నవ స్పర్శ eచర్మం

కృత్రిమమే కావొచ్చు...సహజంగా స్పందిస్తుంది...సున్నితత్వాన్ని, కఠినత్వాన్ని గుర్తిస్తుంది...వేడి, చల్లదనం వంటివీ పసిగడుతుంది...ఒక్క మాటలో చెప్పాలంటే మన చర్మం మాదిరిగానే ప్రతిస్పందిస్తుంది. అదే ఇ-చర్మం. ప్రయోగదశలను దాటుకుంటూ.. మానవ జీవితాలను పెనవేసుకుంటోంది!
ఇ-చర్మం అంటే?
నిజానికిదో అతి పలుచటి రబ్బరు లేదా పాలిమర్‌ పొర. కాకపోతే ఒత్తిడి, వేడి, చలి, తేమ, గాలి ప్రవాహం వంటి వాటిని గుర్తించే సున్నితమైన గ్రాహకాలు ఉండటం వల్ల చర్మం మాదిరిగానే స్పందిస్తుంది. ఇది మన చర్మ కణాల కన్నా 10 రెట్లు పలుచగానూ, చాలా తేలికగానూ ఉంటుంది! అన్నిరంగాల్లోనూ ఎలక్ట్రానిక్‌ పరికరాల వినియోగం అత్యవసరవుతున్న తరుణంలో ఇ-చర్మం పలు అద్భుతాలకు వేదికవుతోంది.
కాల్పనిక కథలే ప్రేరణ
ఇ-చర్మం సృష్టికి ఒకరకంగా సైన్స్‌ ఫిక్షన్‌ కథలే ప్రేరణ. ఎప్పుడంటే అప్పుడు తీసి పెట్టుకునే చేయి, కన్ను పాత్రతో 1971లో ప్రసారమైన ‘సిక్స్‌ మిలియన్‌ డాలర్‌ మ్యాన్‌’ టీవీ సీరియల్‌.. 1980ల్లో స్టార్‌ వార్స్‌ సీరియల్‌లో కనిపించే ఎలక్ట్రానిక్‌ చేయి.. 1984లో వచ్చిన టెర్మినేటర్‌ సినిమాల్లో మనుషుల్లాంటి మర మనుషులు.. ఇలాంటివన్నీ ఇ-చర్మం ఆలోచనకు బీజం వేశాయి.