Text

ఎంసెట్‌లో ర్యాంకు వచ్చింది...ఆనందం. ఇంజినీరింగ్‌లో సీటొచ్చింది...సంతోషం. బీటెక్‌ పట్టా చేతికి అందింది... పట్టరాని సంతోషం. మరి ఉద్యోగం వచ్చిందా?... సమాధానం లేదు. నెలలు.. ఏళ్లు గడిచినా అవును అన్న సమాధానం రావటంలేదు.. ఆ సమాధానం కోసమే రాష్ట్ర నలుమూలల నుంచి చలో హైదరాబాద్‌ అంటున్నారు విద్యార్థులు.

అందుకు కారణం నాలుగేళ్లు ఇంజినీరింగ్‌ చదివితే వారు నేర్చుకుంటున్నది కేవలం ప్రాథమిక విషయాలే. ఫలితం ఇంటర్వ్యూలో ఫెయిల్‌. ఈ పరిస్థితులే విద్యార్థులను ప్రత్యేక శిక్షణ సంస్థలవైపు దృష్టిపెట్టేలా చూస్తోంది.

రాష్ట్రం నుంచి ఏటా సుమారు 1.25 లక్షల మంది వృత్తివిద్య గ్రాడ్యుయేట్లు బయటకు వస్తున్నారు. వారిలో 10 శాతం మంది లోపే ప్రాంగణ నియామకాల్లో ఎంపికవుతున్నారు. మిగతా వారిలో 10-15 శాతం మంది మాత్రమే ఉన్నత చదువులైన ఎంటెక్‌, ఎంబీఏ లేదా అమెరికా లాంటి దేశాల్లో ఎంఎస్‌ చేయడానికి వెళ్తున్నారు. ఇక మిగిలిన 75 శాతం మందిలో కొద్ది మంది మాత్రమే ఇతరత్రా మార్గాల్లో ఉద్యోగాలు పొందుతున్నారు. అత్యధికమంది ప్రత్యేక శిక్షణ పొందేందుకు నగరంలోని అమీర్‌పేట రాకుండా తప్పడంలేదు. నగరంలో ఐటీ శిక్షణ సంస్థలు సుమారు 150 వరకు ఉంటాయని అంచనా. ఎక్కువగా అమీర్‌పేట, ఎస్సార్‌నగర్‌, ఆ తర్వాత దిల్‌సుఖ్‌నగర్‌లో ఉంటాయి. కొన్ని సంస్థలకు రెండు చోట్ల బ్రాంచీలున్నాయి. ఎక్కువగా డాట్‌ నెట్‌, జావా నేర్చుకుంటున్నారు. శిక్షణ సంస్థలు కోర్సును బట్టి 5 వేలు- 9 వేలు ఫీజు కింద వసూలు చేస్తున్నాయి.