Ask the Expert
|
Feedback
|
About us
|
Contact us
|
Pratibha Home
 
బిట్స్‌కు మౌలిక రూటు

ప్రతిష్ఠాత్మక బిట్స్‌ విద్యాసంస్థల్లో ప్రవేశానికి నిర్వహించే పరీక్ష...బిట్‌శాట్‌! మే 16 నుంచి ఆన్‌లైన్‌ పరీక్షలు ఆరంభం కాబోతున్నాయి. ప్రణాళికతో కూడిన సన్నద్ధత, ప్రాథమిక భావనలపై పట్టు, కంప్యూటర్‌పై సాధన, సమయపాలనలో నిబద్ధత.. ఇవి మీలో ఉన్నాయా? అయితే ఈ ప్రవేశపరీక్షలో ఉత్తమ స్కోరు సాధించి, సీటు తెచ్చుకోవటం మీకంత కష్టమేమీ కాదు!

అత్యున్నత ఇంజినీరింగ్‌ విద్యను అందించే ఐఐటీల వంటి విద్యాసంస్థలతో సమాన ప్రాధాన్యమున్న సంస్థ బిట్స్‌ (బిర్లా ఇన్‌స్టిట్యూట్‌ ఆఫ్‌ టెక్నాలజీ అండ్‌ సైన్స్‌). కాలానుగుణంగా కరికులమ్‌, మౌలిక సదుపాయాల వంటివి ఆధునికీకరించే విద్యాసంస్థ ఇది. అత్యాధునిక సాంకేతిక పరిజ్ఞానం, సువిశాల క్యాంపస్‌లు, పారిశ్రామిక రంగంతో సంబంధాలు బిట్స్‌ను అగ్రస్థానంలో నిలుపుతున్నాయి. ప్రస్తుతం బిట్స్‌ క్యాంపస్‌లు పిలానీతోపాటు హైదరాబాద్‌, గోవా, దుబాయ్‌ల్లో ఉన్నాయి. వీటిల్లో దేనిలో చదివినప్పటికీ పిలానీలో ఏర్పాటు చేసిన బిట్స్‌ పేరుతోనే సర్టిఫికెట్లు అందజేస్తారు. ఈ ప్రతిష్ఠాత్మక సంస్థలో చేరాలంటే బిట్స్‌ నిర్వహించే ఆన్‌లైన్‌ పరీక్ష బిట్స్‌ అడ్మిషన్‌ టెస్ట్‌ (బిట్‌శాట్‌)లో మంచి స్కోరు సాధించాలి.

కంప్యూటర్‌ ఆధారిత పరీక్ష
దేశవ్యాప్తంగా 50 పరీక్ష కేంద్రాల్లో కంప్యూటర్‌ ఆధారిత ప్రవేశపరీక్షను నిర్వహించనున్నారు. మే 16 నుంచి మే 31, 2018 వరకు ప్రతిరోజూ ఉదయం 9 గం. నుంచి 12గం. వరకు, మధ్యాహ్నం 2 గం. నుంచి సాయంత్రం 5గం.ల వరకు రెండు స్లాట్లలో నిర్వహిస్తారు. అభ్యర్థి కంప్యూటర్‌ మానిటర్‌పై కనిపించే ప్రశ్నలకు కీబోర్డు లేదా మౌస్‌ సాయంతో సరైన సమాధానాలను గుర్తించాల్సి ఉంటుంది. అభ్యర్థి పరీక్ష తేదీ, సమయం, పరీక్ష కేంద్రాలను తనకు అనుగుణంగా ఎంచుకునే వీలు కల్పించారు. బిట్స్‌ పరీక్షలో నాలుగు విభాగాలున్నాయి. మొత్తం 150 ప్రశ్నలు ఆబ్జెక్టివ్‌ విధానంలో ఉంటాయి. ప్రతి ప్రశ్నకు నాలుగు ఆప్షన్లు ఉంటాయి. వాటిలో ప్రతి సరైన సమాధానానికి 3 మార్కులు, తప్పు సమాధానానికి -1 మార్కులుంటాయి. ప్రశ్నను వదిలేస్తే మార్కులుండవు. మొత్తం 150 ప్రశ్నలకుగానూ 450 మార్కులుంటాయి. ఒక్కో విభాగానికి ఎంత సమయాన్ని కేటాయించాలనేదానిపై ఎలాంటి నిబంధనా లేదు. ఏ క్రమంలోనైనా అభ్యర్థి ప్రశ్నలను చదువుకోవచ్చు. పరీక్ష వ్యవధి 3 గంటలు. ఒకవేళ అభ్యర్థి 150 ప్రశ్నలను నిర్ణీత సమయంకన్నా ముందే పూర్తిచేసినట్లయితే 12 ప్రశ్నలను (ఫిజిక్స్‌, కెమిస్ట్రీ, మేథమేటిక్స్‌ల్లో 4 చొప్పున) అదనంగా ఎంచుకునే వీలుంది. అభ్యర్థి అదనపు ప్రశ్నలను ఎంచుకుంటే తిరిగి మొదటి 150 ప్రశ్నలను సరిదిద్దుకునే వీలుండదు. అదనపు ప్రశ్నలకు కూడా తప్పుగా గుర్తిస్తే రుణాత్మక మార్కులుంటాయి. మేథమేటిక్స్‌, ఫిజిక్స్‌, కెమిస్ట్రీల్లో సీబీఎస్‌ఈ/ ఇంటర్మీడియట్‌ సిలబస్‌లోనే ఇంచుమించు ప్రశ్నలు అడుగుతారు. ఇంగ్లిష్‌, రీజనింగ్‌ల్లో పోటీపరీక్షలకు అడిగే స్థాయిలో ఉంటాయి. ప్రశ్నల స్థాయిని అంచనా వేసుకోవడానికి గత ప్రశ్నపత్రాలను అధ్యయనం చేస్తే మంచిది.

జేఈఈ మెయిన్స్‌ కంటే ప్రశ్నల స్థాయి తక్కువే!
* గతంలో మూడేళ్ల ప్రశ్నపత్రాలను గమనిస్తే, మిగిలిన జాతీయస్థాయి ప్రవేశపరీక్షల ప్రశ్నపత్రాల కన్నా అంత కష్టతరంగా ఏమీ లేవు. ముఖ్యంగా జేఈఈ మెయిన్స్‌లో ఇచ్చే ప్రశ్నలకన్నా బిట్స్‌ ప్రవేశపరీక్షలో ప్రశ్నలస్థాయి కొంత తక్కువే. కాబట్టి జేఈఈ పరీక్షకు సన్నద్ధమైనవారికి ఇది చాలా సులువైన పరీక్ష. జేఈఈ మెయిన్‌ 2018 సంతృప్తికరంగా రాయని వారికి ఇది ఒక సువర్ణావకాశం.
* ఎన్‌సీఈఆర్‌టీ/ సీబీఎస్‌ఈ పుస్తకాలను సిలబస్‌కు అనుగుణంగా అధ్యయనం చేయాలి. ముఖ్యమైన ఫార్ములాలు, కాన్సెప్టులను విడిగా పుస్తకంలో రాసుకుని పునశ్చరణ చేసుకోవాలి.
* పాత ప్రశ్నపత్రాలను సాధన చేయాలి. కంప్యూటర్‌ అవగాహన కోసం వీలైనన్ని ఎక్కువ మాదిరి పరీక్షలకు హాజరు కావాలి. ఎక్కువ రిహార్సల్‌ టెస్ట్‌లను ఆన్‌లైన్‌లో సాధన చేయాలి.
* సాధన ద్వారానే సమయపాలన, కచ్చితత్వం సాధ్యమవుతాయి. ఫలితంగా రుణాత్మక మార్కులు తగ్గుతాయి. ఇంగ్లిష్‌, రీజనింగ్‌ల్లో ప్రశ్నలను కొంచెం నేర్పుగా చేయగలిగితే స్కోరును పెంచుకోవడం చాలా తేలిక.
* అత్యుత్సాహంతో అదనపు ప్రశ్నల కోసం ప్రయత్నించడం మాని మొదటి 150 ప్రశ్నలను జాగ్రత్తగా ఆన్సర్‌ చేయాలి. అదనపు ప్రశ్నలను సాధించడానికి ఉపక్రమించిన తరువాత వెనక్కి వెళ్లి మొదటి ప్రశ్నలను పునఃపరిశీలించడం సాధ్యం కాదు.
* ప్రశ్నలో ఇచ్చిన నాలుగు ఆప్షన్లను జాగ్రత్తగా చదివిన తరువాతే సరైన సమాధానాన్ని ఎంచుకోవాలి. నీ మేథమేటిక్స్‌, ఫిజిక్స్‌ సబ్జెక్టుల్లో కొన్ని ముఖ్యమైన ఫార్ములాలు, స్టాండర్డ్‌ రిజల్ట్స్‌ను ఉపయోగించి షార్ట్‌కట్‌ పద్ధతుల ద్వారా సులువుగా సమాధానాన్ని రాబట్టొచ్చు. ఉదాహరణకు- మేథమేటిక్స్‌లో ప్రాపర్టీస్‌ ఆఫ్‌ ట్రయాంగిల్స్‌, ట్రిగనామెట్రి, కాల్‌క్యులస్‌, ఫిజిక్స్‌లో డైమెన్షనల్‌ అనాలిసిస్‌.
* కెమిస్ట్రీలో గ్రూప్‌ల్లో కొన్ని ముఖ్యమైన ధర్మాలు, స్వభావాలను గుర్తుంచుకోవడం మంచిది. ఆర్గానిక్‌ కెమిస్ట్రీలో చాలాసార్లు సాధన వల్ల ఆత్మవిశ్వాసం పెరుగుతుంది.
* ఆయా సబ్జెక్టుల్లో లెక్కలు చేసేప్పుడు కాల్‌క్యులేషన్స్‌లో పొరబాట్లు దొర్లకుండా జాగ్రత్త వహించాలి.
* పరీక్షలో ఇచ్చిన ప్రశ్నలు మరీ కఠినంగా ఉండే అవకాశం లేదు. కాబట్టి మార్కెట్‌లో లభ్యమవుతున్న ఎక్కువ స్థాయి పుస్తకాలు, మెటీరియల్‌ జోలికి పోకపోవడం ఉత్తమం.



Back..

Posted on 30-04-2018