Ask the Expert
|
Feedback
|
About us
|
Contact us
|
Pratibha Home
 
సెక్టోరల్‌ ఎంబీఏ కోర్సులు-సంస్థలు

* మెచ్చిన రంగంలో మేనేజ్‌మెంట్‌

అడ్మినిస్ట్రేషన్‌ కోసం దాదాపు అన్ని ఆర్గనైజేషన్లు ఎంబీఏ అభ్యర్థులను ఎంపిక చేసుకుంటాయి. కానీ కొన్ని ప్రత్యేక సంస్థలు వాటి ప్రత్యేకతకు అనుగుణంగా మేనేజర్లను ఎంచుకుంటాయి. అలాంటి ఆఫర్లను అందుకోవాలంటే ప్రత్యేక మేనేజ్‌మెంట్‌ కోర్సులు చేయాల్సిందే. వాటినే సెక్టోరల్‌ (రంగాలవారీ) ఎంబీఏలు అంటారు. అభ్యర్థులు తమ అభిరుచులకు అనుగుణంగా కూడా వీటిని చేసుకోవచ్చు. ఇష్టమైన విభాగంలో ఉద్యోగాన్ని సాధించుకోవచ్చు.
ఎంబీఏ కోర్సును జనరల్, సెక్టోరల్‌.. రెండుగా చెప్పుకోవచ్చు. రెగ్యులర్‌ ఎంబీఏ చదివినవారు తమ పరిజ్ఞానాన్ని ఏ విభాగానికైనా అన్వయించుకోవడానికి వీలవుతుంది. అంటే వీరు అన్ని రకాల పరిశ్రమల్లోనూ సేవలు అందించవచ్చు. అలా కాకుండా సెక్టోరల్‌ ఎంబీఏ విషయానికొచ్చేసరికి ఆ రంగానికి సంబంధించి పూర్తిస్థాయి అవగాహన కల్పిస్తారు. దానిలో సేవలందిస్తోన్న సంస్థల అవసరాలు తీర్చేలా ఈ కోర్సులను రూపొందించారు. దీంతో వీటిని చేసినవారికి ఎక్కువ శాతం అవకాశాలు ఆ రంగంతో ముడిపడే ఉంటాయి. కెరియర్‌ మొత్తం దాదాపుగా సంబంధిత విభాగంలో సేవలు అందిస్తోన్న సంస్థల్లోనే కొనసాగాల్సి వస్తుంది.
ఏ తరహా కంపెనీల్లో ఉద్యోగం చేయాలనుకుంటున్నారో, ఏ విభాగంలో సేవలందించాలని కోరుకుంటున్నారో పూర్తి స్పష్టత ఉన్నప్పుడు సెక్టోరల్‌ చదువుల దిశగా అడుగులు వేయవచ్చు. కొన్ని సెక్టోరల్‌ కోర్సుల విషయంలో ఇందుకు మినహాయింపు లభిస్తుంది. ఉదాహరణకు ఎంబీఏ ఇంటర్నేషనల్‌ బిజినెస్‌ కోర్సు పూర్తిచేసినవారు అంతర్జాతీయ వర్తకంతో ముడిపడే ఏ తరహా సంస్థలోనైనా ఉపాధి పొందడానికి వీలవుతుంది. సెక్టోరల్‌ కోర్సులు చదవాలనే ఆసక్తి ఉన్నప్పుడు ప్రామాణిక బీ స్కూళ్లలో చేరితేనే నాణ్యమైన పరిజ్ఞానం పొందగలరు. క్యాంపస్‌ ప్లేస్‌మెంట్లలోనూ ఉన్నత అవకాశాలు దక్కించుకోవచ్చు. సెక్టోరల్‌ కోర్సులతో ఆశించిన ప్రయోజనం సాధారణ సంస్థల్లో ద]క్కదని గుర్తుంచుకోవాలి.

ఎవరికి ఏది బాగు?
స్పెషలిస్టుగా సేవలందించాలని కోరుకునే విద్యార్థులు సెక్టార్‌ వైపు, జనరలిస్టుగా రాణించాలని ఆశించేవారు రెగ్యులర్‌ ఎంబీఏ దిశగా అడుగులేయడం ఉత్తమం. విద్యార్థి యూజీలో చదివిన కోర్సుల ప్రకారమూ ఒక నిర్ణయం తీసుకోవచ్చు. ఉదాహరణకు బీఫార్మసీ విద్యార్థి సాధారణ ఎంబీఏ బదులు ఫార్మాస్యూటికల్‌ మేనేజ్‌మెంట్‌ కోర్సులో చేరడం వల్ల ఎక్కువ ప్రయోజనం పొందవచ్చు. బీఏలో రూరల్‌ డెవలప్‌మెంట్‌ కోర్సులు చదువుకున్నవారు రూరల్‌ మేనేజ్‌మెంట్‌లో చేరడానికి ప్రాధాన్యం ఇవ్వవచ్చు. ఆసుపత్రుల్లోనే సేవలు అందించాలనుకునేవారు హాస్పిటల్‌ అడ్మినిస్ట్రేషన్‌కు జై కొట్టొచ్చు. విద్యార్థులు తమ ఇష్టాలు, నైపుణ్యాలు, ఆసక్తులకు అనుగుణంగా సెక్టోరల్, జనరల్‌ ఎంబీఏల్లో ఎటువైపు వెళ్లాలో నిర్ణయించుకోవాలి.

ఏ కోర్సులు... ఏ సంస్థల్లో?
ఇంటర్నేషనల్‌ బిజినెస్‌: జనరల్‌ మేనేజ్‌మెంట్‌తోపాటు ఇంటర్నేషనల్‌ బిజినెస్‌పై పట్టు లభించేలా కరిక్యులమ్‌ ఉంటుంది. అంతర్జాతీయ ఆర్థిక వ్యవస్థకు అనుగుణంగా దీన్ని తీర్చిదిద్దారు. బహుళజాతి కంపెనీలకు ఈ స్పెషలైజేషన్‌తో అవసరం ఉంటుంది. స్థానిక మార్కెట్‌ పరిస్థితులు, అంతర్జాతీయ ట్రెండ్‌ ఈ రెండింటికీ సరిపోయేలా ఉత్పత్తులను తయారు చేయడం, అభివృద్ధి పరచడం, వర్తకాన్ని విస్తరించడం, దానికి ప్రచారం కల్పించడం లాంటివన్నీ చూసుకుంటారు. అంతర్జాతీయ పరిణామాలు స్థానిక మార్కెట్‌పై ఏ విధమైన ప్రభావాన్ని చూపగలవో అంచనా వేస్తారు. ప్రధాన కార్యాలయాలు విదేశాల్లో ఉంటాయి. సాధారణంగా వీరు స్వదేశం నుంచి సేవలు అందిస్తారు.
సంస్థలు: ఇండియన్‌ ఇన్‌స్టిట్యూట్‌ ఆఫ్‌ ఫారిన్‌ ట్రేడ్‌. ఈ సంస్థ ఎంబీఏ ఇంటర్నేషనల్‌ బిజినెస్‌ కోర్సులో సొంత పరీక్ష ద్వారా ప్రవేశం కల్పిస్తుంది. దిల్లీ క్యాంపస్‌లో 220, కోల్‌కతాలో 140 సీట్లు ఉన్నాయి. ఫీజు రూ.16 లక్షలు. ఇక్కడి విద్యార్థులు సగటున రూ.20 లక్షల వార్షిక వేతనంతో క్యాంపస్‌ నియామకాల ద్వారా అవకాశాలు పొందుతున్నారు. సింబయాసిస్‌ ఇంటర్నేషనల్‌ బిజినెస్‌ (ఎస్‌ఐబీ), పుణె స్నాప్‌ ద్వారా 120 మందికి అవకాశం కల్పిస్తోంది. ఇక్కడ ఫీజు రూ.15 లక్షల వరకు ఉంటుంది. కోర్సు పూర్తిచేసిన విద్యార్థులు సగటున రూ.10 లక్షలకు పైగా వార్షిక వేతనం పొందుతున్నారు.

రూరల్‌ మేనేజ్‌మెంట్‌: ప్రాంతీయ సహకార సంఘాలు, అభివృద్ధి సంస్థలు, ఎన్జీవోలు, ఫండింగ్‌ సంస్థలు, ఫౌండేషన్లలో ఈ కోర్సులు చదివినవారికి అవకాశాలు ఉంటాయి. జాతీయ సంస్థలతోపాటు బహుళజాతి సంస్థలు సైతం గ్రామీణాభివృద్ధిలో పాలు పంచుకుంటున్నాయి. ప్రస్తుతం చాలావరకు కార్పొరేట్‌ కంపెనీలు సీఎస్‌ఆర్‌లో భాగంగా పెద్దఎత్తున గ్రామాల అభివృద్ధిపై దృష్టి సారిస్తున్నాయి. స్థానిక వనరులను అభివృద్ధి చేయడం, ఉత్పత్తులను మార్కెట్‌ చేయడంపైనా కృషి జరుగుతోంది. డెయిరీ, ఎరువులు, క్రిమిసంహారకాలు, వ్యవసాయ ఉత్పత్తులు...తదితర సంస్థల్లో పెద్ద ఎత్తున అవకాశాలు లభిస్తాయి.
సంస్థలు: ఇన్‌స్టిట్యూట్‌ ఆఫ్‌ రూరల్‌ మేనేజ్‌మెంట్‌ ఆనంద్‌ (ఐఆర్‌ఎంఏ), ఆనంద్‌ (గుజరాత్‌), 180 సీట్లు ఉన్నాయి. క్యాట్‌ లేదా సొంతంగా నిర్వహించే పరీక్ష ఈ రెండింటితోనూ ప్రవేశం లభిస్తుంది. జేవియర్‌ ఇన్‌స్టిట్యూట్‌ ఆఫ్‌ మేనేజ్‌మెంట్, భువనేశ్వర్, వెల్లింగ్‌కర్, ముంబయి, అమిటీ, నోయిడా. నేషనల్‌ ఇన్‌స్టిట్యూట్‌ ఆఫ్‌ రూరల్‌ డెవలప్‌మెంట్‌ అండ్‌ పంచాయతీ రాజ్‌ (ఎన్‌ఐఆర్‌డీపీఆర్‌), హైదరాబాద్‌ పీజీ డిప్లొమా ఇన్‌ రూరల్‌ మేనేజ్‌మెంట్, పీజీ డిప్లొమా ఇన్‌ రూరల్‌ డెవలప్‌మెంట్‌ మేనేజ్‌మెంట్‌ కోర్సులు అందిస్తోంది. దరఖాస్తులకు గడువు ఏప్రిల్‌ 8..

అగ్రి బిజినెస్‌ మేనేజ్‌మెంట్‌: దాదాపు రూరల్‌ మేనేజ్‌మెంట్‌ కోర్సుగానే ఉంటుంది. అయితే వ్యవసాయ రంగంపై ప్రత్యేక దృష్టితో రూపొందించారు. ఇందులో చేరిన ఐఐఎం విద్యార్థులు అగ్రికల్చర్‌ విభాగంతోపాటు సాధారణ మేనేజ్‌మెంట్‌ గ్రాడ్యుయేట్లు పొందుతున్న అవకాశాలూ సొంతం చేసుకుంటున్నారు.
సంస్థలు: ఐఐఎం - అహ్మదాబాద్, లఖ్‌నవూ; మేనేజ్, హైదరాబాద్, ఎస్‌ఐఐబీ, పుణె. ఎస్వీ అగ్రికల్చరల్‌ కాలేజ్, తిరుపతి. ఇండియన్‌ ఇన్‌స్టిట్యూట్‌ ఆఫ్‌ ప్లాంటేషన్‌ మేనేజ్‌మెంట్, బెంగళూరు -అగ్రి బిజినెస్‌ అండ్‌ ప్లాంటేషన్‌ మేనేజ్‌మెంట్‌ (ఏబీపీఎం), ఫుడ్‌ ప్రాసెసింగ్‌ అండ్‌ బిజినెస్‌ మేనేజ్‌మెంట్‌ (ఎఫ్‌పీబీఎం) కోర్సు అందిస్తోంది. నేషనల్‌ అకాడెమీ ఆఫ్‌ అగ్రికల్చరల్‌ రిసెర్చ్‌ మేనేజ్‌మెంట్‌ (నార్మ్‌), హైదరాబాద్‌ పీజీ డిప్లొమా ఇన్‌ టెక్నాలజీ మేనేజ్‌మెంట్‌ ఇన్‌ అగ్రికల్చర్‌ పేరుతో ఏడాది వ్యవధి కోర్సు అందిస్తోంది.దరఖాస్తులకు గడువు ఫిబ్రవరి 28. .

రిటైల్‌ మేనేజ్‌మెంట్‌: ఇప్పుడు అంతా రిటైల్‌ వ్యాపారమే. దుస్తులైనా, సరుకులైనా కార్పొరేట్‌ రిటైల్‌ కంపెనీల్లో కొనుగోలు చేసుకోవచ్చు. రిలయన్స్, ఫ్యూచర్‌ గ్రూప్, ఐటీసీ, ఆదిత్య బిర్లా, టాటా, లైఫ్‌స్టైల్, స్పెన్సర్స్, డీమార్ట్, వాల్‌మార్ట్‌...ల్లో అవకాశాలు లభిస్తున్నాయి.
సంస్థలు: నార్సీ మోంజీ, ముంబయి, వెలింగ్‌కర్, ముంబయి, బిర్లా ఇన్‌స్టిట్యూట్‌ ఆఫ్‌ మేనేజ్‌మెంట్‌ టెక్నాలజీ, గ్రేటర్‌ నోయిడా, ఇండియన్‌ ఇన్‌స్టిట్యూట్‌ ఆఫ్‌ కామర్స్‌ అండ్‌ ట్రేడ్, లఖ్‌నవూ, ఫుట్‌వేర్‌ డిజైన్‌ అండ్‌ డెవలప్‌మెంట్‌ ఇన్‌స్టిట్యూట్‌ (ఎఫ్‌డీడీఐ) ఎంబీఏ (రిటైల్‌ అండ్‌ ఫ్యాషన్‌ మర్చెండైజ్‌) కోర్సు అందిస్తోంది. దరఖాస్తులకు గడువు ఏప్రిల్‌ 20.

ఫార్మా మేనేజ్‌మెంట్‌: ఫార్మా కంపెనీల్లో మేనేజీరియల్‌ ఉద్యోగాలు ఆశించేవారు ఫార్మా మేనేజ్‌మెంట్‌ కోర్సులో చేరడానికి ప్రాధాన్యం ఇవ్వవచ్చు.
సంస్థలు: నార్సీ మోంజీ ఇన్‌స్టిట్యూట్‌ ఆఫ్‌ మేనేజ్‌మెంట్‌ స్టడీస్‌ (ఎన్‌ఎంఐఎంఎస్‌), ముంబయి, ఎస్‌ఐఈఎస్‌ కాలేజ్‌ ఆఫ్‌ మేనేజ్‌మెంట్‌ స్టడీస్, ముంబయి.

మరికొన్ని...
ఇండియన్‌ ఇన్‌స్టిట్యూట్‌ ఆఫ్‌ ఫారెస్ట్‌ మేనేజ్‌మెంట్‌ (ఐఐఎఫ్‌ఎం), భోపాల్‌ రెసిడెన్షియల్‌ విధానంలో పోస్టుగ్రాడ్యుయేట్‌ డిప్లొమా ఇన్‌ ఫారెస్ట్రీ మేనేజ్‌మెంట్‌ కోర్సు అందిస్తోంది. ఈ రెండేళ్ల కోర్సులో కన్జర్వేషన్‌ అండ్‌ లైవ్‌లీ హుడ్, డెవలప్‌మెంట్‌ మేనేజ్‌మెంట్, ఎన్విరాన్‌మెంట్‌ మేనేజ్‌మెంట్‌ స్పెషలైజేషన్లు సైతం ఉన్నాయి. ఈ కోర్సులో ప్రవేశాలకు ప్రకటన వెలువడింది. క్యాట్‌/ ఎక్స్‌ఏటీ స్కోర్‌తో ఫిబ్రవరి 20లోగా దరఖాస్తు చేసుకోవచ్చు.
* నేషనల్‌ ఇన్‌స్టిట్యూట్‌ ఆఫ్‌ ఇండస్ట్రియల్‌ ఇంజినీరింగ్‌ (ఎన్‌ఐటీఐఈ), ముంబయి పీజీ డిప్లొమా ఇన్‌ ఇండస్ట్రియల్‌ మేనేజ్‌మెంట్, పీజీ డిప్లొమా ఇన్‌ ఇండస్ట్రియల్‌ సేఫ్టీ అండ్‌ ఎన్విరాన్‌మెంటల్‌ మేనేజ్‌మెంట్‌ కోర్సులు అందిస్తోంది. బీఈ/ బీటెక్‌ ఉత్తీర్ణులు అర్హులు. ఈ సంస్థలో చదివినవారు మంచి వేతనాలతో ఉద్యోగాలు పొందుతున్నారు.
* వైఎస్‌ఆర్‌ నిథమ్, హైదరాబాద్‌తోపాటు పలు సంస్థలు హాస్పిటాలిటీ మేనేజ్‌మెంట్‌లో పీజీ కోర్సులు అందిస్తున్నాయి. వీరికి హోటళ్లు, రిసార్టులు, పర్యాటక కేంద్రాలు, ఎయిర్‌ లైన్స్‌...తదితర చోట్ల అవకాశాలు లబిస్తాయి.
* రాజీవ్‌ గాంధీ ఇన్‌స్టిట్యూట్‌ ఆఫ్‌ పెట్రోలియం టెక్నాలజీ, అమేథీ ఎంబీఏ ఎనర్జీ మేనేజ్‌మెంట్‌ కోర్సును అందిస్తోంది.

ఆంత్రప్రెన్యూర్‌షిప్‌ మేనేజ్‌మెంట్‌: ఔత్సాహిక పారిశ్రామిక వేత్తలుగా రాణించాలని ఆశించేవారు ఈ కోర్సులో చేరవచ్చు. సృజన, తర్కం, నైపుణ్యాలు...వీటన్నింటికీ మెరుగులద్దుకోవచ్చు.
సంస్థలు: ఆంత్రప్రెన్యూర్‌షిప్‌ డెవలప్‌మెంట్‌ ఇన్‌స్టిట్యూట్‌ ఆఫ్‌ ఇండియా, గాంధీనగర్, టాటా ఇన్‌స్టిట్యూట్‌ ఆఫ్‌ మేనేజ్‌మెంట్‌ సైన్సెస్, ముంబై, జేవియర్‌ ఇన్‌స్టిట్యూట్‌ ఆఫ్‌ మేనేజ్‌మెంట్‌ అండ్‌ అంతర్‌ప్రెన్యూర్‌షిప్, బెంగళూరు, నిర్మా ఇన్‌స్టిట్యూట్‌ ఆఫ్‌ మేనేజ్‌మెంట్, అహ్మదాబాద్, జామియా మిల్లియా ఇస్లామియా, న్యూదిల్లీ

హాస్పిటల్‌ అడ్మినిస్ట్రేషన్‌: జనాభాతోపాటు రోగాలు పెరుగుతున్నాయి. కొత్త జబ్బులూ పుట్టుకొస్తున్నాయి. దీంతో ఆసుపత్రులు విస్తరిస్తున్నాయి. అయితే ఆసుపత్రులకు వైద్యుల అవసరం ఎంత ఉందో వాటి విభిన్న విభాగాల సక్రమ నిర్వహణకు సమర్థులైన మానవ వనరుల అవసరం అంతే ఉంది. ఇందుకోసమే పీజీ స్థాయిలో పలు సంస్థలు హాస్పిటల్‌ అడ్మినిస్ట్రేషన్‌ కోర్సు అందిస్తున్నాయి. వీటిలో కొన్ని వైద్యవిద్య అభ్యసించినవారికి మాత్రమే ప్రవేశాలు కల్పిస్తుండగా మిగిలినవి అందరు గ్రాడ్యుయేట్లనూ చేర్చుకుంటున్నాయి.
సంస్థలు: ఎయిమ్స్, న్యూదిల్లీ, నిమ్స్, హైదరాబాద్‌ల్లో కోర్సులు చదవడానికి వైద్యవిద్య పట్టభద్రులు అర్హులు. అపోలో హాస్పిటల్, హైదరాబాద్‌ కేంద్రీయ విద్యాలయం, ఇన్‌స్టిట్యూట్‌ ఆఫ్‌ పబ్లిక్‌ ఎంటర్‌ ప్రైజెస్, హైదరాబాద్, ఫోర్ట్‌ హాస్పిటల్‌...తదితర సంస్థలు సాధారణ గ్రాడ్యుయేట్లకు పీజీ స్థాయిలో కోర్సులో చేరే అవకాశం కల్పిస్తున్నాయి.

కమ్యూనికేషన్‌ మేనేజ్‌మెంట్‌: అడ్వర్టయిజింగ్, మీడియా, జర్నలిజం, పబ్లిక్‌ రిలేషన్స్‌ విభాగాల్లో ఉద్యోగాలు లభిస్తాయి. సంస్థలు: ముద్ర ఇన్‌స్టిట్యూట్‌ ఆఫ్‌ కమ్యూనికేషన్, అహ్మదాబాద్, సింబయాసిస్‌ ఇన్‌స్టిట్యూట్‌ ఆఫ్‌ మీడియా అండ్‌ కమ్యూనికేషన్, పుణె, అమిటీ, నోయిడా.

ఇన్సూరెన్స్‌ బిజినెస్‌ మేనేజ్‌మెంట్‌: బీమా రంగం, బ్యాంకింగ్‌ విభాగాల్లో కొలువులు ఆశించేవారు ఈ కోర్సులో చేరడానికి ప్రాధాన్యం ఇవ్వవచ్చు. సంస్థలు: బీమ్‌టెక్, నోయిడా; ఐపీఈ, హైదరాబాద్, ఎన్‌ఐఏ, పుణె.

టెలికాం మేనేజ్‌మెంట్‌: టెలికాం రంగంలో ఉద్యోగాలు లభిస్తాయి. సంస్థలు: సింబయాసిస్‌ ఇన్‌స్టిట్యూట్‌ ఆఫ్‌ టెలికాం మేనేజ్‌మెంట్, పుణె, ఐఐటీ, దిల్లీ; అమిటీ, నోయిడా

ఐటీ మేనేజ్‌మెంట్‌: ఐటీ రంగంలో మేనేజ్‌మెంట్‌ ఉద్యోగాలు ఆశించేవారు ఈ కోర్సులో చేరవచ్చు. సంస్థలు: సింబయాసిస్‌ సెంటర్‌ ఫర్‌ ఇన్ఫర్మేషన్‌ టెక్నాలజీ (ఎస్‌సీఐటీ), పుణె, ఎస్‌పీ జైన్, ముంబై.


Back..

Posted on 06-02-2019