Preparation Plan

నీట్‌ - 2018

* అర్హత సులువు... కష్టపడితే సీటు

వైద్యవిద్యలో ప్రవేశాల కోసం జాతీయస్థాయిలో నిర్వహించే పరీక్ష ‘నీట్‌’. దేశంలో ఏ వైద్య/ దంతవైద్య కళాశాలలోనైనా చేరాలంటే ఈ పరీక్షలో అర్హత తప్పనిసరి. ఇది పొందకుండా ప్రభుత్వ, ప్రైవేటు, మైనార్టీ, డీమ్డ్‌ యూనివర్శిటీల్లో ఎక్కడా ప్రవేశం పొందటానికి అవకాశం లేదు. అందుకే ఈ పరీక్ష స్వరూపం, ప్రశ్నల తీరుపై మన తెలుగు విద్యార్థులు తగిన అవగాహన పెంచుకోవాల్సివుంది. అప్పుడే సన్నద్ధత లక్ష్యదిశలో సాగుతుంది. ప్రతిభను నిరూపించుకుని, మెడికల్‌ సీటు సంపాదించటం సాధ్యమవుతుంది!

మెడికల్‌, డెంటల్‌ కళాశాలల్లో తొలి సంవత్సర ప్రవేశానికి సంబంధించిన నేషనల్‌ ఎలిజిబిలిటీ కమ్‌ ఎంట్రన్స్‌ టెస్ట్‌ (నీట్‌- యూజీ) 2017 సంవత్సరపు ప్రవేశాల ప్రక్రియ పూర్తయింది. తొలి సంవత్సరం పూర్తిగా ఈ పరీక్ష ఆధారంగా సీట్ల భర్తీ పూర్తయింది. అయితే ఈ ఏడాది వెబ్‌ కౌన్సెలింగ్‌ వల్ల గతంలో 2001లో ఇచ్చిన జీవో నెంబరు 555పై గందరగోళం ఏర్పడింది. దీనిపై హైకోర్టు జీవో 5 (2)పేరాపై స్టే ఇచ్చింది. దీని ద్వారా రిజర్వేషన్‌ విద్యార్థులకు 68 శాతం, జనరల్‌ కేటగిరికి 32 శాతం కావటంతో రిజర్వేషన్లు 50 శాతం దాటకూడదని హైకోర్టు స్టే ఇచ్చింది. కానీ ఈ ప్రక్రియ పూర్తయ్యేటప్పటికే ప్రవేశ ప్రక్రియ ముగిసినందున ర్యాంకులు కొంత తారుమారు అయ్యాయి. వచ్చే ఏడాది- 2018లో జరిగే అడ్మిషన్ల ప్రక్రియ ఈ సవరణ ఆధారంగా జరగవచ్చు.

నీట్‌ ఏటా మే మొదటివారంలోని ఆదివారం జరుగుతుంది. ఈ పరీక్షలో మొత్తం 180 ప్రశ్నలు. బయాలజీ- 90, ఫిజిక్స్‌- 45, కెమిస్రీ-్ట 45 ప్రశ్నలు ఉంటాయి. బయాలజీలోని 90 ప్రశ్నల్లో బోటనీ, జువాలజీలకు సరిగ్గా సగం ప్రశ్నలు ఉండవు. గత రెండు సంవత్సరాల పరీక్ష పత్రాల విశ్లేషణలో బోటనీలో ప్రశ్నల సంఖ్య జువాలజీ కంటే ఎక్కువగా ఉంటోంది. ఈ విభజన దాదాపు 50: 40గా చెప్పవచ్చు. ప్రతి సరైన సమాధానానికీ నాలుగు మార్కులు, తప్పు సమాధానానికి ఒక రుణాత్మక మార్కు.

కటాఫ్‌ మార్కులు
నీట్‌ ద్వారా ర్యాంకు పొందాలంటే విద్యార్థి కటాఫ్‌ మార్కుల కంటే అధికంగా సాధించాలి. జనరల్‌ కేటగిరీ విద్యార్థులకు 50వ పర్సంటైల్‌, ఎస్సీ, ఎస్టీ, ఓబీసీలకు 40వ పర్సంటైల్‌ కటాఫ్‌ను నిర్ణయించారు. అలాగే జనరల్‌ కేటగిరీలో వికలాంగ విద్యార్థులకు 45వ పర్సంటైల్‌ మార్కులు రావాలి. ఇది పర్సంటేజీ కాదు, పర్సంటైల్‌. 50వ పర్సంటైల్‌ అంటే ఏమిటో చూద్దాం. పరీక్ష రాసిన విద్యార్థుల మార్కుల మొత్తాన్ని ఆరోహణక్రమంలో అమరుస్తారు. పరీక్ష రాసిన విద్యార్థుల్లో మధ్య విద్యార్థి పొందిన మార్కును జనరల్‌ కేటగిరీ విద్యార్థుల కటాఫ్‌ మార్కుగా నిర్ణయిస్తారు. ఇది ఈ ఏడాది 131గా ఉండగా గత ఏడాది 143. మొత్తం రాసిన విద్యార్థుల్లో 40 పర్సంటేజీకి విద్యార్థి సంఖ్య ఎంత వస్తుందో ఆరోహణ క్రమంలో అమరిస్తే ఆ విద్యార్థి పొందే మార్కును ఓబీసీ, ఎస్సీ, ఎస్టీ విద్యార్థుల కటాఫ్‌ మార్కుగా పరిగణిస్తారు. ఈ మార్కు ఈ ఏడాది 107 మాత్రమే. అంటే 720 మార్కులకు జరిగిన పరీక్షలో బోటనీ, జువాలజీ, ఫిజిక్స్‌, కెమిస్ట్రీల్లో కలిపి 107 మార్కులు సాధిస్తే ఈ కేటగిరీ విద్యార్థులు ఎంబీబీఎస్‌లో చేరటానికి అర్హత సాధించినట్లే. ఇక్కడ సబ్జెక్టు కటాఫ్‌ లేదు. అంటే ప్రతి సబ్జెక్టుకూ కనీస మార్కులు సాధించవలసిన అవసరం లేదు.

ఒక సబ్జెక్టు చదివినా...
నీట్‌ ద్వారా సీటు సాధించటం సులభమే. నీట్‌లోని మొత్తం 180 ప్రశ్నల్లో 90 బయాలజీ, 90 ఫిజికల్‌ సైన్సెస్‌లో ఉంటాయి కదా! విద్యార్థి బోటనీ, జువాలజీ, ఫిజిక్స్‌, కెమిస్ట్రీల్లో ఏ ఒక్క సబ్జెక్టు చదివినా కూడా 45 ప్రశ్నల్లో 40 రాయగలుగుతారు. అంటే 40*4 = 160 మార్కులు సాధించినట్లే. కేవలం ఒక్క సబ్జెక్టు చదివిన విద్యార్థి కూడా క్వాలిఫైయింగ్‌ మార్కు సాధించుకొని మెడికల్‌/ డెంటల్‌ కళాశాలల్లో సీటు పొందటానికి అర్హత సాధించినట్లే. అయితే సీటు సాధించటానికి ఇంకా అదనపు మార్కులు సాధించవలసి ఉంటుంది. కేవలం బయాలజీలోని 90 ప్రశ్నల్లో విద్యార్థి 80 ప్రశ్నలకు సమాధానాలు గుర్తించగలిగితే 80*4 = 320 మార్కులు సాధించినట్లే. ఈ మార్కులకు ప్రైవేటు మెడికల్‌ కళాశాలల్లో సి- కేటగిరీ సీటు తప్పకుండా వస్తుంది. కొన్నింటిలో బి- కేటగిరీ సీటు కూడా వచ్చే అవకాశం ఉంది. బీడీఎస్‌ (డెంటల్‌) సీటు వస్తుంది. ప్రైవేటు కళాశాలల్లో ఈ బీ, సీ కేటగిరీ సీట్లు అంటే ఫీజు వ్యత్యాసం మాత్రమే. బి-కేటగిరీ సీట్లకు అయితే ఫీజు సుమారుగా సంవత్సరానికి 12 లక్షలు, సీ-కేటగిరీ సీటు అయితే ఏడాదికి ఫీజు 30 లక్షలు ఉంటుంది. ఇక ఎ-కేటగిరీ లేదా ప్రభుత్వ మెడికల్‌ కళాశాలల్లో సీటు సాధించాలంటే విద్యార్థి కొంత జాగ్రత్తగా చదవాల్సి ఉంటుంది. ఈ జాగ్రత్త వహిస్తే విద్యార్థి అయిదు ఏళ్లకు కలిపి ఒకటిన్నర కోటి (30,00,000*5 = 1,50,00,000) సంపాదించినట్లే. ఇది కూడా పెద్దగా కష్టతరమేమీ కాదు. ఫిజిక్స్‌, కెమిస్ట్రీల్లో 90 ప్రశ్నలు ఉంటాయి. వాటిలో విద్యార్థి కనీసం 50 ప్రశ్నలు సరిగ్గా రాస్తే 50*4 = 200 మార్కులు వచ్చినట్లే. బయాలజీలో 320, ఫిజికల్‌ సైన్సెస్‌లో 200 మొత్తం కలిపితే 520/720 మార్కులు సొంతం చేసుకున్నట్లే. ఈ మార్కులు తెచ్చుకుంటే ఏ-కేటగిరీలో సీటు పొందినట్లే. ఇంకా అదనంగా 10 ప్రశ్నలు చేయగలిగితే ప్రభుత్వ మెడికల్‌ కళాశాలలో సీటు! ఈ విధమైన ఆలోచనతో సరైన ప్రణాళికతో విద్యార్థి ప్రయత్నించాలి.

సూటిగానే నీట్‌ ప్రశ్నలు!
1. నీట్‌లో ఇంటర్మీడియట్‌ సిలబస్‌ వెలుపల నుంచి ప్రశ్నలు ఉంటాయా? ఉంటే సుమారుగా ఎంతశాతం రావచ్చు?
జ: 2012లో ఇంటర్మీడియట్‌ సిలబస్‌ను మార్చారు. సీఓబీఎస్‌ఈ అని భారతదేశంలోని వివిధ బోర్డుల నుంచి ఉమ్మడి సిలబస్‌ ప్రతిపాదన జరిగితే ఆ సిలబస్‌ను అప్పటి ఉమ్మడి ఆంధ్రప్రదేశ్‌ స్వీకరించింది. అంటే 2012 నుంచి జాతీయస్థాయి పోటీ పరీక్షల సిలబస్‌, తెలుగు రాష్ట్రాల సిలబస్‌ ఒకే విధంగా ఉంది. అయితే సీబీఎస్‌ఈలో బయాలజీ ఒకే సబ్జెక్టు. ఇక్కడ బోటనీ, జువాలజీ రెండు వేర్వేరు సబ్జెక్టులు. కాబట్టి మనకు కొంత అదనపు సిలబస్‌ ఉంది. మన సిలబస్‌కు మాత్రమే పరిమితమై తయారైనా దాదాపు అన్ని ప్రశ్నలకూ జవాబులు గుర్తించవచ్చు. గత రెండు సంవత్సరాల్లో 8 నుంచి 10 ప్రశ్నలు కింది తరగతుల నుంచి లేదా ప్రయోగదీపిక నుంచి అడుగుతున్నారు. అది తప్పితే మిగిలినవన్నీ మన పుస్తకాలకు పరిమితమైనవే.

2. రాష్ట్ర సిలబస్‌ చదివే విద్యార్థులు తీసుకోవాల్సిన జాగ్రత్తలు ఏమిటి?
జ: సిలబస్‌ ఒకటే కాబట్టి ప్రశ్నలు అడిగే తీరును రాష్ట్ర సిలబస్‌ చదివే విద్యార్థులు అవగాహన చేసుకోవాలి. మన పరీక్షల్లో నిర్దిష్ట ప్రశ్నలే పునరావృతమవుతాయి. కానీ సీబీఎస్‌ఈ పరీక్షా విధానంలో విద్యార్థి అవగాహన మీద ప్రశ్నలు ఉంటున్నాయి. అందువల్ల ఒక లెక్కకు ఏ ఫార్ములా వాడాలి అనే పద్ధతి కాకుండా ప్రశ్న సాధన తీరుకు ప్రాధాన్యం ఇవ్వాలి.ఆ దిశలో జాగ్రత్తలు తీసుకోగలిగితే రాష్ట్ర సిలబస్‌ విద్యార్థులు సీబీఎస్‌ఈ విద్యార్థుల కంటే తుది పరీక్షలో మెరుగ్గా చేసే అవకాశం ఉంటుంది.

3. ప్రశ్నల తీరు తికమక పెట్టేలా ఉంటుందా? సూటిగా ఉంటుందా? ప్రశ్నల నిడివి ఎక్కువ ఉంటుందా?
జ: ప్రశ్నల తీరు సరళంగానే ఉంటుంది. ప్రాథమిక అంశాల మీద పట్టు ఉన్న ఏ విద్యార్థి అయినా సులభంగానే చేయవచ్చు. సిద్ధాంతపరమైన అవగాహన లేకపోతే తికమకగా ఉన్నట్లుగా ఉంటుంది. వారు సన్నద్ధత విధానం మార్చుకోవాలి. ప్రశ్నలు సూటిగానే ఉంటున్నాయి. మొత్తం 180 ప్రశ్నల్లో పది ప్రశ్నలవరకూ అనుసంధానంతో ఇస్తున్నారు. ఎంసెట్‌తో పోలిస్తే ప్రశ్నల నిడివి చాలా తక్కువని చెప్పవచ్చు. మొత్తం 180 ప్రశ్నలతో ప్రశ్నపత్రం 24 పేజీలలోపే ఉంటుంది.

4. పరీక్షకు ఇచ్చిన వ్యవధి సరిపోతుందా? లేదా?
జ: ఎంసెట్‌లో అయినా చాలామంది విద్యార్థులు సమయం సరిపోలేదని అనేవారు. కానీ ఇప్పుడు తుది పరీక్షలో ప్రశ్నల సంఖ్య పెరిగినప్పటికీ ఏ విద్యార్థిలోనూ ఆ భావం కనబడటం లేదు. కాబట్టి ఆ సంశయం వదిలిపెట్టి అభ్యాసం, పునశ్చరణలకు ప్రాధాన్యం ఇస్తే సమయాభావం కలగదు.

5. రుణాత్మక మార్కుల గురించి ఎంతమేరకు పట్టించుకోవాలి?
జ: తుది ఫలితాలపై అత్యధికంగా ప్రభావం చూపేవి రుణాత్మక మార్కులే. ఈ విషయంపై విద్యార్థి అవగాహన పెంచుకోవాలి. ప్రశ్న, నాలుగు జవాబులు పూర్తిగా తెలియనివాటి జోలికి వెళ్లవద్దు. నాలుగు జవాబుల్లో రెండు కచ్చితంగా కాదని తెలిస్తే.. వాటికి జవాబులు గుర్తించటం కొంతవరకూ మేలు. అంటే సంభావ్యత 50 శాతం లేదా ఆపైన ఉంటేనే జవాబులు గుర్తించాలి. 25 శాతంలోపు అయితే ఎటువంటి రిస్కూ తీసుకోవద్దు.

‘నీట్‌’ బయాలజీలో 320, ఫిజికల్‌ సైన్సెస్‌లో 200 మార్కులు తెచ్చుకోగలిగితే మొత్తం 520/720 మార్కులు సొంతం చేసుకున్నట్లే. ఈ మార్కులు తెచ్చుకుంటే ఎ-కేటగిరీలో సీటు పొందినట్లే. ఇంకా అదనంగా 10 ప్రశ్నలకు కచ్చితంగా సమాధానాలు గుర్తించగలిగితే ఏకంగా ప్రభుత్వ వైద్య కళాశాలలోనే ఎంబీబీఎస్‌ కోర్సులో ప్రవేశం లభిస్తుంది !

6. ఉత్తర భారతదేశ ప్రొఫెసర్లు పేపరు తయారుచేస్తారట కదా. మన తెలుగు రాష్ట్రాలవారు సన్నద్ధతలో, అవగాహనలో జాగ్రత్త పడాల్సిన విషయాలున్నాయా?
జ: నీట్‌ నిర్వహించేది సీబీఎస్‌ఈ. ఈ సిలబస్‌ కలిగిన విద్యాసంస్థలు ఉత్తర భారతదేశంలోనే ఎక్కువ. దానివల్ల ఎక్కువ అధ్యాపకులు ఆ ప్రాంతం నుంచి ఉంటారు. కాబట్టి ప్రశ్నపత్రం సంపుటీకరణలో వారి ప్రాధాన్యం ఎక్కువగానే ఉంటుంది. తెలుగు రాష్ట్రాల విద్యార్థులు బయాలజీకి సంబంధించి రాష్ట్రప్రభుత్వ ప్రచురణలతో పాటు ప్రశ్నించే విధాన అవగాహన కోసం ఎన్‌సీఈఆర్‌టీ ఉదాహరణల్ని చదవాలి. భౌతిక, రసాయన శాస్త్రాల్లో జేఈఈ మెయిన్‌ ప్రాతిపదికన తయారుకావలిసిన అవసరం ఉంది. తెలుగు రాష్ట్రాల్లో బైపీసీ విద్యార్థులకు గణితం అసలు లేదు. కానీ సీబీఎస్‌ఈ విద్యార్థులకు బైపీసీతో పాటు ఇంకొక సబ్జెక్టు కచ్చితంగా తీసుకోవాలి. దీనివల్ల వారికి మన విద్యార్థుల కంటే లెక్కలపై పట్టు ఎక్కువ. దీన్ని అధిగమించటానికి జేఈఈ మెయిన్‌ ప్రణాళికనే ఫిజిక్స్‌, కెమిస్ట్రీల్లో ప్రాతిపదికగా తీసుకోవాలి. రుణాత్మక మార్కులపై ఎక్కువ అవగాహన ఉండదు కాబట్టి వీలైనన్ని నమూనా పరీక్షలను రాస్తూ వ్యక్తిగత దోషాలను అధిగమించే స్థాయికి చేరుకోవాలి. నిర్దిష్ట ప్రణాళికతో నీట్‌ బయాలజీలో 90 ప్రశ్నల్లో 80, ఫిజిక్స్‌, కెమిస్ట్రీల్లోని 90 ప్రశ్నల్లో 60 ప్రశ్నలకు సరిగా జవాబులు రాసే స్థితికి విద్యార్థి చేరుకుంటే చాలు. ప్రభుత్వ వైద్యకళాశాలలో సీటు సాధించినట్లే!

Posted on 18-09-2017