రంగ బ్యాంకులను ప్రైవేటీకరించాలనే వాదన తెరమీదకు వస్తోంది. ప్రైవేటు రంగమైతే ప్రభుత్వ వర్గాలు, రాజకీయ నాయకుల ఒత్తిళ్లు అంతగా పనిచేయవు. అందువల్ల వాటిని రాని బాకీల బెడద తక్కువగా ఉంటుందని, సమర్థ పర్యవేక్షణ ఉంటుంది కాబట్టి మోసాలకు తక్కువగా ఉంటాయని సంబంధిత వర్గాల వాదన. అందువల్ల ప్రభుత్వ బ్యాంకులను క్రమంగా ప్రైవేటీకరించటం మేలని అంటున్నారు. ప్రస్తుతం ప్రభుత్వ బ్యాంకుల్లో కేంద్ర ప్రభుత్వానికి 50 శాతానికి పైగా వాటా ఉంది. దీన్ని 50 శాతం కంటే కిందకు తగ్గించుకొని ప్రైవేటు యాజమాన్యానికి బాధ్యతలు అప్పగించాలనేది ఒక ఆలోచన. అలా కాకుండా మొత్తానికే ప్రైవేటీకరించాలనేది మరొక వాదన. కానీ ప్రభుత్వ బ్యాంకులను పూర్తిగా ప్రైవేటీకరించటానికి ప్రభుత్వం అంగీకరించకపోవచ్చు. బ్యాంకింగ్‌పై తమ పట్టుపోతుందనే భయం దీనికి కారణం. కానీ ప్రస్తుత పరిస్థితుల్లో ప్రభుత్వ రంగ బ్యాంకులను ప్రైవేటీకరించాలనే డిమాండ్లు పెరుగుతున్నాయి.

పెనుభారమైన మొండి బకాయిలు
* ప్రైవేటు రంగ బ్యాంకులతో పోల్చితే ప్రభుత్వ రంగ బ్యాంకుల వ్యాపార పరిమాణం ఎంతో ఎక్కువ. అదేవిధంగా రాని బాకీలు కూడా ప్రభుత్వ రంగ బ్యాంకులకు అధిక మొత్తంలో పేరుకుపోయాయి.
* ఆర్‌బీఐ గణాంకాల ప్రకారం గత ఏడాది సెప్టెంబరు నాటికి ప్రభుత్వ రంగ బ్యాంకులు రూ. 7.34 లక్షల కోట్ల మొండి బకాయిలతో ఇబ్బంది పడుతున్నాయి.

పీఎన్‌బీ ఉదంతాన్ని చూస్తే అంతర్గత నియంత్రణలన్నీ విఫలమైనట్లు కనిపిస్తోంది. ప్రభుత్వ యాజమాన్యం వల్ల నియంత్రణ వ్యవస్థలు బలహీనంగా తయారయ్యాయి. ఈ పరిస్థితుల్లో బ్యాంకుల ప్రైవేటీకరణే పరిష్కారమనే ఆలోచన కలుగుతోంది...
- అర్వింద్‌ సుబ్రమణియన్‌, కేంద్ర ప్రభుత్వ ప్రధాన ఆర్థిక సలహాదారుడు.
దేశంలో 21- 22 ప్రభుత్వ రంగ బ్యాంకులు ఉన్నాయి, వివిధ కారణాల వల్ల స్ధిరీకరణ చేపట్టి ఈ సంఖ్యను తగ్గించాల్సిన అవసరం ఉంది. వీటిని 10- 15 బ్యాంకులకు తగ్గించాల్సి ఉంది...
- ఇటీవల జరిగిన ‘భారత ఆర్థిక సదస్సు’లో సంజీవ్‌ సన్యాల్‌, కేంద్ర ప్రభుత్వ ముఖ్య ఆర్థిక సలహదారుడు.

- ఈనాడు ప్రత్యేక విభాగం
Posted on 23-02-2018