సమావేశాల్లో
ఉన్నతాధికారులు/తోటి ఉద్యోగులతో సమావేశమైనపుడు కొందరు మౌనంగా కూర్చుండిపోతారు. ఏం మాట్లాడితే ఎం ముంచుకొస్తుందోనని భయపడుతుంటారు. ఇతరులు మాట్లాడేదాకా వేచి ఉంటారు. ఇది అన్ని సందర్భాల్లోనూ సరిపోదు. సమవేశంలో ఉన్నవారు అందరూ అపరిచితులైతే.. మిమ్మల్ని మీరు పరిచయం చేసుకోవాలి. ఇతరుల నుంచి పరిచయాలను కోరాలి. మీ పనులు బాధ్యతల గురించి సంక్షిప్తంగా వారికి చెప్పాలి. ఇతరుల బాధ్యతల గురించి ఆరా తీయాలి. వారిచ్చే సమాధానాల ఆధారంగా కొన్ని ప్రశ్నలు అడగాలి. దీని వల్ల మీకు నేర్చుకోవాలన్న తపన ఉన్నట్లు తెలుస్తుంది.

ఫోన్లో మాట్లాడేటపుడు
ఎవరైనా సరే సంస్థ నుంచి వచ్చే ఫోన్ తీయగానే ఆ సమయానికి తగినట్లు గుడ్ మార్నింగ్/ఆఫ్టర్‌నూన్/ఈవెనింగ్ చెప్పాలి.
మీరు ఉన్నతాధికారికి ఫోన్ చేసినపుడు మాట్లాడటానికి ఇది సరైన సమయమేనా అడగాలి. లేకుంటే ఫలానా అంశంపై మీతో మాట్లాడాలని ఉంది. అని సందేశం ఇస్తే వారే మీకు ఫోన్ చేయొచ్చు.
ఇక్కడ మీ సమాధానాలు, ప్రశ్నలు నేరుగానే ఉండాలి. డొంక తిరుగుడు పనికిరాదు.
అవతలివారు మాట్లాడటానికి సమయమివ్వండి. వారు చెబుతున్నపుడు మౌనంగా ఉండకుండా సందర్భానుసారం అవునా.. సరే. అంటూ స్పందించాలి.
అవతలి వ్యక్తిని ఎక్కువసార్లు పేరుపెట్టి పిలవకూడదు. 8నుంచి 10నిమిషాలకు 3సార్లు పిలిస్తే చాలు. సంభాషణ వీలైనంత సంక్షిప్తంగా ఉండాలి.