Ask the Expert
|
Feedback
|
About us
|
Contact us
|
Pratibha Home
 
ఇలా గెలుద్దాం ఇంజినీరింగ్‌ సర్వీస్‌!

ఇంజినీరింగ్‌ విద్యార్థులు ప్రతిష్ఠాత్మకంగా భావించే పోటీపరీక్షల్లో యూపీఎస్‌సీ నిర్వహించే ఇంజినీరింగ్‌ సర్వీసెస్‌ అత్యంత ప్రధానమైంది. దీని ప్రకటన ఇటీవలే వెలువడింది. ఏమిటీ పరీక్ష ప్రాధాన్యం? దీనికెలా దరఖాస్తు చేసుకోవాలి? సిలబస్‌ ఏమిటి? ఏ తీరులో సిద్ధమైతే లక్ష్యం చేరుకోగలం?

సమాజంలో మంచి గౌరవం, అత్యున్నత స్థాయికి చేరుకునేలా క్రమం తప్పని పదోన్నతులు, ఉద్యోగ భద్రత, సంతృప్తి .. ఇవీ ఇంజినీరింగ్‌ సర్వీసెస్‌ ప్రత్యేకతలు. ఐఏఎస్‌ తరహాలో ఐఈఎస్‌ అని కూడా దీన్ని వ్యవహరిస్తుంటారు. జాతీయస్థాయిలో వివిధ శాఖల్లో అసిస్టెంట్‌ ఎగ్జిక్యూటివ్‌ ఇంజినీరు, అసిస్టెంట్‌ ఇంజినీరు వంటి గ్రూప్‌-ఎ ఉద్యోగాల భర్తీకి యూపీఎస్‌సీ ఈ పరీక్షను నిర్వహిస్తోంది. సివిల్‌, ఎలక్ట్రికల్‌, మెకానికల్‌, ఎలక్ట్రానిక్స్‌ అండ్‌ టెలికమ్యూనికేషన్‌ విభాగాల్లో ఈ పరీక్షను నిర్వహిస్తారు.

ఇండియన్‌ రైల్వే, సెంట్రల్‌ పబ్లిక్‌ వర్క్స్‌, మిలిటరీ ఇంజినీరింగ్‌, సెంట్రల్‌ వాటర్‌, సెంట్రల్‌ ఇంజినీరింగ్‌, నేవల్‌, సెంట్రల్‌ పవర్‌, టెలికాం, బోర్డర్‌ రోడ్డు ఇంజినీరింగ్‌ సర్వీసెస్‌, స్కిల్‌ డెవలప్‌మెంట్‌ సర్వీసెస్‌, ఆర్డినెన్స్‌ ఫ్యాక్టరీస్‌ వంటి వివిధ విభాగాల్లో దీని ద్వారా నియామకాలు జరుగుతాయి. వేతనాలపరంగా చూస్తే.. ఏడో పే కమిషన్‌తో మొదటి నెలజీతం రూ.70 వేల నుంచి రూ.75 వేల వరకు ఉండే అవకాశముంది.

దరఖాస్తు ప్రక్రియ
అభ్యర్థులు తమ దరఖాస్తును ఆన్‌లైన్‌లో www.upsconline.nic.in వెబ్‌సైట్‌ నుంచి మాత్రమే దరఖాస్తు చేసుకోవాలి. అర్హత ఉన్న అభ్యర్థులకు ఈ-అడ్మిషన్‌ కార్డును పరీక్షకు మూడు వారాల ముందు జారీ చేస్తారు. దీనిని యూపీఎస్‌సీ వెబ్‌సైట్‌ నుంచి డౌన్‌లోడ్‌ చేసుకోవాలి. పోస్టు ద్వారా పంపించరు.
* ఆన్‌లైన్‌ దరఖాసుకు గడువు: 23.10.2017
* ఈఎస్‌ఈ ప్రిలిమ్స్‌ పరీక్ష తేదీ: జనవరి 7, 2018
* ఈఎస్‌ఈ మెయిన్స్‌ పరీక్ష తేదీ: జులై 1, 2018

మూడు దశలు
2017 నుంచి పరీక్షవిధానం, మార్కులు, కాలవ్యవధి, సిలబస్‌లలో మార్పులు జరిగాయి.

స్టేజ్‌-1 (ప్రిలిమినరీ): ఇది పూర్తిగా ఆబ్జెక్టివ్‌ విధానంలో ఉంటుంది. కాల్‌క్యులేటర్‌లు అనుమతించరు. రుణాత్మక మార్కులు ఉంటాయి. ఓఎంఆర్‌ షీట్‌లో సమాధానాలను మార్క్‌ చేయడానికి బ్లాక్‌ బాల్‌పాయింట్‌ పెన్నును మాత్రమే ఉపయోగించాలి. ప్రతి తప్పు సమాధానానికీ 1/3 (0.33) రుణాత్మక మార్కులు. పై రెండు పేపర్లలో కనీస క్వాలిఫయింగ్‌ మార్కులను నిర్ణయించే విచక్షణాధికారం యూపీఎస్‌సీకి ఉంటుంది. ఇది క్వాలిఫయింగ్‌ స్టేజ్‌ మాత్రమే కాదు, ఇందులో సాధించిన మార్కులను తుది ఎంపికలో కూడా పరిగణనలోకి తీసుకుంటారు.

స్టేజ్‌-2 (మెయిన్స్‌) (కన్వెన్షనల్‌): ప్రిలిమినరీ పరీక్ష ద్వారా 1:7 లేదా 1:8 నిష్పత్తిలో మెయిన్స్‌కు అర్హత కల్పిస్తారు. ఈ ఏడాది దాదాపుగా 588 ఖాళీలు ఉండవచ్చు. అంటే 4116 నుంచి 4704 మంది మాత్రమే మెయిన్స్‌ పరీక్ష రాయడానికి అర్హులు అవుతారు.
స్టేజ్‌-1 + స్టేజ్‌-2 = 1100 మార్కులు పై రెండు పేపర్లలో కనీస క్వాలిఫయింగ్‌ మార్కులను నిర్ణయించే విచక్షణాధికారం యూపీఎస్‌సీకి ఉంటుంది. కొత్త విధానంలో కన్వెన్షనల్‌ ప్రశ్నపత్రాలకు 600 మార్కులు. కన్వెన్షనల్‌ ప్రశ్నలు డిజైన్‌ ఆధారిత, ఎక్కువ నిడివిగలవిగా ఉంటాయి. వీటికి చదవడంతోపాటు రాయడమూ బాగా అలవాటు చేసుకోవాలి. క్వశ్చన్‌ కమ్‌ ఆన్సర్‌ బుక్‌లెట్‌ (క్యూసీఏబీ) విధానాన్ని ప్రవేశపెట్టడం వల్ల సమాధానాలు రాయడానికి నిర్ణీత స్థలాన్ని కేటాయించారు. కాబట్టి వీలైనంత సూటిగా సమాధానం రాయడం మంచిది. ఈ రాతపరీక్షల ఫలితాలు వెలువడిన తరువాత యూపీఎస్‌సీ కమిషన్‌ అర్హత పొందిన అభ్యర్థుల డీటేల్డ్‌ అప్లికేషన్‌ ఫారం (డీఏఎఫ్‌) ను ఆన్‌లైన్‌ ద్వారా పంపడానికి సమాచారం అందిస్తుంది.

స్టేజ్‌-3: పర్సనాలిటీ టెస్ట్‌ (200 మార్కులు) పై రెండు స్టేజీల్లో సాధించిన మార్కుల ఆధారంగా (1100 మార్కులకుగానూ) అభ్యర్థులను 1:2 నుంచి 1:2.5 నిష్పత్తిలో స్టేజ్‌-3 (పర్సనల్‌ ఇంటర్వ్యూ)కు అనుమతిస్తారు. మూడు స్టేజీల్లో కలిపి 1300 మార్కులకు సాధించిన మొత్తం, ఉన్న ఖాళీల ఆధారంగా జాబితాను రూపొందిస్తారు.

సగటు విద్యార్థికి సాధ్యమేనా?
1. ఈఎస్‌ఈ కోసం అభ్యర్థులు పడే శ్రమ తద్వారా లభించే ఉద్యోగం, దాని వల్ల కలిగే ప్రయోజనాలకు అంత విలువ ఉందా?
జ: ఈఎస్‌ఈ కోసం పడ్డ శ్రమకంటే దాని ద్వారా వచ్చే ఉద్యోగం, తద్వారా వచ్చే ప్రయోజనాలు ఎంతో గొప్పవి. అవి:
* సమాజంలో గ్రూప్‌-ఎ ఆఫీసర్‌కు లభించే మంచి గౌరవం సంబంధిత కోర్‌ విభాగంలో పనిచేసే అవకాశం
* దేశంలోనే ప్రతిష్ఠాత్మకమైన ప్రాజెక్టుల్లో పనిచేసే అవకాశం ఉదా: బుల్లెట్‌ ట్రైన్‌ ప్రాజెక్టు
* ఏడో పే కమిషన్‌తో లభించే జీతభత్యాలు
* ఉద్యోగభద్రత, అత్యున్నత స్థాయికి చేరుకునే రెగ్యులర్‌ ప్రమోషన్లు
* రైల్వేస్‌ మిలిటరీ ఇంజినీరింగ్‌, పబ్లిక్‌ వర్క్స్‌ డిపార్ట్‌మెంట్‌ల వంటివాటిలో బాధ్యతాయుతమైన పదవుల్లో విధులు నిర్వహిస్తూ దేశానికీË, ప్రజలకూ సేవ చేసే సదవకాశం.

2. ఉద్యోగ ఖాళీల సంఖ్య, ప్రశ్నపత్రాలపరంగా ఈఎస్‌ఈ ఎంత కఠినంగా ఉంటుంది?
జ: ఈఎస్‌ఈ 2017కు దాదాపుగా 2,50,000 మంది అభ్యర్థులు దరఖాస్తు చేసుకున్నారు. అందులో దాదాపుగా 4000 మంది మెయిన్స్‌కు అర్హత సాధించారు. అందులో నుంచి దాదాపుగా 1200 మంది మాత్రమే ఇంటర్వ్యూకు అర్హత సాధించారు. చివరగా 500 మంది ఉద్యోగాలకు ఎంపికయ్యారు. ఈ గణాంకాలను నిశితంగా పరిశీలిస్తే ఈఎస్‌ఈ పరీక్ష కఠినత్వం అర్థమవుతుంది. ఈ పరీక్షలో ఒక్కో ఉద్యోగానికి దాదాపుగా 500 మంది అభ్యర్థులు పోటీపడ్డారు. ఏటా పోటీతత్వం దాదాపుగా ఇలాగే ఉంటుంది. ప్రశ్నపత్రాల విషయానికొస్తే సిలబస్‌ పరిధి చాలా విశాలంగా ఉన్నా ప్రశ్నలు మాత్రం మధ్యస్థం నుంచి కొంత కఠినంగా ఉంటాయి. గత సంవత్సరం నుంచి ఆచరణాత్మకమైన (ప్రాక్టికల్‌) ప్రశ్నలను చేర్చడం వల్ల ప్రశ్నపత్రం కఠినంగా తయారైంది. అయినప్పటికీ గత సంవత్సర పరీక్షలో కటాఫ్‌ మార్కులు దాదాపుగా 55% ఉన్నాయి. ఈ విషయాలను పరిశీలిస్తే సిలబస్‌ ఎక్కువగా ఉన్నా, ప్రశ్నపత్రం కఠినంగా ఉన్నా విజయం సాధించడం కష్టమేమీ కాదని తెలుస్తుంది.

3. సగటు విద్యార్థి ఈఎస్‌ఈ పరీక్షలో విజయం సాధించ గలడా?
జ: కొంతమంది విద్యార్థుల్లో ఐఐటీ, ఎన్‌ఐటీ వంటి ప్రామాణికమైన కళాశాలలో చదివితే మాత్రమే ఈ పరీక్షను సాధించగలరనే అపోహ ఉంటుంది. ఇంజినీరింగ్‌లో తక్కువ శాతం మార్కులతో ఉత్తీర్ణులైన ఎంతోమంది విద్యార్థులు ఈ పరీక్షలో నెగ్గారు; ఇంజినీరింగ్‌ మార్కుల శాతం ఈ పరీక్షను ఛేదించడానికి ఎంతమాత్రం అడ్డుకాదని నిరూపించారు. కాబట్టి ఇంజినీరింగ్‌లో తక్కువ మార్కులు వచ్చినవారూ, సాధారణ కళాశాలలో చదివినవారూ ఏమాత్రం అధైర్యపడకుండా సమయపాలనతో సాధనచేస్తే ఈ పరీక్షలో విజయం సాధించి మంచి ర్యాంకు తెచ్చుకోవచ్చు.

4. స్టేట్‌ ఇంజినీరింగ్‌ సర్వీసెస్‌ కంటే సెంట్రల్‌ ఇంజినీరింగ్‌ సర్వీసెస్‌ ఎలా మెరుగైన ఉద్యోగం?
జ: సెంట్రల్‌ ఇంజినీరింగ్‌ సర్వీసెస్‌లో దేశంలోని వివిధ ప్రదేశాలు, డిపార్ట్‌మెంట్లలో పనిచేసే అవకాశం ఉంటుంది. అలాగే కేంద్రప్రభుత్వం ప్రతిష్ఠాత్మకంగా చేపట్టే మెగా ప్రాజెక్టుల్లో పనిచేసే అరుదైన అవకాశమూ లభిస్తుంది. అధునాతనమైన టెక్నాలజీని ఉపయోగించి పనిచేసే వీలూ ఉంటుంది. ఇక జీతభత్యాల విషయానికొస్తే రాష్ట్ర ప్రభుత్వ ఉద్యోగులతో పోలిస్తే నిర్ణీత సమయంలో పే రివిజన్‌, మంచి అలవెన్సులు, సదుపాయాలు లభిస్తాయి. అలాగే పదోన్నతుల విషయంలోనూ కేంద్రప్రభుత్వ ఉద్యోగులకు నిర్ణీత వ్యవధిలో లభిస్తాయి.

5. ఇంజినీరింగ్‌ సర్వీసెస్‌ ఆఫీసర్‌ జీవనశైలి ఎలా ఉంటుంది?
జ: ఆఫీసర్ల జీవనశైలి విభాగాలనుబట్టి కొద్ది తేడాలతో మారుతుంది. దాదాపుగా అన్ని విభాగాల్లో వీరి జీవనశైలి ఒకేవిధంగా ఉంటుంది. ముఖ్యంగా ఆఫీసర్లు ఉపయోగించే వాహనాలు, నివాసాలు వారి హుందాతనాన్ని వ్యక్తీకరిస్తాయి. దాదాపుగా ఆఫీసర్లు అందరూ మెట్రో సిటీలో కానీ, రాష్ట్ర రాజధానులు, హిల్‌ స్టేషన్లలో కానీ ఉద్యోగాలు చేయవలసి వస్తుంది. కేంద్రప్రభుత్వం అందించే ఆరోగ్య సదుపాయాలు, ఉన్నతవిద్య, కుటుంబ విహారయాత్రలకు ఈ అధికారులందరూ అర్హులే. వీటిన్నిటితో వారి జీవనశైలి ఆకర్షణీయంగా ఉంటుంది.

6. కోచింగ్‌ సమయంలో రోజువారీ తరగతుల తరువాత అభ్యర్థుల సాధన ఎలా ఉండాలి?
జ: కోచింగ్‌ సమయంలో అభ్యర్థులు తరగతిలోనే వీలైనంత ఏకాగ్రతతో విషయాన్ని గ్రహించాలి. రోజువారీ తరగతుల తరువాత ఏరోజు విషయాలను ఆరోజే పునఃసమీక్షించుకోవాలి. ఆరోజు జరిగిన పాఠ్యాంశాలకు సంబంధించిన గత సంవత్సరం ప్రశ్నలను సాధన చేయాలి. సాధన సమయంలో షార్ట్‌నోట్స్‌ తయారు చేసుకుంటే పునశ్చరణకు సులభమవుతుంది. కోచింగ్‌, పరీక్షసాధన అనేవి దాదాపు 5 నుంచి 6 నెలలపాటు ఉంటాయి. కాబట్టి ఆరోగ్యంపై ప్రత్యేకశ్రద్ధ వహించాలి.

7. ఈఎస్‌ఈకి సన్నద్ధమయ్యే సమయంలో చేయకూడని పనులేంటి?
జ: సోషల్‌ మీడియాకు వీలైనంత దూరంగా ఉండాలి. ఒక సబ్జెక్టుకు అనేక పుస్తకాలను చదవటం సరికాదు. ఒక ప్రామాణిక పుస్తకాన్ని ఎంచుకుని సాధన చేసి, దాన్నే వీలైనన్నిసార్లు పునశ్చరణ చేయడం ఉత్తమం. సాధన సమయంలో ఏదైనా విషయంలో మనస్తాపానికి గురై ప్రేరణ కోల్పోవచ్చు. ఉదా: సాధన చేసేటప్పుడు కొన్ని ప్రశ్నలకు సమాధానాలను రాబట్టడంలో విఫలమైనప్పుడుకానీ సామాజిక, కుటుంబపర సమస్యలు ఎదురైనప్పుడుకానీ సాధనపై దృష్టి మరలుతుంది. ఈ లోపాలను సవరించుకోవాలి.

Back..

Posted on 16-10-2017