వీరులుగా..వాయుసేనలోకి!
* ఏఎఫ్‌క్యాట్‌ 2020

పెద్దయిన తర్వాత ఏమవుతావు? అని పదిమంది పిల్లల్ని అడిగితే కనీసం నలుగురు పైలట్‌ అవుతా.. అంటారు. ఆకాశంలో ఎగిరే విమానాన్ని చూసి ఆనందంతో గంతులేస్తుంటారు. ఆ ఆశలను నెరవేర్చుకోవడం తేలికే. ఒక్క పరీక్షలో నెగ్గితే పైసా ఖర్చు లేకుండా పైలట్‌ కావచ్చు. వాయుసేనలో వీరులుగా ఎదగవచ్చు. ఒక అధికారిగా, యోధుడిగా భారత రాజ్యాంగాన్ని, స్వాంతంత్య్రాన్ని కాపాడే కర్తవ్యాన్ని నిర్వర్తించవచ్చు. ఆ అవకాశాన్ని అర్హులైన యువతకు కల్పించే ఎయిర్‌ఫోర్స్‌ కామన్‌ ఎంట్రన్స్‌ టెస్ట్‌కు ప్రకటన విడుదలైంది. సాధారణ డిగ్రీ లేదా బీటెక్‌ ఉత్తీర్ణులు, కోర్సు చివరి సంవత్సరం చదువుతున్నవారూ పోటీ పడవచ్చు. మహిళా అభ్యర్థినులూ దరఖాస్తు చేసుకోవచ్చు.
భారత వాయుసేనలో ఉన్నతోద్యోగాల భర్తీకి ఏడాదికి రెండు సార్లు ఎయిర్‌ఫోర్స్‌ కామన్‌ ఎంట్రన్స్‌ టెస్టు (ఏఎఫ్‌ క్యాట్‌) నిర్వహిస్తారు. ఎంపికైనవారిని పైలట్‌, గ్రౌండ్‌ డ్యూటీ - టెక్నికల్‌, నాన్‌ టెక్నికల్‌ పోస్టుల్లోకి తీసుకుంటారు. మొదటి నెల నుంచే రూ.లక్షకు పైగా వేతనం అందుతుంది. 2020 సంవత్సరానికి సంబంధించి మొదటి ప్రకటన వెలువడింది. ఎయిర్‌ఫోర్స్‌లో పైలట్‌ లాంటి మంచి ఉద్యోగాలను ఆశించేవారు ఏఎఫ్‌ క్యాట్‌ ప్రయత్నించవచ్చు. ఈ నోటిఫికేషన్‌ ఏటా జూన్‌, డిసెంబరుల్లో వస్తుంది. ఫ్లయింగ్‌, టెక్నికల్‌, నాన్‌-టెక్నికల్‌ బ్రాంచీల్లో పోస్టులు భర్తీ చేస్తారు. ప్రవేశ పరీక్ష అభ్యర్థులందరికీ ఉమ్మడిగా ఉంటుంది. టెక్నికల్‌ బ్రాంచి ఉద్యోగాలకు ఇంజినీరింగ్‌ నాలెడ్జ్‌ టెస్ట్‌ (ఈకేటీ) అదనంగా ఉంటుంది.
రాత పరీక్షలో అర్హత సాధించిన అభ్యర్థులకు స్టేజ్‌-1, స్టేజ్‌-2 పరీక్షలు నిర్వహిస్తారు. ఫ్లయింగ్‌ బ్రాంచికి దరఖాస్తు చేసుకున్నవారికి ఇంటర్వ్యూ అనంతరం కంప్యూటరైజ్డ్‌ పైలట్‌ సెలక్షన్‌ సిస్టం (సీపీఎస్‌ఎస్‌) పరీక్ష ఉంటుంది. వీటన్నింటిలో అర్హత సాధిస్తే ఆరోగ్య పరీక్షలు నిర్వహించి శిక్షణకి ఎంపిక చేస్తారు. దాన్నీ విజయవంతంగా పూర్తిచేస్తే విధుల్లోకి తీసుకుంటారు. ఉద్యోగాలను శాశ్వత, 14 ఏళ్లపాటు కొనసాగే ప్రాతిపదికన భర్తీ చేస్తారు.

రెండు దశల్లో..!
రాత పరీక్షలో ఉత్తీర్ణులకు స్టేజ్‌ 1, 2 పరీక్షలు ఉంటాయి. వీటిని ఎయిర్‌ఫోర్స్‌ సెలక్షన్‌ బోర్డు (ఏఎఫ్‌ఎస్‌బీ) నిర్వహిస్తుంది. అభ్యర్థులు 1.6 కి.మీ. దూరాన్ని 10 నిమిషాల్లో చేరుకోవాలి. 10 పుష్‌-అప్స్‌, 3 చిన్‌-అప్స్‌ తీయగలగాలి. స్టేజ్‌ -1 స్క్రీనింగ్‌ టెస్టు. ఇందులో ఆఫీసర్‌ ఇంటలిజెన్స్‌ రేటింగ్‌ టెస్టు, పిక్చర్‌ పర్సెప్షన్‌ అండ్‌ డిస్కషన్‌ టెస్టు ఉంటాయి. చిన్న అసైన్‌మెంట్స్‌, పజిల్స్‌ లాంటి వాటి ద్వారా అభ్యర్థి మేధను పరీక్షిస్తారు. ఏదైనా చిత్రాన్ని చూపించి దానిపై విశ్లేషణ చేయమంటారు. ఇందులో అర్హత సాధించినవారినే స్టేజ్‌ -2కి తీసుకుంటారు. స్టేజ్‌ -2లో సైకాలజిస్టు ఆధ్వర్యంలో పరీక్షలు జరుగుతాయి. అనంతరం ఇండోర్‌, అవుట్‌డోర్‌ ఇంటరాక్టివ్‌ గ్రూపు టెస్టులు ఉంటాయి. వీటిలో మానసిక, శారీరక పరీక్షలు ఉంటాయి. అనంతరం వ్యక్తిగత ముఖాముఖి నిర్వహిస్తారు. ఈ దశలన్నీ నెగ్గితే ఆరోగ్య పరీక్షలు చేపడతారు. అందులోనూ విజయవంతమైతే మెరిట్‌ లిస్టు తయారుచేసి శిక్షణ కోసం ఎంపిక చేస్తారు.

వంద ప్రశ్నలు.. మూడు వందల మార్కులు
పరీక్షను ఆన్‌లైన్‌లో నిర్వహిస్తారు. ప్రశ్నపత్రం 300 మార్కులకు ఉంటుంది. వంద ప్రశ్నలు వస్తాయి. ప్రతి ప్రశ్నకు మూడు మార్కులు. తప్పుగా గుర్తించిన ప్రతి జవాబుకు ఒక మార్కు చొప్పున తగ్గిస్తారు. పరీక్ష వ్యవధి రెండు గంటలు. జనరల్‌ అవేర్‌నెస్‌, వెర్బల్‌ ఎబిలిటీ, రీజనింగ్‌, న్యూమరికల్‌ ఎబిలిటీ, మిలిటరీ ఆప్టిట్యూడ్‌ విభాగాల నుంచి ప్రశ్నలు వస్తాయి. న్యూమరికల్‌ ఎబిలిటీ ప్రశ్నలు పదో తరగతి స్థాయిలో, మిగిలిన విభాగాలు డిగ్రీ స్థాయిలో ఉంటాయి. వెబ్‌సైట్‌లో మాదిరి ప్రశ్నపత్రాలు ఉన్నాయి. వాటిని పరిశీలిస్తే ప్రశ్నల సరళిపై అవగాహనకు రావచ్చు. టెక్నికల్‌ బ్రాంచి పోస్టులకు దరఖాస్తు చేసుకున్న వారికి అదనంగా ఇంజినీరింగ్‌ నాలెడ్జ్‌ టెస్ట్‌ (ఈకేటీ) నిర్వహిస్తారు. వ్యవధి 45 నిమిషాలు. 50 ప్రశ్నలు వస్తాయి. ప్రతి ప్రశ్నకు 3 చొప్పున వీటికి 150 మార్కులు కేటాయించారు.
జనరల్‌ అవేర్‌నెస్‌: చరిత్ర, క్రీడలు, భూగోళశాస్త్రం, పర్యావరణం, కళలు, సంస్కృతి, వర్తమానాంశాలు, రాజకీయాలు, పౌరశాస్త్రం, రక్షణ రంగం, సామాన్యశాస్త్రంలోని ప్రాథమికాంశాల నుంచి ప్రశ్నలుంటాయి.
వెర్బల్‌ ఎబిలిటీ: కాంప్రహెన్షన్‌, ఎర్రర్‌ డిటెక్షన్‌, సెంటెన్స్‌ కంప్లిషన్‌, సినానిమ్స్‌, యాంటనిమ్స్‌, వొకాబ్యులరీల నుంచి ప్రశ్నలడుగుతారు.
న్యూమరికల్‌ ఎబిలిటీ: సగటు, లాభనష్టాలు, శాతాలు, సూక్ష్మీకరణ, భిన్నాలు, నిష్పత్తి-అనుపాతం, బారువడ్డీ అంశాల్లో ప్రశ్నలుంటాయి.
రీజనింగ్‌, మిలటరీ ఆప్టిట్యూడ్‌: వెర్బల్‌ స్కిల్స్‌, స్పేషియల్‌ ఎబిలిటీ (మెంటల్‌ ఎబిలిటీ) అంశాల నుంచి ప్రశ్నలు ఇస్తారు.

విభాగాలవారీగా శిక్షణ
ఎంపికైన అభ్యర్థులకు సంబంధిత విభాగంలో 2021 జనవరి మొదటి వారం నుంచి శిక్షణ ప్రారంభమవుతుంది. ఫ్లయింగ్‌, గ్రౌండ్‌ డ్యూటీ టెక్నికల్‌ బ్రాంచి అభ్యర్థులకు 74 వారాలు, గ్రౌండ్‌ డ్యూటీ నాన్‌-టెక్నికల్‌ విభాగాలకు 52 వారాలు వైమానిక దళ కేంద్రాల్లో శిక్షణ ఇస్తారు. ఫ్లయింగ్‌ బ్రాంచికి ఎంపికైన వారికి ముందుగా ఆరు నెలల పాటు ప్రాథమిక శిక్షణ ఉంటుంది. అనంతరం అభ్యర్థుల ప్రతిభ ప్రకారం... ఫైటర్‌ పైలట్‌, ట్రాన్స్‌పోర్ట్‌ పైలట్‌, హెలికాప్టర్‌ పైలట్లుగా విడదీసి శిక్షణను రెండు దశల్లో నిర్వహిస్తారు. ఒక్కో దశలో 6 నెలలు చొప్పున దుండిగల్‌, హకీంపేట, బీదర్‌, ఎలహంకల్లో ఈ కార్యక్రమాలుంటాయి.
ప్రోత్సాహకాలు: శిక్షణ సమయంలో నెలకు రూ.56,100 చొప్పున స్ట్టైపెండ్‌ చెల్లిస్తారు. విజయవంతంగా ట్రెయినింగ్‌ పూర్తిచేసుకున్న అభ్యర్థులను విధుల్లోకి తీసుకుంటారు. ఉద్యోగంలో చేరిన వారికి రూ.56,100 మూలవేతనం లభిస్తుంది. అదనంగా డీఏ, హెచ్‌ఆర్‌ఏ, ఇతర అలవెన్సులు అందుతాయి. మిలిటరీ సర్వీస్‌ పే (ఎంఎస్పీ)లో భాగంగా ప్రతి నెలా రూ.15,500 చెల్లిస్తారు. పైలట్లకు ఫ్లయింగ్‌ అలవెన్సు, టెక్నికల్‌ బ్రాంచీల వారికి టెక్నికల్‌ అలవెన్సు ఉంటాయి. అన్నీ కలిపి రూ.లక్షకు పైగా వేతనం లభిస్తుంది.

ఎవరు అర్హులు?
ఫ్లయింగ్‌ బ్రాంచి, ఎన్‌సీసీ స్పెషల్‌ ఎంట్రీ: ఈ పోస్టులకు 60 శాతం మార్కులతో ఏదైనా డిగ్రీ పూర్తిచేసినవారు దరఖాస్తు చేసుకోవచ్చు. ఇంటర్‌ / ప్లస్‌ 2లో మ్యాథ్స్‌, ఫిజిక్స్‌ చదివి ఉండాలి. ఎన్‌సీసీ స్పెషల్‌ ఎంట్రీ విభాగానికి దరఖాస్తు చేసుకోవాలంటే ఎన్‌సీసీ సీనియర్‌ డివిజన్‌ సీ సర్టిఫికెట్‌ తప్పనిసరి.
వయసు: జనవరి 1, 2021 నాటికి 20 నుంచి 24 ఏళ్లలోపు ఉండాలి. జనవరి 2, 1997 - జనవరి 1, 2001 మధ్య జన్మించినవారు అర్హులు. ఎత్తు కనీసం 162.5 సెం.మీ ఉండాలి.
గ్రౌండ్‌ డ్యూటీ - టెక్నికల్‌ బ్రాంచి: ఇందులో ఏరోనాటికల్‌ ఇంజినీర్‌ (ఎల‌్రక్టానిక్స్‌/ మెకానికల్‌) పోస్టులు ఉన్నాయి. సంబంధిత లేదా అనుబంధ బ్రాంచీల్లో 60 శాతం మార్కులతో బీటెక్‌/ బీఈ పూర్తిచేసినవారు అర్హులు. ఇంటర్‌/ ప్లస్‌ 2లో ఫిజిక్స్‌, మ్యాథ్స్‌ల్లో 60 శాతం మార్కులతో ఉత్తీర్ణులై ఉండాలి.
గ్రౌండ్‌ డ్యూటీ - నాన్‌ టెక్నికల్‌ బ్రాంచి: దీనిలో అడ్మినిస్ట్రేషన్‌ అండ్‌ లాజిస్టిక్స్‌, అకౌంట్స్‌ విభాగాలున్నాయి. అడ్మినిస్ట్రేషన్‌ అండ్‌ లాజిస్టిక్స్‌ పోస్టులకు కనీసం 60 శాతం మార్కులతో ఏదైనా డిగ్రీ పూర్తి చేసి ఉండాలి. అకౌంట్స్‌ పోస్టులకు 60 శాతం మార్కులతో బీకాం ఉత్తీర్ణులు అర్హులు.
వయసు: గ్రౌండ్‌ డ్యూటీ టెక్నికల్‌, నాన్‌-టెక్నికల్‌ పోస్టులకు జనవరి 1, 2021 నాటికి 20 నుంచి 26 ఏళ్లలోపు ఉండాలి. జనవరి 2, 1995 - జనవరి 1, 2001 మధ్య జన్మించినవారు అర్హులు. ఈ పోస్టులకు దరఖాస్తు చేసే పురుషులు 157.5 సెం.మీ., మహిళలు 152 సెం.మీ. ఎత్తు ఉండాలి.

ఫిబ్రవరిలో పరీక్షలు
ఖాళీలు: అన్ని విభాగాల్లో కలిపి 249.
ఆన్‌లైన్‌ దరఖాస్తులకు చివరి తేదీ: డిసెంబరు 30, 2019
పరీక్షలు: ఫిబ్రవరి 22, 23 తేదీల్లో
తెలుగు రాష్ట్రాల్లో పరీక్ష కేంద్రాలు: హైదరాబాద్‌, విజయవాడ, విశాఖపట్నం, గుంటూరు, వరంగల్‌, తిరుపతి.

Posted on 05-12-2019