Ask the Expert
|
Feedback
|
About us
|
Contact us
|
Pratibha Home


ఆర్థిక రంగం

రుణ గ్రహీతలకు మంచి రోజులు?

* ఆర్‌బీఐ రెపోరేటు తగ్గింపు

బ్యాంకులు తన నుంచి తీసుకొనే స్వల్పకాలిక రుణాలపై వసూలు చేసే వడ్డీ (రెపోరేటు) తగ్గింపు ప్రయోజనాన్ని పూర్తిస్థాయిలో వెంటనే రుణగ్రహీతలకు అందించాలన్న లక్ష్యంతో బ్యాంకుల వడ్డీరేట్లను లెక్కకట్టే విధానంలో రిజర్వుబ్యాంక్‌ కొన్ని కీలక మార్పులు చేసింది. ప్రస్తుతం అమలులో ఉన్న ఎంసీఎల్‌ఆర్‌ (మార్జినల్‌ కాస్ట్‌బేస్డ్‌ లెండింగ్‌ రేటు- వ్యయ ఆధారిత వడ్డీరేటు) విధానం స్థానంలో రెపోరేటు ఆధారిత వడ్డీ రేటు (ఆర్‌ఎల్‌ఎల్‌ఆర్‌- రెపో లింక్‌ లెండింగ్‌ రేట్‌) విధానాన్ని ప్రవేశపెట్టింది. అక్టోబరు ఒకటి నుంచి అమలులోకి రానున్న ఈ కొత్త విధానం ప్రకారం బ్యాంకులు చలనవడ్డీపై ఇచ్చే కొత్త రిటైల్‌ (గృహ, వాహన, విద్యా, వ్యక్తిగత) రుణాలు, సూక్ష్మ, చిన్న, మధ్యతరహా (ఎంఎస్‌ఎంఈ) రుణాల వడ్డీరేట్లను రెపోరేటు లేదా మరో మూడు ప్రామాణిక రేట్లకు అనుసంధానించాల్సి ఉంటుంది. ఈ విధానం ప్రకారం బ్యాంకులు వాటి రుణ వడ్డీరేట్లను ప్రతి మూడు నెలలకోసారి సవరించాల్సి ఉంటుంది. ఇప్పటిదాకా ఆర్‌బీఐ రెపోరేటు తగ్గించిన ప్రతిసారీ ఆ తగ్గింపు ప్రయోజనాన్ని రుణగ్రహీతలకు పూర్తిస్థాయిలో అందించకుండా తూతూమంత్రంగా స్వల్ప తగ్గింపుతో సరిపెట్టేవి. కొన్ని బ్యాంకులైతే వడ్డీరేట్ల తగ్గింపు ఊసెత్తకుండా ‘వేచిచూసే’ ధోరణిని అవలంబించేవి. గతంలో ప్రతి ద్రవ్యవిధాన సమీక్ష సమావేశంలో అప్పటి ఆర్‌బీఐ గవర్నర్లు (దువ్వూరి సుబ్బారావు, రఘురామ్‌ రాజన్‌, ఉర్జిత్‌ పటేల్‌) ఈ అంశంపై తీవ్రంగా స్పందించే వారు. అయినా రెపోరేటు తగ్గింపు ప్రయోజనం రుణగ్రహీతలకు పూర్తిస్థాయిలో అందాలన్న లక్ష్యం ఇప్పటిదాకా నెరవేరలేదు. వృద్ధికి ఊతమిచ్చే దిశలో ఆర్‌బీఐ ఈ ఏడాది ఇప్పటి దాకా రెపోరేటును నాలుగు దఫాలుగా (ఫిబ్రవరి, ఏప్రిల్‌, జూన్‌, ఆగస్టు, నెలల్లో) 110 బేసిస్‌ పాయింట్లు (1.10శాతం) తగ్గించింది. దీనితో రెపోరేటు తొమ్మిదేళ్ల కనిష్ఠస్థాయికి (5.40 శాతం) చేరింది. బ్యాంకులు వాటి వడ్డీ రేట్లను నామమాత్రంగా తగ్గించి చేతులు దులుపుకొన్నాయి. ఈ అంశంపై ఆర్‌బీఐ గవర్నర్‌ శక్తికాంత దాస్‌ స్పందిస్తూ ఈ ఏడాది జూన్‌ వరకూ జరిపిన మూడు ద్రవ్య విధాన సమీక్షల్లో ఆర్‌బీఐ రెపోరేటును 75 బేసిస్‌ పాయింట్లు తగ్గిస్తే బ్యాంకులు కేవలం 29 బేసిస్‌ పాయింట్లే తగ్గించాయని తెలియజేశారు.

ఇక తగ్గింపు అనివార్యం
బ్యాంకులు రెపోరేటు తగ్గింపును యథాతథంగా బదలాయించి వాటి వడ్డీరేట్లను తగ్గించేందుకు గత దశాబ్దకాలంలో ఆర్‌బీఐ పలు చర్యలు చేపట్టింది. పలుమార్లు వడ్డీరేట్ల విధానాన్ని మార్చి ఎప్పటికప్పుడు కొత్త విధానాలను ప్రవేశపెట్టింది. 2003-04లో బీపీఎల్‌ఆర్‌ (బెంచ్‌మార్క్‌ ప్రైమ్‌ లెండింగ్‌ రేటు) విధానాన్ని ప్రారంభించింది. దానితో ఆశించిన మేర రేట్ల తగ్గింపు, బదలాయింపు జరగడంలేదని గుర్తించిన ఆర్‌బీఐ బేస్‌రేట్‌ విధానాన్ని, అనంతరం 2016లో ఎంసీఎల్‌ఆర్‌ విధానాన్ని ప్రవేశపెట్టింది. అయినా బ్యాంకులు రుణవడ్డీ రేట్ల తగ్గింపు విషయంలో పెద్దగా స్పందించకపోగా ఎప్పటికప్పుడు దాటవేసే ధోరణిని అవలంబించాయి. ఈ నేపథ్యంలో ప్రస్తుతం అమలులో ఉన్న వడ్డీరేట్ల విధానాన్ని సమీక్షించి రెపోరేటు తగ్గింపు ప్రయోజనం రుణగ్రహీతలకు యథాతథంగా, సకాలంలో అందించే దిశలో రిజర్వుబ్యాంక్‌ 2017 ఆగస్టులో అంతర్గత అధ్యయన బృందాన్ని ఏర్పాటు చేసింది. ఆ బృందం రెపోరేటు మార్పులు యథాతథంగా బ్యాంకుల రుణవడ్డీ రేట్లలో ప్రతిబింబించే విధంగా, కొత్త వడ్డీరేట్ల విధానాన్ని సిఫార్సు చేసింది. దీని ప్రకారం బ్యాంకులు వాటి రుణ వడ్డీరేట్లను రెపోరేటుకు, లేదా 90 రోజుల ప్రభుత్వ ట్రెజరీ బిల్లు, 180 రోజుల ట్రెజరీ బిల్లు రాబడికి లేదా ఫైనాన్షియల్‌ బెంచ్‌ మార్క్‌ ఇండియా ప్రైవేట్‌ లిమిటెడ్‌ సంస్థ ప్రకటించిన ఏదైనా ఒక ప్రామాణిక రేటుతో అనుసంధానించాల్సి ఉంటుంది. ఆర్‌బీఐ నిబంధనల ప్రకారం ఈ కొత్త వడ్డీరేట్ల విధానం చలన వడ్డీపై ఇచ్చే రిటైల్‌ రుణాలకే వర్తిస్తుంది. స్థిరవడ్డీపై ఉన్న రుణాలు యథావిధిగా కొనసాగుతాయి. బ్యాంకులు ఈ కొత్త విధానాన్ని ఇతర రుణాలకూ (చలనవడ్డీపై ఉన్నవి) వర్తింపజేసే వెసులుబాటును ఆర్‌బీఐ కల్పించింది. గతంలోని బీపీఎల్‌ఆర్‌, బేస్‌రేట్‌, ఎంసీఎల్‌ఆర్‌ వంటి వడ్డీరేట్ల విధానాలతో పోల్చినట్లయితే కొత్తగా ప్రవేశపెట్టిన ఆర్‌ఎల్‌ఎల్‌ఆర్‌ విధానంలో రెపోరేటు తగ్గింపును బ్యాంకులు పూర్తిస్థాయిలో రుణగ్రహీతలకు అందించడం తప్పనిసరి. ఇంతకుముందు మాదిరిగా బ్యాంకులు వడ్డీరేట్ల తగ్గింపు విషయంలో ‘వేచిచూసే’ ధోరణిని అవలంబించే ఆస్కారం లేకుండా ఈ కొత్త విధానాన్ని రూపొందించింది. గత కొంత కాలంగా రిజర్వుబ్యాంక్‌ ఆర్‌ఎల్‌ఎల్‌ఆర్‌ విధానాన్ని అనుసరించాలని బ్యాంకులకు చెబుతున్న నేపథ్యంలో దేశంలో ప్రథమంగా స్టేట్‌ బ్యాంక్‌ ఆఫ్‌ ఇండియా ఈ విధానాన్ని గత జులైలోనే అమలులోకి తెచ్చింది. ఆ తరవాత బ్యాంక్‌ ఆఫ్‌ బరోడా, యూనియన్‌ బ్యాంక్‌, సెంట్రల్‌ బ్యాంక్‌ ఆఫ్‌ ఇండియా, ఐడీబీఐతోపాటు మరికొన్ని బ్యాంకులు అమలుకు శ్రీకారం చుట్టాయి. ప్రస్తుతం ఆర్‌బీఐ రెపోరేటు 5.40 శాతంగా ఉంది. బ్యాంకులు ఈ రేటును ప్రామాణికంగా తీసుకున్నట్లయితే ఈ రేటుకు కొంత శాతం నిర్వహణ వ్యయాలను కలిపి వాటి ఆర్‌ఎల్‌ఎల్‌ఆర్‌లను లెక్కకడతాయి. ఉదాహరణకు స్టేట్‌ బ్యాంక్‌ ఆఫ్‌ ఇండియా ఆర్‌ఎల్‌ఎల్‌ఆర్‌ 7.65 (5.40+2.25) శాతం ఉంది. రుణగ్రహీతల క్రెడిట్‌ రేటింగును బట్టి 40 బేసిస్‌ పాయింట్ల నుంచి 110 బేసిస్‌ పాయింట్ల దాకా ఆర్‌ఎల్‌ఎల్‌ఆర్‌కు కలిపి బ్యాంకులు వివిధ రుణాల వడ్డీరేట్లు నిర్ణయిస్తాయి. స్టేట్‌ బ్యాంక్‌ ఆఫ్‌ ఇండియా గృహరుణాల (రూ.75 లక్షల వరకు)ను 8.05 శాతం (7.65+0.40) వడ్డీకే అందిస్తోంది. స్టేట్‌ బ్యాంకు తాజాగా ఎంసీఎల్‌ఆర్‌ను సైతం 8.15 శాతానికి తగ్గించి తక్కువ వడ్డీ రేట్ల విధానానికి బాటవేసింది. దీంతో ఇతర బ్యాంకులు వాటి ఎంసీఎల్‌ఆర్‌లను తగ్గించక తప్పని పరిస్థితి ఏర్పడింది.

ప్రయోజనకరమే, కానీ...
రెపోరేటు తగ్గుతున్నంతవరకు దానికి అనుగుణంగా బ్యాంకులు వాటి వడ్డీరేట్లను తగ్గిస్తాయి కాబట్టి రుణగ్రహీతలకు ఉపయోగకరంగానే ఉంటుంది. ప్రస్తుత ఆర్థిక పరిస్థితి, జీడీపీ క్షీణత, కనిష్ఠ స్థాయిలోఉన్న ద్రవ్యోల్బణం, ప్రపంచవ్యాప్తంగా నెలకొన్న మాంద్యం దృష్ట్యా భవిష్యత్తులోనూ మరికొంతకాలం వృద్ధే లక్ష్యంగా ఆర్‌బీఐ కీలక రేట్ల తగ్గింపునకే మొగ్గు చూపే అవకాశం ఉంది. ఈ పరిణామాలు రుణగ్రహీతలకు అనుకూలంగా ఉన్నాయి. ఈఎంఐల భారం కొంతమేర తగ్గుతుంది. ఆర్థిక వ్యవస్థలో ఎంతకాలం ఈ తక్కువ వడ్డీరేట్లు కొనసాగుతాయన్నది నిర్దిష్టంగా చెప్పలేం. రెపోరేట్లు, మార్కెట్లో ఇతర ప్రామాణిక వడ్డీరేట్లు పెరుగుతున్నప్పుడు మాత్రం చలన వడ్డీపై రుణాలు తీసుకున్న రుణగ్రహీతలకు ఇబ్బందులు మొదలవుతాయి. ఈఎంఐలు మరింత భారమవుతాయి. అలాంటప్పుడు రిటైల్‌ రుణగ్రహీతలకు చలన వడ్డీ విధానం నుంచి స్థిరవడ్డీ విధానానికి మారే అవకాశం కల్పించాలి. కొన్ని బ్యాంకులు ఈ అవకాశాన్ని కల్పిస్తున్నప్పటికీ రుసుముల రూపంలో రుణగ్రహీతపై అధిక భారాన్ని మోపుతున్నాయి. వడ్డీరేట్లు పెరుగుతున్న తరుణంలో రిటైల్‌ రుణగ్రహీతలకు చలనవడ్డీ నుంచి స్థిరవడ్డీ విధానానికి సులువుగా, ఎటువంటి ఆర్థిక భారం లేకుండా మారే అవకాశాన్ని కల్పించాలి. ప్రస్తుతం ఎంసీఎల్‌ఆర్‌ పరిధిలో ఉన్న రుణాల వడ్డీ రేట్లు ఆర్‌ఎల్‌ఎల్‌ఆర్‌ వడ్డీ రేట్ల కంటే ఎక్కువగా ఉన్నందువల్ల పాతరుణాలపై అధికవడ్డీ భారం పడుతుంది. అంతేకాక రెపోరేట్లు తగ్గినప్పుడుల్లా బ్యాంకులు ఆర్‌ఎల్‌ఎల్‌ఆర్‌పై ఇచ్చిన రుణాలవడ్డీ రేట్లను వెంటనే తగ్గించి పాతరుణాలపై వడ్డీరేట్లను తగ్గించకపోవచ్చు. ఫలితంగా ఎంసీఎల్‌ఆర్‌పై తీసుకున్న రుణాల వడ్డీరేట్లు ఆర్‌ఎల్‌ఎల్‌ఆర్‌పై రుణవడ్డీ రేట్ల మధ్య వ్యత్యాసం పెరుగుతూ పోతుంది. దీనివల్ల గతంలో తీసుకున్న పాత రుణాలను ఆర్‌ఎల్‌ఎల్‌ఆర్‌ పద్ధతికి మార్చుకోకపోతే రుణ గ్రహీతలపైన వడ్డీభారం అధికంగా ఉంటుంది. అందువల్ల పాతరుణాలను కొత్త విధానానికి మార్చుకోవడం అవసరం. ఆర్‌బీఐ నిబంధనల ప్రకారం బ్యాంకులు వాటి వడ్డీరేట్ల (ఆర్‌ఎల్‌ఎల్‌ఆర్‌)ను ప్రతి మూడు నెలలకోసారి సవరించడం చేయాల్సి ఉంటుంది. అంటే రెపోరేటు మారిన ప్రతిసారి బ్యాంకులు వాటి వడ్డీ రేట్లను సవరించాల్సి ఉంటుంది. ఈ క్రమంలో రుణ గ్రహీతల ఈఎంఐలు తరచూ హెచ్చుతగ్గులకు గురయ్యే అవకాశం ఉంది. గతంలో సంవత్సరానికో రెండేళ్ళకోసారి జరిగే వడ్డీ రేట్ల మార్పులు ఇప్పుడు ప్రతి మూడు నెలలకోసారి జరుగుతున్నాయి. భవిష్యత్తులో రుణగ్రహీతలు ఈ పరిణామాలను ఎదుర్కొనేందుకు సిద్ధంగా ఉండాలి.

ఆర్‌ఎల్‌ఎల్‌ఆర్‌ విధానంతో బ్యాంకులు కొంత ఇబ్బందికర పరిస్థితిని ఎదుర్కోక తప్పదు. ఎందుకంటే డిపాజిట్లపై స్థిరవడ్డీ విధానాన్ని అనుసరిస్తూ రుణాలను రెపోరేటుతో అనుసంధానించడం వల్ల బ్యాంకుల నికరవడ్డీ మార్జిన్ల (ఎన్‌ఐఎమ్‌)పై ప్రభావం పడుతుంది. నిరర్థక ఆస్తుల మోత, ఆశించిన మేర పెరగని రుణగిరాకీ వంటి సమస్యలతో సతమతవుతున్న ప్రభుత్వరంగ బ్యాంకులకు కొత్త విధానం చేదుగుళిక లాంటిదే. ఆర్‌బీఐ రెపోరేటు తగ్గుదల పూర్తి ప్రయోజనాన్ని సకాలంలో రుణగ్రహీతలకు అందించే దిశలో కొత్త విధానం మరో ముందడగు అనడంలో ఏ మాత్రం సందేహంలేదు!


Posted on 16-09-2019