అది నా సమస్య కాదు
ఉన్నతాధికారి మీతో ఏదైనా ఒక సమస్య గురించి చర్చిస్తున్నపుడు మీకు సంబంధించినది కాకున్నా.. దానికి పరిష్కార మార్గాలు సూచించడానికి ప్రయత్నించాలి. అంతేకాని అది నా సమస్య కాదు.. అని చెప్పి తప్పించుకొనే ప్రయత్నం చేయకూడదు.
మినహాయింపులు కోరొద్దు
ఒక పని అప్పజెప్పి ఫలానా సమయంలో పూర్తి చేయాలని ఆదేశిస్తే.. అంతకన్నా ముందే పూర్తి చేసేందుకు ప్రయత్నించాలి. అంతేకాని మరికాస్త సమయం ఇవ్వండని కోరడం.. ఆలస్యం చేయడం సరికాదు. ఒకవేళ ఆలస్యమైతే దాన్ని వీలైనంత ముందుగా వారికి చెప్పాలి. అందుకు కారణాలూ సంక్షిప్తంగా వివరించాలి.
మీరు చేస్తోంది తప్పు
బాస్ అప్పుడప్పుడూ తప్పులు చేస్తున్నా.. ఆయన తప్పుచేయరని భావించి ముందుకెళ్లాలి. ఎందుకంటే చాలా మంది బాస్‌లు తమకు అంతా తెలుసు.. తాము చేస్తోంది సరి అని భావిస్తుంటారు. కనుక బాస్ ఆలోచన లేదా పని సరిగా లేనపుడు దాన్ని ప్రత్యక్షంగా మీరు చేస్తున్నది సరికాదు అని చెప్పకూడదు. అంతకన్నా మంచి ఆలోచనను.. విధానాన్ని సూచించాలి. అప్పుడు వారు తనలోని లోపాలను గుర్తించగలుగుతారు.
సహచరులూ తప్పు చేశారు
మీరేదైనా తప్పు చేస్తే దాన్ని అంగీకరించాలి. సరిదిద్దుకొనేందుకు ప్రయత్నించాలి. అంతే కాని ఆ తప్పును ఇతరులపైకి నెట్టే ప్రయత్నం ఎప్పుడూ చేయకూడదు. తప్పుచేసినపుడు అంగీకరించకుండా రక్షణాత్మక ధోరణిలో వ్యవహరించడమూ సరికాదు. సహచరులూ ఇలాగే చేస్తున్నారని చెప్పకూడదు. తప్పును అంగీకరించడమే చాలా ఉత్తమం.
మౌనం పనికిరాదు
మీ వద్ద బాస్ ఏదైనా ఒక విషయాన్ని ఆరా తీసినపుడు వెంటనే సమాధానం ఇవ్వాలి. మౌఖికంగా చెప్పలేకుంటే రాతపూర్వకంగా అయినా తెలపాలి. అంతే కాని ఆలస్యం చేయకూడదు. మౌనం వహించకూడదు. సమాచారం తెలియకుంటే వెంటనే తెలుసుకొని వీలైనంత త్వరగా చెప్పాలి. ఇక్కడ ఏమాత్రం నిర్లక్ష్యం చేయకూడదు. ఆలస్యమైతే అదే సమాచారం కోసం బాస్ మీ సహచరులను అడిగే అవకాశం ఉంది. వారు త్వరగా ఇస్తే మీపై ప్రతికూల ప్రభావం చూపొచ్చు.
అది చాలా సులభం
మీరు చేస్తున్న పని మీకు ఎంత సులభంగా ఉన్నా ఆ సంగతి బాస్‌కి చెప్పకూడదు. వీలైనంత పక్కాగా మెరుగ్గా చేసి చూపించాలి. ఏదైనా ఒక పని చెప్పినపుడు .. ఓస్ ఇంతేనా.. ఇది చాలా సులభం క్షణాల్లో చేసేస్తాను అని ముందే చెప్పకూడదు. సకాలంలో ఆ పనిని చక్కగా చేసి చూపెట్టాలి. బాస్ గురించి సహచరులు, ఇతరులతో చెడుగా మాట్లాడకూడదు. ఇలాంటి వైఖరి ఖచ్చితంగా ఎప్పుడో ఒకప్పుడు మీ వృత్తి జీవితంపై చెడు ప్రభావాన్ని చూపుతుంది. బాస్ ఎంత కఠినంగా వ్యవహరిస్తున్నా అన్నీ సానుకూలంగా తీసుకొని ముందుకెళ్లాలి. బాస్ నుంచి ముందస్తు అనుమతి తీసుకోకుండా సెలవు పెట్టకూడదు.