Post your question

 

    Asked By: vamsi

    Ans:

    Dear Vamsi,

    First of all congratulations for having an idea and being particular about your career at this age.  Here are some links provided for your information. Hope this will clear doubts. Ignore about application dates, just note the core content and note about the months of application process, because notifications every year come on those months.

    After going through the articles,if you still doubts then don't hesitate to post your question again.

    https://www.eenadupratibha.net/careersandcourses/lesson/courses/designing/education/2-14-97-702-21010001220

    https://www.eenadupratibha.net/careersandcourses/lesson/courses/designing/iiad-notification/2-14-97-702-21010000458

    https://www.eenadupratibha.net/careersandcourses/lesson/courses/designing/nid-admission/2-14-97-702-21010000386

    Asked By: ఆశ్రిత

    Ans:

    ఐఐటీ హైదరాబాద్, ఐఐటీ తిరుపతి, ఎన్‌ఐటీ వరంగల్, జవహర్‌లాల్‌ నెహ్రూ టెక్నలాజికల్‌ యూనివర్సిటీ హైదరాబాద్, ఆంధ్ర యూనివర్సిటీ, శ్రీ వేంకటేశ్వర యూనివర్సిటీ, జవహర్‌ లాల్‌ నెహ్రూ టెక్నలాజికల్‌ యూనివర్సిటీ కాకినాడ, కేఎల్‌ యూనివర్సిటీల్లో ఎన్విరాన్‌మెంటల్‌ ఇంజనీరింగ్‌లో ఎంటెక్‌ కోర్సు అందుబాటులో ఉంది. వీటితో పాటు కొన్ని ప్రైవేటు ఇంజినీరింగ్‌ కళాశాలలూ ఈ కోర్సును అందిస్తున్నాయి. చాలా విద్యాసంస్థల్లో ఎన్విరాన్‌మెంటల్‌ ఇంజనీరింగ్‌లో ఎంటెక్‌ చదవాలంటే బీఈ/ బీటెక్‌లో సివిల్‌ ఇంజినీరింగ్‌ కచ్చితంగా చదివి ఉండాలన్న నిబంధన ఉంది. జీఏంఆర్‌ఐటీ రాజంలో ఈ కోర్సును కెమికల్‌ ఇంజినీరింగ్‌ విభాగం వారు అందిస్తున్నారు.
    ఈ కోర్సు చదివిన తరువాత పురుషులకూ, మహిళలకూ ఉద్యోగావకాశాలు సమానమే. ఎన్విరాన్‌మెంటల్‌ ఇంజనీరింగ్‌లో ఎంటెక్‌ కోర్సు చదివినవారికి కేంద్ర, రాష్ట్ర, ప్రైవేటు, అంతర్జాతీయ సంస్థల్లో ఉద్యోగాలు లభిస్తాయి. ఎన్విరాన్‌మెంటల్‌ ఇంజనీర్, ఎన్విరాన్‌మెంటల్‌ ఎక్స్‌పర్ట్, సాలిడ్‌ వేస్ట్‌ మేనేజ్‌మెంట్‌ ఇంజినీర్, ఎన్విరాన్‌మెంటల్‌ కన్సల్టెంట్, ఎన్విరాన్‌మెంటల్‌ ప్రొటెక్షన్‌ డిజైన్‌ ఇంజినీర్, ప్రాజెక్ట్‌ ఇంజినీర్‌ ఉద్యోగాలు వస్తాయి.      
        - ప్రొ. బి. రాజశేఖర్, కెరియర్‌ కౌన్సెలర్‌

    Asked By: ఎల్‌. సాయికుమార్‌

    Ans:

    జావా ఆధారిత అప్లికేషన్‌ల డిజైన్, డెవలప్‌మెంట్, నిర్వహణల బాధ్యత చూసేవారిని జావా డెవలపర్‌ అంటారు. జావా డెవలప్‌మెంట్‌లో కెరియర్‌ని ఎంచుకోవాలంటే బేసిక్‌ జావా, అడ్వాన్స్‌డ్‌ జావా ప్రోగ్రామింగ్‌ సంపూర్ణంగా నేర్చుకోవాలి. దీనిలో ఉద్యోగం సంపాదించాలంటే  జావా సర్వర్‌ పేజెస్‌ అండ్‌ సర్వ్‌లెట్స్, వెబ్‌ ఫ్రేమ్‌ వర్క్స్, సర్వీస్‌ ఓరియంటెడ్‌ ఆర్కిటెక్చర్‌/ వెబ్‌ సర్వీసెస్‌ హెచ్‌టీఎంఎల్, సీఎస్‌ఎస్, జావా స్క్రిప్ట్, జేక్వెరీ లాంటి వెబ్‌ టెక్నాలజీలు, ఎక్స్‌ఎంఎల్, జేఎస్‌ఓఎన్‌ లాంటి మార్క్‌ అప్‌ లాంగ్వేజెస్, ఆబ్జెక్టివ్‌ ఓరియంటెడ్‌ ప్రోగ్రామింగ్‌ లాంటి ప్రాధమిక నైపుణ్యాలు అవసరం.
    వీటితో పాటు అడ్వాన్స్‌డ్‌ నైపుణ్యాలైన ఏఐ అండ్‌ మెషిన్‌ లర్నింగ్, బ్లాక్‌ చెయిన్, పైతాన్, అమెజాన్‌ వెబ్‌ సర్వీసెస్, హడూప్, బిగ్‌ డేటా, మొబైల్‌ టెక్నాలజీస్, అడ్వాన్స్‌డ్‌ జావా స్క్రిప్ట్‌ ఫ్రేమ్‌ వర్క్‌ అయిన యాంగ్యులర్, రియాక్ట్‌లతో పాటు స్ప్రింగ్‌ బూట్‌/మైక్రో సర్వీసెస్‌లో అవగాహన ఉంటే మంచి జావా డెవలపర్‌గా రాణిస్తారు.
    జావాతో పాటు MySQL లాంటి డేటా బేస్‌ లాంగ్వేజ్‌ కూడా నేర్చుకుంటే ఉద్యోగావకాశాలు మెరుగుపడతాయి. జావా ప్రోగ్రామింగ్‌పై పూర్తి పరిజ్ఞానానికి పైన చెప్పిన నైపుణ్యాలు కూడా తోడైతే జావా డెవలపర్‌గా, అప్లికేషన్‌ డెవలపర్‌ జావాగా, పైతాన్‌ డెవలపర్‌ గా, జావా ప్రోగ్రామర్‌ అనలిస్ట్‌గా, జావా ఆర్కిటెక్ట్‌గా ప్రముఖ సాఫ్ట్‌వేర్‌/ వ్యాపార సంస్థల్లో ఆకర్షణీయమైన వేతనంతో మంచి ఉద్యోగంలో స్థిరపడవచ్చు.
    - ప్రొ. బి. రాజశేఖర్, కెరియర్‌ కౌన్సెలర్‌

    Asked By: ఉమా శ్రీకాంత్‌

    Ans:

    ఫిజికల్‌ కెమిస్ట్రీ కోర్సు మ్యాథమేటిక్స్, ఫిజిక్స్, బయాలజీ, కెమిస్ట్రీల సమ్మేళనం. దీనిలో ఎక్కువగా అనలిటికల్‌ కెమిస్ట్రీ, కంప్యుటేషనల్‌ కెమిస్ట్రీలను నేర్చుకొంటారు. ఈ కోర్సులో ముఖ్యంగా పరిశ్రమల్లో కెమిస్ట్రీ వినియోగం తెలుసుకుంటారు. ఫిజికల్‌ కెమిస్ట్రీ  రంగంలో రాణించాలంటే గణితంలోని ప్రాథమిక సూత్రాలపై మంచి అవగాహన ఉండాలి.
    ఎంఎస్‌సీ (ఫిజికల్‌ కెమిస్ట్రీ) చదివితే ప్రైవేటు ఫార్మా, ఫుడ్, కాస్మొటిక్స్, బయో టెక్నాలజీ లాంటి కంపెనీల్లో, బోధన రంగంలో చాలా ఉద్యోగావకాశాలు ఉన్నాయి. ఇస్రో, డీఆర్‌డీఓ, ఓఎన్‌జీసీ, భారత్‌ పెట్రోలియం, హిందుస్తాన్‌ పెట్రోలియం, ఇండియన్‌ ఆయిల్‌ కార్పొరేషన్‌ లాంటి కేంద్ర ప్రభుత్వరంగ సంస్థల్లో,  కేంద్ర ప్రభుత్వ ప్రయోగశాలల్లో, కేంద్ర, రాష్ట్ర,  ప్రైవేటు విశ్వవిద్యాలయాల్లోని కెమిస్ట్రీ ప్రయోగశాలల్లో శాస్త్రవేత్తలు/సైంటిఫిక్‌ ఆఫీసర్‌/ టెక్నికల్‌ ఆఫీసర్‌/ సైంటిఫిక్‌ అసిస్టెంట్‌/ ల్యాబ్‌ అసిస్టెంట్‌/ రిసెర్చ్‌ అసిస్టెంట్‌గా ఉద్యోగాలు పొందొచ్చు.
    బోధన రంగంపై ఆసక్తి ఉంటే బీఈడీ చేసి స్కూల్‌ అసిస్టెంట్‌/ టీజీటీ/ పీజీటీగా పాఠశాలల్లో ఉద్యోగాలు పొందవచ్చు. ఇవే కాకుండా  ప్రైవేటు, ప్రభుత్వ జూనియర్‌ కళాశాలల్లో కెమిస్ట్రీ లెక్చరర్‌గా స్థిర పడవచ్చు. నెట్‌/సెట్‌ లో ఉత్తీర్ణత సాధించి డిగ్రీ కళాశాలల్లో కెమిస్ట్రీలో సహాయ ఆచార్యుడిగా ఉద్యోగం పొందవచ్చు. ఫిజికల్‌ కెమిస్ట్రీలో పీహెచ్‌డీ చేసి కేంద్ర/ రాష్ట్ర/ ప్రైవేటు విశ్వవిద్యాలయాల్లో సహాయ ఆచార్యుడిగా ఉద్యోగం పొందే అవకాశం ఉంది. పరిశోధనలపై ఎక్కువ ఆసక్తి ఉంటే విదేశాల్లో పోస్ట్‌ డాక్టొరల్‌ పరిశోధన కోసం ప్రయత్నించవచ్చు. ఎంఎస్‌సీ (ఫిజికల్‌ కెమిస్ట్రీ) తర్వాత గేట్‌ రాసి ఐఐటీ, ఎన్‌ఐటీల్లో ఎమ్‌టెక్‌ చేసి ఇంజినీరింగ్‌ సంస్థల్లో ఉద్యోగాలకు అర్హత సాధించవచ్చు. ఫిజికల్‌ కెమిస్ట్రీ కోర్సు చేసినవారికి కెమికల్‌ ఇంజినీరింగ్‌ పరిశ్రమల్లో  అధిక ప్రాధాన్యం ఉంటుంది.
    - ప్రొ. బి. రాజశేఖర్, కెరియర్‌ కౌన్సెలర్‌

    Asked By: ఎ. లక్ష్మారెడ్డి

    Ans:

    పదో తరగతి విద్యార్హతతో స్టాఫ్‌ సెలక్షన్‌ కమిషన్‌ జనరల్‌ డ్యూటీ, పోస్టల్‌ డిపార్ట్‌మెంట్‌లో గ్రామీణ్‌ డాక్‌ సేవక్, భారత రైల్వేలో హెల్పర్, భారత సైన్యంలో, వైమానిక దళం, నౌకా దళం, బోర్డర్‌ సెక్యూరిటీ ఫోర్స్‌లలో, సెంట్రల్‌ ఇండస్ట్రియల్‌ సెక్యూరిటీ ఫోర్స్‌లో ఉద్యోగాలు అందుబాటులో ఉన్నాయి. ఇంకా రాష్ట్ర ప్రభుత్వ కార్యాలయాల్లో, ప్రభుత్వ రంగ సంసల్లో, పాఠశాలల్లో, కళాశాలల్లో, విశ్వవిద్యాలయాల్లో, హాస్పిటల్స్‌లో అటెండర్‌ లాంటి ఉద్యోగాలతో పాటు ఆర్‌టీసీలో బస్‌ కండక్టర్‌ ఉద్యోగాలకు కూడా టెన్త్‌ సరిపోతుంది. ఈ అర్హతతో పాటు డ్రైవింగ్‌ లైసెన్స్‌ ఉంటే ప్రభుత్వ వాహనాల డ్రైవర్‌ ఉద్యోగాలకోసం ప్రయత్నించవచ్చు. ఇటీవలికాలంలో పైన చెప్పిన ఉద్యోగాలను చాలావరకు పొరుగు సేవల ద్వారా తాత్కాలికంగా ఒప్పంద పద్ధతిలో నియమిస్తున్నారు. ఫారెస్ట్‌ డిపార్ట్‌మెంట్‌లో బీట్‌ ఆఫీసర్‌ ఉద్యోగానికి ఇంటర్మీడియట్‌ విద్యార్హత. పదో తరగతి తరువాత ఐటీఐ కానీ, పాలిటెక్నిక్‌ కానీ, ఇంటర్మీడియట్‌ కానీ, డిగ్రీ కానీ చదివితే మరిన్ని ప్రభుత్వ ఉద్యోగాలకు అర్హులవుతారు. - ప్రొ. బి. రాజశేఖర్, కెరియర్‌ కౌన్సెలర్‌

    Asked By: ఎం. నాగరాజు

    Ans:

    ఇంటర్‌లో ఎంఈసీ చదివిన చాలామంది సీఏ చేస్తూ బీకాం లేదా బీకాం చదువుతూ సీఏలో చేరతారు. అయితే వీరిలో ఎక్కువమంది బీకాం మాత్రమే పూర్తి చేయగలుగుతున్నారు. కొద్దిమందే సీఏ కోర్సుని విజయవంతంగా పూర్తి చేయగలుగుతున్నారు. మరికొద్దిమంది సీఏ (ఇంటర్‌)తోనే ఆపేస్తున్నారు. బీకాం పూర్తయిన తర్వాత ఎంబీఏ లేదా ఎంకాం ఎంచుకోవచ్చు. సీఏ కోర్సు ప్రైవేటు, బహుళజాతి సంస్థల్లో కాస్టింగ్, అకౌంటింగ్‌ రంగాల్లో అవకాశాలు కల్పిస్తుంది. ఇది పూర్తిచేసినవారికి ప్రభుత్వ, ప్రైవేటు రంగాల్లోని బ్యాంకింగ్, ఇన్సూరెన్స్, ఇన్‌కమ్‌ టాక్స్, ఆడిట్‌ రంగాల్లో ఉపాధి లభిస్తుంది. ఎంబీఏ చదువుకున్నవారికి ప్రభుత్వ, ప్రైవేటు రంగాల్లో విస్తృత ఉద్యోగావకాశాలున్నాయి. ఎంకాం కోర్సు పూర్తిచేసినవారు అకౌంటింగ్‌ విభాగాలు, బోధన రంగంలో ఉపాధి పొందుతున్నారు.
    ఇటీవలికాలంలో డేటా సైన్స్‌/ బిజినెస్‌ అనలిటిక్స్‌ ప్రాచుర్యంలోకి వచ్చాయి. వివిధ సర్వేల ప్రకారం రాబోయే 20 ఏళ్లలో ఈ రంగాల్లోనే ఎక్కువ ఉద్యోగాలు అందుబాటులో ఉంటాయి. ప్రస్తుతం తగినంత మంది అర్హులు లేనందున చాలా కళాశాలలు బిజినెస్‌ అనలిటిక్స్‌  కోర్సుని బీకాం, బీబీఏ, ఎంబీఏల్లో అందిస్తున్నాయి. ఈ కోర్సు స్టాటిస్టిక్స్, కంప్యూటర్‌ సైన్స్‌ల సమ్మేళనం. దీన్ని పూర్తిచేయడానికి ప్రాబ్లం సాల్వింగ్‌పై అవగాహన, గణితంపై ఆసక్తి అవసరం. బీకాం బిజినెస్‌ అనలిటిక్స్‌ కోర్సు చేశాక మంచి ఉద్యోగాలు పొందాలంటే వ్యాపారపు ఫంక్షనల్‌ పరిజ్ఞానం, స్టాటిస్టిక్స్, ప్రోగ్రామింగ్‌లపై పట్టు అవసరం. ఈ విషయాలను దృష్టిలో పెట్టుకొని మీ అబ్బాయి అభిరుచిని బట్టి కోర్సును ఎంచుకోమని చెప్పండి. ఫంక్షనల్, టెక్నికల్‌ (అనలిటిక్స్‌) రంగాల్లో పూర్తి అవగాహన ఉన్నవారు మార్కెట్‌లో తక్కువగా ఉన్నందున సీఏతోపాటు బీకాం అనలిటిక్స్‌ని చేయగలిగితే దేశ విదేశాల్లో మేటి అవకాశాలు పొందవచ్చు.
    - ప్రొ. బి. రాజశేఖర్, కెరియర్‌ కౌన్సెలర్‌

    Asked By: ఎం.వరప్రసాద్‌

    Ans:

    బీటెక్‌ పూర్తిచేసిన ఏడేళ్ల తర్వాత సంస్కృత భాషను నేర్చుకోవాలనుకుంటున్న మీ ఆసక్తి అభినందనీయం. సంస్కృత భాషలో సామాన్య పరిజ్ఞానం కోసం కేంద్రీయ సంస్కృత విశ్వవిద్యాలయం దిల్లీ, ఇందిరాగాంధీ నేషనల్‌ ఓపెన్‌ యూనివర్సిటీ (ఇగ్నో) దిల్లీ, నేషనల్‌ సాన్‌స్క్రిట్‌ యూనివర్సిటీ (రాష్ట్రీయ సంస్కృత విశ్వవిద్యాలయం) తిరుపతిల్లో ఆరు నెలల సర్టిఫికెట్‌/ డిప్లొమా కోర్సు చేయవచ్చు. ఇగ్నోలో ఈ కోర్సు ఆంగ్ల మాధ్యమంలో అందుబాటులో ఉంది. ఏ వయసువారైనా ఇందులో చేరవచ్చు. సంస్కృతంలో ప్రాథమిక అర్హత ఉన్నవారు ఇవే సంస్థల ద్వారా పీజీ కూడా చేయవచ్చు. భారతీయ విద్యాభవన్‌ వారి సంస్కృత విశారద, సంస్కృత భారతిల్లో ప్రవేశ, పరిచయ, శిక్షా, కోవిద కోర్సులు ఉపయోగపడతాయి. నేషనల్‌ ఇన్‌స్టిట్యూట్‌ ఆఫ్‌ ఓపెన్‌ స్కూలింగ్‌ కూడా చాలా కోర్సులను అందిస్తోంది. డిగ్రీలో ద్వితీయ భాషగా సంస్కృతం చదువుకున్నవాళ్లు ఉస్మానియా, ఆంధ్రా, ఆచార్య నాగార్జున విశ్వవిద్యాలయాల్లో దూరవిద్య ద్వారా ఎంఏ సంస్కృతం కోర్సు చదవవచ్చు.  ప్రొ. బి. రాజశేఖర్, కెరియర్‌ కౌన్సెలర్‌ 

    Asked By: జి. అమూల్య.

    Ans:

    చార్టర్డ్‌ అకౌంటెన్సీ (సీఏ)ను ది ఇన్‌స్టిట్యూట్‌ ఆఫ్‌ చార్టర్డ్‌ అకౌంటెంట్స్‌ ఆఫ్‌ ఇండియా (ఐసీఎంఏ) అందిస్తోంది. సీఎంఏ, సీఏ రెండూ ప్రొఫెషనల్‌ కోర్సులే. ఇవి ఫైనాన్స్, అకౌంటింగ్‌కు సంబధించిన రంగాల్లో ఉద్యోగాలు కల్పిస్తాయి. సీఏ కోర్సు అకౌంటింగ్, టాక్సేషన్, ఆడిటింగ్‌ రంగాల్లో అవకాశాలు కల్పిస్తే, సీఎంఏ కోర్సు కాస్టింగ్, అకౌంటింగ్‌లో అవకాశాలను అందిస్తుంది. ప్రభుత్వ, ప్రభుత్వ రంగ సంస్థలు రెండు కోర్సులకూ సమాన ఉద్యోగావకాశాలు కల్పిస్తున్నాయి. ప్రైవేటు, బహుళజాతి సంస్థలు ఈ రెండు కోర్సుల్లోనూ ఉపాధిని కల్పిస్తున్నాయి. సొంతంగా ప్రాక్టీస్‌ చేయదలిస్తే సీఏ కోర్సు పూర్తిచేసినవారికి కాస్త ఎక్కువ అవకాశాలున్నాయి. ఈ కోర్సులను పూర్తిచేసినవారికి ప్రభుత్వ, ప్రైవేట్‌ రంగాల్లోని బ్యాంకింగ్, ఇన్సూరెన్స్, ఇన్‌కమ్‌ టాక్స్, ఆడిట్‌ విభాగాల్లో కూడా ఉద్యోగాలున్నాయి. ఈ రెండు కోర్సుల్లో దాదాపుగా 80 శాతం సిలబస్‌ సమానం కాబట్టి ఒకే సన్నద్ధతతో రెండూ పూర్తి చేసుకోవచ్చు. ఈ రెండు కోర్సులతోపాటు కంపెనీ సెక్రటరీ కోర్సును కూడా పరిగణనలోకి తీసుకుని, ఈ మూడింటిలో ఏవైనా రెండు పూర్తి చేస్తే భవిష్యత్తు మెరుగ్గా ఉంటుంది. - ప్రొ. బి. రాజశేఖర్, కెరియర్‌ కౌన్సెలర్‌
     

    Asked By: షేక్‌ బాబా జీలన్

    Ans:

    డిప్లొమా ఇన్‌ సేఫ్టీని దూరవిద్యలో చదవొచ్చు. యూనివర్సిటీ ఆఫ్‌ పెట్రోలియం అండ్‌ ఎనర్జీ స్టడీస్‌ (UPES), దెహ్రాదూన్‌లో అడ్వాన్స్‌డ్‌ డిప్లొమా ఇన్‌ ఇండస్ట్రియల్‌ సేఫ్టీ (హెల్త్, సేఫ్టీ, ఎన్విరాన్మెంట్‌)ని దూరవిద్య ద్వారా అందిస్తున్నారు. నేషనల్‌ ఇన్‌స్టిట్యూట్‌  ఆఫ్‌ ఫైర్‌ సేఫ్టీ ఇంజినీరింగ్‌ (NIFSE), హైదరాబాద్‌ వారు సర్టిఫికెట్‌ ఇన్‌ ఫైర్‌ సేఫ్టీ ఇంజినీరింగ్, డిప్లొమా ఇన్‌ ఫైర్‌ సేఫ్టీ ఇంజినీరింగ్, ఫైర్‌ ఆఫీసర్‌ కోర్సులను రెగ్యులర్‌ పద్ధతిలో అందిస్తున్నారు.
    ఇవే కాకుండా దూరవిద్యలో డిప్లొమా ఇన్‌ ఫైర్‌ అండ్‌ సేఫ్టీ ఇంజినీరింగ్, డిప్లొమా ఇన్‌ హెల్త్, సేఫ్టీ అండ్‌ ఎన్విరాన్‌మెంట్, డిప్లొమా ఇన్‌ ఇండస్ట్రియల్‌ సేఫ్టీ మేనేజ్‌మెంట్, డిప్లొమా ఇన్‌ ఫైర్‌ అండ్‌ ఇండస్ట్రియల్‌ సేఫ్టీ ఇంజినీరింగ్, అడ్వాన్స్‌ డిప్లొమా ఇన్‌ ఫైర్‌ అండ్‌ ఇండస్ట్రియల్‌ సేఫ్టీ ఇంజినీరింగ్, అడ్వాన్స్‌ డిప్లొమా ఇన్‌ ఇండస్ట్రియల్‌ సేఫ్టీ ఇంజినీరింగ్, ఫైర్‌ అండ్‌ సేఫ్టీలో ఎంబీఏ కోర్సు, పీజీ డిప్లొమా ఇన్‌ ఫైర్‌ అండ్‌ సేఫ్టీ ఇంజినీరింగ్, పీజీ డిప్లొమా ఇన్‌ ఇండస్ట్రియల్‌ సేఫ్టీ మేనేజ్‌మెంట్‌ లాంటి కోర్సులు నేషనల్‌ ఇన్‌స్టిట్యూట్‌ ఆఫ్‌ ఫైర్‌ సేఫ్టీ ఇంజినీరింగ్, హైదరాబాద్‌ వారు అందిస్తున్నారు.
    వీటితో పాటు NIFSC, LSOS UK కలిసి అడ్వాన్స్‌ డిప్లొమా ఇన్‌ ఫైర్‌ ప్రివెన్షన్‌ అండ్‌ ప్రొటెక్షన్, అడ్వాన్స్‌ డిప్లొమా ఇన్‌ ఇండస్ట్రియల్‌ సేఫ్టీ అండ్‌ హైజీన్, మాస్టర్‌  డిప్లొమా ఇన్‌ ఇండస్ట్రియల్‌ సేఫ్టీ అండ్‌ హైజీన్, ఫైర్‌ అండ్‌ ఇండస్ట్రియల్‌ సేఫ్టీ మేనేజ్‌మెంట్‌లో ఎంబీఏ కోర్సులను అందిస్తున్నాయి. అన్నామలై యూనివర్సిటీ డిప్లొమా ఇన్‌ ఇండస్ట్రియల్‌ సేఫ్టీ,  డిప్లొమా ఇన్‌ ఇండస్ట్రియల్‌ హైజీన్‌లను దూరవిద్యలో అందిస్తోంది. ఈ కోర్సులు చదివినవారికి కెమికల్, పెట్రోకెమికల్, ఇంజనీరింగ్, కన్‌స్ట్రక్షన్, ఆయిల్‌ అండ్‌ గ్యాస్, హెల్త్, ఎన్విరాన్మెంట్‌ సంస్థల్లో ఉద్యోగావకాశాలు ఉంటాయి.- ప్రొ.బి. రాజశేఖర్, కెరియర్‌ కౌన్సెలర్‌

    Asked By: ఆర్. కీర్తి

    Ans:

    ఎంఎస్సీ (ఆర్గానిక్‌ కెమిస్ట్రీ) చదివినవారికి ప్రైవేటు ఫార్మా, ఫర్టిలైజర్, ఆగ్రో కెమికల్, ఆయిల్, గ్యాస్, బయోటెక్నాలజీ లాంటి కంపెనీల్లో ఉద్యోగావకాశాలు ఉంటాయి. ఇస్రో, డీఆర్డీఓ, ఓఎన్‌జీసీ, భారత్‌ పెట్రోలియం, హిందుస్థాన్‌ పెట్రోలియం, ఆయిల్‌ ఇండియా లాంటి కేంద్ర ప్రభుత్వరంగ సంస్థల్లో, ప్రయోగశాలల్లో, కేంద్ర, రాష్ట్ర, ప్రైవేటు విశ్వవిద్యాలయాల్లోని కెమిస్ట్రీ ప్రయోగశాలల్లో చేరవచ్చు. సైంటిస్ట్, సైంటిఫిక్‌ ఆఫీసర్, టెక్నికల్‌ ఆఫీసర్, సైంటిఫిక్‌ అసిస్టెంట్, ల్యాబ్‌ అసిస్టెంట్, రిసెర్చ్‌ అసిస్టెంట్‌గా విధులు నిర్వహించవచ్చు. రాష్ట్ర కాలుష్య నియంత్రణ సంస్థల్లో ఉద్యోగావకాశాలు ఉన్నాయి. బోధనరంగంపై ఆసక్తి ఉంటే బీఈడీ చేసి స్కూల్‌ అసిస్టెంట్‌గా, టీజీటీగా, పీజీటీగా పాఠశాలల్లో ఉద్యోగాలు దొరుకుతాయి. ఇవే కాకుండా జూనియర్‌ కళాశాలల్లో  కెమిస్ట్రీ లెక్చరర్‌గా స్థిరపడవచ్చు. నెట్‌/సెట్‌లో ఉత్తీర్ణత సాధిస్తే డిగ్రీ కళాశాలల్లో కెమిస్ట్రీ సహాయ ఆచార్యులుగా ఉద్యోగం లభిస్తుంది. ఆర్గానిక్‌ కెమిస్ట్రీలో పీహెచ్‌డీ చేసి విద్యాసంస్థల్లో సహాయ ఆచార్యులుగా ఉద్యోగం పొందే అవకాశం ఉంది. మీకు పరిశోధనలపై ఎక్కువ ఆసక్తి ఉంటే విదేశాల్లో పోస్ట్‌ డాక్టొరల్‌ పరిశోధన కోసం కూడా ప్రయత్నించవచ్చు. ఎంఎస్సీ (ఆర్గానిక్‌ కెమిస్ట్ర్టీ) తరువాత గేట్‌ రాసి ఐఐటీ, ఎన్‌ఐటీల్లో ఎంటెక్‌ చేసి ఇంజినీరింగ్‌ సంస్థల్లో ఉద్యోగాలకు అర్హత సాధించవచ్చు.