Ask the Expert
|
Feedback
|
About us
|
Contact us
|
Pratibha Home
 
‘నెస్ట్‌’లో నెగ్గితే భవితకు భరోసా

ప్రతిష్ఠాత్మక విద్యాసంస్థల్లో ఇంటిగ్రేటెడ్‌ సైన్స్‌ పీజీ కోర్సుల్లో ప్రవేశం పొందటానికి ఉపకరించే పరీక్ష ‘నెస్ట్‌’ (నేషనల్‌ ఎంట్రన్స్‌ స్క్రీనింగ్‌ టెస్ట్‌). ఈ పరీక్ష ముఖ్యాంశాలు, సమగ్రంగా సిద్ధమవ్వాల్సిన తీరుతెన్నులను తెలుసుకుందాం!

జాతీయ ప్రవేశపరీక్ష ‘నెస్ట్‌’లో మంచి స్కోరు తెచ్చుకుంటే నైసర్‌ (భువనేశ్వర్‌), ముంబయి యూనివర్సిటీ- ఎటామిక్‌ ఎనర్జీ డిపార్ట్‌మెంట్‌ ఫర్‌ ఎక్స్‌లెన్స్‌ ఇన్‌ బేసిక్‌ సైన్స్‌- సీఈబీఎస్‌ (ముంబయి) సంస్థల్లో ఎంఎస్సీ కోర్సుల్లో చేరవచ్చు. ఈ రెండు సంస్థల్లో అత్యాధునిక పరిజ్ఞానంతో కూడిన ప్రయోగశాలలు, ఆధునిక కంప్యూటేషనల్‌ సౌకర్యాలు ఉంటాయి. ప్రముఖ శాస్త్రవేత్తలతో బోధన జరగటం చెప్పుకోదగ్గ ప్రత్యేకత.
మౌలిక (బేసిక్‌) సైన్సు కోర్సులైన బయాలజీ, కెమిస్ట్రీ, మ్యాథ్స్‌, ఫిజిక్స్‌ మొదలైన సబ్జెక్టుల్లో ఐదేళ్ళ ఇంటిగ్రేటెడ్‌ పీజీ కోర్సులను ఇక్కడ సెమిస్టర్‌ విధానంలో అందిస్తున్నారు. ఈ కోర్సుల్లో చదవటానికి అర్హత సంపాదించిన విద్యార్థులకు భారత ప్రభుత్వం అందించే రూ.5,000 ఇన్‌స్పైర్స్‌ ఉపకార వేతనం, వేసవి ప్రాజెక్టు కోసం ఏడాదికి రూ, 20,000 ప్రోత్సాహకం లభిస్తాయి.
పీజీ చివరి సంవత్సరంలో ఉన్న విద్యార్థులకు అధిక వేతనాలతో కూడిన క్యాంపస్‌ ప్లేస్‌మెంట్లు ఉంటాయి. అంతే కాదు; బాబా ఎటామిక్‌ రిసర్చ్‌ సెంటర్‌లో ప్రవేశాల కోసం నిర్వహించే ఇంటర్వ్యూకు వీరికి నేరుగా అర్హత లభిస్తుంది.

ఎవరు అర్హులు?
ఇంటర్మీడియట్‌/ 10+2 ను 2015 లేదా 2016లో పూర్తిచేసిన ఎంపీసీ, బైపీసీ, ఎంబైపీసీ విద్యార్థులూ, 2017 పరీక్ష రాసే ఈ గ్రూపుల విద్యార్థులూ ఈ నెస్ట్‌- ప్రవేశపరీక్ష రాయటానికి అర్హులు. జనరల్‌/ఓబీసీ క్యాటగిరీ విద్యార్థులకు ఇంటర్‌/10+2లో 60 శాతం అగ్రిగేట్‌ మార్కులుండాలి. ఎస్‌సీ, ఎస్‌టీ, పీడీ విద్యార్థులకు 55 శాతం అగ్రిగేట్‌ మార్కులుండాలి.
ఆన్‌లైన్‌ ద్వారా మాత్రమే దరఖాస్తు చేయాల్సివుంటుంది.

పరీక్ష ఎలా ఉంటుంది?
పూర్తి ఆబ్జెక్టివ్‌ విధానంలో ఉండే పరీక్ష ఇది. ప్రశ్నపత్రం ఇంగ్లిష్‌ మాధ్యమంలో మాత్రమే ఉంటుంది. మొత్తం ఐదు విభాగాలుంటాయి. ఒక్కో విభాగానికి దాదాపు 50 మార్కుల వెయిటేజిని నిర్దేశిస్తారు.
సెక్షన్‌ 1: ఇది జనరల్‌ సెక్షన్‌. మూడు గ్రూపుల వారూ తప్పనిసరిగా సమాధానాలు రాయాల్సిన విభాగమిది. దీనిలోని ప్రశ్నలకు రుణాత్మక మార్కులు ఉండవు.
సెక్షన్‌ 2 నుంచి సెక్షన్‌ 5: ఈ విభాగాల్లో సబ్జెక్టులవారీ ప్రశ్నలు ఉంటాయి. అంటే బయాలజీ, కెమిస్ట్రీ, మ్యాథ్స్‌, ఫిజిక్స్‌ విభాగం ప్రశ్నల సెక్షన్లు. విద్యార్థులు ఈ అన్ని సెక్షన్లలోని ప్రశ్నలకు సరైన సమాధానాలు రాయవచ్చు. కానీ సరిగ్గా జవాబులు రాసిన మూడు సెక్షన్లను మాత్రమే పరిగణనలోకి తీసుకుంటారు. ఈ విభాగాల్లోని ప్రశ్నలకు రుణాత్మక (నెగిటివ్‌) మార్కులు ఉంటాయి.
ఈ ప్రవేశపరీక్ష రాయటానికి 3 గంటల సమయం కేటాయిస్తారు.

సన్నద్ధత ఎలా?
నైసర్‌ విద్యావిధానమే సమగ్రంగా ఉంటుంది. కాబట్టి ప్రవేశపరీక్షలు కూడా ఆ స్థాయిలోనే ఉంటాయి. ప్రశ్నలన్నీ విద్యార్థుల విశ్లేషణ, తార్కిక సామర్థ్యాలను పరీక్షించేవిధంగా ఉండటం నైసర్‌ ప్రత్యేకత. ఈ ప్రవేశపరీక్షలో ప్రశ్నలు జేఈఈ అడ్వాన్స్‌డ్‌ స్థాయిలో ఉంటున్నాయి.
ఈ ప్రవేశపరీక్ష రాసే విద్యార్థులు మొదట ప్రాథమిక భావనలను (బేసిక్‌ కాన్సెప్ట్స్‌) వృద్ధి చేసుకోవాలి. దీనికోసం తెలుగు అకాడమీ, సీబీఎస్‌ఈ ఎన్‌సీఈఆర్‌టీ పుస్తకాలను చదివి, తర్వాత టాపిక్‌ వారీ రెఫరెన్స్‌ పుస్తకాల ద్వారా సబ్జెక్టును క్షుణ్ణంగా అధ్యయనం చేయాలి.
బయాలజీ విభాగంలో ప్రధానంగా జనరల్‌ బయాలజీ, సెల్‌ బయాలజీ, జెనెటిక్స్‌, ఎకాలజీ- ఎవల్యూషన్‌, బయో టెక్నాలజీ, యానిమల్‌ ఫిజియాలజీ, ప్లాంట్‌ ఫిజియాలజీ, డీఎన్‌ఏ ధర్మాలు, ఆర్‌డీఎన్‌ఏ టెక్నాలజీ, ట్రాన్స్‌లేషన్‌, ట్రాన్స్‌క్రిప్షన్‌ మొదలైన అంశాల నుంచి అధిక ప్రశ్నలను అడుగుతున్నారు. కాబట్టి వీటిమీద ఎక్కువగా దృష్టి కేంద్రీకరించాలి.
కెమిస్ట్రీ విభాగంలో ప్రధానంగా ఎక్కువ శ్రద్ధ పెట్టాల్సిన టాపిక్స్‌ కొన్ని ఉన్నాయి.
ఆర్గానిక్‌ కెమిస్ట్రీలో- జనరల్‌ ఆర్గానిక్‌ కెమిస్ట్రీ, రియాక్షన్‌ మెకానిజం, స్టీరియో కెమిస్ట్రీ, నెమెడ్‌ రియాక్షన్స్‌, ఎరోమ్యాటిసిటీ, కార్బోహైడ్రేట్స్‌, అమైనో యాసిడ్స్‌, పాలిమార్స్‌; ఫిజికల్‌ కెమిస్ట్రీలో- మోల్‌ కాన్సెప్ట్‌, సొల్యూషన్స్‌, సాలిడ్‌ స్టేట్‌, ఎలక్ట్రో కెమిస్ట్రీ, కెమికల్‌ కైనటిక్స్‌, థర్మో డైనమిక్స్‌ సంబంధిత అంశాలను క్షుణ్ణంగా అధ్యయనం చేయాలి.
ఇనార్గానిక్‌ కెమిస్ట్రీలో సంశ్లిష్ట సమ్మేళనాలు, ఎస్‌-పీ బ్లాక్‌ మూలకాలు, డీ అండ్‌ ఎఫ్‌ బ్లాక్‌ మూలకాలు, మెటలర్జీ మొదలైన అంశాలు ప్రధానమైనవి.
ఫిజిక్స్‌ విభాగంలో జనరల్‌ ఫిజిక్స్‌, ఆప్టిక్స్‌, మోడర్న్‌ ఫిజిక్స్‌, ఎలక్ట్రిసిటీ, మ్యాగ్నటిజమ్‌, మెకానిక్స్‌ సంబంధిత సిలబస్‌ను అనువర్తిత ధోరణిలో అధ్యయనం చేయాలి.
మేథమేటిక్స్‌ విభాగంలో కాల్‌క్యులస్‌, ట్రిగొనామెట్రీ, కోఆర్టినేట్‌ జామెట్రీ, ఆల్జీబ్రా, వెక్టర్స్‌ సంబంధిత సిలబస్‌ను అభ్యాసం చేయాలి.
అభ్యర్థులు బట్టీ పట్టే ధోరణిలో కాకుండా సబ్జెక్టును అవగాహన చేసుకుంటూ చదవాలి. విభిన్న అంశాలను అన్వయించగలిగితే విజయం సాధ్యపడుతుంది. సబ్జెక్టును ఇష్టపడి చదవాలి. ఆశావహ దృక్పథంతో కష్టపడి అభ్యాసం చేస్తే మెరుగైన ర్యాంకుకు ఆస్కారం ఏర్పడుతుంది. గత ప్రశ్నపత్రాలను www.nestexam.inవెబ్‌సైట్‌లో పరిశీలించి, అవగాహన ఏర్పరచుకోవచ్చు.

సబ్జెక్టువారీగా... మొత్తానికీ కటాఫ్‌
* ఒక అభ్యర్థి మొత్తం స్కోరు అనేది ఆ అభ్యర్థి జనరల్‌ విభాగం, ఇంకా అత్యుత్తమ స్కోరు సాధించిన మూడు సబ్జెక్టు విభాగాల్లో సాధించిన మార్కుల మొత్తంగా ఉంటుంది.
* ప్రతి విభాగంలోనూ అత్యుత్తమ 100 స్కోర్ల సగటులో 20 శాతం అనేదాన్ని ఆ విభాగానికి కటాఫ్‌ స్కోరు SMASగా నిర్ణయిస్తారు. ఉదా: జనరల్‌ విభాగంలో అత్యుత్తమ 100 స్కోర్ల సగటు 40 మార్కులు అయితే జనరల్‌ విభాగానికి ‘ఎస్‌మాస్‌’ అనేది 40X0.2= 8 మార్కులు అవుతుంది.
* వేర్వేరు విభాగాలకు ఎస్‌మాస్‌ వేర్వేరుగా ఉండే అవకాశం ఉంది.
* ప్రతి అభ్యర్థీ జనరల్‌, కనీసం మూడు సబ్జెక్టు విభాగాల్లో ఎస్‌మాస్‌ సమానమైన లేదా అధికమైన స్కోరు సాధించాలి. వీరిని మాత్రమే మెరిట్‌ లిస్టు గణనలోకి తీసుకుంటారు.
* జనరల్‌ విభాగం, కనీసం మూడు సబ్జెక్టుల్లో ఎస్‌మాస్‌ సాధించని అభ్యర్థులకు ఎలాంటి ర్యాంకునూ కేటాయించరు. వీరు ప్రవేశార్హతలు పొందలేరు.
* ఓబీసీ క్యాటగిరీ అభ్యర్థుల ఎస్‌మాస్‌ అనేది జనరల్‌ కేటగిరి అభ్యర్థుల ఎస్‌మాస్‌లో 90 శాతం వర్తిస్తుంది. ఉదా: జనరల్‌ అభ్యర్థుల ఎస్‌మాస్‌ 8 అయితే ఓబీసీ క్యాటగిరీ అభ్యర్థుల ఎస్‌మాస్‌ 8X0.9=7 (సుమారుగా) అవుతుంది.
* ఎస్‌సీ, ఎస్‌టీ, పీడీ క్యాటగిరీ అభ్యర్థుల ఎస్‌మాస్‌ అనేది జనరల్‌ కేటగిరి అభ్యర్థుల ఎస్‌మాస్‌లో 50 శాతం వర్తిస్తుంది. ఉదా: జనరల్‌ కేటగిరి అభ్యర్థుల ఎస్‌మాస్‌ 8 అయితే ఎస్‌సీ, ఎస్‌టీ, పీడీ క్యాటగిరీ అభ్యర్థుల ఎస్‌మాస్‌ 8X0.5= 4 (సుమారుగా) అవుతుంది.
* వీటితో పాటు అభ్యర్థులు మొత్తం ప్రశ్నపత్రం మార్కుల్లో 50 శాతం అంటే 100 మార్కులు కనీసంగా సాధించాలి. దీన్నే MASఅంటారు. మాస్‌కు సమానమైన, అధిక మార్కులు సాధించిన అభ్యర్థులకు మాత్రమే మెరిట్‌ ర్యాంకును కేటాయిస్తారు.
* మాస్‌ కంటే తక్కువ స్కోరు సాధించి, జనరల్‌; మూడు సబ్జెక్టుల విభాగాల్లో ఎస్‌మాస్‌ సాధించినప్పటికీ అలాంటి అభ్యర్థులకు మెరిట్‌ ర్యాంకును కేటాయించరు.
* ఓబీసీ కేటగిరీ అభ్యర్థుల మాస్‌ అనేది జనరల్‌ కేటగిరీ అభ్యర్థుల మాస్‌లో 90 శాతం వర్తిస్తుంది.
* ఎస్‌సీ, ఎస్‌టీ, పీడీ క్యాటగిరీ అభ్యర్థుల మాస్‌ అనేది జనరల్‌ అభ్యర్థుల మాస్‌లో 50 శాతం వర్తిస్తుంది.
పరీక్ష కేంద్రాలు: మన తెలుగు రాష్ట్రాల్లో హైదరాబాద్‌, విజయవాడ, విశాఖపట్నాల్లో ఈ పరీక్షను నిర్వహిస్తారు.
నెస్ట్‌లో ప్రశ్నలు జేఈఈ అడ్వాన్స్‌డ్‌ స్థాయిలో ఉంటున్నాయి. ఈ ప్రవేశపరీక్ష రాసే విద్యార్థులు మొదట ప్రాథమిక భావనలను (బేసిక్‌ కాన్సెప్ట్స్‌) వృద్ధి చేసుకోవాలి. తర్వాత టాపిక్‌ వారీ రెఫరెన్స్‌ పుస్తకాల ద్వారా సబ్జెక్టును క్షుణ్ణంగా అధ్యయనం చేయాల్సివుంటుంది.

ర్యాంకర్లు ఏం చెపుతున్నారు?
* ఇంటర్మీడియట్‌ తర్వాత జేఈఈ మెయిన్స్‌, అడ్వాన్స్‌డ్‌లే కాకుండా మంచి భవిష్యత్తునిచ్చే ‘నెస్ట్‌’ కూడా రాయవచ్చని తెలుసుకున్నాను. నా సన్నద్ధత కోసం ప్రాథమిక అంశాలను క్షుణ్ణంగా అర్థం చేసుకున్నాను. మాదిరి ప్రశ్నలను సాధన చేశాను. ప్రతి అంశాన్నీ అనువర్తిత ధోరణిలో సమగ్రంగా అధ్యయనం చేశాను. రోజుకు సుమారు 8 గంటలు కష్టపడి చదివాను.
కెమిస్ట్రీలో క్లిష్టతర అంశాలైన రియాక్షన్‌ మెకానిజం, స్టీరియో కెమిస్ట్రీ, స్టాయికియోమెట్రీ, ఎలక్ట్రో కెమిస్ట్రీ, సంశ్లిష్ట సమ్మేళనాలు, ఫిజిక్స్‌లో మోడర్న్‌ ఫిజిక్స్‌, ఎలక్ట్రిసిటీ, మెకానిక్స్‌, మేథమెటిక్స్‌లో కాల్‌క్యులస్‌, ట్రిగొనామెట్రీ మొదలైనవి ప్రామాణిక పుస్తకాల ఆధారంగా సిద్ధమయ్యాను. ఈ కృషి నా విజయానికి కారణం అని భావిస్తున్నాను. - కె. ప్రియాంక
* ఇంటర్మీడియట్‌ ద్వితీయ సంవత్సరం చదువుతున్నపుడు నైసర్‌లో చేరే ప్రవేశపరీక్ష అయిన ‘నెస్ట్‌’ గురించి తెలిసింది. చాలా కష్టపడి చదివాను. ప్రణాళికాబద్ధంగా సిద్ధమవటం, నమూనా పరీక్షలు రాయటం వల్ల ర్యాంకు సాధించగలిగాను. సబ్జెక్టును అర్థం చేసుకుని అనువర్తిత ధోరణిలో రోజుకు సుమారు 7-8 గంటలు చదివాను.
ఇతర పోటీ పరీక్షలకు సంబంధించిన సమగ్రమైన పుస్తకాలను కూడా విస్తృతంగా చదవటం మంచిది. ప్రతి టాపిక్‌కూ సంబంధించిన ప్రాక్టీసు బిట్లు, పూర్వపు టెస్ట్‌ పేపర్లు అభ్యసించాను. టాపిక్‌కు సంబంధించిన సమాచారాన్ని క్లుప్తంగా, సూటిగా టేబుల్స్‌గా తయారుచేసుకోవాలి. టెస్ట్‌ పేపర్లు సాధన చేయడం వల్ల సమయపాలన అలవడుతుంది. ప్రామాణిక పుస్తకాలను చదవటం కూడా చాలా ప్రధానమైన విషయం. - వర్షిత్‌ రెడ్డి


Back..

Posted on 11-01-2017