సోషల్‌ లైఫ్‌లో... సక్కనోళ్లు అవ్వాలంటే?

సమాజంలో మంచోడు అనిపించుకోవాలంటే?
కొన్ని నియమాల్ని పాటించాల్సిందే!
మరి, సోషల్‌ లైఫ్‌లో మంచోడు అవ్వాలంటే?
అందుకూ కొన్ని సూత్రాలు ఉన్నాయి...
అవేంటో తెలుసుకుని ఫాలో అయితే మీరూ స్మార్ట్‌ ‘సోషల్‌’ సిటిజనే!

నిద్ర లేచింది మొదలు బాహ్య ప్రపంచంలో బాధ్యతలు నిర్వర్తిస్తూనే గంటల కొద్దీ నెట్టింట్లో సామాజిక మాధ్యమాల్లో గడపాల్సిన పరిస్థితి. లెక్కకు మిక్కిలి పోస్టింగులు... కామెంట్‌లు... లైక్‌లు... చేయందే సోషల్‌ మీడియాలో ఉనికిని చాటుకోలేం. మేనేజ్‌ చేయాల్సిన మాధ్యమాలేమో మినిమమ్‌ మూడు లేదా నాలుగు. ఓ పక్క ట్విట్టర్‌లో చిట్టిపొట్టి కబుర్లు... మరో పక్క ఫేస్‌బుక్‌లో ­సులు... ఇంకో పక్క ఇన్‌స్టాగ్రామ్‌ స్టిల్‌ ఫొటోలు... వీటన్నింటినీ చురుకుగా మేనేజ్‌ చేస్తుండాలి. కనిపించిందల్లా పెట్టేసి పండగ చేసుకుంటే పొరబాటే. పెట్టే ముందు కాస్త ఆలోచించాలి. అప్పుడే అబ్బాయ్‌ చాలా స్మార్ట్‌ అనిపించుకోవచ్చు.
అన్నింట్లో ఒకేసారి
అందరికీ ఒకటి కంటే ఎక్కువ సోషల్‌ నెట్‌వర్క్‌ వేదికలు ఉన్నాయి. దీంతో ఏదైనా ముఖ్యమైన సమాచారాన్ని పంచుకోవాలంటే అన్నింటిలోనూ పోస్ట్‌ చేయాల్సిందే. అప్పుడే ఎక్కువ మందికి పంచుకున్న విషయం చేరుతుంది. ఒక్కో దాంట్లో వేరు వేరుగా పోస్టింగులు పెట్టాలంటే... అన్ని సైట్‌లు, ఆప్‌లు ఓపెన్‌ చేయాలి. లాగిన్‌ అవ్వాలి.. దీనికి కాస్త సమయం వృథా అవుతుంది. అందుకే ఒక దాంట్లో పోస్ట్‌ చేస్తే అన్నింటిలో అప్‌డేట్‌ అయితే! అందుకు అనువైన వేదికే ‘ఐఎఫ్‌టీటీటీ’. గూగుల్‌, ఫేస్‌బుక్‌ లాగిన్‌ వివరాలతో దీంట్లో సభ్యులై సర్వీసుని వాడుకోవచ్చు. ‘సోషల్‌ మీడియా’ విభాగంలోకి వెళ్లి ఏయే సోషల్‌ మీడియా ఫ్లాట్‌ఫామ్‌లను వాడుతున్నారో వాటిని ఎనేబుల్‌ చేసి అనుమతి ఇవ్వాలి. దీంతో ఎప్పుడైనా ఏదైనా ఒక్క వేదికపై పోస్ట్‌ చేస్తే... అన్నింటిలోనూ స్టేటస్‌ అప్‌డేట్‌ అవుతుంది. మొబైల్‌ ఆప్‌, వెబ్‌ సర్వీసుగా దీన్ని వాడుకోవచ్చు.
* మరిన్ని వివరాలకు https://ifttt.com
హ్యాష్‌ట్యాగ్‌లు వాడకంలో...
సోషల్‌లైఫ్‌లో చురుకైనవారికి హ్యాష్‌ట్యాగ్స్‌ గురించి ప్రత్యేకంగా చెప్పక్కర్లేదు. సామాజిక మాధ్యమాల్లో ట్రెండింగ్‌ అంశాల్ని వెతికి పట్టేందుకు ఇవే ఆధారం. అయితే, సరైన హ్యాష్‌ట్యాగ్‌ని పెట్టడం ఓ కళే. తోచిందేదో ట్యాగ్‌ చేస్తే వెతికేవారికి మీరు పోస్ట్‌ చేసింది కనిపించకపోవచ్చు. అందుకే సరైన హ్యాష్‌ట్యాగ్‌లను పొందేందుకు నెట్టింట్లో ప్రత్యేక సర్వీసులు ఉన్నాయి. కావాలంటే https:/ritetag.com సర్వీసుని చూడండి. ఫొటో, వ్యాసం... పంచుకోవాలనుకునేది ఏదైనా తగిన హ్యాష్‌ట్యాగ్‌ని పొందేందుకు సరైన వేదిక. ట్విట్టర్‌, ఫేస్‌బుక్‌ లాగిన్‌ వివరాలతో సైన్‌ఇన్‌ అయ్యి కంటెంట్‌ని అప్‌లోడ్‌ చేసి ట్యాగ్స్‌ పొందొచ్చు. వెబ్‌ సర్వీసుగానే కాకుండా ఆప్‌లా ఇన్‌స్టాల్‌ చేసుకుని సర్వీసుని వాడుకోవచ్చు. ఫైర్‌ఫాక్స్‌ ఎక్స్‌టెన్షన్‌గానూ బ్రౌజర్‌లో ఒదిగిపోతుంది. http://hashtagify.me సర్వీసు వాడుకుని సోషల్‌ మీడియాలో హ్యాష్‌ట్యాగ్‌లకు ఉన్న ప్రాధాన్యత ఎంతో తెలుసుకోవచ్చు. అందుకు సెర్చ్‌బాక్స్‌లో ట్యాగ్‌ని ఎంటర్‌ చేసి వెతికితే సరి. ట్విట్టర్‌, ఇన్‌స్టాగ్రామ్‌ల్లో పంచుకునే వాటికి తగిన ట్యాగ్‌లను జనరేట్‌ చేసుకునే వీలుంది. * ఐఫోన్‌ యూజర్లు ‘ట్యాగ్స్‌డాక్‌’ ఆప్‌ని ప్రయత్నించొచ్చు. డౌన్‌లోడ్‌ లింక్‌: https://goo.gl/xzF4QX
ఆ ‘మార్క్‌’ దాటారా?
సామాజిక మాధ్యమాల్లో ఎప్పటి నుంచి ఎకౌంట్‌ని రన్‌ చేస్తున్నాం అనేది ముఖ్యం కాదు. ఆ ఎకౌంట్‌ ‘వెరిఫికేషన్‌’ దశ దాటిందా? లేదా? అనేది ముఖ్యం. ఫేస్‌బుక్‌లో అయితే పర్సనల్‌ ఎకౌంట్‌లకు ఇది వర్తించదు. ఒకవేళ మీరేదైనా బిజినెస్‌ పేజీ రన్‌ చేస్తున్నట్లయితే ‘వెరిఫికేషన్‌’ని క్లియర్‌ చేయడం చాలా ముఖ్యం. అప్పుడే పేజీకి సోషల్‌ మీడియాలో తగిన ఆదరణ లభిస్తుంది. ట్విట్టర్‌ని వెరిఫికేషన్‌ చేసేందుకు http://verification.twitter.com/ లింక్‌లోకి వెళ్లండి. లాగిన్‌ వివరాలు ఎంటర్‌ చేసి ప్రాసెస్‌ని ముగిస్తే ట్విట్టర్‌ ఎకౌంట్‌ని అధికారికంగా ధృవీకరిస్తూ బ్యాడ్జ్‌ గుర్తుని జత చేస్తుంది.
ఉచిత స్థావరాలు
పొడి పొడి మాటల్లో.. అదీ అక్షరాల్లో ఏదైనా రాసి పోస్ట్‌ చేస్తే అంతగా ఆసక్తి కనిపించదు. అదే అక్షరాలకు ఆకట్టుకునే ఫొటో జోడిస్తే! కచ్చితంగా ఆగి చూస్తారు. తర్వాత చదువుతారు. అయితే, దొరికిన ఇమేజ్‌ని వ్యాసానికి జత చేస్తే! కచ్చితంగా ఎప్పుడోకప్పుడు కాపీరైట్స్‌ సమస్య రావచ్చు. అందుకే మీరు క్లిక్‌ మనిపించిన ఫొటోలే వాడాలి. లేకుంటే... కాపీరైట్స్‌ సమస్య లేకుండా ఉచితంగా ఫొటోలను అందించే ‘ఇమేజ్‌ స్టాక్‌ వెబ్‌సైట్‌లు’ ఉన్నాయి. వాటి నుంచి ఇమేజ్‌లను డౌన్‌లోడ్‌ చేసి వాడుకోవచ్చు. విభాగాల వారీగా సైట్‌ల్లో ఫొటోలను వెతకొచ్చు. కావాల్సిన వాటిని కీవోర్డులతో వెతికే వీలుంది.
* https://unsplash.com
* https://www.pexels.com
* https://picjumbo.com
* https://pixabay.com
ఇవి ‘ఫాలో’ అవ్వాల్సిందే
బాహ్య ప్రపంచంలో సత్ప్రవర్తనతో ఎలా గుర్తింపు తెచ్చుకుంటామో... అదే మాదిరిగా సోషల్‌ మీడియాలోనూ సరైన నడవడిక ఏర్పరుచుకోవాలి. అందుకు ఇవి పాటించాల్సిందే!
* ‘స్పామ్‌’లా ­సులాడొద్దు. అంటే... ఇతరులు పంపింది పదే పదే రీట్వీట్‌ చేయడం. దీంతో ఇతరులకు విసుగొచ్చి మిమ్మల్ని బ్లాక్‌ చేసే అవకాశం లేకపోలేదు.
* ఎక్కువ హ్యాష్‌ట్యాగ్‌లు వద్దు. అంశానికి ఉన్న ప్రాధాన్యత ఆధారంగా ఒకటో... రెండో... పెట్టడం ఉత్తమం. ఎక్కువ ట్యాగ్‌లతో అంశం చేరాలనుకునేవారికి చేరకపోవచ్చు.
* అసభ్య పదజాలం వాడడం సభ్యత కాదు. వ్యాసాలు, కామెంట్స్‌లో అసభ్యపదాల్ని వాడితే మీ విలువను మీరు నెట్టింట్లో దిగజార్చుకున్నట్లే!
* అశ్లీల ఫొటోలు, దృశ్యాలకు వాల్‌పై చోటు లేకుండా చూడాలి.
* ఎక్కువ మందిని ట్యాగ్‌ చేయొద్దు. పంచుకునే పోస్టింగ్స్‌లో ఒకరో... ఇద్దరో... ఫర్వాలేదుగానీ. అంతకంటే ఎక్కువ మందిని వారి ప్రమేయం లేకుండా ట్యాగ్‌ చేయొద్దు.
* ప్రతి స్పందనగా ఎప్పుడూ టెక్స్ట్‌ వాడడం సరైంది కాదు. అవసరం మేరకు ఎమోజీలను వాడడం మంచిది. భిన్నమైన ఎమోజీలకు https://goo.gl/dXh7iK, https://goo.gl/YvrQxk, https://goo.gl/y4n5XL, https://emojipedia.org/whatsapp/ సైట్‌లను చూడండి.
* పదాల్ని మరీ సూక్ష్మంగా మార్చేస్తూ టెక్స్ట్‌ చేయడం అర్థవంతమైన భాష అనిపించుకోదు. ట్విట్టర్‌ లాంటి చిట్టిపోట్టి ­సుల్లో తప్పితే... మిగతా మాధ్యమాల్లో మీదైన రచనా శైలిని ప్రదర్శించేలా పోస్టింగులు ఉంటే బాగుంటుంది. అప్పుడే సోషల్‌ మీడియాలో ముద్ర వేయొచ్చు.
* ఆటోమాటిక్‌గా అన్నింటిలో పోస్ట్‌ అయ్యేలా సిస్టంని పెట్టుకుంటే పంచుకునే వాటికి ప్రాధాన్యాన్ని ఒకటి రెండు సార్లు చెక్‌ చేసుకోండి. ఒక నెట్‌వర్క్‌లో పంచుకున్నది మరో నెట్‌వర్క్‌కి ఆసక్తికరమైంది కాకపోవచ్చు.
* సొంత వ్యాపారం, ఉత్పత్తులు, ఇతర సర్వీసులపై సోషల్‌ మీడియాలో ప్రచారానికి సరైన హ్యాష్‌ట్యాగ్‌ ఎంపిక చాలా ముఖ్యం.

 

Posted on 21-02-2018