అగ్మెంటెడ్‌ రియాలిటీ

* టాటూ వేసుకుందాం అనుకున్నారు... డిజైన్‌నీ ఎంపిక చేశారు... ముందే చేతిపై డిజైన్‌ ఎలా వస్తుందో తెలుసుకోవాలంటే?
* ఆన్‌లైన్‌ షాపింగ్‌లో దుస్తులు కొందాం అనుకున్నారు... చొక్కా ఒకటి బాగా నచ్చింది. అది మీకెలా నప్పుతుందో ట్రయల్‌ చేసి చూడాలంటే?
* అప్పుడే గుండె పనితీరు గురించి పాఠం చదివారు. ప్రత్యక్షంగా గుండె పనితీరుని మీ స్టడీ టేబుల్‌పైనే వర్చువల్‌గా చూడగలిగితే?
* చిన్నప్పుడు జాతరలో సినిమా హీరోల కటౌట్‌ల పక్కన నిలబడి ఫొటోలకు ఫోజులిచ్చినట్టు కాకుండా... పోస్టర్‌ ముందు నిలబడితే సరాసరి హీరో పక్కనే నిలబడి తీసుకున్నట్టుగా ఫొటో కావాలనుకుంటే..?

స్మార్ట్‌ ఫోన్‌ చేతిలో ఉండి, దాంట్లో ఏఆర్‌ (అగ్మెంటెడ్‌ రియాలిటీ) సపోర్ట్‌ చేసే ఫీచర్‌ ఉంటే చాలు. వాస్తవ ప్రపంచంలో ఇలా ఎన్నో వింతల్ని చూడొచ్చు. కృత్రిమ మేధస్సు (ఏఐ), వర్చువల్‌ రియాలిటీ (వీఆర్‌), అగ్మెంటెడ్‌ రియాలిటీ (ఏఆర్‌)... ఈ మూడింటి కలయికతో ఫోనూ, దాంట్లో ఇన్‌స్టాల్‌ చేస్తున్న ఆప్స్‌ పరిధి మరింత విస్తృతం అవుతోంది. ఎలాంటి అదనపు పరికరాలతో పని లేకుండానే కేవలం ఫోన్‌తోనే వింతల్ని చూసేలా, వాటితో ఇంట్రాక్ట్‌ అయ్యేలా ‘ఏఐ’, ‘వీఆర్‌’ల నుంచి పుట్టిన ‘ఏఆర్‌’తో సాధ్యం అవుతోంది. ఇంతకీ ఇదెలా పని చేస్తుంది? దీంతో భవిష్యత్‌లో ఎలాంటి మార్పులు చోటు చేసుకోబోతున్నాయి? వాటితో టెక్‌ ప్రియులు పొందే ప్రయోజనాలేంటో చూద్దాం!

వాస్తవ ప్రపంచంలోకి ‘వర్చువల్‌’
ఉన్నచోటునే... అంటే వాస్తవ ప్రపంచంలోకి వర్చువల్‌ వరల్డ్‌ని ఆహ్వానించడం. ఉదాహరణకు కొత్త ప్రాంతానికి వెళ్లావనుకుందాం. బాగా ఆకలేస్తోంది. మంచి స్పైసీ బిరియాని తిందాం అనుకుంటే మీరు ఉన్న చోట హోటళ్ల వివరాలు తెలుసుకోవాలంటే? వెంటనే స్మార్ట్‌ ఫోన్‌ని తీసుకుని 4జీ ప్రపంచంలోకి ప్రవేశించాలి. ప్రత్యేకంగా తీర్చిద్దిన అగ్మెంటెడ్‌ రియాలీటీ సాఫ్ట్‌వేర్‌తో ఉన్న చోటుని ఫోన్‌ కెమెరాకి చూపుతూ వర్చువల్‌ వరల్డ్‌కి జత చేసి చూడాలంతే! స్మార్ట్‌ఫోన్‌లో చూస్తూ వీధుల్లో నడుస్తూ వెళ్తుంటే దారి పొడవునా ఉన్న హోటళ్ల వివరాలు ఫోన్‌ తెరపై ప్రత్యక్షంగా కనిపిస్తాయి. ఇంకాస్త అర్థమయ్యేలా చెప్పాలంటే తెలుగు సినిమా హీరోలుండే ఫిల్మ్‌నగర్‌కి వెళ్లారనుకుందాం! కానీ, ఎవరిల్లు ఎక్కడో మీకు తెలియదు. అప్పుడు వెంటనే అగ్మెంటెడ్‌ రియాలిటీలోకి వెళ్లి మీరున్న చోటుని చూస్తూ హీరోల ఇళ్లనూ గుర్తించొచ్చు అన్నమాట!

పోటా పోటీ..
ప్రముఖ టెక్‌ సంస్థలు యాపిల్‌, గూగుల్‌ ఏఆర్‌ని వేదికగా చేసుకుని టెక్‌ ప్రియులకు స్మార్ట్‌ అప్‌డేట్స్‌ని పరిచయం చేస్తున్నాయి. యాపిల్‌ గత నెల్లో విడుదల చేసిన కొత్త ‘ఐఓఎస్‌’ వెర్షన్‌లో ‘ఏఆర్‌కిట్‌’ని ఆపరేటింగ్‌ సిస్టంకి జోడించింది. యాపిల్‌ ‘ఏ9’ ప్రాసెసర్‌ అందుకు తోడయ్యింది. దీంతో ఐఫోన్‌ 8, 8ప్లస్‌, ఎక్స్‌ మోడళ్లతో పాటు గతంలో విడుదలపైన 6ఎస్‌, 6ఎస్‌ ప్లస్‌, 7, 7 ప్లస్‌ మోడళ్లు కూడా ఏఆర్‌ అప్లికేషన్స్‌ని సపోర్ట్‌ చేస్తున్నాయి. కాస్త పెద్ద తెరపై ఏఆర్‌ని యాక్సెస్‌ చేయాలంటే ఐప్యాడ్‌లను వాడొచ్చు. ఐప్యాడ్‌ ప్రో 12.9, 9.7, ఐప్యాడ్‌ ప్రో 10.5 ఏఆర్‌కిట్‌ని సపోర్ట్‌ చేస్తున్నాయి. ఒక్కమాటలో చెప్పాలంటే అగ్మెంటెడ్‌ రియాలిటీతో తయారైన ఆప్‌ ఏదైనా ఐఓఎస్‌ ఫ్లాట్‌ఫాం సపోర్ట్‌ చేస్తుందన్నమాట. ఇక గూగుల్‌ విషయానికొస్తే ‘ఏఆర్‌కోర్‌’పై ప్రస్తుతం కసరత్తు చేస్తోంది. పరిమిత యూజర్లకే ప్రివ్యూ వెర్షన్‌ని అందుబాటులో ఉంచి లోటుపాట్లను తెలుసుకుంటోంది. వచ్చే ఏడాది కల్లా అధికారికంగా టెక్నాలజీని యూజర్లకు అందుబాటులోకి తేనుంది. అండ్రాయిడ్‌ 7.0 ఓఎస్‌తో పని చేసే మోడళ్ల ‘ఏఆర్‌కోర్‌’ని సపోర్ట్‌ చేస్తాయి. అయితే, విడుదల సమయానికల్లా సుమారు 10 కోట్ల ఫోన్లలో ఏఆర్‌కోర్‌ నిక్షిప్తమైయ్యేలా సిద్ధమవుతోంది. ఇప్పటికైతే గూగుల్‌ ప్రవేశపెట్టిన ‘ట్యాంగో’ ఫ్లాట్‌ఫాం ఏఆర్‌ ఆప్స్‌కి వేదికైంది. అయితే, ఇంటెల్‌ ‘రియల్‌సెన్స్‌ 3డీ’ కెమెరాతో కూడిన ఫోన్లలోనే ట్యాంగో ఎనేబుల్‌ అవుతుంది.

ఒకటా... రెండా!
ఆన్‌లైన్‌ షాపింగ్‌లో వస్తువుల వీడియోలు, 360 డిగ్రీల కోణంలో తీసిన ఫోటోలను చూసి ఓ అంచనాకి వచ్చే వాళ్లం. ఫోన్‌, ఇతర గ్యాడ్జెట్‌ల వరకూ ఫర్వాలేదుగానీ... ఆన్‌లైన్‌లో ఫర్నీచర్‌ లాంటివి కొనాల్సివస్తే? అవి గదుల్లోని ఇంటీరియర్‌కి ఎలా సరిపడతాయి? ఉంచాలనుకున్న చోట ఎలా ఇమడతాయి?... అనే సందేహాలకు ఏఆర్‌ తీర్చనుంది. ప్రత్యేకంగా రూపొందించిన ఏఆర్‌ షాపింగ్‌ ఆప్‌లో హాలులో ఉంచాల్సిన సోఫాని సెలెక్ట్‌ చేయాలి. తర్వాత హాల్లోకి వెళ్లి కెమెరా కంటితో చూస్తూ సోఫాని పెట్టాలనుకున్న చోట పెట్టొచ్చు. హాల్లోని మిగతా ఫర్నీచర్‌తో సోఫా ఇముడుతుందో (కొలతలతో సహా...) లేదో చెక్‌ చేసుకోవచ్చు. అన్ని రకాలుగా సంతృప్తి చెందాకే ఆర్డర్‌ చేయవచ్చు. ప్రముఖ ఫర్నిచర్‌ కంపెనీ ‘ఐకియా’ యాపిల్‌యూజర్లకు అందుబాటులోకి తెచ్చిన ‘ఐకియా ప్లేస్‌’ ఆప్‌ అందుకు ఉదాహరణ. ఇదే మాదిరిగా విద్యా బోధన వినూత్నం కానుంది. పాఠ్యాంశం ఏదైనా ప్రయోగాలకు ఉన్నచోటునే 3డీలో వర్చువల్‌ ల్యాబ్‌ని సృష్టించొచ్చు. వైద్య విద్యార్థులకు పలు క్లిష్టమైన శస్త్ర చికిత్సల్ని అగ్మెంట్‌ రియాలిటీతో 3డీలో విడమరిచి చెప్పొచ్చు. శరీర నిర్మాణం, అవయవాల పని తీరుని కేవలం ఫోన్‌తోనే ‘అగ్మెంటెడ్‌ రియాలిటీ’లో చూడొచ్చు. గుండె పని తీరుని ప్రత్యక్షంగా చూస్తూ తెలుసుకునేందుకు మీ స్టడీ టేబుల్‌పైనే గుండెని 4డీలో సృష్టించొచ్చు. ఫోన్‌ కెమెరా కంటితో చూస్తూ గుండె భాగాల్ని ఎక్స్‌ప్లోర్‌ చేసి చూడొచ్చు. అంతేకాదు... ప్రత్యేక కళ్లజోళ్లను ధరించి టేబుల్‌పై ఇంజినీరింగ్‌ డ్రాయింగ్స్‌ని చిటికెలో 3డీలో నిర్మించొచ్చు. వాటిని అగ్మెంట్‌ రియాలిటీతో నమూన పనితీరు, ఇతర వివరాల్ని ప్రజెంట్‌ చేయవచ్చు.

పోస్టర్ల మాయ
పలు రంగాల్లో ప్రవేశించి టెక్నాలజీ ప్రియుల్ని అబ్బురపరుస్తున్న ఏఆర్‌ సినిమా రంగంలోనూ తనదైన ప్రత్యేకతతో ప్రవేశించింది. విడుదలకు సిద్ధమైన సినిమాల వినూత్న ప్రచారానికి సరికొత్త వేదికగా మారుతోంది. మొన్నీమధ్యే హీరో రానా నటించిన సినిమా విడుదల సమయంలో ఏఆర్‌ పోస్టర్‌తో సందడి చేశారు. ఏఆర్‌ టెక్నాలజీతో రూపొందించిన ఆ సినిమా పోస్టర్‌ని ఫోన్‌తో స్కాన్‌ చేస్తే క్యూఆర్‌ కోడ్‌ ఆధారంగా ఫోన్‌లో ఏఆర్‌ మొబైల్‌ ఆప్‌ (ఆప్‌స్టార్‌) ఇన్‌స్టాల్‌ అవుతుంది. అంతే... ఇన్‌స్టాల్‌ చేసిన ఆప్‌తో పోస్టర్‌ని ఫోన్‌ కెమెరాతో చూడాలి. సెకన్లతో తెరపై ఓ మ్యాజిక్‌... గోడకున్న పోస్టర్‌లోని హీరో మీ స్మార్ట్‌ఫోన్‌లోకి వచ్చేస్తాడు. మీతో ప్రత్యక్షంగా మాట్లాడుతున్నట్టుగా సినిమా గురించి చెబుతారు. ఆ సమయంలో హీరో పక్కకెళ్లి ఫొటోలకు ఫోజులు ఇవ్వొచ్చు. వీడియోలో భాగమవ్వొచ్చు. ఇక మొబైల్‌ గేమింగ్‌లోనూ ఏఆర్‌ కీలకంగా మారుతోంది. ఫోన్‌ జీపీఎస్‌, కెమెరాని యాక్సెస్‌ చేస్తూ పోకేమాన్‌ లాంటి ఏఆర్‌, వీఆర్‌ గేమ్‌ల సందడి మరింత పెరగనుంది. ప్రపంచ వ్యాప్తంగా 70 శాతం వినియోగదారులు ఫోన్‌నే ప్రధాన గేమింగ్‌ మాధ్యమంగా వాడేస్తున్న నేపథ్యంలో గేమ్స్‌ ఎలా రూపాంతరం చెందనున్నాయో చూడాలి.

మీ ఫోన్‌లోనూ ‘ఏఆర్‌’
కొత్తగా మార్కెట్‌లోకి వస్తున్న అన్ని ఆధునిక ఫోన్‌లు అగ్మెంటెడ్‌ రియాలిటీని సపోర్ట్‌ చేస్తున్నాయి. ఎలాంటి అదనపు హార్డ్‌వేర్‌ పరికరాలతో పని లేదు. హెచ్‌డీ స్క్రీన్‌, కెమెరా, కదలికల్ని గుర్తించేందుకు ప్రత్యేక సెన్సర్లతో కూడిన టెక్నాలజీ, సాఫ్ట్‌వేర్‌ సపోర్ట్‌ ఉంటే చాలు. ఫోన్‌, ట్యాబ్లెట్‌తో అగ్మెంట్‌ రియాలిటీ అద్భుతాల్ని చూడొచ్చు.

ఇంక్‌హంటర్‌
స్టైలింగ్‌గా టాటూలను వేసుకుని ట్రెండీగా కనిపించాలనుకునేవారికి ఆప్‌ ప్రత్యేకం. టాటూ డిజైన్‌ని సెలెక్ట్‌ చేసుకున్నాక అదెలా కనిపిస్తుందో ముందే దీంట్లో చూడొచ్చు. ఆప్‌లో టాటూ డిజైన్‌ని సెలెక్ట్‌ చేసుకుని ఫోన్‌ కెమెరాతో ఎక్కడ కావాలనుకుంటే అక్కడ ఫోకస్‌ చేసి డిజైన్‌ ఎలా కనిపిస్తుందో చూసుకోవచ్చు.
డౌన్‌లోడ్‌ లింక్‌: http://goo.gl/bggrg (ఆండ్రాయిడ్‌), http://goo.gl/yJ3VBE (ఐఓఎస్‌)

అనాటమీ 4డీ
మనిషి శరీర నిర్మాణానికి సంబంధించిన వివరాల్ని ఏఆర్‌లో ఉన్నచోటే చూడొచ్చు. ఆప్‌ని ఇన్‌స్టాల్‌ చేసి ‘టార్గెట్‌ గ్యాలరీ’లోని బొమ్మల్ని ప్రింట్‌ తీసుకోవాలి. వాటిని ఖాళీ టేబుల్‌పై ఉంచి ఆప్‌ ఓపెన్‌ చేసి ఫోన్‌ కెమెరాతో స్కాన్‌ చేయాలి. ‘హ్యుమన్‌ బాడీ’ బొమ్మని స్కాన్‌ చేస్తే టేబుల్‌పై అగ్మెంట్‌ రియాలిటీలో మనిషి శరీర నిర్మాణం 4డీలో ప్రత్యక్షమవుతుంది. తెర కింది భాగంలో కనిపించే ఆప్షన్స్‌తో శరీర నిర్మాణాన్ని ఎక్స్‌ప్లోర్‌ చేయవచ్చు.
డౌన్‌లోడ్‌ లింక్‌: https://goo.gl/sISHGD (ఆండ్రాయిడ్‌)

స్టార్‌ వాక్‌ 2
పల్లె వాకిట్లో రాత్రిపూట మంచంపై పడుకుని మెరిసే నక్షత్రాలతో వూసులు చెప్పుకొన్న రోజులు ఎలా మర్చిపోతాం. కానీ, నేటి కాలుష్య కారకాలతో నగరంలో నక్షత్రాలు కనిపించడమే కష్టం. అందుకే తాకేతెరపై తారల్ని చూస్తూ నక్షత్ర మండలాలు, వాటి ఆకారాలు, ఇతర గ్రహాలు, వాటి గతుల్ని వీక్షించేందుకే ఈ ఆప్‌.
డౌన్‌లోడ్‌ లింక్‌: https://goo.gl/edKeWv

Quiver
ఫోన్‌, ట్యాబ్‌ అనే తేడా లేకుండా పిల్లలు గ్యాడ్జెట్‌లను యాక్సెస్‌ చేస్తున్నారు. మరి, వారిలోని కళాత్మక కోణాల్ని వెతికి తీస్తూ కలరింగ్‌ ఆప్‌లను అగ్మెంటెడ్‌లో పరిచయం చేసేందుకు ఈ ఆప్‌ని ప్రయత్నించొచ్చు. యాపిల్‌ ఐఫోన్‌ వాడుతున్నట్లయితే పిల్లలకు ఇష్టమైన కార్టూన్‌లను ఉన్న చోటునే సృష్టించొచ్చు. ఆప్‌ నుంచి డౌన్‌లోడ్‌ చేసిన చిత్రాల్ని ప్రింట్‌ తీసి వాటిని ఫోన్‌తో స్కాన్‌ చేసి 4డీలో సృష్టించొచ్చు. వాటికి రంగులు నింపుతూ యానిమేట్‌ చేయవచ్చు.
డౌన్‌లోడ్‌ లింక్‌: https://goo.gl/L4fRzx

ఐకియా ప్లేస్‌
కలల సౌధంలో ఆకట్టుకునేలా ఫర్నీచర్‌ని పెట్టుకోవాల నుకుంటే? ఎంపిక చేసిన సోఫాలు, మంచాలు, కుర్చీలు ఎలా అమరతాయో వర్చువల్‌గా చూసుకునేందుకు అనువైన ఆప్‌. 2,000పైనే ఉత్పత్తుల్ని ఆప్‌లో ఐకియా అందుబాటులో ఉంచింది. నచ్చిన దాన్ని సెలెక్ట్‌ చేసుకుని కెమెరా కంటితో చూస్తూ గదిలో అమర్చుకుని చూడొచ్చు. నచ్చితేనే కొనుగోలు చేయొచ్చు.
డౌన్‌లోడ్‌ లింక్‌: https://goo. gl/P 6VQnB

Posted on 13-10-2017