Skip Navigation Links
Pratibha Engineering blog



ప్రధాన కథనాలు
పోటీ పరీక్షలకు అనుగుణంగా పాఠ్యపుస్తకాలు

* రాష్ట్ర విద్యాశాఖకు ఎన్‌సీఈఆర్టీ ఆదేశాలు
* ఒకటి నుంచి ఏడో తరగతి పాఠ్య పుస్తకాల్లో మార్పులు
ఈనాడు, చీపురుపల్లి, విజయనగరం: ఒకటో తరగతి నుంచి ఏడో తరగతి వరకు పాఠ్య పుస్తకాల్లో ప్రధానంగా 11 విభాగాల్లో మార్పులు అవసరమని దిల్లీలో జరిగిన సమావేశంలో జాతీయ ఉపాధ్యాయ విద్యామండలి (ఎన్‌సీఈఆర్టీ) గుర్తించింది. మొదటిది సాధారణ సమాచారంలో తరగతి, పేరు, రచయిత, ప్రచురణ సంస్థ, పుటలు, పాఠాలు, సమీక్షలు, పుస్తకం ధర ఉండాలి. రెండోది పుస్తక స్వరూపం. ఇందులో కాగితం నాణ్యత, బైండింగ్‌, కవర్‌ పేజీ, ముద్రణ నాణ్యత, అక్షరాల పరిమాణం, పేజీ ఆకృతి, పుస్తకంలో భావనలు, సమస్య పరిష్కారం, శాస్త్రీయ చర్చలు (లాజికల్‌ ఆర్గ్యూమెంటు), సమాచారం వంటి అంశాలు పొందుపరచాల్సి ఉంటుంది. మూడో అంశానికొస్తే విషయ నిర్వహణలో వాస్తవ అంశాలు, విధానాలు, అదనపు సమాచారం, విధానాల సమగ్రత, గణిత పదజాలాన్ని సూచిస్తూ పుస్తకాలను మార్పు చేయాల్సి ఉంటుంది. నాలుగోది విద్యార్థి కేంద్రీకృత కార్యకలపాల్లో నిత్యజీవితంలో చూసినవై ఉండాలి. పుస్తకాల్లో చదివిందే కాకుండా వాటికి మించి ఆలోచన చేసేలా పాఠ్యపుస్తకాల మార్పు అవసరం. అయిదోది ప్రశ్నల విధానం. ఇందులో ఆలోచన ధోరణి, ఆధారిత కార్యకలాపాలు, సమస్యాపూర్వక, సృజనాత్మకంగా లోపాలను గుర్తించేలా ఉండాలి. ఆరోది కనిపించే దృశ్యాలు. ఇందులో బొమ్మల్లో స్పష్టత, వాటి నిర్మాణం, పాఠ్యాంశంతో బొమ్మల అనుసంధానం, రంగులు వంటి అంశాలకు చోటిచ్చారు. ఏడోది ఆసక్తి పెంచడం, ఎనిమిదోది ఉపాధ్యాయుల మద్దతు, తొమ్మిదోది జాతీయ దృక్పథం, పదోది భాష, పదకొండో అంశం ఇతర అంశాలకు చోటిస్తూ పాఠ్యపుస్తకాలను మార్పు చేయాలని ఆయా రాష్ట్రాల విద్యా పరిశోధ‌న శిక్షణ సంస్థల్ని ఎన్‌సీఈఆర్టీ కోరింది. జాతీయ స్థాయిలో పోటీ పరీక్షలు రాసే విద్యార్థులకు ఈ పాఠ్యప్రణాళిక దోహదపడనుందని విద్యావేత్తలు అభిప్రాయపడుతున్నారు. మరోవైపు.. ప్రాథమిక విద్య తరగతుల పాఠ్య పుస్తకాలను అలాగే కొనసాగిస్తూ వాటిల్లో గుర్తించిన లోపాల్ని, అక్షర దోషాల్ని సరిదిద్దే చర్యలు రాష్ట్ర విద్యా పరిశోధ‌న సంస్థ ద్వారా జరుగుతున్నాయి.

'సర్కారు' విద్యార్థులకు పరీక్ష ఫీజు రద్దు!
* అన్ని వర్గాల పదో తరగతి విద్యార్థులకు వర్తింపు
* ప్రభుత్వ బడుల్లో పిల్లల సంఖ్య పెంచడమే లక్ష్యం
* ప్రతిపాదనలు సిద్ధం చేస్తున్న తెలంగాణ పాఠశాల విద్యాశాఖ
ఈనాడు, హైదరాబాద్: ప్రభుత్వ పాఠశాలల్లో చదువును ప్రోత్సహించడం, విద్యార్థుల సంఖ్యను పెంచాలన్న లక్ష్యంతో తెలంగాణ పాఠశాల విద్యాశాఖ కొత్త ప్రతిపాదనను తెరపైకి తెచ్చింది. సర్కారు బడుల్లో చదువుతున్న పదో తరగతి విద్యారులందరి పరీక్ష ఫీజును రద్దు చేయాలని సర్కారును కోరనుంది. దీనిపై కసరత్తు చేస్తున్న అధికారులు మరో రెండు వారాల్లో ప్రభుత్వానికి ప్రతిపాదనలను సమర్పించనున్నారు. ప్రభుత్వం అనుమతి ఇస్తే నూతన విద్యా సంవత్సరం నుంచి ఇది అమల్లోకి వస్తుంది. తెలంగాణ రాష్ట్రంలో ప్రస్తుతం పదో తరగతి వార్షిక పరీక్షలకు ఒక్కో విద్యార్థి నుంచి రూ.125 వసూలు చేస్తున్నారు. కుటుంబ వార్షిక ఆదాయం రూ.24 వేల లోపు ఉన్న వారికి మినహాయింపు ఇస్తున్నారు. ఈ ఫీజు నిర్ణయించి సుమారు 10 సంవత్సరాలవుతోంది. ప్రస్తుతం ఖర్చులు పెరిగినందున ప్రభుత్వ పరీక్షల విభాగంపై ఆర్థిక భారం పడుతోంది. ఏటా ఫీజుల రూపేణా రూ.11 కోట్లు వస్తుండగా ఖర్చు రూ.25 కోట్లను మించింది. ఈక్రమంలో ప్రభుత్వ పాఠశాలల్లో చదివే వారికి మినహాయించి ప్రైవేట్ పాఠశాలల విద్యార్థులకు ఇప్పుడున్న ఫీజును మూడు నాలుగు రెట్లు పెంచాలని ప్రతిపాదించేందుకు విద్యాశాఖ నిర్ణయించింది. అంతేకాక వార్షిక ఆదాయం రూ.24 వేలు ఉండటం వల్ల కొన్ని వందల మంది మాత్రమే ప్రయోజనం పొందుతున్నారు. దీన్ని రూ.1.50 లక్షలకు పెంచాలనే డిమాండ్ ఉండటంతో అందుకు అధికారులు సంసిద్ధంగా ఉన్నారు.
ప్రభుత్వ పాఠశాలల్లోని విద్యార్థులందరికీ...
ఒకవైపు ప్రైవేట్ బడుల్లో చదివే విద్యార్థులకు పరీక్ష ఫీజు పెంచుతూనే మరో వైపు ప్రభుత్వ పాఠశాలల్లో చదివే అన్ని వర్గాల విద్యార్థులకు ఫీజు రద్దు చేయాలన్నది ప్రతిపాదన. తెలంగాణవ్యాప్తంగా సుమారు 5.5 లక్షల నుంచి 6 లక్షల వరకు పదో తరగతి విద్యార్థులుండగా సగం మంది సర్కారు బడుల్లోనే చదువుతున్నారు. వారిలో ఓసీకి చెందిన వారు సుమారు 18 శాతం మంది ఉన్నారు. అందులోనూ అధికంగా బాలికలున్నారు. అంటే 82 శాతం మంది ఎస్‌సీ, ఎస్‌టీ, బీసీ వర్గాలకు చెందిన వారే. దీంతో అందరి విద్యార్థుల ఫీజు రద్దు చేయాలని అధికారులు ప్రతిపాదిస్తున్నారు. దీనివల్ల ప్రభుత్వంపై రూ.3 కోట్ల నుంచి రూ.4 కోట్ల వరకు భారం పడుతుంది.
బడులకూ నాణ్యత శ్రేణులు!
* ప్రభుత్వ ఆమోదం కోరనున్న తెలంగాణ విద్యాశాఖ
ఈనాడు, హైదరాబాద్: ఎన్నో వ్యయప్రయాసలకు ఓర్చి ప్రవేశాలు పొందే ఉన్నత విద్యా సంస్థల్లో నాణ్యమైన విద్యాబోధకులు, మంచి సదుపాయాలు, ప్రభుత్వ నిబంధనల పాటింపు వంటివి ఉన్నాయో...లేదో ముందే తెలుసుకొనేందుకు ఆయా సంస్థలకు న్యాక్ ఇచ్చే గుర్తింపుతో ఇట్టే తెలిసిపోతుంది. అలాగే చదవాల్సిన కోర్సులకు ఎన్‌బీఏ గుర్తింపు ఓ ప్రామాణికంగా మారింది. న్యాక్ గుర్తింపు లేకుంటే నిధులు మంజూరు చేసేది లేదని విశ్వవిద్యాలయాల నిధుల సంఘం(యూజీసీ) తేల్చి చెబుతోంది. మంచి విద్యా సంస్థలేవో తెలుసుకోవాలంటే ఏదో ఒక కొలమానం ఉండాలన్నది నిపుణులు చెబుతున్న మాట. ఈ తరహా కొలమానాన్ని ఉన్నత విద్యా సంస్థలకే పరిమితం చేయకుండా...పాఠశాలలకూ వర్తింపజేయాలని తెలంగాణ పాఠశాల విద్యాశాఖ కసరత్తు చేస్తోంది. ప్రభుత్వ, ప్రైవేటు పాఠశాలలకూ ప్రమాణాలను నిర్దేశించబోతోంది. న్యాక్ గుర్తింపు లేకుంటే విశ్వవిద్యాలయాలకు, ప్రభుత్వ కళాశాలలకు నిధులు ఇచ్చేది లేదని యూజీసీ ఇప్పటికే స్పష్టంచేసింది. దాన్ని కచ్చితంగా అమలు చేస్తోంది. ఈ పోటీ వల్లే తెలంగాణలోని 126 ప్రభుత్వ డిగ్రీ కళాశాలల్లో 40 వరకు న్యాక్ గ్రేడ్‌ను సాధించి యూజీసీ నుంచి రూ.2 కోట్ల చొప్పున నిధులు పొందుతున్నాయి. దాదాపు 30 ప్రైవేట్ ఇంజినీరింగ్ కళాశాలలు కూడా న్యాక్ గ్రేడ్‌ను పొందాయి.
పాఠశాలలకు ఏదీ ప్రమాణం?
ప్రైవేట్ పాఠశాలలు పుట్టగొడుగుల్లా పుట్టుకొస్తున్నాయి. వాటిలో కనీస సౌకర్యాలు ఉండటం లేదు. పసిపిల్లలను ఇరుకు, చీకటి గదుల్లో కుక్కుతున్నారు. వసూలు చేసే రుసుములు మాత్రం భారీగా ఉంటున్నాయి. అర్హులైన ఉపాధ్యాయులు.. అవసరమైన గదులు...ఆట స్థలం... ప్రయోగశాలలు...గ్రంథాలయాలు...ఇలా ఏవి లేకున్నా యథేచ్ఛగా నడుస్తున్నాయి. ఏది నాణ్యమైన పాఠశాల అన్నది తెలుసుకునే అవకాశం లేకుండాపోయింది.
కసరత్తు మొదలైంది
తెలంగాణ రాష్ట్రంలో 28,707 ప్రభుత్వ పాఠశాలలు, 15,069 ప్రైవేట్ పాఠశాలు ఉన్నాయి. వీటిల్లో సుమారు 60 లక్షల మంది చదువుతున్నారు. విచిత్రమేమిటంటే ప్రైవేట్ పాఠశాలలకు ప్రభుత్వ గుర్తింపు మినహా వాటిలోని నాణ్యతా ప్రమాణాలకు సంబంధించి గుర్తింపు లేదా గ్రేడ్లు ఇచ్చే ప్రభుత్వ సంస్థలు ఏవీ లేవు. ఈ క్రమంలోనే పాఠశాలలకు కూడా నాణ్యతా గుర్తింపు, గ్రేడ్లు ఇవ్వాలని పాఠశాల విద్యాశాఖ భావిస్తోంది. దీనిపై ప్రాథమిక కసరత్తు ప్రారంభించింది. గుర్తింపు లేదా గ్రేడ్ ఇచ్చేందుకు ఏఏ కొలమానాలను పరిగణనలోకి తీసుకోవాలన్న దానిపై చర్చ జరుగుతోంది. ఓ స్వతంత్ర సంస్థచే ఆయా పాఠశాలలను పరిశీలించి కొలమానాల ప్రకారం గ్రేడ్లు ఇవ్వాలని యోచిస్తోంది. రాష్ట్ర విద్యా, పరిశోధన శిక్షణ మండలి(ఎస్‌సీఈఆర్‌టీ) పర్యవేక్షణలో ఈ ప్రక్రియ కొనసాగనుంది. ఈ అంశాన్ని ప్రభుత్వం దృష్టికి తీసుకెళ్లి అనుమతిపొందుతామని ఉన్నతాధికారి ఒకరు స్పష్టం చేశారు.
'పది' పాత విద్యార్థులకు పరీక్ష ఎలా?
* మారిన విధానంతో ఇరకాటం
* స్పష్టత కోసం అభ్యర్థుల నిరీక్షణ
ఈనాడు, హైదరాబాద్‌: గత విద్యాసంవత్సరం నుంచి పదో తరగతి సిలబస్‌తో పాటు పరీక్షా విధానం, మార్కుల ప్రక్రియ అంతా మారిపోయిన నేపథ్యంలో తెలంగాణలో పదో తరగతి తప్పిన పాత విద్యార్థుల పరిస్థితి అయోమయంగా మారింది. గత విద్యాసంవత్సరం నిరంతర సమగ్ర మూల్యాంకన విధానాన్ని ప్రవేశపెట్టారు. దీని ప్రకారం.. వార్షిక పరీక్షలను 80 మార్కులకే నిర్వహిస్తారు. మిగతా 20 మార్కులను అంతర్గతంగా వివిధ కార్యక్రమాల ఆధారంగా నిర్ణయిస్తారు. 2013-14 విద్యాసంవత్సరం, అంతకుముందు పదో తరగతి చదివి తప్పిన వారికిప్పుడు పరీక్ష ఎలా నిర్వహిస్తారన్నది ప్రశ్న. సిలబస్‌ మారినప్పుడు పాత విద్యార్థులకు రెండేళ్లపాటు పాతదాని ప్రకారమే పరీక్ష రాసుకునే వీలు కల్పిస్తారు. ఈ సారి పరీక్ష మార్కుల విధానం మారటమే కొత్త చిక్కు. పాత విద్యార్థులకు 80 మార్కులకే పరీక్ష జరిపి వాటిని 100కు లెక్కిస్తే సరిపోతుందని అధికారులుసూచిస్తున్నారు. గతంలోనూ అలా చేసిన సందర్భాలు ఉన్నాయన్నారు. దీనిపై ప్రభుత్వం నిర్ణయం తీసుకోవాల్సి ఉంది. పరీక్ష ఫీజు చెల్లింపు తేదీలు ప్రకటించిన నేపథ్యంలో ఫీజు చెల్లించడంపై స్పష్టత ఇవ్వాలని పాతవిద్యార్థులు కోరుతున్నారు. పాత విద్యార్థులు ఆరేడు వేల మంది వరకు ఉండొచ్చని అంచనా. అధికారులు మాత్రం వారికి ప్రత్యేకంగా మార్గదర్శకాలు ఇస్తామని, ఆందోళన వద్దని చెబుతున్నారు.
అమల్లోకి విద్యా సంస్కరణలు
* ప్రస్తుత సంవత్సరంలో 9వ తరగతికి వర్తింపు
* వచ్చే ఏడాది నుంచి పదో తరగతికీ..
* ప్రభుత్వ ఉత్తర్వులు జారీ
ఈనాడు - హైదరాబాద్‌: ప్రస్తుత విద్యా సంవత్సరం (2015 -16) నుంచే 6 నుంచి 9వ తరగతి వరకు సంస్కరణలను అమలు చేయనున్నట్టు విద్యాశాఖ ప్రకటించింది. 2016 -17 నుంచి పదో తరగతిలోనూ సంస్కరణల్ని చేపడతామని వెల్లడించింది. ఇందుకు సంబంధించి మాధ్యమిక విద్యాశాఖ కార్యదర్శి ఆర్పీ సిసోడియా అక్టోబ‌ర్ 29న‌ ఉత్తర్వుల‌ను జారీచేశారు. నిర్బంధ ఉచిత విద్యా హక్కు చట్టం -2009, జాతీయ విద్యా ప్రణాళిక చట్రం -2005, రాష్ట్ర విద్యా ప్రణాళిక పరిధి పత్రం -2011 ప్రకారం పలు చర్యల‌ను చేపట్టారు.
* ఒకటి నుంచి పదో తరగతి వరకు పాఠ్య పుస్తకాలను ఆధునికీకరించారు.
* 2010 ఏప్రిల్‌ నుంచి 1 - 8వ తరగతి వరకు నిరంతర సమగ్ర మూల్యాంకనం అమల్లోకి తెచ్చారు.
* దీన్ని ఈ విద్యా సంవత్సరం నుంచే తొమ్మిది తరగతికీ విస్తరించారు.
* ప్రస్తుత విద్యా సంవత్సరం (2015 -16)లో పదో తరగతి పబ్లిక్‌ పరీక్షల‌ను పాత పద్ధతిలోనే నిర్వహిస్తారు.
* 2016 -17 నుంచి 11 పేపర్ల వంతునే పరీక్షలు జరుగుతాయి.
* ప్రతి సబ్జెక్టులో 80% మార్కులు పబ్లిక్‌ పరీక్షల ద్వారా, మిగిలిన 20% మార్కులు అంతర్గత నిర్మాణాత్మక మూల్యాంకనం (ఫార్మెటివ్‌ అసెస్‌మెంట్‌) ద్వారా కేటాయిస్తారు.
* ప్రతి పరీక్ష వ్యవధి 2.30 గంటలు ఉంటుంది. ప్రశ్నపత్రాన్ని చదివేందుకు అదనంగా 15 నిమిషాలు కేటాయిస్తారు.

వీటిపై శ్రద్ధ:
భాషా విషయాల్లో భాగంగా ప్రధానంగా కథల పుస్తకాలు, పత్రికలు, బాల సాహిత్యం చదవడం; విజ్ఞాన శాస్త్రంలో ప్రయోగాలు చేయగలగడం, రికార్డుల్లో నమోదు చేయడం; గణితంలో వివిధ భావనలకు సంబంధించిన గణిత సమస్యల (ప్రాబ్లమ్స్‌) తయారీ; సాంఘికశాస్త్రంలో చదవడం, విశ్లేషించడం ప్రస్తుత సామాజిక విషయాలపై ప్రతిస్పందించడం; నోటు పుస్తకాల్లో సొంతంగా వివిధ అంశాలపై రాయగలగడం; ప్రాజెక్టు పనులు, లఘు పరీక్ష (స్లిప్‌టెస్ట్‌) వంటి వాటిల్లో విద్యార్థులు కనబరిచే ప్రతిభ అనుసరించి సబ్జెక్టుల వారీగా 20% మార్కులను కేటాయిస్తారు. ఇందుకు తీసుకోవాల్సిన జాగ్రత్తలను ఉత్తర్వుల్లో సమగ్రంగా పేర్కొన్నారు.
* క్యుములేటివ్‌ గ్రేడింగ్‌ పాయింట్ల సగటును, సగటు గ్రేడ్‌ పాయింట్ల ఆధారంగా నిర్ధరిస్తారు.
* మార్కుల మెమోలో గ్రేడ్ల వివరాలు ఉంటాయి. పాఠ్యేతర కార్యక్రమాల్లో (అదర్‌ కరిక్యులర్‌ సబ్జెక్ట్సు)విద్యార్థుల ప్రతిభ అనుసరించి వచ్చిన మార్కులు ఉంటాయి. ప్రతి సబ్జెక్టులో విద్యార్థి తప్పకుండా 27 మార్కులు (35%) పొందాలి. అంతర్గత మూల్యంకనానికి విడిగా మార్కులు కేటాయిస్తారు. కనీసం ఎనిమిది మార్కులు రావాలి. రెండింట్లో ఒక్కో సబ్జెక్టుల్లో 35% మార్కులు రావాలి. అంతర్గత మూల్యాంకనంలో పాస్‌/ఫెయిల్‌ ఉండదు.
నవంబరు 16 వరకు పదో తరగతి పరీక్ష ఫీజు గడువు
ఈనాడు, హైదరాబాద్: పదో తరగతి పరీక్షలు రాయబోయే రెగ్యులర్, ప్రైవేట్ విద్యార్థులు నవంబరు 16వ తేదీ నాటికి పరీక్ష ఫీజు చెల్లించాలని ప్రభుత్వ పరీక్షల విభాగం సంచాలకుడు సురేందర్‌రెడ్డి తెలిపారు. ఈ మేరకు ఆయన గడువు వివరాలను వెల్లడించారు. రూ.50 ఆలస్య రుసుంతో నవంబరు 26వ తేదీ వరకు, రూ.200 ఆలస్య రుసుంతో డిసెంబరు 3వ తేదీ, రూ.500 ఆలస్య రుసుంతో డిసెంబరు 10వ తేదీ వరకు ఫీజు ఆయా పాఠశాలల్లో చెల్లించవచ్చు. పట్టణ ప్రాంతాల్లో వార్షిక ఆదాయం రూ.24వేలు, గ్రామీణ ప్రాంతాల్లో రూ.20 వేలు లేదా 2.5 ఎకరాలకు మించకుండా మెట్ట భూమి ఉన్నట్లయితే వారికి ఫీజు మినహాయింపు ఉంటుంది. రెగ్యులర్ విద్యార్థులు అన్ని సబ్జెక్టులకు రూ.125లు ఫీజు చెల్లించాలి.
పదో తరగతి ధ్రువపత్రాలపై ఆధార్‌ సంఖ్య!
* అనుసంధానం పూర్తయితే ముద్రించే యోచన
ఈనాడు, హైదరాబాద్‌: పాఠశాల విద్యార్థులకు ఆధార్‌ సంఖ్యను అనుసంధానం చేస్తున్న ప్రభుత్వం పదో తరగతి మార్కుల ధ్రువపత్రాలపై ఆధార్‌ సంఖ్యను ముద్రించాలని భావిస్తోంది. మధ్యాహ్న భోజనం పథకంలో అక్రమాలను నిరోధించేందుకు ఆధార్‌ సంఖ్యతో ముడిపెడుతున్న విషయం తెలిసిందే. కొన్ని పాఠశాలల్లో విద్యార్థులు లేకున్నా అధిక సంఖ్య ఉన్నట్లు చూపుతున్నారన్న ఆరోపణలున్నాయి. ప్రభుత్వ పాఠశాలల్లో సుమారు 24.50 లక్షల మంది విద్యార్థులు చదువుతుండగా వారిలో 18 లక్షలకుపైగా విద్యార్థుల ఆధార్‌ సంఖ్యలను సేకరించారు. మిగతా వాటిని పూర్తి చేసే పనులు సాగుతున్నాయి. డిసెంబరు లోపు పూర్తి కావచ్చని భావిస్తున్నారు.
* ప్రైవేట్‌ పాఠశాలల విద్యార్థుల పరిస్థితి?
పదో తరగతి మార్కుల ధ్రువపత్రాలపై ఆధార్‌ సంఖ్యను ముద్రించాలని గత ఏడాదే ప్రతిపాదన వచ్చింది. తెలంగాణ రాష్ట్రంలో సుమారు 5.5 లక్షల మంది పదో తరగతి విద్యార్థులుంటారు. వారిలో అధిక శాతం ప్రైవేట్‌ పాఠశాలల్లోనే చదువుతున్నారు. ప్రభుత్వ పాఠశాలల విద్యార్థుల ఆధార్‌ అనుసంధానం పూర్తయినా... ఇతర విద్యార్థుల పరిస్థితి ఏంటన్నది ప్రశ్న. అయితే ప్రత్యేకంగా పదో తరగతి విద్యార్థుల వరకైనా ఆధార్‌ సంఖ్య సేకరించగలిగితే మార్కుల ధ్రువపత్రంపై ఆధార్‌ సంఖ్యను ముద్రించేందుకు ప్రభుత్వ పరీక్షల విభాగం(ఎస్‌ఎస్‌సీ బోర్డు) సంసిద్ధంగా ఉంది. ఆధార్‌ సంఖ్య వల్ల విద్యార్థి పూర్తి వివరాలు అందుబాటులో ఉంటాయని... భవిష్యత్తులోనూ ప్రయోజనకరంగా ఉంటుందని అధికారులు చెబుతున్నారు.
పోటీలో జేఈఈ మెయినూ తీసికట్టే!
* 2000 ఎన్‌టీఎస్‌ఈ ఉపకార వేతనాలకు 3లక్షల మంది పోటీ
* ఐఐటీకి తొలిమెట్టుగా భావిస్తున్న విద్యార్థులు
ఈనాడు, హైదరాబాద్‌: ఐఐటీ సీటు పొందేందుకు తొలిమెట్టుగానే కాదు.. చదువుకున్నంత కాలం ఉపకారవేతనాలు పొందేందుకు వూతకర్రగానూ జాతీయ ప్రతిభాన్వేషణ పరీక్ష(నేషనల్‌ టాలెంట్‌ సెర్చ్‌ ఎగ్జామినేషన్‌-ఎన్‌టీఎస్‌ఈ)కు ఏటేటా పోటీ అనూహ్యంగా పెరుగుతోంది. జాతీయస్థాయిలో ప్రతిష్ఠాత్మకంగా భావించే జేఈఈ మెయిన్‌, అడ్వాన్స్‌డ్‌ పరీక్షలతో పోలిస్తే ఎన్‌టీఎస్‌ఈకి మూడు, నాలుగింతల పోటీ ఎక్కువగా ఉంటుండటం విశేషం.
ఎన్‌ఐటీ, ట్రిపుల్‌ఐటీ, ఇతర కేంద్ర ప్రభుత్వ సహకారంతో నడిచే సంస్థల్లో ప్రవేశానికి నిర్వహించే జాయింట్‌ ఎంట్రన్స్‌ ఎగ్జామినేషన్‌(జేఈఈ) మెయిన్‌ పరీక్షకు ఏటా దేశవ్యాప్తంగా సుమారు 12లక్షల మంది పోటీపడుతున్నారు. దేశంలో అతి భారీగా విద్యార్థులు తలపడే పరీక్ష ఇదే. ఎన్‌ఐటీ, ట్రిపుల్‌ఐటీల్లో సుమారు 20వేల సీట్లున్నాయి. విచిత్రమేమిటంటే పోటీపరంగా చూస్తే ఎన్‌టీఎస్‌ఈకి జేఈఈ కన్నా మూడు నాలుగు రెట్ల పోటీ ఎక్కువగా ఉండటం. ప్రస్తుతం జేఈఈ పరీక్షకు పోటీ తగ్గుతుండగా ఎన్‌టీఎస్‌ఈకి మాత్రం ఏటేటా అభ్యర్థుల సంఖ్య పెరుగుతున్నారు. దేశవ్యాప్తంగా 2వేల ఉపకారవేతనాలకు మూడు లక్షలమందికి పైగా పదోతరగతి విద్యార్థులు రేసులో నిలుస్తున్నారు. ఏటా ఈ సంఖ్య 10శాతం చొప్పున పెరుగుతోంది. గత ఏడాది తెలంగాణ నుంచి 33,667 మంది దరఖాస్తు చేసుకోగా ఈసారి ఆ సంఖ్య మరో 5వేల వరకు పెరగవచ్చన్నది విద్యాశాఖ అధికారుల అంచనా. ఆంధ్రప్రదేశ్‌ నుంచీ అటూఇటూగా అంతేసంఖ్యలో ఈ పరీక్షకు దరఖాస్తుచేస్తున్నారు.
* ఇంటర్‌ నుంచి చదువు పూర్తయ్యే వరకూ..
ఎన్‌టీఎస్‌ఈ ఉపకారవేతనం పొందగోరే పదోతరగతి విద్యార్థులు మొదట రాష్ట్రస్థాయిలో జరిగే పరీక్ష రాయాల్సి ఉంటుంది. వారినుంచి కేవలం పదుల సంఖ్యలోనే ఎంపికచేసి ఎన్‌సీఈఆర్‌టీ నిర్వహించే జాతీయస్థాయి పరీక్షకు పంపిస్తారు. గత ఏడాది తెలంగాణ నుంచి కేవలం 126మందే జాతీయస్థాయి పరీక్షకు ఎంపికయ్యారు. ఈసారి రాష్ట్రస్థాయిలో నవంబరు 8న(180 మార్కులు), జాతీయస్థాయిలో 2016 మే 8న పరీక్ష(180 మార్కులు) జరుగుతుంది. మొత్తంమీద 2వేల మందిని ఎంపికచేసి ఇంటర్‌ నుంచి పీహెచ్‌డీ పూర్తయ్యే వరకు ఉపకారవేతనాలు మంజూరుచేస్తారు. ఇంటర్‌లో ప్రతినెలా రూ.1250, డిగ్రీ నుంచి పీజీ వరకు నెలకు రూ.2వేలు, పీహెచ్‌డీలో చేరితే యూజీసీ నిబంధనల ప్రకారం స్కాలర్‌షిప్‌ ఇస్తారు. ఎంపికలో రాష్ట్రకోటా అంటూ ప్రత్యేకంగా లేదు. దేశవ్యాప్తంగా ప్రతిభావంతులనే ఎంపికచేస్తారు.
* జాతీయస్థాయి గుర్తింపు
ఈ ఉపకార వేతనానికి ఎంపికయ్యే విద్యార్థికి జాతీయస్థాయి గుర్తింపు లభిస్తుంది. ఎన్‌ఐటీ, ఐఐటీల్లో ప్రవేశానికి ఈ విజయం తొలిమెట్టుగా విద్యార్థులు, నిపుణులు భావిస్తుంటారు. రాజస్థాన్‌లో కోటా పట్టణ ప్రాంతంలో ఐఐటీ లక్ష్యంగా చదువుతున్నవారు ఎన్‌టీఎస్‌ఈ పరీక్షను సైతం అంతే ప్రతిష్ఠాత్మకంగా తీసుకుంటూ సిద్ధమవుతున్నారు. తెలుగు రాష్ట్రాల నుంచి ఐఐటీలకు ఎంపికవుతున్న వారిలో ఎన్‌టీఎస్‌ఈ ఉపకార వేతనాలు పొందుతున్నవారూ పలువురు ఉంటున్నారు.
పోటీలో జేఈఈ మెయినూ తీసికట్టే!
* 2000 ఎన్‌టీఎస్‌ఈ ఉపకార వేతనాలకు 3లక్షల మంది పోటీ
* ఐఐటీకి తొలిమెట్టుగా భావిస్తున్న విద్యార్థులు
ఈనాడు, హైదరాబాద్‌: ఐఐటీ సీటు పొందేందుకు తొలిమెట్టుగానే కాదు.. చదువుకున్నంత కాలం ఉపకారవేతనాలు పొందేందుకు వూతకర్రగానూ జాతీయ ప్రతిభాన్వేషణ పరీక్ష(నేషనల్‌ టాలెంట్‌ సెర్చ్‌ ఎగ్జామినేషన్‌-ఎన్‌టీఎస్‌ఈ)కు ఏటేటా పోటీ అనూహ్యంగా పెరుగుతోంది. జాతీయస్థాయిలో ప్రతిష్ఠాత్మకంగా భావించే జేఈఈ మెయిన్‌, అడ్వాన్స్‌డ్‌ పరీక్షలతో పోలిస్తే ఎన్‌టీఎస్‌ఈకి మూడు, నాలుగింతల పోటీ ఎక్కువగా ఉంటుండటం విశేషం.
ఎన్‌ఐటీ, ట్రిపుల్‌ఐటీ, ఇతర కేంద్ర ప్రభుత్వ సహకారంతో నడిచే సంస్థల్లో ప్రవేశానికి నిర్వహించే జాయింట్‌ ఎంట్రన్స్‌ ఎగ్జామినేషన్‌(జేఈఈ) మెయిన్‌ పరీక్షకు ఏటా దేశవ్యాప్తంగా సుమారు 12లక్షల మంది పోటీపడుతున్నారు. దేశంలో అతి భారీగా విద్యార్థులు తలపడే పరీక్ష ఇదే. ఎన్‌ఐటీ, ట్రిపుల్‌ఐటీల్లో సుమారు 20వేల సీట్లున్నాయి. విచిత్రమేమిటంటే పోటీపరంగా చూస్తే ఎన్‌టీఎస్‌ఈకి జేఈఈ కన్నా మూడు నాలుగు రెట్ల పోటీ ఎక్కువగా ఉండటం. ప్రస్తుతం జేఈఈ పరీక్షకు పోటీ తగ్గుతుండగా ఎన్‌టీఎస్‌ఈకి మాత్రం ఏటేటా అభ్యర్థుల సంఖ్య పెరుగుతున్నారు. దేశవ్యాప్తంగా 2వేల ఉపకారవేతనాలకు మూడు లక్షలమందికి పైగా పదోతరగతి విద్యార్థులు రేసులో నిలుస్తున్నారు. ఏటా ఈ సంఖ్య 10శాతం చొప్పున పెరుగుతోంది. గత ఏడాది తెలంగాణ నుంచి 33,667 మంది దరఖాస్తు చేసుకోగా ఈసారి ఆ సంఖ్య మరో 5వేల వరకు పెరగవచ్చన్నది విద్యాశాఖ అధికారుల అంచనా. ఆంధ్రప్రదేశ్‌ నుంచీ అటూఇటూగా అంతేసంఖ్యలో ఈ పరీక్షకు దరఖాస్తుచేస్తున్నారు.
* ఇంటర్‌ నుంచి చదువు పూర్తయ్యే వరకూ..
ఎన్‌టీఎస్‌ఈ ఉపకారవేతనం పొందగోరే పదోతరగతి విద్యార్థులు మొదట రాష్ట్రస్థాయిలో జరిగే పరీక్ష రాయాల్సి ఉంటుంది. వారినుంచి కేవలం పదుల సంఖ్యలోనే ఎంపికచేసి ఎన్‌సీఈఆర్‌టీ నిర్వహించే జాతీయస్థాయి పరీక్షకు పంపిస్తారు. గత ఏడాది తెలంగాణ నుంచి కేవలం 126మందే జాతీయస్థాయి పరీక్షకు ఎంపికయ్యారు. ఈసారి రాష్ట్రస్థాయిలో నవంబరు 8న(180 మార్కులు), జాతీయస్థాయిలో 2016 మే 8న పరీక్ష(180 మార్కులు) జరుగుతుంది. మొత్తంమీద 2వేల మందిని ఎంపికచేసి ఇంటర్‌ నుంచి పీహెచ్‌డీ పూర్తయ్యే వరకు ఉపకారవేతనాలు మంజూరుచేస్తారు. ఇంటర్‌లో ప్రతినెలా రూ.1250, డిగ్రీ నుంచి పీజీ వరకు నెలకు రూ.2వేలు, పీహెచ్‌డీలో చేరితే యూజీసీ నిబంధనల ప్రకారం స్కాలర్‌షిప్‌ ఇస్తారు. ఎంపికలో రాష్ట్రకోటా అంటూ ప్రత్యేకంగా లేదు. దేశవ్యాప్తంగా ప్రతిభావంతులనే ఎంపికచేస్తారు.
* జాతీయస్థాయి గుర్తింపు
ఈ ఉపకార వేతనానికి ఎంపికయ్యే విద్యార్థికి జాతీయస్థాయి గుర్తింపు లభిస్తుంది. ఎన్‌ఐటీ, ఐఐటీల్లో ప్రవేశానికి ఈ విజయం తొలిమెట్టుగా విద్యార్థులు, నిపుణులు భావిస్తుంటారు. రాజస్థాన్‌లో కోటా పట్టణ ప్రాంతంలో ఐఐటీ లక్ష్యంగా చదువుతున్నవారు ఎన్‌టీఎస్‌ఈ పరీక్షను సైతం అంతే ప్రతిష్ఠాత్మకంగా తీసుకుంటూ సిద్ధమవుతున్నారు. తెలుగు రాష్ట్రాల నుంచి ఐఐటీలకు ఎంపికవుతున్న వారిలో ఎన్‌టీఎస్‌ఈ ఉపకార వేతనాలు పొందుతున్నవారూ పలువురు ఉంటున్నారు.
పాఠశాలల హేతుబద్ధీకరణకూ ఆధార్‌
* డైస్‌ గణాంకాల్ని పక్కనబెట్టిన విద్యా శాఖ
ఈనాడు-హైదరాబాద్‌: పాఠశాలల హేతుబద్ధీకరణకు విద్యార్థుల ఆధార్‌ సంఖ్యను వినియోగించాలని విద్యాశాఖ నిర్ణయించింది. పాఠశాలలో తక్కువ మంది విద్యార్థులు మాత్రమే ఉన్నారని గుర్తించేందుకు డైస్‌ (డిస్ట్రిక్ట్‌ ఇన్ఫర్మేషన్‌ సిస్టమ్‌ ఫర్‌ ఎడ్యుకేషన్‌) గణాంకాల్ని గతంలో మాదిరిగా పరిగణనలోనికి తీసుకుంటే సమస్యలు తప్పవని విద్యాశాఖ వర్గాలు భావిస్తున్నాయి. డైస్‌ కింద గణాంకాల సేకరణ జరిగే సమయంలో కొంతమంది ఉపాధ్యాయులు విద్యార్థుల ప్రవేశాలు లేకున్నా...ఉన్నట్లు చూపించడం ఆనవాయితీ. పోస్టు మరోక చోటకు పోకుండా ఉండేందుకు ఇలా చేస్తూ వచ్చారు. ఈ క్రమంలో ఆధార్‌ సంఖ్య ఆధారంగా విద్యార్థుల ప్రవేశాలను నిర్థారించగా గత ఏడాది సుమారు ఆరు లక్షల ప్రవేశాలు బోగస్‌గా ఉన్నట్లు గుర్తించారు.
రాష్ట్రంలో 98%మంది విద్యార్థులకు ఆధార్‌ కార్డులు ఉన్నాయి. దీనివల్ల హేతుబద్ధీకరణచర్యలను సైతం ఆధార్‌ సంఖ్య ఆధారంగా చేస్తే ఫలితాలు ఆశాజనకంగా ఉంటాయని విద్యాశాఖ వర్గాలు ఓ నిర్ణయానికి వచ్చాయి. దీనికి అనుగుణంగా చర్యలు మొదలయ్యాయి. ప్రభుత్వ ప్రాథమిక పాఠశాలల్లో గత ఏప్రిల్‌ చివరి నాటికి ఉన్న ప్రవేశాలను మాత్రమే పరిగణనలోకి తీసుకోవడంపై ప్రభుత్వ మాధ్యమిక విద్యాశాఖ కార్యదర్శి సిసోడియా మాట్లాడుతూ...''5వ తరగతిలో ఉన్న వారు జూన్‌ నుంచి ఆరో తరగతిలోకి వచ్చారు. జులై వరకు ఉన్న ప్రవేశాలను పరిగణనలోకి తీసుకుంటే సంఖ్య పెరిగిపోతోంది. అదే ఏప్రిల్‌ వరకు ఉన్న ప్రవేశాలను పరిగణనలోకి తీసుకుంటే 5వ తరగతి ముగించిన విద్యార్థుల సంఖ్య యథావిధిగా ఉంటుంది. అందువల్ల ఎటువంటి సమస్యలు ఉండవు. ప్రభుత్వ పాఠశాలల్లో చదివే విద్యార్థుల ఆధార్‌ నమోదు 98% వరకు జరిగింది. మిగిలిన రెండూ శాతం మందిలో ఆధార్‌ కార్డులేకుండా ప్రవేశాలు పొందినా ఆ విద్యార్థులను పరిగణనలోకి తీసుకుంటాం. ఈ వివరాల్నీ పరిగణనలోకి తీసుకుని హేతుబద్ధీకరణ చర్యలను చేపడతామని'' వెల్లడించారు. ఈ మేరకు జిల్లా విద్యాశాఖ అధికారులకు సమాచారాన్ని పంపించారు.
సర్కారీ చదువులకు సాంకేతిక సొబగులు!
* యునిసెఫ్‌ చేయూతతో
* డిజిటల్‌ పాఠాల రూపకల్పన
ఈనాడు - హైదరాబాద్‌: సర్కారీ బడుల్లో త్వరలో డిజిటల్‌ విప్లవం రానుంది. కార్పొరేట్‌ పాఠశాలకు దీటుగా ప్రభుత్వ బడుల్లో ఆధునిక సాంకేతిక పద్ధతుల్లో బోధనకు శ్రీకారం చుట్టేందుకు పాఠశాల విద్యాశాఖ సమాయత్తమవుతోంది. డిజిటల్‌ పాఠాలను అందుబాటులోకి తీసుకొచ్చే దిశగా అడుగులు వేస్తోంది. యునిసెఫ్‌ ఆర్థిక సహకారంతో సర్వశిక్ష అభియాన్‌ కింద సర్కారు బడుల్లో డిజిటల్‌ పాఠాలకు రూపకల్పన చేసే పని గత మార్చిలో ప్రారంభమైంది. ఇప్పటికే కేరళలో డిజిటల్‌ పాఠాలు అమలవుతుండగా కర్ణాటకలో ఇప్పుడిప్పుడే మొదలవుతోంది. అక్కడ ఓ స్వచ్ఛంద సంస్థ డిజిటల్‌ పాఠాలు తయారుచేయగా తెలంగాణలో ప్రభుత్వ ఉపాధ్యాయులే స్వయంగా రూపకల్పన చేస్తున్నారు. గణితం, సైన్స్‌, సాంఘికశాస్త్ర ఉపాధ్యాయులు 60 మంది 6-10వ తరగతి విద్యార్థులకు డిజిటల్‌ పాఠాలు తయారుచేశారు. స్వల్పమార్పులు తప్ప దాదాపు పూర్తయింది. పాఠశాల విద్యాశాఖ ఉన్నతాధికారులు, డీఈఓలు వాటిని పరిశీలించి ఆమోదం తెలపాల్సి ఉంది. ఆ తర్వాత తెలుగు, ఆంగ్లం పాఠాలు రూపొందిస్తారు.
డిజిటల్‌ పాఠాలంటే?
ప్రస్తుతం పుస్తకాలను చూసి ఉపాధ్యాయులు తరగతి గదిలో బోధిస్తున్నారు. అవసరమైన చోట ఛాయాచిత్రాలను చూపిస్తారు. ఈ ప్రక్రియలో విద్యార్థులకు పాఠాలు పూర్తిగా అర్థమవడం లేదు. అదే సాంకేతిక పరిజ్ఞానాన్ని వాడుకుంటే వీడియోల ద్వారా బోధించవచ్చు. అవసరమైతే యానిమేషన్‌ను ఉపయోగించి విద్యార్థులను ఆకట్టుకునేలా పాఠాలు చెప్పొచ్చు. ఉదాహరణకు మొక్కల్లో పరాగ సంపర్కం జరిగే తీరును ఓ సినిమా మాదిరిగా విద్యార్థులకు చూపొచ్చు. బోధనతోపాటు అసైన్‌మెంట్లు, ముఖ్యాంశాలు, ఆన్‌లైన్‌ పరీక్షలు, ప్రాజెక్టు వర్క్‌లు కూడా ఉంటాయి. ఈ పాఠాలు తరగతులవారీగా కాకుండా స్థాయిల్లో ఉంటాయి. విద్యార్థులు అర్ధం చేసుకునే సామర్థ్యాన్ని బట్టి ఉపాధ్యాయుడు ఏ స్థాయి పాఠాలు చెప్పాలో నిర్ణయిస్తారు. విద్యార్థులు మరిన్ని సందేహాలు అడిగితే మరో స్థాయిని ఎంచుకొని బోధిస్తారు.
అందరికీ అందుబాటులోకి..
డిజిటల్‌ పాఠాలను తెలంగాణ ఓపెన్‌ ఎడ్యుకేషనల్‌ రిసోర్సెస్‌ పేరిట వెబ్‌సైట్‌లో ఉంచుతారు. వాటిని ఎవరైనా చదువుకోవచ్చు. అంతకంటే మెరుగైన పద్ధతులున్నట్లు ఎవరైనా సూచిస్తే ఎప్పటికప్పుడు మార్చుకోవచ్చు. ప్రభుత్వ పాఠశాలల్లో కంప్యూటర్లు ఏర్పాటు చేస్తే వచ్చే విద్యాసంవత్సరం నుంచే దీన్ని అందుబాటులోకి తీసుకొచ్చే అవకాశం ఉంది. అయితే మొదట కొన్ని పాఠశాలల్లో ప్రయోగాత్మకంగా ప్రవేశపెట్టాలని భావిస్తున్నారు.
వచ్చే ఏడాదికి 1190 గురుకుల పాఠశాలలు!
* ఉప ముఖ్యమంత్రి కడియం శ్రీహరి
పరకాల, సంగెం, న్యూస్‌టుడే: మెరుగైన, నాణ్యమైన విద్యను అందించేందుకు వచ్చే ఏడాది రాష్ట్రంలో 1190 గురుకుల పాఠశాలలను ఏర్పాటుచేయనున్నట్లు ఉప ముఖ్యమంత్రి కడియం శ్రీహరి తెలిపారు. వరంగల్ జిల్లా పరకాలలో రూ.5.94 కోట్లతో నిర్మించిన ప్రభుత్వ పాలిటెక్నిక్ కళాశాల నూతన భవనాన్ని సెప్టెంబరు 8న ఆయన ప్రారంభించారు. ఈ సందర్భంగా ఆయన మాట్లాడుతూ... గురుకులాల ఏర్పాటుపై ముఖ్యమంత్రి కేసీఆర్ ప్రత్యేక దృష్టి సారించారన్నారు. పాలిటెక్నిక్ కళాశాలల్లో సొంత భవనాలు, మౌలిక వసతుల రూపకల్పనకు ఆర్ఐడీఎఫ్ నుంచి రూ.315 కోట్లను ఖర్చు చేస్తున్నామన్నారు. ఇంటర్, డిగ్రీ, పాలిటెక్నిక్ వంటి కళాశాలల్లో కాంట్రాక్టు అధ్యాపకులతో బోధన సాగుతోందని.. క్రమబద్ధీకరణకు చర్యలు చేపట్టామన్నారు. పూర్తి నివేదిక అందాక రోస్టర్ విధానంతో ఖాళీలను భర్తీ చేస్తామన్నారు.
తొమ్మిదో తరగతిలో ఈ ఏడాది నుంచే సంస్కరణలు
ఈనాడు-హైదరాబాద్: తొమ్మిదో తరగతిలో ఈ విద్యా సంవత్సరం నుంచే సంస్కరణలు అమలు చేస్తామని ఏపీ విద్యాశాఖ సెప్టెంబరు 7న హైకోర్టుకు తెలిపింది. నిరంతర సమగ్ర మూల్యాంకనం అనుసరించి 9, 10 తరగతుల్లో చేపట్టాల్సిన సంస్కరణల అమల్లో రాష్ట్ర ప్రభుత్వం జాప్యం చేసింది. దీన్ని కృష్ణా జిల్లాకు చెందిన ఆనందకుమార్ హైకోర్టు దృష్టికి తీసుకెళ్లారు. పదో తరగతిలో సంస్కరణలను 2016-17 విద్యా సంవత్సరం నుంచి అమలుచేస్తామని కొద్దిరోజుల కిందట ఏపీ విద్యాశాఖ తెలిపింది. తొమ్మిదో తరగతిలో సంస్కరణల అమలుపై నివేదించాలని హైకోర్టు ఆదేశించగా విద్యాశాఖ ఏడో తేదీన స్పందించింది. ఈ విద్యా సంవత్సరం నుంచే తొమ్మిదో తరగతిలో సంస్కరణలు అమలుచేస్తామని వెల్లడించింది. తొమ్మిదో తరగతిలో హిందీ మినహా ప్రతి సబ్జెక్టు (వార్షిక)కు పేపరు-1, పేపరు-2 వంతున 11 పరీక్షలు నిర్వహించాలని, ప్రాజెక్టువర్క్ కింద 20శాతం మార్కులు కేటాయించాలని దీనిపై పరిశీలించిన కమిటీ ప్రభుత్వానికి నివేదించింది. దీని ప్రకారమే చర్యలను రాష్ట్ర ప్రభుత్వం తీసుకోవాల్సి ఉంటుంది. మార్గదర్శకాలు వెలువడాల్సి ఉంది.
మళ్లీ డి'టెన్షన్‌' విధానమా?
* వద్దని తెలంగాణ డీఈవోల ప్రాథమిక భావన
* కేంద్ర కొత్త విద్యా విధానంపై సంప్రదింపులు షురూ
ఈనాడు, హైదరాబాద్‌: పరీక్ష పాసైతేనే పైతరగతికి, లేదంటే మళ్లీ పాత తరగతిలోనే ఉండే (డిటెన్షన్‌) విధానాన్ని మళ్లీ తీసుకురావాలనుకుంటున్న కేంద్ర ప్రభుత్వ ఆలోచనతో తెలంగాణ విద్యాశాఖ ప్రాథమికంగా విభేదిస్తోంది. ఉత్తీర్ణతతో సంబంధం లేకుండా తొమ్మిదో తరగతిదాకా విద్యార్థులను పైతరగతికి పంపుతున్న ప్రస్తుత విధానం స్థానంలో 'డిటెన్షన్‌' తీసుకొస్తే సమస్యలు ఉత్పన్నమవుతాయని ఎక్కువమంది జిల్లా విద్యాశాఖాధికారులు అభిప్రాయపడ్డారు. కేంద్ర ప్రభుత్వ ప్రతిపాదిత కొత్త విద్యావిధానంపై సంప్రదింపుల ప్రక్రియను తెలంగాణ విద్యాశాఖ ఆగస్టు 25న ఆరంభించింది. పలువురు ఉన్నతాధికారులు కూడా ఇదే అభిప్రాయం వ్యక్తంజేసినట్లు సమాచారం. రాష్ట్రంలోని అన్ని జిల్లాల డీఈవోలు, విద్యాపర్యవేక్షణ అధికారులు, డైట్‌ కళాశాలల ప్రిన్సిపాళ్లు తదితరులతో విద్యాశాఖ ముఖ్యకార్యదర్శి రంజీవ్‌ ఆర్‌ ఆచార్య, పాఠశాలవిద్య సంచాలకులు చిరంజీవులు సదస్సు నిర్వహించారు. ఈ సందర్భంగా కేంద్ర ప్రభుత్వం కొత్త విద్యావిధానానికి సంబంధించి ప్రతిపాదిస్తున్న 13 అంశాలపై డీఈవోల అభిప్రాయాలను అడిగి తెలుసుకున్నారు. డిటెన్షన్‌ పద్ధతిని తీసుకురావటం వల్ల బడి మానేసేవారి సంఖ్య పెరుగుతుందని, తాము వెనకబడ్డామనే ఆత్మన్యూనత పిల్లల్లో ఏర్పడుతుందని, పిల్లల హక్కులకూ భంగం కలుగుతుందనే అభిప్రాయం వ్యక్తమైంది. ప్రస్తుతం అనుసరిస్తున్న సీసీఈ పద్ధతిని పకడ్బందీగా అమలుచేస్తే చాలని కొంతమంది సూచించారు. మరికొందరేమో ఐదో తరగతిలో బోర్డు పరీక్ష నిర్వహిస్తే బాగానే ఉంటుందన్నారు. 13 అంశాలపై డీఈవోలు గ్రామస్థాయి నుంచి జిల్లాస్థాయి దాకా సమావేశాలు, సదస్సులు ఏర్పాటుచేసి తల్లిదండ్రులు, సామాజిక సంస్థలు, విద్యార్థులు తదితరుల అభిప్రాయాలను తీసుకుంటారు. వీటన్నింటినీ కలిపి సెప్టెంబరు 30కల్లా రాష్ట్ర ప్రభుత్వ అభిప్రాయాలను క్రోఢీకరించి కేంద్రానికి పంపిస్తారు. జిల్లాస్థాయిలో డీఈవో, మండలస్థాయిలో ఎంఈవో, పంచాయతీస్థాయిలో ప్రధానోపాధ్యాయులు ఈ అవగాహన సదస్సులకు సమన్వయకర్తలుగా వ్యవహరిస్తారు.
తెలంగాణలో ఇక అన్ని బడుల్లో ఆంగ్లమే!
* వచ్చే ఏడాది నుంచి ఆంగ్ల మాధ్యమం అమలు!
* ముందస్తుగా ఉపాధ్యాయులకు 6 నెలల శిక్షణ
* మాతృభాషకు ఇబ్బంది లేకుండా పాఠ్య ప్రణాళిక
* విద్యార్థులకు డిజిటల్‌ పాఠాలు.. వచ్చే 5న లాంఛనంగా ప్రారంభం
* తెలంగాణ పాఠశాల విద్యాశాఖ ఏర్పాట్లు
ఈనాడు - హైదరాబాద్‌: మారుతున్న సామాజిక పరిస్థితులకు అనుగుణంగా వచ్చే ఏడాది నుంచి అన్ని ప్రభుత్వ పాఠశాలల్లో ఆంగ్లమాధ్యమం ఆరంభించాలని తెలంగాణ ప్రభుత్వం భావిస్తోంది. ఈ దిశగా పాఠశాల విద్యాశాఖ ఏర్పాట్లు చేస్తోంది. నానాటికీ తగ్గుతున్న పిల్లల నమోదు, ఆంగ్లమాధ్యమానికి పెరుగుతున్న ఆదరణను దృష్టిలో ఉంచుకొని ఈ నిర్ణయం తీసుకున్నట్లు సమాచారం. ఇప్పటికే ఆంగ్లమాధ్యమంలో బోధించే నేర్పున్న ఉపాధ్యాయులను విద్యాశాఖ గుర్తించింది. సుమారు 10వేల మంది ఆంగ్లమాధ్యమం నేపథ్యంతో ఉన్నారు. వీరితో పాటు మిగిలిన వారందరికీ ఆంగ్ల మాధ్యమంలో బోధించటానికి వీలుగా ఆరునెలల పాటు శిక్షణ ఇవ్వబోతున్నారు. పది రోజుల పాటు ప్రత్యక్షంగా శిక్షణ కార్యక్రమం ఏర్పాటు చేసి... మిగిలిన శిక్షణను ఆన్‌లైన్‌ ద్వారా ఇవ్వాలన్నది ప్రాథమిక ఆలోచన. స్పోకెన్‌ ఇంగ్లిష్‌కు సంబంధించిన సీడీలు, ఇతర సామగ్రిని ఉపాధ్యాయులకు అప్పగించి వారంలో కొన్నిగంటలు కచ్చితంగా ఈ శిక్షణ పొందేలా చూస్తారు. చివర్లో ఆన్‌లైన్‌లోనే పరీక్ష నిర్వహిస్తారు. ప్రాథమికస్థాయిలోనూ 20వేల మంది ఉపాధ్యాయులకు ఆంగ్లంలో శిక్షణనివ్వాలని అనుకుంటున్నారు. ఆంగ్ల మాధ్యమంలోకి ఎంతగా మారినా..ముఖ్యమంత్రి ఇటీవల సమీక్ష సమావేశంలో చెప్పినట్లుగా మాతృభాషకు ఇబ్బంది లేకుండా, విద్యార్థులు మాతృభాషకు దూరంకాకుండా ఉండేలా పాఠ్యప్రణాళికను రూపొందిస్తామని విద్యాశాఖ ఉన్నతాధికారి ఒకరు తెలిపారు. తల్లిదండ్రులు, పిల్లలు కోరుకున్న చోట తెలుగు మాధ్యమాన్నీ కొనసాగిస్తారు.
తయారవుతున్న డిజిటల్‌ పాఠాలు..
సంప్రదాయ బోధనతో పాటు కంప్యూటర్‌ ఆధారిత బోధనకు వీలుగా డిజిటల్‌ పాఠాల రూపకల్పనకూ తెలంగాణ పాఠశాల విద్యాశాఖ ఏర్పాట్లు చేస్తోంది. ఇప్పటికే కసరత్తు ప్రారంభించి 4, 5 తరగతులకు పర్యావరణ శాస్త్రం పాఠాలు కూడా సిద్ధం చేశారు. జైకా (జపాన్‌ ఇంటర్నేషనల్‌ కోఆపరేషన్‌ ఏజన్సీ), సేవ్‌ ది చిల్డ్రన్‌ స్వచ్ఛంద సంస్థ, రికో అనే సంస్థలతో కలసి వీటిని రూపొందించారు. తగిన శిక్షణ తర్వాత ప్రభుత్వ పాఠశాలల్లోని ఉపాధ్యాయులే ఈ డిజిటల్‌ పాఠాలు తయారు చేశారు. ఈ అనుభవంతో విద్యాశాఖ పరిధిలో ఉన్న 2157 ప్రభుత్వ ఉన్నత పాఠశాలల్లో కంప్యూటర్ల ద్వారా డిజిటల్‌ పాఠాలు చెప్పించాలని ఆలోచిస్తున్నారు. ఆ బడులన్నిటిలో కంప్యూటర్లున్నాయి. ఇటీవలిదాకా ఐదు ప్రైవేటు సంస్థలు వీటిని నిర్వహించాయి. నిర్వహణ కాలపరిమితి ఈ మధ్యే ముగిసింది. ఇప్పుడు పాఠశాలల్లోని ఉపాధ్యాయులతో వీటిని ఉపయోగించి, విద్యార్థులకు ప్రాథమిక భావనలు కల్పించటంతోపాటు, డిజిటల్‌ పాఠాలు బోధింపజేస్తారు. ఇందుకు అన్ని బడుల్లో చిన్నస్థాయి ప్రొజెక్టర్లు కొనాలని భావిస్తున్నారు. ఇప్పటికే 450బడుల్లో ప్రొజెక్టర్లున్నాయి. డిజిటల్‌ ఇండియాలో భాగంగా ప్రతిజిల్లాకు 10 బడులను కార్పొరేట్‌ సంస్థలు దత్తత తీసుకోబోతున్నాయి. వాటిలోని ఉపాధ్యాయులకు శిక్షణివ్వటం వీటి బాధ్యతే. మిగిలిన పాఠశాలల ఉపాధ్యాయులకూ శిక్షణ ఇప్పించాలన్నది విద్యాశాఖ ఆలోచన. వచ్చేనెల 5న బడుల్లో డిజిటల్‌ ఇండియా కింద డిజిటల్‌ పాఠాలు, శిక్షణను ఆరంభిస్తారు.
9 లేకుండానే 10వ తరగతి!
* చదువు మధ్యలో ఆపివేసిన వారికోసం కేంద్రం కొత్తపథకం
ఈనాడు, దిల్లీ: ఆర్థిక ఇబ్బందుల వల్లనో ఇతరత్రా కారణాల వల్లనో చదువును పాఠశాలస్థాయిలోనే వదిలివేసిన వారికోసం కేంద్రప్రభుత్వం ఓ కొత్తపథకానికి సన్నాహాలు చేస్తోంది. దీనిప్రకారం.. తొమ్మిదవ తరగతి కూడా చదువుకోని లేదా ఉత్తీర్ణులుగాని అభ్యర్థులు పదోతరగతి పరీక్ష రాయవచ్చు. ఏడాదికి కనీసం ఒక్క సబ్జెక్టు చొప్పున పాసవుతూ పదోతరగతి పూర్తి చేసుకోవచ్చు. కేంద్రమానవ వనరుల అభివృద్ధిశాఖ ఈ పథకం అమలుపై కసరత్తు జరుపుతున్నట్లు సమాచారం. క్షేత్రస్థాయిలో గ్రామపంచాయితీలను సమన్వయపరుచుకుంటూ దీనిని అమలుచేయాలని యోచిస్తున్నట్లు తెలుస్తోంది. పదోతరగతి పరీక్షకు హాజరుకావాలని భావించే వ్యక్తి తొలుత ఆన్‌లైన్‌లో తన పేరు నమోదు చేసుకోవాలి. పరీక్షతేదీని 'నేషనల్‌ ఇన్‌స్టిట్యూట్‌ ఆఫ్‌ ఒపెన్‌ స్కూలింగ్‌' నిర్ణయించి.. హాజరయ్యే ప్రతీవ్యక్తికి ఒక నెంబరును కేటాయిస్తుంది. ఈ వివరాలు గ్రామపంచాయితీ కార్యాలయాల ద్వారా సదరు అభ్యర్థులకు అందుతాయి. అన్ని సబ్జెక్టుల పరీక్షలకు ఒకేసారి హాజరుకాలేని వారు.. ఏడాదికి కనీసం ఒక సబ్జెక్టు పరీక్ష రాయటానికి కూడా అవకాశం ఉంటుంది. ఎన్నేళ్లపాటైనా పరీక్షలు రాయవచ్చు. ఈ విధంగా కనీసం ఐదు సబ్జెక్టుల్లో (లాంగ్వేజీ తప్పనిసరి) ఉత్తీర్ణులైన వారికి పదోతరగతి ధ్రువీకరణపత్రం అందజేస్తారు. ఈ పథకంపై మానవవనరులశాఖ అధికారి ఒకరు మాట్లాడుతూ.. చదువు మధ్యలోనే ఆపివేసిన అన్ని వయసుల్లో ఉన్న వారికోసం దీనిని తీసుకొస్తున్నామని తెలిపారు. పదోతరగతి ఉత్తీర్ణత తర్వాత ఉన్నతచదువులు చదవాలనుకునేవారికోసం 'మాసివ్‌ ఒపెన్‌ ఆన్‌లైన్‌ కోర్స్‌' ద్వారా అవకాశం కల్పించాలని భావిస్తున్నట్లు ఆ అధికారి వెల్లడించారు.
పరీక్షలు కాగానే.. పైతరగతి పాఠాలు
* ఒంటిపూట బడులకు స్వస్తి
* ఏడాదికి రెండుసార్లే పరీక్షలు
* మార్చి 21 నుంచి ఏప్రిల్‌ 23 దాకా తర్వాతి తరగతి పాఠాలు
* తెలంగాణ విద్యాదైనందిని విడుదల
ఈనాడు, హైదరాబాద్‌: తెలంగాణ విద్యాశాఖ కొత్త విద్యాసంవత్సరంలోకి నూతన నిర్ణయాలతో అడుగుపెట్టనుంది. ఒంటిపూట బడుల సంస్కృతికి స్వస్తి చెబుతూ... ఏడాదికి రెండు సార్లే పరీక్షలతో 2015-16 సంవత్సరానికి కొత్త విద్యాదైనందినిని (అకడమిక్‌ కేలండర్‌) విడుదల చేసింది. జూన్ 10న నూతన దైనందినిని అన్ని జిల్లాలకు పంపించారు. ఆ వివరాలు..
* ఈసారి నుంచి త్రైమాసిక పరీక్షలుండవు. ఏడాదికి రెండే రెండు సార్లు పరీక్షలుంటాయి. సంగ్రహణాత్మక మూల్యాంకనం (ఎస్‌ఎ-1- అర్ధవార్షిక), సంగ్రహణాత్మక మూల్యాంకనం 2 (ఎస్‌ఎ-2 వార్షిక). ఇవికాకుండా అంతర్గతంగాసాగే నిర్మాణాత్మక మూల్యాంకనం (ఎఫ్‌ఎ) పరీక్షలు నాలుగు యథాతథంగా ఉంటాయి.
* ఉన్నత పాఠశాలల సమయాల్ని అరగంట జరిపి... 9.30 నుంచి 5 గంటలుగా నిర్ణయించారు.
* వార్షిక పరీక్షలు ఎప్పటిలా ఏప్రిల్‌లో ఉండవు. ఒకటి నుంచి తొమ్మిదో తరగతి దాకా పరీక్షలను మార్చి 14కే ముగించాలని నిర్ణయించారు. ఫలితాలను కూడా అప్పుడే వెల్లడించి... మార్చి 21 నుంచి ఏప్రిల్‌ 23 దాకా... సీబీఎస్‌ఈ తరహాలో తర్వాతి తరగతి పాఠాలను బోధించటం ఆరంభిస్తారు.
* ఏటా మార్చి 15 నుంచి ఏప్రిల్‌ 23 దాకా ఉండే ఒంటిపూట బడుల స్థానంలో పూర్తిస్థాయి బడులు నడుస్తాయి.
ఆ సామర్థ్యాల బాధ్యత హెచ్‌ఎంలకు..
* బడుల్లో పిల్లలందరికీ చదవటం, రాయటం, సాధారణ గణిత సామర్థ్యాలు సాధించేలా చూడాల్సిన బాధ్యత ప్రధానోపాధ్యాయులపై ఉంచారు. అక్టోబరు 15కల్లా పిల్లలందరికీ ఈ సామర్థ్యాలు వచ్చేలా హెచ్‌ఎంలు చూడాలి.
* సబ్జెక్ట్‌ నిపుణులతో బృందాలను తయారు చేసి డిప్యూటీ డీఈవోలకు తోడుగా బడుల పర్యవేక్షణకు పంపిస్తారు. వీరు ప్రతి మూడునెలలకోసారి పర్యవేక్షణ జరుపుతారు.
* నాణ్యత ప్రమాణాల విషయంలో బయటివారితోనూ (నిపుణుల బృందాలు) సమీక్ష జరిపించి వీటిని ఆన్‌లైన్లో ఉంచుతారు.
* విద్యాదైనందిని అమలుకు సంబంధించిన ప్రణాళిక, దాని కార్యాచరణ వివరాలను జూన్ 25లోగా పాఠశాల విద్య సంచాలకులకు డీఈవోలంతా పంపించాలి. దీన్ని రాష్ట్రస్థాయి కమిటీ పర్యవేక్షిస్తుంది.
2015-16లో పరీక్షల తేదీలు...
* ఎఫ్‌ఎ 1- జులై 31 లోపు; ఎఫ్‌ఎ 2- ఆగస్టు 31లోపు; ఎఫ్‌ఎ 3- నవంబరు 30 లోపు; ఎఫ్‌ఎ 4 (ఒకటినుంచి తొమ్మిదో తరగతి దాకా)- 28 ఫిబ్రవరి లోపు; పదో తరగతికి ఎఫ్‌ఎ-4 జనవరి 31 లోపు)
* ఎస్‌ఎ-1 (అర్ధవార్షిక)- అక్టోబరు 3-9 దాకా (దసరా సెలవులకు ముందు)
* ఎస్‌ఎ-2 (వార్షిక) 2016 మార్చి 7-14 దాకా
పదో తరగతి పరీక్షలు... ప్రభుత్వం నిర్ణయించిన మేరకు సెలవులు...
* దసరా సెలవులు అక్టోబరు 10-25 తేదీల్లో
* సంక్రాంతి సెలవులు 2016 జనవరి 11-17 తేదీల్లో (క్రిస్టియన్‌ మైనార్టీ బడులకు మాత్రం డిసెంబరు 24-30 తేదీలు)
* ఏప్రిల్‌ 24 నుంచి జూన్‌ 11 దాకా వేసవి సెలవులు.
'పది' ప్రశ్నపత్రాలు తగ్గించే యోచనలో సీఐఎస్‌సీఈ!
* సీబీఎస్‌ఈ తరహాలో మార్పులు
* సీఐఎస్‌సీఈ సీఈవో జెర్రీ అరాథూన్‌
దిల్లీ: ఐసీఎస్‌ఈ పదో తరగతి ప్రశ్నపత్రాలను తగ్గించాలని భారత పాఠశాల పరీక్షల ధ్రువీకరణ మండలి (సీఐఎస్‌సీఈ) యోచిస్తోంది. మూడు విజ్ఞానశాస్త్ర ప్రశ్నపత్రాలను ఒకే ప్రశ్నపత్రంగా, మరో మూడు సాంఘికశాస్త్ర ప్రశ్నపత్రాలను మరొక ప్రశ్నపత్రంగా మార్చాలని భావిస్తోంది. ఈ విషయంలో సీబీఎస్‌ఈ తరహా విధానాన్ని అనుసరించాలని భావిస్తోంది. జీవ, భౌతిక, రసాయన శాస్త్రాలను వంద మార్కుల ప్రశ్నపత్రంగా, చరిత్ర, భౌగోళిక, పౌర శాస్త్రాలను కూడా వంద మార్కుల ప్రశ్నపత్రంగా మార్చాలనుకుంటున్నట్లు సీఐఎస్‌సీఈ ముఖ్య కార్యనిర్వహణాధికారి(సీఈవో), కార్యదర్శి జెర్రీ అరాథూన్‌ జూన్ 7న తెలిపారు. ఈ ప్రతిపాదనపై తల్లిదండ్రులు సహా అన్ని పక్షాలను సంప్రదించాలనుకుంటున్నట్లు వివరించారు. దీనిపై ఇంకా తుది నిర్ణయం తీసుకోలేదని, తీవ్రంగా పరిశీలిస్తున్నామన్నారు. ఒకవేళ అమలుపరిస్తే ప్రశ్నపత్రంలో మూడు అంశాలకు సమాన ప్రాముఖ్యతను ఇస్తామన్నారు. అలాగే ప్రశ్నపత్రం రుపకల్పన, పరీక్ష విధానాల్లో మార్పుల విషయాన్ని కూడ పరిగణనలోకి తీసుకుంటామన్నారు. మరోవైపు లఘుసమాధాన ప్రశ్నలను బహులైచ్ఛిక ప్రశ్నలుగా ఇవ్వాలనే ఆలోచనలో బోర్డు ఉన్నట్లు తెలిపారు.
9, 10 పరీక్షల్లో సంస్కరణలు
* అంతర్గత మూల్యాంకనానికి ప్రాధాన్యం
* తెలంగాణ అనుభవాలపై అధ్యయనం
ఈనాడు - హైదరాబాద్‌: వచ్చే విద్యా సంవత్సరం నుంచి తొమ్మిది, పదో తరగతి పరీక్షల్లో సంస్కరణలు తీసుకురావాలని ఆంధ్రప్రదేశ్‌ ప్రభుత్వం సన్నాహాలు చేస్తోంది. ఇందుకోసం ప్రస్తుతం తెలంగాణలో అమల్లో ఉన్న విధానాలను పరిశీలిస్తోంది. పదో తరగతిలో పాఠ్యపుస్తకాల ఆధారంగా (థియరీ) ప్రతి సబ్జెక్టులో 80 మార్కులకు వార్షిక పరీక్ష నిర్వహిస్తారు. మిగిలిన 20 మార్కులు అంతర్గత మూల్యాంకనం ద్వారా విద్యార్థుల విషయ పరిజ్ఞానానికి కేటాయిస్తారు. తొమ్మిదో తరగతిలోనూ ఇలాగే మార్కులు కేటాయించి, 11 ప్రశ్నపత్రాల విధానాన్ని అమలు చేయాలని సన్నాహాలు చేస్తోంది.
2010 ఏప్రిల్‌ నుంచి ఒకటి నుంచి ఎనిమిదో తరగతి వరకు నిరంతర సమగ్ర మూల్యాంకనం అమలవుతోంది. ప్రశ్నలు ఇచ్చే పద్ధతుల్లో మార్పులు తెచ్చి ప్రయోగాలు, భావ వ్యక్తీకరణకు ప్రాధాన్యం ఇస్తున్నారు. తొమ్మిది, పదో తరగతులకు కూడా 2014-15 విద్యా సంవత్సరం నుంచి ఇదే విధానాలను అమలు చేయాలని ఉమ్మడి రాష్ట్రంలో నిర్ణయించారు. దాన్ని తెలంగాణలో అమలు చేస్తున్నా సమయాభావం దృష్ట్యా ఆంధ్రప్రదేశ్‌లో ఆచరణలోకి తీసుకొనిరాలేదు. దీన్ని అమలు చేసే ముందు తెలంగాణలోని అనుభవాలను అధ్యయనం చేయడానికి ప్రత్యేక సంఘాన్ని ఏర్పాటు చేశారు. ముఖ్యంగా అంతర్గత మూల్యాంకనంలో చోటు చేసుకుంటున్న అవినీతిపై దృష్టి పెట్టారు. విద్యార్థులకు పాఠ్యపుస్తకాలతో పాటు, అందుకు సంబంధించిన ఇతర అంశాలపై ఉన్న అవగాహనను అంచనావేయడానికి అంతర్గత మూల్యాంకనాన్ని ప్రవేశపెట్టారు. ఈ మార్కులను సంబంధిత పాఠశాలల ఉపాధ్యాయులే ఇస్తారు. భాషా విషయాల్లో కథల పుస్తకాలు, పత్రికలు, బాలసాహిత్యం చదవడం; విజ్ఞాన శాస్త్రంలో ప్రయోగాలు చేయగలగడం, రికార్డుల్లో నమోదు చేయడం; గణితంలో వివిధ భావనలకు సంబంధించిన సమస్యలను తయారు చేయడం; సాంఘిక శాస్త్రంలో చదవడం, విశ్లేషించడం, సామాజిక విషయాలపై ప్రతిస్పందించడంపై విద్యార్థులకు ఉన్న అవగాహనను అంతర్గత మూల్యాంకనం ద్వారా గుర్తిస్తారు. నోటు పుస్తకాల్లో సొంతంగా వివిధ అంశాలపై రాయగలగడం, ప్రాజెక్టు పనులు, నెల వారీ పరీక్షల్లో చూపించే ప్రతిభనూ పరిగణనలోకి తీసుకుంటారు. వీటన్నింటికీ కలిపి 20 మార్కులు కేటాయిస్తారు.
అక్రమాలకు ఆస్కారం
అంతర్గత మూల్యాంకనం తెలంగాణలోని ప్రైవేట్‌ పాఠశాలల విద్యార్థులకు వరంగా మారిందని అధికారులు అభిప్రాయపడుతున్నారు. అందరికీ ఎక్కువ మార్కులు ఇస్తున్నారని, విద్యాశాఖ అధికారులు సైతం ఇందుకు సహకరిస్తున్నట్టు అధికారుల దృష్టికి వచ్చింది. ఈ విషయంలో ప్రభుత్వ పాఠశాలల విద్యార్థులు నష్టపోతున్నారు. తెలుగు, హిందీ, ఆంగ్లం పరీక్షల్లో బహుళైచ్ఛికం, ఖాళీలు పూరించడం వంటి ప్రశ్నలు అధికంగా ఉండడంతో కాపీయింగ్‌ పెరిగినట్టు గుర్తించారు. ఇలా జరగకుండా ప్రత్యామ్నాయం ఏమిటన్నదానిపై ప్రత్యేక సంఘం పరిశీలన జరపనుంది. అంతర్గత మూల్యాంకనంలో త్రైమాసిక, అర్థసంవత్సర పరీక్షల్లో సాధించే మార్కులకు కూడా ప్రాధాన్యం ఇవ్వనున్నారు. ప్రభుత్వం నుంచి వచ్చే ఆదేశాలకు అనుగుణంగా వీటన్నింటిపై వేసవిసెలవుల్లో ఉపాధ్యాయులకు పునశ్చరణ తరగతులు జరపాలని విద్యాశాఖ సన్నాహాలు చేస్తోంది.
'పది'లో నెగ్గకున్నా.. ఇంజినీరింగ్ డిగ్రీ..!
* సరికొత్తగా వృత్తివిద్యలో బీవోక్ కోర్సు
* మధ్యలో చదువును వీడిన వృత్తివిద్య నేర్పరుల కోసం...
* ఉన్నత విద్యలో నైపుణ్యాలకు మోదీ సర్కారు కసరత్తు
ఈనాడు, హైదరాబాద్: నైపుణ్యమున్నా... విద్యార్హతల్లేక ఉద్యోగాలకు దూరమవుతున్న వారందరికీ నరేంద్రమోదీ సర్కారు తీపి కబురు అందించబోతోంది. పదో తరగతి ఉత్తీర్ణులు కాకున్నా ఇంజినీరింగ్ పూర్తిచేసేలా దేశంలో తొలిసారిగా కొత్త కోర్సులకు రూపకల్పన చేయాలని యోచిస్తోంది. దీనికి బీటెక్, బీఏ, బీఎస్సీల మాదిరిగా బీవోక్ (బ్యాచిలర్ ఆఫ్ వొకేషనల్ కోర్సు) అని పేరు పెడుతున్నారు. ఇందులో 70 శాతం ప్రయోగాల ద్వారా 30 శాతం పాఠాల (థియరీ) ద్వారా బోధన ఉంటుంది. సామాజిక కళాశాలల (కమ్యూనిటీ కాలేజీలు) ద్వారా ఉన్నత విద్యలో నైపుణ్యాభివృద్ధికి, వృత్తివిద్యకు పెద్దపీట వేసే క్రమంలో కేంద్ర మానవవనరుల మంత్రిత్వశాఖ (ఎంహెచ్ఆర్డీ) ఈ కసరత్తు చేస్తోంది. రెండ్రోజుల కిందట దీని సారథ్యంలో యూనివర్సిటీ గ్రాంట్స్ కమిషన్ (యూజీసీ), అఖిలభారత సాంకేతిక విద్యా మండలి (ఏఐసీటీఈ)ల ఆధ్వర్యంలో నిర్వహించిన కార్యగోష్ఠిలో ఈ కోర్సు తీరుతెన్నులపై విస్తృతంగా చర్చించినట్లు తెలిసింది. దీంతో పాటు.. సాధారణ కోర్సులతో వృత్తివిద్యను అనుసంధానించే అవకాశాలపైనా కసరత్తు ఆరంభమవుతోంది.
ఎలా... ఎవరికి?
తొమ్మిది పదో తరగతుల్లో బడిని వీడి, వివిధ వృత్తుల్లో స్థిరపడ్డవారికి ఇది ఉపయోగపడుతుంది. వీరికి ఒకటి నుంచి ఏడు వరకు వివిధ స్థాయుల్లో పరీక్ష నిర్వహిస్తారు. ఉత్తీర్ణులైతే తర్వాతి స్థాయికి వెళతారు. ఏడో స్థాయి పరీక్షలో ఉత్తీర్ణులైతే బీవోక్ డిగ్రీ అందజేస్తారు.ఈ చదువంతా పూర్తిగా వృత్తివిద్యకు సంబంధించిందే. దీంతో అభ్యర్థులకు ఉద్యోగార్హత వస్తుంది.
వృత్తి విద్యస్థాయి కావాల్సిన అర్హత
1-2: పదో తరగతి తప్పినవారు
3 1, 2 స్థాయుల్లో నెగ్గినవారు; లేదా పదిలో ఉత్తీర్ణులు
4 3వ స్థాయి ఉత్తీర్ణులు
5 4వ స్థాయి ఉత్తీర్ణులు
6 5వ స్థాయి ఉత్తీర్ణులు
7 6వ స్థాయి ఉత్తీర్ణులు
ఇందులో మూడు, నాలుగో స్థాయి పరీక్షల్లో ఉత్తీర్ణులు కాగానే వృత్తివిద్యలో డిప్లొమా అందజేస్తారు. పదిలో ఉత్తీర్ణులు కాకున్నా... నాలుగో స్థాయిలో ప్రత్యేకంగా పరీక్ష పెడతారు. అందులో ఉత్తీర్ణులైతే నాలుగు, ఐదు స్థాయి కోర్సులు చేయటానికి వీలుంటుంది. అవి పాసైతే డిప్లొమా పొందొచ్చు. వివిధ స్థాయుల్లో బోధనకు ఉద్దేశించిన పాఠ్యప్రణాళికలను రూపొందిస్తున్నారు. వీటిని అభ్యర్థుల వృత్తికి ఇబ్బంది కలగకుండా రాత్రి కళాశాలల ద్వారా నిర్వహించాలన్నది ప్రాథమిక ఆలోచన. ఈ బోధనలో వృత్తిసంబంధిత అంశాలతో పాటు ఆంగ్లం, కంప్యూటర్, ప్రాథమిక సామాన్యశాస్త్ర అంశాలను కూడా బోధిస్తారు. సామాజిక కళాశాల్లో వచ్చే విద్యాసంవత్సరం నుంచి ఈ కోర్సులను ఆరంభించే అవకాశముంది.