• facebook
  • whatsapp
  • telegram

మన పరిశోధనకు ‘ప్రధాని’ నిధి

* హెచ్‌సీయూకు పీఎంఆర్‌ఎఫ్‌ మంజూరు హోదా
* దేశంలోని ప్రముఖ విద్యాసంస్థలతో పోటీ పడి గుర్తింపు


ఈనాడు, హైదరాబాద్‌: హైదరాబాద్‌ కేంద్రీయ విశ్వవిద్యాలయం(హెచ్‌సీయూ) మరో మైలురాయిని అందుకుంది. దేశంలోని ప్రముఖ విద్యాసంస్థలలోని పరిశోధక విద్యార్థులకు అందించేందుకు ఉద్దేశించిన ప్రధానమంత్రి పరిశోధక నిధి (పీఎంఆర్‌ఎఫ్‌)కి ఎంపికైంది. ఐఐటీలు, ఐఐఎస్‌ఈఆర్‌, ఐఐఎస్‌తో పాటు కేంద్రీయ విశ్వవిద్యాలయానికి పీఎంఆర్‌ఎఫ్‌ మంజూరు హోదా ఇస్తూ కేంద్ర మానవ వనరుల అభివృద్ధి శాఖ ఆదేశాలు జారీ చేసింది. దేశంలోని ప్రముఖ విద్యాసంస్థల్లో పరిశోధనలకు ప్రోత్సాహం అందించే ఉద్దేశంతో 2018-19 బడ్జెట్‌లో కేంద్ర ప్రభుత్వం పీఎంఆర్‌ఎఫ్‌ పథకాన్ని ప్రకటించింది. 2020-21 విద్యాసంవత్సరం నుంచి అమలుకు నిర్ణయించింది. దేశంలో ఎన్‌ఐఆర్‌ఎఫ్‌లో 25లోపు ర్యాంకులు సాధించిన విద్యాసంస్థలకు పథకం వర్తింపచేయాలని కేంద్రం నిర్ణయించింది. హెచ్‌సీయూ 11వ స్థానంలో ఉంది. గతేడాది వర్సిటీకి విశిష్ఠ(ఎమినెన్స్‌) హోదా దక్కడం కలిసివచ్చింది. ఈ పథకం కింద హెచ్‌సీయూకు 17 ఫెలోషిప్‌లు దక్కే అవకాశం ఉంది. వీటిని పీహెచ్‌డీ చేసే విద్యార్థులకు ప్రవేశాల సందర్భంగా అందిస్తారు. ప్రతి పరిశోధక విద్యార్థికి నెలకు రూ.70 వేల ఉపకారవేతనం, ఏటా రూ.2 లక్షల చొప్పున కంటింజెన్సీ నిధిని మంజూరు చేస్తారు. ఫెలోషిప్‌లను నేరుగా విద్యార్థికే అందిస్తారు. ఇందుకు వారు వర్సిటీ తరఫున అందించే సైన్స్‌, ఇంజినీరింగ్‌, టెక్నాలజీ విభాగాల్లోని రెగ్యులర్‌ కోర్సుల్లో ప్రవేశం పొంది ఉండాలి.