Ask the Expert
|
Feedback
|
About us
|
Contact us
|
Pratibha Home


ఇతరాలు

మంటగలుస్తున్న మానవత్వం

* చిన్నారులపై అత్యాచారాలు

ముక్కుపచ్చలారని పసిబిడ్డలపై నానాటికీ పెరుగుతున్న అత్యాచారాలు ఆందోళన కలిగిస్తున్నాయి. దుర్మదాంధుల దాడులనుంచి పసినలుసులను ఏ విధంగా కాపాడుకోవాలో అంతు చిక్కక తల్లిదండ్రులు సతమతమవుతున్నారు. కఠిన చట్టాలు, తీవ్రమైన శిక్షలూ అకృత్యాలను అడ్డుకోలేకపోతున్నాయి. కేసుల విచారణలో జాప్యం, నేర నిర్ధారణలో పోలీసుల వైఫల్యం వంటివి సమస్యను సంక్షోభ స్థాయికి చేరుస్తున్నాయి. తెలంగాణలోని సంగారెడ్డి జిల్లా కొండాపూర్‌ మండల పరిధిలోని గ్రామంలో ఓ కామాంధుడు మూడున్నరేళ్ళ చిన్నారిపై అత్యాచారానికి ఒడికట్టాడు. వికారాబాద్‌ జిల్లా పెద్దాపూర్‌ మండల పరిధిలో ఓ యువకుడు సమీపంలోని ఇంట్లో ఉండే అయిదేళ్ల పసిపాపపై అకృత్యానికి తెగబడ్డాడు. వరంగల్‌ అర్బన్‌ జిల్లా పరిధిలో పదమూడేళ్ల బాలికను ముగ్గురు స్నేహితులు అత్యాచారం చేశారు. దాంతో ఆ బాలిక ఆత్మహత్య చేసుకుంది. అసోమ్‌లో తొమ్మిదేళ్ల బాలికపై అత్యాచారానికి పాల్పడిన కన్నతండ్రికి యావజ్జీవ కారాగార శిక్ష పడింది. హరియాణాలోని గురుగ్రామ్‌ ప్రాంతానికి చెందిన ఓ తండ్రి తన ఇద్దరు మైనర్‌ బాలికలపై అత్యాచారానికి ఒడికట్టినందుకు కోర్టు యావజ్జీవ శిక్ష విధించింది. ఛత్తీస్‌గఢ్‌లో పాఠశాల ప్రాంగణంలో ఓ చిన్నారిపై తోటి విద్యార్థులే అఘాయిత్యానికి ఒడికట్టారు. ఐపీసీ సెక్షన్‌ 376, 354ఏ, పోక్సో చట్టంలోని సెక్షన్‌ 4 కింద నిందితులపై కేసు నమోదు చేసి జైలుకు పంపారు. ఇలాంటి ఘటనలు దేశవ్యాప్తంగా రోజూ వెలుగు చూస్తూనే ఉన్నాయి. వివిధ కారణాలవల్ల కొన్ని ఘటనలు వెలుగులోకి రావడం లేదు.

బాలికలపై నేరాలు ఏటికేడు పెరిగిపోతున్నాయని అధికారిక గణాంకాలు వెల్లడిస్తున్నాయి. జాతీయ నేరవిభాగం గణాంకాల ప్రకారం 2015లో చిన్నారులపై జరిగిన నేరాలకు సంబంధించి 94,172 కేసులు నమోదవగా, 2016లో ఆ సంఖ్య 1,06,958కి చేరుకుంది. ఏటా పెరుగుతున్న నేరాలు ఆందోళన కలిగిస్తున్నాయి. అత్యధికంగా అంటే యాభై శాతానికి పైగా కేసులు ఉత్తర్‌ ప్రదేశ్‌, మధ్యప్రదేశ్‌, దిల్లీ, పశ్చిమ్‌బంగలోనే నమోదవుతుండటం గమనార్హం. చిన్నారులపై నేరాల్లో 18శాతం అత్యాచారానికి సంబంధించినవే. పోక్సో చట్టం కింద 34.4 శాతం కేసులు నమోదయ్యాయి. అత్యధికంగా ఉత్తర్‌ ప్రదేశ్‌లో 15.3, మహారాష్ట్రలో 13.6, మధ్యప్రదేశ్‌లో 13.1 శాతం కేసులు నమోదయ్యాయి. అకృత్యాలకు సంబంధించిన కేసుల విచారణ నత్తనడకన నడుస్తోంది. శిక్షల శాతం సైతం దిగదుడుపుగానే ఉంది. 2015-16లో 1.06 లక్షల కేసులు నమోదు కాగా 8.87 శాతం కేసుల్లో మాత్రమే నిందితులకు శిక్షలు పడ్డాయి. అధిక శాతం కేసులు రుజువుకాక వీగిపోతున్నాయి. న్యాయస్థానాల్లో పేరుకుపోయిన కేసులను త్వరితగతిన పరిష్కరించాల్సిన అవసరం ఉంది. ఇటీవల వరంగల్‌లో తొమ్మిది నెలల పసిపాపపై అత్యాచారం జరిపి ఆపై పాశవికంగా హత్య చేసిన ఘటనలో ఫాస్ట్‌ట్రాక్‌ కోర్టు నెలన్నర రోజుల్లోనే విచారణ పూర్తిచేసి నిందితుడికి మరణశిక్ష విధించింది. ఆ కేసు విషయంలో న్యాయవాదులు సైతం పసిపాపకు అండగా నిలవడం హర్షించదగ్గ విషయం.

మైనర్‌ బాలికలపై అత్యాచారాలు అరికట్టేందుకు కేంద్రప్రభుత్వం ఇటీవలే కొత్త చట్టం తీసుకొచ్చింది. దాని ప్రకారం దోషులకు ఉరిశిక్ష విధిస్తారు. సాంకేతిక పరిజ్ఞాన దుర్వినియోగం అధికమైంది. విలువలను విస్మరిస్తున్నారు. వ్యసనాలకు బానిసలవుతూ దారి తప్పుతున్నారు. యువతరానికి నైతిక విలువలు, బంధాలు, అనుబంధాల గురించి తెలియజేయాల్సిన అవసరం ఉంది. అందుకు సంబంధించి పాఠశాల, ఇంటర్‌, డిగ్రీ, పీజీ స్థాయుల్లో పాఠ్యాంశాలు ప్రవేశపెట్టాలి. అప్పుడే యువతకు సమాజంపట్ల అవగాహన కలుగుతుంది. బాలికల రక్షణ చట్టాలపై విస్తృత ప్రచారం నిర్వహించడం కొంతమేరకు ఫలితాలు ఇస్తుంది. ప్రధానంగా పోక్సో చట్టం పట్ల గ్రామ పంచాయతీ, పురపాలక, నగరపాలక సంస్థలకు ప్రాతినిధ్యం వహించే ప్రజా ప్రతినిధులు అవగాహన కలిగి ఉండాలి. తల్లిదండ్రులు, ఉపాధ్యాయులు, అంగన్‌వాడీ సిబ్బంది, ఆశా వర్కర్లు, స్త్రీ శిశు సంక్షేమ శాఖ అధికారులు, నర్సులకు సంపూర్ణ అవగాహన కల్పించాలి. తద్వారా వారు చట్టాలకు సంబంధించి యువతను జాగృతం చేయగలరు. దానివల్ల కొంతవరకైనా మార్పు పొడచూపి దారుణాలకు అడ్డుకట్ట పడే అవకాశం ఉంది.


- డాక్టర్‌ సిలువేరు హరినాథ్‌
(రచయిత - సెస్‌లో రీసెర్చ్‌ అసిస్టెంట్‌)
Posted on 27-08-2019