• facebook
  • whatsapp
  • telegram

ఉజ్వ‌ల భ‌విత‌కు అయిదు కోర్సులు

* ఉన్నత విద్యకు విదేశాల‌కు వెళ్లే విద్యార్థులకు ప్రత్యేకం


ప్ర‌స్తుతం గ్లోబల్ ఎడ్యుకేషన్ యువ‌త ‌జీవితాల‌ను మార్చేయడంలో ప్రధానపాత్ర పోషిస్తోంది. అందుకే ప్రతి సంవత్సరం లక్షలమంది భారతీయ విద్యార్థులు విదేశాల్లో చదువుకోవడానికి తరలి వెళుతున్నారు. వీరిని ఆక‌ర్షించేందుకు విదేశాల్లోని విశ్వ‌విద్యాల‌యాలూ పోటాపోటీగా కొత్త కొత్త కోర్సులు ప్రవేశపెడుతున్నాయి. వీటిలో చేరి విద్యార్థులు తమ కెరియర్ అవకాశాలను విస్తరించుకుంటున్నారు. ఈ మధ్యకాలంలో కొన్ని కోర్సులు మరింత ప్రాచుర్యాన్ని పొందాయి. వాటిలో ఒక అయిదు కోర్సుల గురించి అభ్యర్థులు తెలుసుకుంటే తమ అభిరుచి మేరకు భవిష్యత్తును తీర్చిదిద్దుకోడానికి వీలవుతుంది.
 

డేటా సైన్స్
ఈ కంప్యూట‌ర్ యుగంలో ప్ర‌పంచ వ్యాప్తంగా డేటా ఆధారిత ఉద్యోగాలు అపారంగా పెరిగిపోతున్నాయి. డేటా సైన్స్ అనేది బ్యాంకింగ్ & ఫైనాన్స్, హెల్త్‌కేర్, ఎంటర్‌టైన్‌మెంట్‌తో పాటు అనేక ఇతర పరిశ్రమ రంగాల్లో విప్లవాత్మక మార్పులు తీసుకొస్తోంది. స్ప‌ష్టంగా చెప్పాలంటే రోజురోజుకు డేటా అనలిటిక్స్ నైపుణ్యాలు లేదా డేటా సైంటిస్టుల డిమాండ్ క్రమంగా పెరుగుతోంది. డేటా సైన్స్ అనేది కంప్యూటర్ సైన్స్, గణాంకాల ఏకీకరణ, డేటా మైనింగ్, అనువర్తిత గణాంకాలు, డేటాబేస్ నిర్వహణ, పెద్ద డేటా విశ్లేషణ వంటి అంశాలను కలిగి ఉంటుంది. ఈ విభాగంలో మాస్టర్స్ డిగ్రీ అర్హ‌త‌ ఉన్న యువ నిపుణుల‌కు చాలా అవ‌కాశాలు వ‌స్తున్నాయి. ఆశించిన జీత‌భ‌త్యాలు ఇస్తామంటూ వారి కోసం పెద్ద పెద్ద కంపెనీలు తలుపులు తెరుస్తున్నాయి. యునైటెడ్ కింగ్‌డమ్, యునైటెడ్ స్టేట్స్ ఆఫ్ అమెరికా, ఆస్ట్రేలియా, కెనడా, న్యూజిలాండ్, ఐర్లాండ్ దేశాల్లో అనేక ప్రముఖ విశ్వవిద్యాలయాలు ఉన్నాయి. ఇవి డేటా సైన్స్‌లో మాస్టర్స్ ప్రోగ్రాం‌ను అందిస్తూ ప్ర‌పంచ దృష్టిని ఆక‌ర్షిస్తున్నాయి.


ఎంబీఏ
ఎంబీఏ మంచి లాభదాయకమైన అధ్యయన రంగం. ఏటా వేలాది మంది భారతీయ ఆశావాదులు విదేశాల్లో ఈ కోర్సు చదివేందుకు జీమ్యాట్ లేదా జీఆర్ఈ ప్ర‌వేశ ప‌రీక్షలో అర్హ‌త సాధిస్తున్నారు. విదేశాల్లో ఎంబీఏ విద్యార్థులకు విభిన్న బృందాలతో కలిసి పనిచేయడానికి అవకాశం ల‌భిస్తుంది. దీని ద్వారా వివిధ దేశాల నాయకత్వాల తీరును అంచనా వేయడానికి, అర్థం చేసుకోవడానికి వీలు కలుగుతుంది. వివిధ వ్యాపార శైలులపై అవగాహ‌న పెరుగుతుంది. బలమైన నాయకత్వ నైపుణ్యాలను పెంపొందించుకోడానికి దోహదపడుతుంది. అంతర్జాతీయ అనుభవం, క్రాస్-కల్చరల్ కమ్యూనికేషన్ స్కిల్స్ ఉన్న భారతీయ విద్యార్థులు ఉద్యోగ విపణిలో ఎక్క‌డైనా నిలబడగలుగుతారు. యూకే, యూఎస్, కెనడా, ఆస్ట్రేలియా ఎంబీఏ ప్రోగ్రామ్‌ను అభ్యసించడానికి భారతీయ విద్యార్థులు ఇష్టపడే గమ్యస్థానాలు.

 

ఏఐ, ఎంఎల్‌తో కంప్యూటర్ సైన్స్
ప్ర‌పంచ వ్యాప్తంగా త‌మ ఉత్పత్తులు, సేవలను మెరుగుపరచడానికి ఆర్టిఫిషియల్ ఇంటెలిజెన్స్ (ఏఐ) లేదా మెషిన్ లెర్నింగ్ (ఎంఎల్‌) వంటి సాంకేతిక పరిజ్ఞానాన్ని ఉపయోగిస్తున్న కంపెనీల సంఖ్య పెరుగుతోంది. ఏఐ ప్రసిద్ధ ఉదాహరణలు అలెక్సా, డ్రోన్లు, సెల్ఫ్ డ్రైవింగ్ కార్లు. ఈ నిర్దిష్ట కంప్యూటర్ సైన్స్ విభాగంలో ఏఐ + ఎంఎల్ డిగ్రీని అభ్యసించడం వల్ల విద్యార్థులకు మంచి అవకాశాలు లభిస్తాయి. తెలివైన యంత్రాలు, వ్యవస్థలను సృష్టించగల నిపుణులను ఏఐ సిద్ధం చేస్తుండగా, ఎంఎల్ ఆశావాదులకు అల్గోరిథంలు, గణాంక నమూనాలను ఎలా ఉపయోగించాలో నేర్పుతుంది. యుఎస్, ఆస్ట్రేలియా, ఐర్లాండ్‌లోని విశ్వవిద్యాలయాల్లో ఈ కోర్సులు ఎక్కువగా బోధిస్తున్నారు. జీతాల ప్యాకేజీలు కూడా బాగా ఆకట్టుకుంటున్నాయి.

 

మెకానికల్, ఆటోమొబైల్‌, ఇండస్ట్రీయల్ ఇంజనీరింగ్
మెకానికల్, ఇండస్ట్రీయల్‌, ఆటోమొబైల్ సహా ఇంజనీరింగ్ కోర్సులన్నీ ఎల్ల‌ప్పుడూ ప్రాచుర్యం పొందుతూనే ఉంటాయి. ఎందుకంటే ఇవి అందించే వృత్తిపరమైన అవకాశాలు విస్తృతంగా ఉన్నాయి. ఐటీ, పారిశ్రామిక లేదా తయారీ వంటి ఏ రంగంలోనైనా ఇంజనీర్లకు ప్రపంచవ్యాప్తంగా అధిక డిమాండ్ ఉంది. బ్యాచిలర్ డిగ్రీ తరువాత, విదేశీ విశ్వవిద్యాలయం నుంచి అదనపు డిగ్రీ పొందిన విద్యార్థులు వృత్తిలో త్వ‌ర‌గా స్థిర‌ప‌డ‌టానికి ఎక్కువ అవ‌కాశాలు ఉంటాయి. వారు వివిధ దేశాల పరిశ్రమలపై లోతైన అవగాహన పొందడానికి ఈ అద‌న‌పు డిగ్రీ ఎంత‌గానో సహాయపడుతుంది. విదేశాల్లో అత్యాధునిక ప్ర‌యోగ‌శాల‌లు, వ‌ర్క్‌షాప్ ప‌రిక‌రాలు ఉండ‌టం వ‌ల్ల విద్యార్థులు చాలా విష‌యాల‌ను నేర్చుకోవ‌డానికి ఆస్కారం ఉంటుంది. విదేశాల్లోని దాదాపు అన్ని విశ్వవిద్యాలయాలు అనేక రకాల స్పెషలైజేషన్లను అందిస్తున్నాయి, దీని ద్వారా విద్యార్థులు కోర్ సబ్జెక్టు మాత్రమే నేర్చుకోవడం కాకుండా సంబంధిత అంశాలపై అవగాహన పొందవచ్చు.

 

నిర్మాణ ప్రాజెక్టుల నిర్వహణ
నిర్మాణ ప్రాజెక్టుల నిర్వహణ (కన్ స్ట్రక్షన్ ప్రాజెక్ట్ మేనేజ్ మెంట్)లో డిగ్రీ కలిగిన ప్రొఫెషనల్ మొదటి నుంచి చివరి వరకు ప్రాజెక్టుల ప్రణాళిక, సమన్వయం, బడ్జెట్‌, ప‌ర్యవేక్షణ బాధ్యత చూడాల్సి ఉంటుంది. ఈ కోర్సులో.. విద్యార్థులు వ్యవసాయం, నివాస, వాణిజ్య, పారిశ్రామిక రంగాలకు చెందిన వివిధ దేశాల సహచరులతో కలిసి పనిచేసేటప్పుడు అంతర్జాతీయ దృక్పథాన్ని అలవరుచుకుంటారు. నేటి ప్రపంచీకరణలో ఎప్పటికప్పుడు మారుతున్న నిర్మాణ పరిశ్రమలో విజయవంతం కావడానికి అవసరమైన జ్ఞానం, నైపుణ్యాలను అభివృద్ధి చేసుకోవ‌డానికి ఇది మరింత దోహ‌ద‌పడుతుంది. యూఎస్, యూకే, జర్మనీలోని విశ్వవిద్యాలయాలు నిర్మాణ ప్రాజెక్టు నిర్వహణపై కోర్సులను అందిస్తున్నాయి.

 

తాజా కథనాలు

మరిన్ని