కేవలం పదో తరగతి లేదా ఐటీఐతో రైల్వేలో గ్రూప్-డి ఉద్యోగాన్ని పొందడానికి ఆర్ఆర్‌బీ రాత పరీక్షలు నిర్వహిస్తుంది. ఈ పోస్టులకు ఇంటర్వ్యూలు ఉండవు. రాత పరీక్షల్లో అభ్యర్థులు చూపిన ప్రతిభ ఆధారంగా ఎంపిక జరుగుతుంది.
గ్రూప్-డి కేటగిరీ పోస్టుల భర్తీకి ఈ ఏడాది మే మొదటి వారం నుంచి రాత పరీక్షలు జరుగనున్నాయి. ఈ నేపథ్యంలో గ్రూప్-డి పరిధిలోకి వచ్చే కేటగిరీల వివరాలు, పరీక్ష సిలబస్ తదితరాంశాల గురించి తెలుసుకుందాం.

గ్రూప్-డి కేటగిరీ పోస్టులు:
1) హెల్పర్ - కలాశీ.
2) కూప్లింగ్ కలాశీ (ఎల్‌సీ పోర్టర్, బాక్స్ పోర్టర్).
3) గేట్‌మ్యాన్ (హెల్పర్ / ట్రాలీమ్యాన్)
4) హమాలీ (హెల్పర్ కలాశీ, డీజిల్ కలాశీ).
5) ట్రాక్‌మ్యాన్/ గ్యాంగ్‌మ్యాన్
6) హెల్పర్ (మెకానికల్, ఎలక్ట్రికల్).
7) సఫాయీవాలా (మెడికల్, కమర్షియల్, మెకానికల్, డిపో).
ఈ పోస్టులకు మొదట దేహదారుఢ్య పరీక్షలు నిర్వహించి దీన్లో అర్హత సాధించిన వారిని రాత పరీక్షలకు ఆహ్వానిస్తారు. రాత పరీక్ష పూర్తిగా ఆబ్జెక్టివ్ విధానంలో సాగుతుంది. దీన్లో జనరల్‌నాలెడ్జ్/ అవేర్‌నస్, మ్యాథమెటిక్స్, జనరల్ సైన్స్, రీజనింగ్ అంశాలపై ప్రశ్నలు వస్తాయి. ఇవి పదో తరగతి స్థాయిలో ఉంటాయి. రాత పరీక్షలో ప్రతిభ చూపిన వారి సర్టిఫికెట్లు తనిఖీ చేసి, వైద్య పరీక్షలు నిర్వహించి తుది ఎంపిక చేస్తారు.