కేకు పైన కొవ్వొత్తులతో అనారోగ్య సమస్యలు!

లండన్‌: పుట్టిన రోజున కేకు కోసి.. బంధుమిత్రులతో పంచుకోవడం ఎవరికైనా సంతోషదాయకం. కేకు మీద కొవ్వొత్తులు వెలిగించి వాటిని నోటితో వూది ఆర్పడం మాత్రం అంత శ్రేయస్కరం కాదని తాజా పరిశోధన చెబుతోంది. ముఖ్యంగా పిల్లలు ఇలా నోటితో వూదే క్రమంలో వారి నోటి నుంచి ఎంతోకొంత లాలాజలం తుంపరగా కేకు మీద పడుతుంది. సాధారణంగా నోటిలో ఎక్కువ శాతం బ్యాక్టీరియా ఉంటుంది. అదంతా హానికరం కాదు. కానీ ఇలా లాలాజలం తుంపరలలోని బ్యాక్టీరియా.. కేకుపైన అలంకరించే ఐసింగ్‌ పొరపై పడగానే విపరీతంగా పెరిగిపోతుందని దక్షిణ కరోలినాలోని క్లెమ్సన్‌ యూనివర్సిటీ పరిశోధకులు చెబుతున్నారు. నోటి నుంచి వెలువడే బ్యాక్టీరియా ఐసింగ్‌ మీద పడగానే 14 రెట్లు పెరుగుతుందని గుర్తించారు. అయితే ఇది ఆరోగ్యానికి అంతగా హానికలిగించదని.. పుట్టిన రోజు చేసుకునే పిల్లలు ఏదైనా అనారోగ్యంతో ఉండి.. ఇలా కొవ్వొత్తులను వూదే పనిచేస్తే మాత్రం ఇతరులకూ సమస్యేనని వివరిస్తున్నారు.

ఇంధనంగా కార్బన్‌ డైఆక్సైడ్‌!

వాషింగ్టన్‌: భూతాపానికి కారణమవుతున్న కార్బన్‌ డైఆక్సైడ్‌కు శాస్త్రవేత్తలు సరికొత్త విరుగుడును కనుగొన్నారు. హానికరమైన ఈ వాయువును ఇంధనంగా మార్చడంలో సాయపడే ఒక పదార్థాన్ని అభివృద్ధి చేశారు. ఈ ప్రక్రియలో అవాంఛనీయ ఉత్పత్తులేవీ వెలువడకపోవడం విశేషం. ఈ కొత్త పదార్థం స్పాంజీలా ఉంటుంది. నికెల్‌ సేంద్రియ స్ఫటిక ఆకృతితో కూడిన ఈ పదార్థంపైకి కాంతిని ప్రసరింపచేసినప్పుడు అద్భుత లక్షణాన్ని ప్రదర్శించింది. కార్బన్‌ డైఆక్సైడ్‌ను కార్బన్‌ మోనాక్సైడ్‌గా వాయువుగా మార్చేసింది. అనంతరం ఈ వాయువును ద్రవ ఇంధనాలు, ద్రావకాలు, ఇతర ప్రయోజనకర ఉత్పత్తులుగా మార్చవచ్చని శాస్త్రవేత్తలు తెలిపారు. హైడ్రోజన్‌, మిథేన్‌ వంటి ఇతర వాయువుల ఆచూకీ లేకుండానే కార్బన్‌ మోనాక్సైడ్‌ను ఉత్పత్తి చేసినట్లు అమెరికా ఇంధన శాఖకు చెందిన లారెన్స్‌ బర్కెలీ నేషనల్‌ లేబొరేటరీ శాస్త్రవేత్త హైమేయ్‌ జెంగ్‌ చెప్పారు. వినూత్న లేజర్‌ రసాయన విధానాన్ని ఉపయోగించి ఈ కొత్త పదార్థాన్ని శాస్త్రవేత్తలు అభివృద్ధి చేశారు.

వాల్‌నట్స్‌తో... పేగుశుద్ధి, ఆరోగ్యవృద్ధి!

న్యూయార్క్‌: పేగుల్లోని సూక్ష్మజీవుల వ్యవస్థ స్వభావాన్ని సమూలంగా మార్చి, ఆరోగ్యాన్ని చేకూర్చే అద్భుతశక్తి వాల్‌నట్స్‌కు ఉందని తాజా పరిశోధనలో వెల్లడైంది! ఆహారంలో భాగంగా నిత్యం వీటిని తీసుకోవడం మేలని పరిశోధకులు అభిప్రాయపడుతున్నారు. ‘ఎల్‌ఎస్‌యూ హెల్త్‌ న్యూ ఓర్లీన్స్‌ స్కూల్‌ ఆఫ్‌ మెడిసిన్‌’కు చెందిన లూరీ బాయిలీ బృందం... కొందరికి ఆహారంలో భాగంగా కొద్దిరోజుల పాటు వాల్‌నట్స్‌ను అందించింది. మరికొందరికి సాధారణ ఆహారమే ఇచ్చింది. తర్వాత వారి పేగుల్లోని బ్యాక్టీరియాను విశ్లేషించగా, వాల్‌నట్స్‌ తీసుకున్నవారిలో చాలా మార్పు కనిపించింది. వారి పేగులు శుద్ధయి, హితకర సూక్ష్మజీవుల సంఖ్య పెరగడమే కాకుండా, వాటి వ్యవస్థ కూడా బలోపేతమైంది. వాల్‌నట్స్‌లో ఉండే ‘ప్రిబయోటిక్స్‌’ అనే పోషకం ప్రత్యేకంగా ఆరోగ్యప్రద బ్యాక్టీరియా వృద్ధికి తోడ్పడుతుండటమే ఇందుకు కారణమని పరిశోధకులు భావిస్తున్నారు.

నాడిని పట్టే సాలీడు పట్టు!

లండన్‌: టాంజానియాలోని సాలీడది. పేరు... గోల్డెన్‌ ఓబ్‌-వీవర్‌! అది విడిచిపెట్టే పట్టు, ఓ పట్టాన తెగదు. నైలాన్‌ దారం కంటే దృఢమైంది కాబట్టే.. మత్స్యకారులు దీంతో వలలు చేసుకుని, చేపలు కూడా పడుతుంటారు! అంతేకాదు. ఇది 250 డిగ్రీల ఉష్ణోగ్రతనైనా ఇట్టే తట్టుకోగలదు. ఉక్కు కంటే నాలుగురెట్లు అధికంగానూ సాగుతుంది. ఇవన్నీ ఒకెత్తయితే, సమర్థవంతమైన సూక్ష్మజీవి నిరోధకం కావడం మరొకెత్తు! ఇన్ని సుగుణాలున్న సాలీడు పట్టును ఔషధాల్లో ఎలా ఉపయోగించుకోవచ్చన్న అంశంపై వియనా ఆరోగ్య విశ్వవిద్యాలయానికి చెందిన ప్లాస్టిక్‌ సర్జన్‌ క్రిస్టినే రీడ్కి పరిశోధన సాగించారు. ‘‘ఈ సాలీడు పట్టు సిరలు, నాడులకు సమర్థంగా అతుక్కుని.. కణ విభజన, కణ ప్రసారానికి సమర్థంగా తోడ్పడుతోంది. దెబ్బతిన్న నాడులు, కణజాల అనుసంధాన చికిత్సకు దీనిని సమర్థంగా వినియోగించుకోవచ్చు’’ అని ఆమె తెలిపారు.

కొత్త భాష మాట్లాడడంలో బహిర్ముఖులే ఉత్తమం!

దిల్లీ: కొత్త భాషను నేర్చుకునే బహిర్ముఖులు(ఎక్స్‌ట్రావర్ట్‌) మాట్లాడడం, చదవడంలో ముందుంటారని.. అంతర్ముఖులు(ఇంట్రావర్ట్‌) మాత్రం మంచి శ్రోతలుగా ఉంటారని శాస్త్రవేత్తలు చెబుతున్నారు. భారత్‌లో చైనా విద్యార్థులు ఆంగ్ల భాషను నేర్చుకునేటప్పుడు ‘బహిర్ముఖ-అంతర్ముఖ’ ధోరణి ప్రభావం ఉంటుందా అనే విషయమై సెంట్రల్‌ పంజాబ్‌వర్సిటీకి చెందిన షాక్లా జర్ఫార్‌, ఇతర పరిశోధకులు చేసిన అధ్యయనంలో ఈ విషయం వెల్లడైంది. సాధారణంగా పాశ్చాత్య విద్యార్థులతో పోల్చితే చైనా విద్యార్థులు ఉపాధ్యాయులు చెప్పే విషయాలను చాలా జాగ్రత్తగా వింటారు. కానీ, అంతర్ముఖ వైఖరి చైనా విద్యార్థులు ద్వితీయ భాషగా ఆంగ్లాన్ని నేర్చుకోవడంపై తీవ్ర ప్రభావం చూపుతోందని కొన్ని అధ్యయనాలు పేర్కొన్నాయి. తాజా అధ్యయనంలో భాగంగా పరిశోధకులు తమిళనాడులోని వీఐటీ వర్సిటీకి చెందిన 145 మంది చైనా విద్యార్థుల సమాచారాన్ని విశ్లేషించారు. వీరిలో 47శాతం మంది బహిర్ముఖులుగాను, 35శాతం మంది అంతర్ముఖులుగాను ఉన్నట్లు గుర్తించారు. ఈ మనస్తత్వాలు ఆంగ్ల భాష నేర్చుకోవడంపై ప్రభావం చూపుతున్నట్లు నిర్ధారించారు.

‘దేవదూత రేణువు’ ఆచూకీ దొరికింది!

లండన్‌: భౌతికశాస్త్రవేత్తల 80 ఏళ్ల అన్వేషణ ఫలించింది. క్వాంటమ్‌ భౌతికశాస్త్రంలో కీలక మైలురాయి ఆవిష్కృతమైంది. పదార్థ, వ్యతిరేక పదార్థ లక్షణాలను కలిగిన ఒక ఏంజెల్‌ రేణువును శాస్త్రవేత్తలు తొలిసారిగా గుర్తించారు. క్వాంటమ్‌ కంప్యూటింగ్‌ విప్లవాన్ని సాకారం చేయడంలో ఇది కీలకపాత్ర పోషిస్తుంది. ప్రస్తుత పరిజ్ఞానంతో పోలిస్తే చాలా శక్తిమంతమైన యంత్రాలను రూపొందించడానికి వీలవుతుంది. అమెరికాలోని స్టాన్‌ఫర్డ్‌ విశ్వవిద్యాలయానికి చెందిన షౌచెంగ్‌ జాంగ్‌ బృందం ఈ ఘనత సాధించింది. విశ్వం పుట్టుకకు కారణమైన బిగ్‌బ్యాంగ్‌ సమయంలో పదార్థం (మ్యాటర్‌), వ్యతిరేక పదార్థం (యాంటీ మ్యాటర్‌) సమాన స్థాయిలో ఉత్పత్తయిందని శాస్త్రవేత్తలు సూత్రీకరించారు. రెండు పదార్థాలు కలుసుకుంటే.. అవి పరస్పరం నాశనం చేసుకుంటాయి. తమలోనే వ్యతిరేక రేణువులను కలిగిన ఒక కొత్త తరగతి రేణువులు కూడా ఉండొచ్చని 1937లో ఇటలీ భౌతికశాస్త్రవేత్త ఎటోర్‌ మాజోరానా ప్రతిపాదించారు. వీటికి ఫెర్మియాన్లని పేరు పెట్టారు. వాటి ఉనికికి సంబంధించిన ఆధారాలను ఇప్పుడు శాస్త్రవేత్తలు తొలిసారిగా గుర్తించారు. ఫెర్మియాన్‌ ఉనికిని తెలిపే ‘క్వాసీ రేణువు’లను ఆచూకీని కనుగొన్నారు. దీనికి దేవదూత రేణువు (ఏంజిల్‌ పార్టికిల్‌)గా పేరు పెట్టారు. దీనిలో పదార్థ, వ్యతిరేక పదార్థ లక్షణాలు ఉన్నాయి. దీంతో ప్రాథమిక భౌతికశాస్త్రంలో అత్యంత విస్తృతంగా సాగిన ఒక అన్వేషణకు ముగింపు పడినట్లయింది. ఫెర్మియాన్లు ఉనికిలో ఉంటే క్వాంటమ్‌ కంప్యూటర్ల నిర్మాణం వీలవుతుంది.

ఉదయాన్నే ‘అల్పా’హారం కాదు..సుష్ఠుగా తినండి

లాస్‌ఏంజెల్స్‌: ఉదయాహారాన్ని మహారాజులా సుష్ఠుగా తినాలి.. మధ్యాహ్న భోజనాన్ని పేదవాడి ఆహారంలా తేలిగ్గా తీసుకోవాలి.. భారత్‌లో పూర్వకాలం నుంచి ఉన్న నానుడి ఇది. అమెరికాలోని లాస్‌ఏంజెల్స్‌ పరిశోధకులు తాజాగా ఈ విషయాన్నే 50 వేల మందిపై పరిశోధన చేసి చెబుతున్నారు. ‘‘రోజు మొత్తంలో ఎక్కువ ఆహారాన్ని ఉదయం పూట తినేవారి బరువు అదుపులో ఉంటుంది. అలాకాకుండా.. మధ్యాహ్నం ఎక్కువగా తినేవారు ఎక్కువ బరువు పెరుగుతారు. ఉదయం పూట సుష్ఠుగా తింటే.. ఆ తరువాత స్వీట్లు, ఇతర చిరుతిళ్లు తినాలనే ఆసక్తి తగ్గుతుంది. ఈ కారణంగా బరువు పెరగరు’’ అని స్పష్టం చేస్తున్నారు. రాత్రి భోజనం మానేసి.. ముందు రోజు భోజనానికి.. తరువాత రోజు ఉదయాహారానికి మధ్య 18 గంటల సమయం ఉండేలా చూసుకుంటే చక్కటి ఆరోగ్యం సొంతమవుతుందని సూచిస్తున్నారు. అంటే మధ్యాహ్నం 12 గంటలకు భోజనం చేస్తే.. మళ్లీ తరువాత రోజు ఉదయం 6 గంటలకు అల్పాహారం తీసుకోవాలి.

వంటల్లో పదార్థాలను కనిపెట్టే కృత్రిమ మేధస్సు

బోస్టన్‌: వంటకాలు ఏమేం పదార్థాలతో చేశారో ఇట్టే కనిపెట్టే కృత్రిమ మేధస్సు (ఆర్టిఫిషియల్‌ ఇంటెలిజెన్స్‌)ను పరిశోధకులు అభివృద్ధిచేశారు. ‘పిక్‌టురెసిపీ’గా పిలిచే ఈ సాంకేతికత మన అభిరుచులకు సరిపడే మరిన్ని కొత్త రుచులనూ మనకు పరిచయం చేయగలదట. అంతేకాదు కొత్త వంటలు నేర్చుకోవడానికీ ఇది తోడ్పడుతుందట. ఆహార పదార్థాల చిత్రాలను పరిశీలించడం ద్వారా ఇది పనిచేయడం విశేషం. దీని కోసం పది లక్షలకుపైగా వంటకాల తయారీ విధానాలతో అమెరికాలోని మసాచుసెట్స్‌ సాంకేతిక విద్యా సంస్థ (ఎంఐటీ) నిపుణులు ఓ సమాచారనిధి సిద్ధంచేశారు. మనం పిక్‌టురెసిపీలో ఆహార పదార్థాల ఫోటోలను ఉంచిన వెంటనే.. ఇది సమాచార నిధిని జల్లెడ పడుతుంది. చిత్రాల్లోని పదార్థాలను గుర్తుపడుతూ ఈ వంటకానికి దగ్గరగా ఉండే రుచులను మన ముందు ఉంచుతుంది. అయితే వంటకాల్లో పదార్థాలు మరీ ఎక్కువైనప్పుడు ఇది తప్పటడుగు వేస్తోందని పరిశోధకులు యూసుఫ్‌ ఐతార్‌ వివరించారు.

‘సిజేరియన్‌’ అవసరం రాకూడదనుకుంటే..

లండన్‌: పండంటి బిడ్డను కనాలని ఎవరనుకోరు! ఇందుకోసం మహిళలు గర్భం దాల్చడానికి ముందు నుంచే పోషకాహారం, వ్యాయామంపై దృష్టిపెట్టాలని నిపుణులు సూచిస్తున్నారు. ప్రపంచవ్యాప్తంగా బిడ్డల్ని కనే వయసున్న మహిళల్లో సగం మంది అధిక బరువు లేక వూబకాయం సమస్యను ఎదుర్కొంటున్నారని లండన్‌లోని క్వీన్‌ మేరి యూనివర్సిటీ పరిశోధకులు చెబుతున్నారు. ‘‘ఈ పరిణామం గర్భం దాల్చాక ఆ మహిళపై, తరువాత బిడ్డపై ప్రభావం చూపుతుంది. సరైన ఆహారంతో పాటు తగినంత వ్యాయామం (ఏరోబిక్స్‌, సైక్లింగ్‌ వంటివి) చేస్తే గర్భిణుల బరువు పెరుగుదలలో సరాసరిన 700 గ్రాముల తగ్గుదల ఉంటుంది. దీని వల్ల సిజేరియన్‌ అవసరం 10 శాతం వరకూ తగ్గుతుంది’’ అని సూచిస్తున్నారు. ‘‘ఆరోగ్యకరమైన ఆహారం తీసుకుంటూ.. తగినంత వ్యాయామం చేసే ప్రతి 40 మంది మహిళల్లో ఒకరికి మాత్రమే సిజేరియన్‌ అవసరం ఉంటుంది’’ అని పరిశోధకురాలు షకీలా తంగరతినమ్‌ తెలిపారు. జీవనశైలిలో మార్పులతో గర్భిణుల్లో వూబకాయం సమస్య 24 శాతం వరకూ తగ్గుతున్నట్లు వెల్లడించారు. గర్భిణులు వ్యాయామం చేయరాదనే భావన ఉన్న నేపథ్యంలో తమ పరిశోధనకు ప్రాధాన్యం ఉందని షకీలా తెలిపారు.

ఆనందంతో మహా‘ఆరోగ్యం’!

లండన్‌: ‘ఆరోగ్యమే మహా భాగ్యం’ అన్నట్లు ఆనందమే గొప్ప శారీరక ఆరోగ్యానికి కారణమట. జీవితంలో సంతృప్తి, ఉల్లాసంగా నవ్వుతూ సాటివారిని నవ్విస్తూ ఉండేవారు శారీరకంగాను ఆరోగ్యంగా ఉంటారని తేలింది. సంతోషకరమైన మానసిక అలవాట్లను అలవర్చుకునే బాధ్యత మాత్రం వీరిపైనే ఆధారపడి ఉంటుందని పరిశోధకులు చెబుతున్నారు. ‘సంతోషంగా ఉండేవారు నిస్సందేహంగా ఆరోగ్యంగా, ఎక్కువ కాలం జీవిస్తారు. దీర్ఘకాలం అసంతృప్తితో ఉంటే అనారోగ్యం రావడం ఖాయం. పొగతాగకుండా ఉండటం, వ్యాయామాలు చేయడం కూడా ఆరోగ్యానికి కారణం’ అని ప్రొఫెసరు ఎడ్‌ డీనెర్‌ పేర్కొన్నారు. ‘ఆనందం, ఒత్తిడి, నిరాశ అనేవి మన గుండె ఆరోగ్యంపై ప్రభావం చూపుతాయి. వ్యాధులను ఎదుర్కోవడంలో మన రోగ నిరోధక వ్యవస్థ బలం, గాయాల నుంచి త్వరగా కోలుకోవడం అనేది ఆత్మాశ్రయ శ్రేయస్సు(సబ్జెక్టివ్‌ వెల్‌బీయింగ్‌)పై ఆధారపడి ఉంటుందని ఇప్పటికే పలు అధ్యయనాల్లో నిర్ధారణ అయింది.

రోజుకో నిముషం పరుగెత్తినా ఎముకల్లో దృఢత్వం

లండన్‌: రోజూ కనీసం ఒకటి, రెండు నిముషాలు వేగంగా పరుగెత్తినా మహిళల ఎముకలు ఆరోగ్యంగా ఉంటాయని ఒక అధ్యయనంలో తేలింది. ఎముకలపై ఒత్తిడి పడేలా బరువులు ఎత్తినా మంచిదేనట. రోజుకు ఒక్క నిముషం పరుగెత్తిన మహిళలతో పోలిస్తే, 60 నుంచి 120 సెకన్లపాటు పరుగెత్తిన స్త్రీల ఎముకల ఆరోగ్యం నాలుగుశాతం మెరుగవుతుంది. రెండు నిముషాల కంటే ఎక్కువ పరుగెత్తిన స్త్రీల ఎముకలు ఆరు శాతం ఎక్కువ ఆరోగ్యంగా ఉంటాయి. ‘ఒకేసారి నిముషం పరుగెత్తాలా, రోజంతా అప్పుడప్పుడు నిముషం పరుగెత్తాలా? అనేది మాకు తెలియదు. ఒక్కరోజులో ఒకటి నుంచి రెండు నిముషాలు వేగంగా పరుగెత్తడం కంటే వారంలో ఒకటి, రెండురోజుల్లో ఇంతకంటే ఎక్కువ సమయం చేసినా అదే సత్ఫలితాలు లభిస్తాయా? అనేదీ చెప్పలేం’ అని ఎక్స్‌టర్‌ విశ్వవిద్యాలయానికి చెందిన విక్టోరియా స్టైల్స్‌ అనే పరిశోధకుడు చెప్పారు. ఎముకలు దృఢంగా ఉంటే వృద్ధాప్యంలో అవి చిట్లిపోవడం, గుల్లబారడం(ఆస్టియోపోరోసిస్‌) జరగదు. 2500 మంది స్త్రీలపై జరిపిన అధ్యయనం వివరాలు ‘ఇంటర్నేషనల్‌ జర్నల్‌ ఆఫ్‌ ఎపిడిమియోలజీ’లో ప్రచురితమయ్యాయి.

చిన్నారులకు ఒకటి కంటే రెండు భాషలు నేర్పితే మేలు

మాడ్రిడ్‌(స్పెయిన్‌): ఒక్క భాష మాత్రమే మాట్లాడే తల్లిదండ్రుల దగ్గర పెరిగే పిల్లల కంటే రెండు భాషలు మాట్లాడే అమ్మానాన్నల దగ్గర పెరిగే చిన్నారుల్లో జ్ఞాన సామర్థ్యాలు(కాగ్నిటివ్‌ అబిలిటీస్‌) అభివృద్ధి చెందుతాయని తేలింది. ముఖ్యంగా వీరు సమస్యలను సులువుగా పరిష్కరించుకోగలుగుతారని వాషింగ్టన్‌ విశ్వవిద్యాలయానికి చెందిన ఐల్యాబ్స్‌ శాస్త్రవేత్త నజ ఫెర్జన్‌ రమిరెజ్‌ పేర్కొన్నారు. పుట్టి, పెరిగే ఇంట్లో ఒక్క భాష మాత్రమే మాట్లాడుతుంటే.. రెండో భాష నేర్పడానికి తగిన వాతావరణం సృష్టించడం ద్వారా ప్రతి చిన్నారిలో జ్ఞాన సామర్థ్యాలను పెంపొందించవచ్చని చెప్పారు. సాంఘిక సంకర్షణ(సోషల్‌ ఇంటరాక్షన్‌), ఆటలు, ఉపాధ్యాయులు సదరు రెండో భాషను స్పష్టంగా, ఎక్కువగా చిన్నారులతో మాట్లాడటం ద్వారా ఈ వాతావరణాన్ని సృష్టించవచ్చన్నారు. స్పెయిన్‌లోని మాడ్రిడ్‌లో ఏడు నెలల నుంచి 33.5 నెలల వయస్సు గల 280 మందిపై చేసిన పరిశోధన వివరాలు ‘మైండ్‌, బ్రెయిన్‌ అండ్‌ ఎడ్యుకేషన్‌’ అనే జర్నల్‌లో జులై 17న ప్రచురితమయ్యాయి.

దాల్చిన చెక్కతో జీవక్రియ రుగ్మతలకు పరిష్కారం

దిల్లీ: భారతీయ మసాలా దినుసుల్లో ఒకటైన దాల్చిన చెక్క.. జీవక్రియ రుగ్మతలకు ఔషధంలా పనిచేస్తుందని తాజా పరిశోధన చెబుతోంది. ఉదరకోశ వూబకాయం, మధుమేహం, అధికస్థాయి ట్రైగ్లిజరైడ్స్‌, హైపర్‌టెన్షన్‌ తదితర సమస్యలున్న 116 మంది స్త్రీ పురుషులపై నిర్వహించిన పరిశోధన ఆధారంగా దిల్లీ వైద్యులు ఈ విషయాన్ని వెల్లడించారు. ప్రయోగంలో పాల్గొన్న వారికి ఆహారంలో రోజుకు 3 గ్రాముల చొప్పున దాల్చిన చెక్క పొడి ఇచ్చారు. వీరితో నిత్యం 45 నిమిషాల పాటు వేగంగా నడిచే వ్యాయామం చేయించారు. 16 వారాల అనంతరం వీరి బరువులో సరాసరిన 4 కిలోల బరువు తగ్గుదల, పరగడుపున రక్తంలో చక్కెర స్థాయి, గ్లైసోసైలేటెడ్‌ హెమోగ్లోబిన్‌, నడుము చుట్టుకొలతలో తగ్గుదల గుర్తించారు. రక్తపోటు, కొలెస్ట్రాల్‌, ఇతర అంశాల్లోనూ వీరిలో మెరుగైన ఫలితాలు నమోదైనట్లు పరిశోధకులు తెలిపారు. మొత్తంగా మనిషి జీవక్రియలను ఈ ఆహార దినుసు మెరుగుపరుస్తుందని వెల్లడించారు. ‘ఫోర్టిస్‌ డయాబెటిస్‌ ఒబెసిటీ అండ్‌ కొలెస్ట్రాల్‌ ఫౌండేషన్‌’లో నిర్వహించిన ఈ పరిశోధన వివరాలు ‘లిపిడ్స్‌ ఇన్‌ హెల్త్‌ అండ్‌ డిసీజ్‌’ జర్నల్‌లో ప్రచురితమయ్యాయి.

ఈ టీకాతో హృదయం పదిలం!

న్యూయార్క్‌: దేశమేదైనా అత్యధిక మరణాలకు కారణమవుతోంది... గుండె వైఫల్యం! అందుకు ప్రధాన కారణం- నాళాల్లో కొవ్వు పేరుకుపోయి రక్త ప్రసరణ సాఫీగా సాగకపోవడం. కానీ, ఇకా భయం అక్కర్లేదంటున్నారు ఆస్ట్రియా, నెదర్లాండ్స్‌లకు చెందిన శాస్త్రవేత్తలు. వారు అభివృద్ధిచేసిన టీకా కొవ్వును సమర్థంగా కరిగించి, హృదయానికి రక్షణ కల్పిస్తుందట. కొవ్వు అధికంగా ఉండే ఆహార పదార్థాలను తరచూ తినడం వల్ల, శరీరంలో సాంద్రత తక్కువగా ఉండే లిపోప్రొటీన్లు గుండెకు రక్తాన్ని చేరవేసే ధమనుల్లో పోగుబడతాయి. పైగా, వీటి చుట్టూ పీసీఎస్‌కే9 అనే మాంసకృత్తులు అల్లుకుపోయి, వాటిని కదలకుండా చేస్తాయి. దీంతో రక్తప్రసారానికి ఆటంకాలు ఏర్పడి గుండె వైఫల్యం చెందుతుంది. అయితే, పరిశోధకులు తయారుచేసిన ‘ఏటీ04ఏ’ అనే టీకా.. పీసీఎస్‌కే9ను లక్ష్యంగా చేసుకుంటుంది. లిపోప్రొటీన్ల నుంచి వాటిని విడగొడుతుంది. తర్వాత కొవ్వు కణాలను ధమనుల నుంచి బయటకు తరిమేస్తుంది. ఎలుకలపై ఈ వ్యాక్సిన్‌ను ప్రయోగించగా.. మొత్తం కొవ్వు 53%, ధమనుల్లో పేరుకుపోయిన ప్రొటీన్లు 64%, రక్తనాళాల వాపులు 28% తగ్గినట్లు గుర్తించామని శాస్త్రవేత్తలు తెలిపారు.

అర్థవంతమైన లంకెలతో.. స్మృతులు పదిలం

టొరంటో: ఏదైనా సమాచారాన్ని గుర్తుపెట్టుకోవాలని అనుకుంటున్నారా? అయితే పదేపదే వల్లెవేయడం ఆపి.. అర్థవంతమైన అంశాలతో దానికి లంకె పెట్టండి. ఇలాచేస్తే చిరకాలం గుర్తుంటుందని తాజా పరిశోధనలో తేలింది. కెనడాలోని బేక్రెస్ట్‌ రోట్‌మ్యాన్‌ రీసెర్చ్‌ ఇన్‌స్టిట్యూట్‌ నిపుణులు దీన్ని చేపట్టారు. 25 మంది ఆరోగ్యవంతులు దీనిలో పాల్గొన్నారు. వీరికి వరుస పదాలు, వాక్యాలు వినిపించి గుర్తుపెట్టుకోమన్నారు. కొద్దిసేపటి తర్వాత వాటిని తిరిగి చెప్పమన్నారు. ఆ సమయంలో వారి మెదడు తరంగాలను విశ్లేషించారు. దీంతో వారు విన్నవన్నీ స్వల్పకాలిక స్మృతులుగా నిక్షిప్తమైనట్లు గుర్తించారు. అయితే అర్థవంతమైన సమాచారంతో కలిపి వీటిని గుర్తుపెట్టుకున్నప్పుడు స్వల్పకాలిక స్మృతులు దీర్ఘకాలికంగా మారుతున్నట్లు కనిపెట్టారు. మా పరిశోధన ఫలితాలు మేధావుల జ్ఞాపకశక్తి వ్యూహాలతో సరిపోలుతున్నాయని పరిశోధనకు నేతృత్వం వహించిన జేడ్‌ మెల్జెర్‌ తెలిపారు.

కొబ్బరి నూనె అనారోగ్యకరం!

వాషింగ్టన్‌: కొబ్బరి నూనె అనారోగ్యకరమంటూ తాజా అధ్యయనం హెచ్చరిస్తోంది. జంతు సంబంధిత కొవ్వులు, వెన్నలానే ఇది కూడా ఆరోగ్యానికి చేటు చేస్తుందని చెబుతోంది. అమెరికన్‌ హార్ట్‌ అసోసియేషన్‌ (ఏఎస్‌ఏ) నిపుణులు దీన్ని చేపట్టారు. సంతృప్త కొవ్వులు ఎక్కువగా ఉన్న ఆహారాన్ని తీసుకుంటే రక్తంలో చెడు కొలెస్ట్రాల్‌ స్థాయిలు పెరుగుతాయి. దీంతో ధమనుల్లో రక్త సరఫరాకు అవరోధం ఏర్పడుతుంది. ఫలితంగా గుండె పోటుతో పాటు పక్షవాతం ముప్పూ పెరుగుతుంది. కొబ్బరి నూనెలోని కొవ్వుల్లో 82 శాతం వరకూ సంతృప్త కొవ్వులే ఉన్నట్లు ప్రస్తుతం పరిశోధకులు గుర్తించారు. దీంతో వెన్న (63 శాతం), గోమాంసం (50 శాతం), పంది మాంసం (39 శాతం)ల కంటే దీనిలోనే సంతృప్త కొవ్వులు ఎక్కువగా ఉన్నట్లు వెలుగులోకి వచ్చింది. కొబ్బరి నూనెకు బదులు పొద్దుతిరుగుడు నూనె, ఆలివ్‌ నూనెలను తీసుకోవడం మేలని పరిశోధకులు ఫ్రాంక్‌ సాక్స్‌ వివరించారు.

ఒత్తిడికి యోగా కళ్లెం!

లండన్‌: శరీరాన్ని, మనసును అనుసంధానం చేసే యోగా, ధ్యానం, తైచి వంటి పద్ధతులు ఒత్తిడి, కుంగుబాటు తగ్గటానికి దోహదం చేస్తున్నట్టు తాజా అధ్యయనంలో వెల్లడైంది. ఇలాంటి సమస్యలకు దారితీసే డీఎన్‌ఏ ప్రక్రియను యోగా, ధ్యానం వెనక్కి మళ్లిస్తున్నట్టు బయటపడింది. పరిశోధకులు సుమారు 846 మందిపై 11 ఏళ్ల పాటు నిర్వహించిన పలు అధ్యయనాలను సమీక్షించి ఈ విషయాన్ని కనుగొన్నారు. ప్రపంచవ్యాప్తంగా లక్షలాది మంది యోగా, ధ్యానం సాధన చేస్తుంటారు గానీ ఇవి అణుస్థాయిలోనూ ప్రభావం చూపగలవని, జన్యువుల పనితీరును సైతం మార్చగలవనే విషయం చాలామందికి తెలియదని బ్రిటన్‌లోని కోవెంట్రీ విశ్వవిద్యాలయానికి చెందిన ఇవానా బ్యూరిక్‌ తెలిపారు. సాధారణంగా మనం ఒత్తిడికి గురైనప్పుడు ఎన్‌ఎఫ్‌-కెబి అనే అణువుల ఉత్పత్తి పెరుగుతుంది. ఇది జన్యువులను ప్రేరేపించి సైటోకైన్లు అనే ప్రోటీన్లు ఉత్పత్తయ్యేలా చేస్తుంది. నిజానికివి స్వల్పకాలంలో మనకు మేలే చేస్తాయి. ఏదైనా ప్రమాదం ఎదురైనప్పుడు అక్కడ్నుంచి పారిపోవటానికో లేదా ధైర్యంగా ఎదుర్కోవటానికో తోడ్పడతాయి. కానీ సైటోకైన్ల స్థాయిలు దీర్ఘకాలంగా ఎక్కువగా ఉంటుంటే మాత్రం కుంగుబాటువంటి మానసిక వ్యాధులు, క్యాన్సర్‌, అకాల వృద్ధాప్యం, తదితర సమస్యల ముప్పు పెరుగుతుంది. యోగా, ధ్యానం వంటి పద్ధతుల మూలంగా ఎన్‌ఎఫ్‌-కెబి, సైటోకైన్ల ఉత్పత్తి తగ్గుతుండటం గమనార్హం.

విటమిన్‌-ఎ తోనూ మధుమేహానికి లంకె!

లండన్‌: మధుమేహం విషయంలో విటమిన్‌ ఎ కూడా ప్రభావం చూపుతున్నట్టు తాజాగా బయటపడింది. ఇది ఇన్సులిన్‌ను ఉత్పత్తి చేసే బీటా కణాల పనితీరును మెరుగుపరుస్తున్నట్టు వెల్లడైంది. నిజానికి శాస్త్రవేత్తలు మొదట్లో బీటా కణాల ఉపరితలంపై విటమిన్‌ ఎ గ్రాహకాలు పెద్దమొత్తంలో ఉంటున్నట్టు మాత్రమే గుర్తించారు. దీంతో ఇవి ఏం పనిచేస్తున్నాయనేదానిపై మరింత లోతుగా అధ్యయనం చేశారు. బాల్యంలో క్లోమంలో బీటా కణాలు అభివృద్ధి చెందుతున్న దశలో విటమిన్‌ ఎ ముఖ్యమైన పాత్ర పోషిస్తుందని శాస్త్రవేత్తలు అభిప్రాయపడ్డారు. అంతేకాదు.. పెద్దయ్యాక కూడా బీటా కణాలు సరిగా పనిచేయటానికి తోడ్పడుతుందని పేర్కొన్నారు.

చర్మం రంగు మార్చి.. క్యాన్సర్‌ను ఏమార్చి!

వాషింగ్టన్‌: సూర్యరశ్మి మాదిరిగా పనిచేసి.. చర్మాన్ని ముదురు రంగులోకి మార్చే కొత్తరకం మందును శాస్త్రవేత్తలు రూపొందించారు. ఇది చర్మ క్యాన్సర్‌ ముప్పును గణనీయంగా తగ్గించగలదని భావిస్తున్నారు. ఈ మందును మనుషుల, ఎలుకల చర్మంపై ప్రయోగించగా.. వూదారంగు వర్ణద్రవ్యం (మెలనిన్‌ ) ఉత్పత్తయ్యేలా ప్రేరేపించటం గమనార్హం. ఇది చర్మ క్యాన్సర్‌ నివారణకే కాదు.. వృద్ధాప్య ప్రక్రియను నెమ్మదింపజేయటానికీ దారితీయగలదని మసాచుసెట్స్‌ జనరల్‌ హాస్పిటల్‌ పరిశోధకులు పేర్కొన్నారు. సాధారణంగా మన ఒంటికి ఎండ తగిలినపుడు సూర్యరశ్మిలోని అతి నీలలోహిత కిరణాలు రసాయనిక ప్రతిచర్యలను ప్రేరేపించి నల్లటి మెలనిన్‌ ఉత్పత్తయ్యేలా చేస్తాయి. దీంతో చర్మం నల్లగా మారుతుంది. ఈ క్రమంలో చర్మం కూడా దెబ్బతింటుంది. కానీ కొత్త మందుతో చర్మం దెబ్బతినకుండానే రంగు మారేలా చేయొచ్చన్నమాట. ముదురురంగు వర్ణద్రవ్యంతో అన్నిరకాల చర్మక్యాన్సర్ల ముప్పు తగ్గుతుందని.. అందువల్ల దీన్ని సన్‌ స్క్రీన్‌ లోషన్లతో జోడించాలనీ పరిశోధకులు భావిస్తున్నారు. అతి నీలలోహిత కిరణాల దుష్ప్రభావం, చర్మ క్యాన్సర్‌ నుంచి కాపాడాలన్నదే తమ లక్ష్యమని వివరించారు.

ఆ చిప్‌... ఓ ప్రయోగశాల!

వాషింగ్టన్‌: ఎక్కడెక్కడ ప్రమాదకర బ్యాక్టీరియా, వైరస్‌, కాలుష్య కారకాలు ఉన్నాయో గుర్తించడానికి అత్యంత సులభమైన సాంకేతికతను శాస్త్రవేత్తలు ఆవిష్కరించారు. జీవ ఉనికిని పసిగట్టి సమాచారం ఇచ్చే ఈ సాంకేతికత (బయో సెన్సర్‌ టెక్నాలజీ)ను ‘చిప్‌పై ప్రయోగశాల’గా అభివర్ణిస్తున్నారు. చేతిలో ఇమిడిపోయే పరికరంలో ఈ చిప్‌ను వేసుకుని ఆరోగ్య సంబంధిత అంశాలను ఇట్టే తెలుసుకోవచ్చు. ఎలక్ట్రానిక్‌ సంకేత పట్టీలున్న సూక్ష్మకణాల ద్వారా ఇది పనిచేస్తుంది. దీనిలో కచ్చితత్వం 95% పైగా ఉందనీ, దీనిని 100 శాతానికి చేర్చడానికి ప్రయత్నిస్తున్నామనీ అమెరికాలోని న్యూబ్రన్స్‌విక్‌లో ఉన్న రట్గెర్స్‌ విశ్వవిద్యాలయం సహాయ ఆచార్యుడు మెహదీ జావన్‌మర్ద్‌ తెలిపారు. స్నానాల గది తలుపు గడియపై ఉన్న వైరస్‌లను ఈ చిన్న పరికరం చిటికెలో బయటపెడుతుందని వివరించారు. ఇలాంటి పరికరాలు రాబోయే రెండేళ్లలో వాణిజ్యపరంగా అందుబాటులోకి వస్తాయని చెప్పారు. ఆరోగ్యాన్ని పర్యవేక్షించి, రోగ నిర్థరణకు వీలు కల్పించే చిన్నపాటి పరికరాలు అయిదేళ్లలో అందరికీ దొరుకుతాయన్నారు.

అల్పాహారంలో కార్బోహైడ్రేట్లు అధికంగా తీసుకుంటే మెరుగైన నిర్ణయాలు

బెర్లిన్‌: అల్పాహారంగా అధికంగా కార్బోహైడ్రేట్లు ఉండే పాలు, బ్రెడ్‌, చీజ్‌ లాంటి పదార్థాలను తీసుకున్నవారు.. ఆ రోజంతా మెరుగైన నిర్ణయాలు తీసుకోగలుగుతారని ఓ అధ్యయనంలో వెల్లడైంది. జర్మనీలోని ల్యాబెక్‌ విశ్వవిద్యాలయ పరిశోధకులు ఈ అధ్యయనాన్ని నిర్వహించారు. కార్బోహైడ్రేట్లు అధికంగా తీసుకోవడం వల్ల శరీరంలో టైరోసిన్‌ అనే అమీనో ఆమ్లం తక్కువ స్థాయిలో ఉంటుందని వారు తెలిపారు. మనుషుల నిర్ణయాలను ప్రభావితం చేసే డోపొమైన్‌ లాంటి మెదడుకు సంబంధించిన రసాయనాల ఉత్పత్తిలో టైరోసిన్‌ ముఖ్యపాత్ర పోషిస్తుందని పేర్కొన్నారు. ఆర్థికపరమైన నిర్ణయాలను తీసుకునే ఓ ఆన్‌లైన్‌ గేమ్‌ను కొంతమందితో ఆడించి. ఫలితాలను విశ్లేషించినట్లు తెలిపారు. కార్బోహైడ్రేట్లు అధికంగా తీసుకున్నవారిలో 53 శాతం మంది నష్టం కలిగించే నిర్ణయాలను తిరస్కరించగా.. ప్రోటీన్‌లు అధికంగా తీసుకున్నవారిలో దాదాపు 75 శాతం నష్టదాయకమైన నిర్ణయాలనే తీసుకున్నారని పేర్కొన్నారు. ఈ అధ్యయనం పురుషులపై మాత్రమే నిర్వహించామని పరిశోధకులు తెలిపారు.

చన్నీళ్లతోనూ అదే శుభ్రత!

న్యూయార్క్‌: చన్నీళ్లతో కడిగినా, వేడినీళ్లతో కడిగినా చేతులు ఒకేలా శుభ్రపడతాయని తేలిపోయింది! వేడినీళ్లు క్రిములను బాగా తొలగిస్తాయని చాలామందికి నమ్మకం. అమెరికాలోని అధికారిక ఆరోగ్య నియమావళి కూడా, వేడినీళ్లతో చేతులు శుభ్రం చేసుకోవాలని చెబుతోంది. అయితే, దీనిలో నిజమెంతో తేల్చేందుకు రట్గర్స్‌ విశ్వవిద్యాలయానికి చెందిన ప్రొఫెసర్‌ డోనాల్డ్‌ షాఫ్నెర్‌ బృందం చిన్నపాటి పరిశోధన సాగించింది. ఓ ఇరవై మంది చేతులకు హానికర క్రిములను పూసి... 15, 26, 38 డిగ్రీల నీళ్లూ, వివిధ గాఢతలున్న సబ్బుతో కడుక్కోమన్నారు. ఇలా ఇరవైసార్లు చేయించి, ఫలితాల ను పోల్చారు. మంచి నీళ్లు, సబ్బుతో కడుక్కోవడమే ముఖ్యంగానీ... వేడినీళ్లయినా, చల్లనీళ్లయినా ఫలితాలు ఒకేలా ఉంటాయని పరిశోధకులు చెప్పారు. చేతులను శుభ్రపరచుకోడానికి హోటళ్లలో మామూలు నీటిని వాడితే ఇంధన ఖర్చు చాలామటుకు తగ్గుతుందని వారి సలహా!

అతి అంతర్జాలం అనర్థదాయకం

లండన్‌: అదేపనిగా అంతర్జాలాన్ని (ఇంటర్నెట్‌) వాడుతున్నారా? అయితే ఒకింత జాగ్రత్తగా ఉండండి. ఎందుకంటే ఇంటర్నెట్‌ అందుబాటులో లేనప్పుడు గుండె వేగం, రక్తపోటు పెరిగే అవకాశముందని తాజా అధ్యయనం పేర్కొంది. ఇవి మద్యం, మాదకద్రవ్యాల వంటి వాటి వ్యసనాన్ని వదిలేసినప్పుడు తలెత్తే లక్షణాల వంటివేనని హెచ్చరించింది. ‘‘డిజిటల్‌ పరికరాలపై అతిగా ఆధారపడేవారు వాటిని కట్టేసినప్పుడు ఆందోళనకు గురవుతున్నట్టు కొంతకాలంగా మనకు తెలుసు. కానీ ఇలాంటి మానసిక ప్రభావాలు శారీరక మార్పులతోనూ ముడిపడి ఉంటున్నట్టు ఇప్పుడు చూస్తున్నాం’’ అని బ్రిటన్‌లోని స్వాన్‌సీ విశ్వవిద్యాలయ ప్రొఫెసర్‌ ఫిల్‌ రీడ్‌ తెలిపారు. అతిగా అంతర్జాలాన్ని వాడేవారిని కొంతసేపు కట్టేయమనగానే వారిలో గుండె వేగం, రక్తపోటు 4% పెరిగినట్టు తేలటమే దీనికి నిదర్శనం. కొందరిలో ఇవి 8% కూడా పెరగటం గమనార్హం. ఆందోళనతో పాటు ఇలాంటి లక్షణాలనూ పెరుగున్నాయని పరిశోధకులు తెలిపారు. ఇవి ఆరోగ్యానికి హాని చేసేంత స్థాయిలో లేకపోయినా హార్మోన్‌ వ్యవస్థలో మార్పులు కలగజేయొచ్చని.. ఇది రోగనిరోధక ప్రతిస్పందనలు నెమ్మదించటానికి దారితీయొచ్చని వివరించారు.

తల్లిపాలలోని అసహజ చక్కెరతో బిడ్డకు చేటు!

న్యూయార్క్‌: తల్లిపాలు అమృతతుల్యమనే విషయంలో కించిత్తు అనుమానమైనా అక్కర్లేదు. కానీ, ఆమె తీసుకునే ఆహారం వల్ల ఒక్కోసారి బిడ్డ అనారోగ్యం పాలయ్యే ముప్పు లేకపోలేదంటున్నారు... కెక్‌ స్కూల్‌ ఆఫ్‌ మెడిసిన్‌కు చెందిన పరిశోధకులు! అమ్మపాలలో ఉండే ‘ఫ్రక్టోజ్‌’ అనే అసహజ చక్కెర వల్ల బిడ్డకు అనేక రకాల రుగ్మతలు దరిచేరే ప్రమాదమున్నట్లు వారు గుర్తించారు. రోజులో బియ్యం గింజంత పరిమాణంలో ఫ్రక్టోజ్‌ అందినా, అది బిడ్డ అధికంగా బరువు పెరగడానికి కారణమవుతోందట. పలువురు తల్లులు తమ శిశువులకు ఇస్తున్న పాలపై బాల వూబకాయ వైద్యనిపుణులు డా.మైకేల్‌ గోరాన్‌ ఇటీవల పరీక్షలు నిర్వహించారు. ‘‘నిజానికి తల్లిపాలలో ఫ్రక్టోజ్‌ ఉండదు. సోడా, శక్తినందించే పానీయాలు తాగడం, మార్కెట్లలో దొరికే తయారైన ఆహార పదార్థాలను తినడం వల్ల అమ్మపాలలో ఈ కృత్రిమ చక్కెర చేరుతుంది. ఇది బిడ్డ ఎదగడానికి కొంతవరకూ దోహదపడుతుంది. కానీ, మోతాదుకు మించి అందడంవల్ల అధిక బరువు మొదలు, మధుమేహం వరకూ ఎన్నో సమస్యలు పిల్లలను చుట్టుముడుతున్నాయి’’ అని గోరాన్‌ ఆందోళన వ్యక్తంచేశారు.గర్భిణులు, పాలిచ్చే తల్లులేకాక పిల్లలు, పెద్దలు ఫ్రక్టోజ్‌ అధికంగా ఉండే ఆహార పదార్థాలు, పానీయాలకు దూరంగా ఉండటం మేలని సూచించారు.

పాడే పోస్టరు.. మాట్లాడే చొక్కా!

లండన్‌: మీరు కారులో వెళుతున్నారు. పట్టణంలో మీకిష్టమైన సంగీత కళాకారుడి కచేరీ జరుగుతున్నట్టు పోస్టర్‌ కనబడింది. వెళ్లలేకపోయామే అని బాధపడకుండా మీ కారునే రేడియో స్టేషన్‌గా మార్చేస్తే? లేదూ.. ఆ పోస్టరే మీ స్మార్ట్‌ఫోన్‌కు రాయితీ టికెట్లు దొరికే లింకును పంపిస్తే? అక్కడికి చేరుకోవటానికి కూడా అదే దారి చూపిస్తే? అదలా ఉంచండి. మీరు ఎక్కడో పరుగెడుతున్నారు. మీరు ధరించిన చొక్కా చెమటను విశ్లేషించి.. శరీరంలో తలెత్తే కీలకమైన మార్పులను నేరుగా మీ ఫోన్‌కు పంపిస్తే? విచిత్రమే కదూ. అలాంటి విచిత్రాన్నే సృష్టించారు వాషింగ్టన్‌ విశ్వవిద్యాలయ ఇంజినీర్లు. అప్పటికే గాలిలో ఉన్న ఎఫ్‌ఎం రేడియో సంకేతాలను ఉపయోగించుకొని.. ఒక రాగి టేపు యాంటెనా ద్వారా సమాచారాన్ని చేరవేసే సరికొత్త ప్రక్రియకు జీవం పోశారు. ఇది అసలైన రేడియో ప్రసారాలను దెబ్బతీయకుండానే ఆయా సంకేతాల్లోని సమాచారాన్ని, మాటలను క్రోడీకరించి.. వాటిని పరావర్తనం చేస్తూ సందేశాలను చేరవేస్తుంది. అంటే దీని ద్వారా ఒకరకంగా పోస్టర్లను పాడేలా చేయొచ్చు, చొక్కాలను మాట్లాడేలా చేయొచ్చన్నమాట.

నత్త విషం నుంచి నొప్పి నివారణ ఔషధాలు!

వాషింగ్టన్‌: ఓ రకమైన సముద్ర నత్త విషం నుంచి నొప్పి నివారణ ఔషధాలను తయారుచేయవచ్చునని అమెరికా శాస్త్రవేత్తలు గుర్తించారు. ప్రస్తుతం అందుబాటులో ఉన్న ‘ఒపియాయిడ్‌’ నొప్పి నివారణ మందుల కంటే ఇవి మెరుగ్గా పనిచేసే అవకాశాలున్నాయని వారు చెబుతున్నారు. ‘కానస్‌ రెజియస్‌’ అనే చిన్న నత్త కరీబియన్‌ సముద్రంలో ఎక్కువగా కనిపిస్తుంది. ఇది తనలోని విషం సాయంతో కొన్ని జీవులను అచేతనంగా చేసి, చంపి ఆహారంగా స్వీకరిస్తుంది. అయితే, సదరు విషంలోని ‘ఆర్‌జీ1ఏ’ అనే సమ్మేళనం నొప్పి నివారణ లక్షణాలను కలిగి ఉన్నట్లు శాస్త్రవేత్తలు గుర్తించారు. ఈ సమ్మేళనంతో తయారుచేసిన ఔషధాలు.. ఓపియాయిడ్‌ మందులకు భిన్నమైన చర్యాక్రమంలో నొప్పిని సమర్థంగా హరిస్తున్నట్లు వారు వెల్లడించారు. ప్రస్తుతం అందుబాటులో ఉన్న ఔషధాల కంటే ఎక్కువసేపు వీటి ప్రభావం కొనసాగుతోందని తెలిపారు.

మధుమేహ పీడితులకు వరం.. ఈ వరి అన్నం!

ఈనాడు - బెంగళూరు: మధుమేహ వ్యాధి పీడితులు తినేందుకు అనుకూలమైన వరి రకాన్ని బెంగళూరులోని వ్యవసాయ విశ్వవిద్యాలయం ఆవిష్కరించింది. సాధారణ వరిలో ఆరున్నర శాతం నుంచి ఏడు శాతం వరకూ మాంసకృత్తులు (ప్రొటీన్లు) ఉంటాయి. కొత్తగా ఆవిష్కరించిన వరిలో 12 శాతం నుంచి 13 శాతం వరకు మాంసకృత్తులు ఉంటాయి! ఈ రకం వరిని మధుమేహ పీడితులు హాయిగా భుజించవచ్చని వ్యవసాయ నిపుణులు వివరించారు. సంప్రదాయ వరి రకాల్లో 20శాతం వరకూ లైజిన్‌ను వృద్ధి చేయడం ద్వారా మాంసకృత్తుల పరిమాణాన్ని పెంచారు. ‘‘ఎక్కువ మాంసకృత్తుల వల్ల వరిలో పిండిపదార్థం (స్టార్చ్‌) పరిమాణం తగ్గి మధుమేహులకు ఉపయుక్తమవుతుంది’’ అని జెనిటిక్స్‌, ప్లాంట్‌ బ్రీడింగ్‌ విభాగాధిపతి, పరిశోధక బృందానికి సారథ్యం వహించిన హెచ్‌.శైలజ చెప్పారు. మాంసాహరం ద్వారా లభించే మాంసకృత్తుల కంటే వరిలోని మాంసకృత్తులు తేలిగ్గా జీర్ణమవుతాయని వివరించారు. అదనపు వ్యయం లేకుండా రైతులు ఈ రకం వరిని పండించి లాభాలు గడించవచ్చని చెప్పారు. జింకు, ఇనుము ఎక్కువగా ఉండే మరో రెండు రకాల వరినీ ఈ బృందం ఆవిష్కరించింది. గోధుమలోని మాంసకృత్తుల పరిమాణం 14 శాతమని, ఆ స్థాయికి కొత్త వరిని తీసుకెళ్లడమే తమ లక్ష్యమని ఈ సందర్భంగా శాస్త్రవేత్తలు వెల్లడించారు.

జీర్ణరసంతో పనిచేసే బ్యాటరీ

బోస్టన్‌: రోగుల జీర్ణాశయంలోని ఆమ్లాల సాయంతో పనిచేసే సూక్ష్మ బ్యాటరీని ఎంఐటీ శాస్త్రవేత్తలు అభివృద్ధి పరిచారు. భవిష్యత్తులో కడుపులోకి మింగే ఎలక్ట్రానిక్‌ మాత్రలకు ఇవి శక్తిని సమకూరుస్తాయని చెబుతున్నారు. ఈ తరహా ఉపకరణాలకు ప్రస్తుతం ఉపయోగిస్తున్న సంప్రదాయ బ్యాటరీలకు భిన్నంగా ఇది చవకైన, సురక్షితమైన ప్రత్యామ్నాయమని పరిశోధకులు వివరించారు. కడుపులోని ఉపకరణాలు, సుదీర్ఘంగా పనిచేసే వ్యవస్థలకు ఇంధనశక్తిని సమకూర్చే మార్గాల్ని రూపొందించాల్సిన అవసరం ఉందని ఎంఐటీ పరిశోధకులు గియోవన్ని ట్రావెర్సో అభిప్రాయపడ్డారు. రోగుల ఆరోగ్యాన్ని పర్యవేక్షించే, చికిత్స అందించడంలో కొత్త బాటలు వేసే తర్వాతి తరం ఎలక్ట్రానిక్‌ మాత్రలకు తాజా పరిజ్ఞానం దారిచూపుతుందని మరో పరిశోధకులు రాబర్ట్‌ లాంగర్‌ పేర్కొన్నారు.

ఒక్క సూదిమందుతో నిర్వీర్యం

గర్భ నిరోధక పరిశోధనల్లో సంచలనం! కేవలం ఒకే ఒక్క సూదిమందుతో రెండేళ్లపాటు వీర్యాన్ని అడ్డుకునే ఔషధం తయారైంది. వద్దనుకుంటే.. నాలుగు క్షణాలు చాలు. మరో ఇంజెక్షన్‌తో మళ్లీ సంతానప్రాప్తి ఖాయం!
కాలిఫోర్నియాలోని జాతీయ వానర పరిశోధన కేంద్రం శాస్త్రవేత్తలు రూపొందించిన ఈ సరికొత్త ఔషధం... ఇప్పటికే ఎలుకలు, వానరాలపై నూరుశాతం సత్ఫలితాలను నమోదు చేసింది. ఇప్పటివరకూ గర్భధారణ రాకుండా సంభోగ సమయంలో కండోమ్‌లు, మందు బిళ్లల వాడకం వంటి తాత్కాలిక పద్ధతులున్నాయి. పిల్లలు వద్దనుకునే కొందరు పురుషులు శాశ్వత పరిష్కారంగా వేసక్టమీ శస్త్రచికిత్స చేయించుకుంటున్నారు. అయితే ఈ శస్త్రచికిత్సపై ఎన్నో అనుమానాలున్నాయి. పైగా వాపు, నొప్పి, ఇన్ఫెక్షన్‌ వంటి సమస్యలు లేకపోలేదు. వీర్య నియంత్రణకు తాత్కాలికంగా వాడే హార్మోన్‌ మిళిత మందులు కొన్నిసార్లు మెదడు పనితీరుపై ప్రభావం చూపి, కుంగుబాటుకు దారితీస్తున్నాయి. దీని పేరు ‘వాసల్‌జెల్‌’. జిగట తయారీకి అవసరమైన రసాయనాలను ఉత్పత్తిచేసే స్టెరీన్‌-ఆల్ట్‌-మెలియర్‌ ఆమ్లం (ఎస్‌ఎంఏ) ఇందులో ఉంటుంది. శరీరానికి ఎలాంటి హానీ కలుగకుండా హార్మోన్‌ రహితంగా దీనిని రూపొందించారు. పునరుత్పత్తి వ్యవస్థలోని వీర్య జనకం నుంచి శుక్రకణాలు నాళాల (వాస్‌ డక్ట్‌) ద్వారా మూత్రనాళానికి చేరి, స్కలిస్తాయి. అయితే ‘వాసల్‌జెల్‌’ను ఇంజెక్షన్‌ ద్వారా వాస్‌డక్ట్‌లోకి చొప్పిస్తారు. ఇది అక్కడ జిగట పదార్థాన్ని ఉత్పత్తి చేసి, వీర్య కణాలు ముందుకెళ్లకుండా దీర్ఘకాలం అడ్డుకుంటుంది. ఈ ప్రక్రియ రెండేళ్లపాటు జరుగుతూనే ఉంటుందట. పిల్లలు కావాలనుకుంటే, దీనికి విరుగుడు మందును ఇంజెక్షన్‌ ద్వారా ఒక్కసారి ఇస్తే చాలంటున్నారు పరిశోధకులు.